Jelemíi
1 Jelemíi* Ilukíya ví, éé nyí ɖokpó ɖo vɔ̌sánúxwlémawutɔ́ lɛ́ mɛ ɖo Anatɔ́ti, ɖo Bɛnjamɛ́ɛ yíkúngban jí é sín xó wɛ nyí élɔ́ lɛ́. 2 Jexóva ɖɔ xó n’i ɖo Judáa xɔ́sú Joziyási Amɔ́zi ví ɔ hwenu, ɖo axɔ́súɖuɖu tɔn sín xwe 13gɔ́ ɔ mɛ. 3 É lɛ́ ɖɔ xó n’i ɖo Judáa xɔ́sú Yexoyakímu Joziyási ví ɔ hwenu, káká jɛ axɔ́súɖuɖu Judáa xɔ́sú Sedesiyási Joziyási ví ɔ tɔn sín xwe 11gɔ́ ɔ sín vivɔnu, káká jɛ hwenu e Jeluzalɛ́munu lɛ́ yi kannumɔgbénu ɖo sunzán atɔ́ɔ́ngɔ́ ɔ mɛ é.
4 Jexóva ɖɔ xó nú mì, bo ɖɔ:
Un sɔ́ we gbeyíɖɔ nú akɔta lɛ́.”
6 Amɔ̌, un ɖɔ: “Áo! Aklúnɔ Nǔbǐwúkpétɔ́ Jexóva è,
un nyɔ́ xó ɖɔ ǎ, ɖó yɔkpɔ́vú* kpowun wɛ un nyí.”
7 Énɛ́ ɔ, Jexóva ɖɔ nú mì ɖɔ:
“Ma ɖɔ: ‘Yɔkpɔ́vú kpowun wɛ un nyí’ ó.
Ðó a ɖó ná yi mɛ e gɔ́n un ná sɛ́ we dó lɛ́ é bǐ gɔ́n,
bo ná ɖɔ nǔ e sín gbe un ná ɖe nú we lɛ́ é bǐ.
8 Ma ɖi xɛsi ɖó lěe yě cí ɖo wěxo é wú ó,
ɖó ‘un ɖo kpɔ́ xá we, bo ná dó hwlɛ́n we,’ wɛ Jexóva ɖɔ.”
9 Énɛ́ gúdo ɔ, Jexóva dlɛ́n alɔ tɔn bo ɖ’alɔ nu ce wú. Jexóva ɖɔ nú mì ɖɔ: “Un sɔ́ xó ce lɛ́ dó nu towe mɛ. 10 Éɖíe! Un sɔ́ we égbé ɖó akɔta lɛ́ kpó axɔ́súɖuto lɛ́ kpó nu, bónú a ná hɔn nǔ bo gba nǔ, bónú a ná hɛn nǔ gblé bo mu nǔ, bónú a ná gbá nǔ bo tun nǔ.”
11 Jexóva lɛ́ ɖɔ xó nú mì, bo ɖɔ: “Jelemíi, étɛ́ mɔ wɛ a ka ɖe?” Bɔ un ɖɔ: “Un ɖo amáditín* sín ala mɔ wɛ.”
12 Jexóva ɖɔ nú mì ɖɔ: “Nǔ e a mɔ é sɔgbe, ɖó un ɖo wunzɛn céɖécéɖé, bo ná bló bɔ xó ce ná jɛnu.”
13 Jexóva lɛ́ ɖɔ xó nú mì azɔn wegɔ́ ɔ, bo ɖɔ: “Étɛ́ mɔ wɛ a ka ɖe?” Bɔ un ɖɔ: “Un mɔ zɛ̌n* ɖokpó, bɔ nǔ e ɖ’é mɛ é ɖo agbǎn hun wɛ, lobɔ nusú tɔn nya dó kɛ́n sín totaligbé.” 14 Énɛ́ gúdo ɔ, Jexóva ɖɔ nú mì ɖɔ:
“Totaligbé wɛ awěxomɛ ɔ ná tɔ́n sín,
bo ná xo mɛ e nɔ nɔ to ɔ mɛ lɛ́ é bǐ.
15 Ðó ‘un ɖo akɔta e ɖo axɔ́súɖuto totaligbé tɔn ɔ mɛ lɛ́ é bǐ xo kplé wɛ,’ wɛ Jexóva ɖɔ,
‘bɔ yě ná wá; mɛ ɖokpó ɖokpó ná sɔ́ axɔ́súzinkpo tɔn
ɖó hɔntogbó Jeluzalɛ́mu tɔn lɛ́ sín alinu,
bo ná sɔ́ ɖó ahohó tɔn lɛ́ bǐ jí lɛ́ lɛ̌ dó,
lobo ná sɔ́ ɖó toxo Judáa tɔn lɛ́ bǐ mɛ.
16 Un ná ɖɔ hwɛ e un ɖó nú yě ɖó nǔnyanyawiwa yětɔn lɛ́ bǐ wú é,
ɖó yě jó mì dó,
yě nɔ dó vɔ̌ zo nú mawu ɖěvo lɛ́,
bo nɔ ɖe kɔ́ nú alɔ yěɖésúnɔ tɔn núwiwa lɛ́.’
17 Amɔ̌, a ɖó ná sɔ́ nǔ bo ná wa nǔ,
a ɖó ná sí te, bo ɖɔ nǔ e sín gbe un ɖe nú we lɛ́ é bǐ nú yě.
Ma ɖi xɛsi nú yě ó,
énɛ́ ɔ, un ná dó xɛsi we ɖo nukɔn yětɔn ǎ.
18 Ðó, égbé ɔ, un sɔ́ we dó húzú toxo e è mɛ ahohó lɛ́ lɛ̌ dó é,
dotín e è sɔ́ gan dó bló é kpó ahohó e è sɔ́ ganvɔ dó bló lɛ́ é kpó, bónú a ní dó húzú kpan nukɔn to lɛ́ bǐ,
axɔ́sú Judáa tɔn lɛ́ kpó axɔ́ví tɔn lɛ́ kpó,
vɔ̌sánúxwlémawutɔ́ tɔn lɛ́ kpó mɛ e ɖo to ɔ mɛ lɛ́ é kpó.
19 É ɖo wɛn ɖɔ yě ná tɔ́n ahwan we,
amɔ̌, yě ná ɖu ɖo jǐ we ǎ,
ɖó ‘un ɖo kpɔ́ xá we,’ wɛ Jexóva ɖɔ, ‘bo ná hwlɛ́n we.’”