Jelemíi
18 Xó e Jexóva ɖɔ nú Jelemíi é ɖíe: 2 “Sí te, bo jɛ te yi zɛ̌nmɛtɔ́ ɔ xwé, un ná bló bɔ a ná se xó ce lɛ́ ɖo fínɛ́.”
3 Énɛ́ ɔ, un jɛ te yi zɛ̌nmɛtɔ́ ɔ xwé bɔ é ɖo zɛ̌n mɛ wɛ. 4 Amɔ̌, zɛ̌n e mɛ wɛ zɛ̌nmɛtɔ́ ɔ ɖe kpó ko kpó é gblé ɖo alɔ tɔn mɛ. Énɛ́ wú ɔ, zɛ̌nmɛtɔ́ ɔ vɔ́ azɔ̌ wa ɖ’é wú, bo sɔ́ dó bló zɛ̌n ɖěvo ná lěe é mɔ ɖɔ é jɛxá gbɔn é.*
5 Énɛ́ gúdo ɔ, Jexóva ɖɔ xó nú mì, bo ɖɔ: 6 “‘Togun Izlayɛ́li tɔn è, un sixú bló lěe zɛ̌nmɛtɔ́ élɔ́ bló gbɔn é nú we ǎ cé?’ wɛ Jexóva ɖɔ. ‘Éɖíe! Togun Izlayɛ́li tɔn è, lěe ko nɔ cí ɖo zɛ̌nmɛtɔ́ sín alɔ mɛ é wɛ mi cí ɖo alɔ ce mɛ. 7 Ényí un ɖɔ hweɖébǔnu ɖɔ un ná hɔn ɖɔ nú akɔta ɖé, alǒ axɔ́súɖuto ɖé, bo ná gba ɛ, lobo ná sú kún tɔn dó, 8 bónú akɔta énɛ́ jó nǔnyanyawiwa tɔn e wú un ɖɔ xó dó é dó ɔ, nyi lɔ ná ɖyɔ́ linlin ce dó awě e un ɖɔ un ná sɔ́ dó xo è é wú.* 9 Amɔ̌, ényí un ɖɔ hweɖébǔnu ɖɔ un ná ɖó akɔta ɖé, alǒ axɔ́súɖuto ɖé ayǐ, bo ná lɛ́ bló bɔ é ná lí dǒ, 10 bónú é ka wa nǔ e nylá nukún ce mɛ lɛ́ é, bo ma se tónú nú gbe ce ǎ ɔ, un ná ɖyɔ́ linlin e un ɖó dó nǔ ɖagbe e un lin ná wa n’i é wú é.’*
11 “Din ɔ, kɛnklɛ́n ɖɔ nú súnnu Judáa tɔn lɛ́ kpó mɛ e nɔ nɔ Jeluzalɛ́mu lɛ́ é kpó ɖɔ: ‘Nǔ e Jexóva ɖɔ é ɖíe: “Un ɖo nǔ sɔ́ nú awěxomɛ ɖé wɛ, bo ɖo tuto ɖé bló dó mi wú wɛ. Mi kɛnklɛ́n bo lɛ́ kɔ sín ali nyanya e jí mi ɖe é jí, bo jlá nǔwalɔ mitɔn lɛ́ kpó zǐnzán mitɔn lɛ́ kpó ɖó.”’”
12 Amɔ̌ yě ɖɔ: “Ðěwagbɛn ɖe ǎ! Ðó mǐ ná xwedó linlin mǐɖésúnɔ tɔn lɛ́, bɔ mǐ mɛ ɖokpó ɖokpó ná wa nǔ sɔgbe kpó ayi nyanya ta syɛ́nsyɛ́n tɔn mǐtɔn kpó.”
13 Énɛ́ wú ɔ, nǔ e Jexóva ɖɔ é ɖíe:
“Miɖésúnɔ ní kɛnklɛ́n bo kan nǔ byɔ́ ɖo akɔta lɛ́ tɛ́ntin.
Mɛ̌ ka se nǔ mɔ̌hun ɖé kpɔ́n?
Ðyɔ̌vǐ ɖo alɔjí Izlayɛ́li tɔn dó nǔ baɖabaɖa ɖaxó ɖé sin.
14 Laglási linfín nɔ bú sín Libáan só lɛ́ jí wɛ a?
Alǒ sin fífá e ɖo sisa sín fí línlín wɛ é ná mɛ wɛ a?
15 Amɔ̌, togun ce wɔn mì.
Ðó yě nɔ sá vɔ̌* nú nǔ e ma xɔ akwɛ́ ǎ é ɖé,
bo nɔ bló bɔ mɛ lɛ́ nɔ klɛ́n afɔ ɖo ali yětɔn lɛ́ jí, ɛɛn, ɖo ali xóxó lɛ́ jí,
bónú yě ná ɖi zɔnlin gbɔn ali kpɛví kacakaca e ma jlɔ́ ǎ lɛ́ é* jí,
16 bo ná mɔ tɛn dó bló bɔ to yětɔn ná húzú nǔ e xyɔ́ wǔ é,
bo ná lɛ́ húzú nǔ kiko* káká sɔ́yi.
Mɛ ɖěbǔ e ná gbɔn fínɛ́ wá yi é ná sɔ́ nukún e è nɔ sɔ́ dó kpɔ́n nǔ e xyɔ́ wǔ é ná é dó kpɔ́n ɛ bo ná húnhún ta.
17 Un ná fúnfún yě ɖo kɛntɔ́ nukɔn, lěe jɔhɔn zǎnzǎnhwe jí tɔn nɔ fúnfún nǔ gbɔn é.
Un ná dó gǔdo yě* hwenu e awě ná xo yě é, un ná xlɛ́ nukúnmɛ ce yě ǎ.”
18 Bɔ yě ɖɔ: “Mi wá, mi nú mǐ ní blá gbě Jelemíi tɔn, ɖó sɛ́n ɔ ná kpo ɖo vɔ̌sánúxwlémawutɔ́ mǐtɔn lɛ́ gɔ́n gosín wɛ, bɔ wěɖexámɛ ná kpo ɖo súnnu nǔnywɛ́tɔ́ lɛ́ gɔ́n gosín wɛ, bɔ xó Mawu tɔn ná kpo ɖo gbeyíɖɔ lɛ́ gɔ́n gosín wɛ. Mi wá, mi nú mǐ ní ɖɔ xó dó wǔ tɔn, bo ma wlí tó nǔ e ɖɔ wɛ é ɖe lɛ́ é ɖě wú ó.”
19 Jexóva è, ɖǒtó mì,
ɖǒtó nǔ e ɖɔ wɛ kɛntɔ́ ce lɛ́ ɖe é.
20 È ɖó ná sɔ́ nyanya dó sú ɖagbexɔ́ ná wɛ a?
Ðó yě kun do ɖokpó bo ná dó hu mì.
Flín lěe un nɔ te ɖo nukɔn towe bo ɖɔ ɖagbe yětɔn,
bónú a ní ma sɔ́ sin xomɛ dó yě syɛ́nsyɛ́n ó gbɔn é.
21 Énɛ́ wú ɔ, jǒ vǐ yětɔn lɛ́ dó bónú adɔ ní hu yě,
bo jó yěɖésúnɔ lɛ́ dó bónú yě ní kú hwǐ kú.
Asi yětɔn lɛ́ ní ba vǐ kpo, bo lɛ́ húzú asúkúsi.
Jɛmɛjí e nɔ hu mɛ é ní hu súnnu yětɔn lɛ́,
bónú dɔ̌nkpɛvú yětɔn lɛ́ ní kú hwǐ kú ɖo ahwangbénu.
22 Xósúsú ní mlí ɖo xwé yětɔn lɛ́ gbe,
hwenu e a ná sɛ́ ajotɔ́ axánsúnxó lɛ́ dó yě ajijimɛ é.
Ðó yě kun do bo ná wlí mì,
lobo ɖó mɔ nú afɔ ce lɛ́.
23 Amɔ̌, Jexóva è,
A tuun gbě ce e blá wɛ yě ɖe, bo ná hu mì lɛ́ é bǐ ganjí.
Ma cyɔ́n nǔ dó nǔwanyido yětɔn ó,
ma súnsún hwɛ yětɔn sín nukɔn towe ó.
Yě ní klɛ́n afɔ ɖo nukɔn towe,
hwenu e a ná ɖo xomɛsin jí bo ná dɔn tó nú yě é.