Jelemíi
13 Nǔ e Jexóva ɖɔ nú mì é ɖíe: “Yi, bo xɔ gǒjíblánú e è sɔ́ lɛ̌ɛnkanvɔ dó bló é ɖokpó, bo sin dó alin; ma ka nylɔ́ dó sin mɛ ó.” 2 Énɛ́ ɔ, un xɔ gǒjíblánú ɔ lěe Jexóva ɖɔ gbɔn é, bo sin dó alin. 3 Jexóva lɛ́ ɖɔ xó nú mì azɔn wegɔ́ ɔ bo ɖɔ: 4 “Sɔ́ gǒjíblánú e a xɔ bo sin é, bo sí te; yi Efláti, bo sɔ́ hwlá dó fínɛ́, ɖo só xomɛ.” 5 Énɛ́ ɔ, un yi, bo sɔ́ hwlá dó Efláti kpá lěe Jexóva ɖe gbe tɔn nú mì gbɔn é.
6 Amɔ̌, ɖo azǎn gěgé gúdo ɔ, Jexóva ɖɔ nú mì ɖɔ: “Sí te, yi Efláti, bo sɔ́ gǒjíblánú e un ɖe gbe nú we ɖɔ a ní hwlá dó dɔ̌n é síin.” 7 Énɛ́ ɔ, un yi Efláti, bo kun gǒjíblánú ɔ sín fí e un hwlá dó é bo sɔ́, lobo mɔ ɖɔ é ko gblé, é sɔ́ nyí nǔɖéwanú ǎ.
8 Énɛ́ gúdo ɔ, Jexóva ɖɔ xó nú mì bo ɖɔ: 9 “Nǔ e Jexóva ɖɔ é ɖíe: ‘Ðo ali ɖokpó ɔ nu ɔ, un ná ɖó nǔ goyíyí Judáa tɔn kpó goyíyí ɖaxó Jeluzalɛ́mu tɔn kpó nu. 10 Togun dídá énɛ́ lɛ́ e gbɛ́ ɖɔ émí kún ná se tónú nú xó ce lɛ́ ó é, yě mɛ e nɔ xwedó ayi yěɖésúnɔ tɔn kpó ta syɛ́nsyɛ́n kpó, lobo nɔ xwedó nǔmɛsɛn ɖěvo lɛ́, nɔ sɛn yě, bo nɔ ɖe kɔ́ nú yě lɛ́ é ɔ, yě ná wá cí gǒjíblánú énɛ́ e ma nyí nǔɖéwanú ǎ é ɖɔhun.’ 11 ‘Ðó lěe gǒjíblánú nɔ tɛ́ dó gbɛtɔ́ sín alin gbɔn é ɔ, mɔ̌ ɖokpó ɔ, un bló bɔ togun Izlayɛ́li tɔn blěbú kpó akɔta Judáa tɔn blěbú kpó tɛ́ dó wǔtu ce,’ wɛ Jexóva ɖɔ, ‘bo ná dó húzú togun ɖé, nyǐkɔ ɖé, susu kpikpa ɖé kpó nǔ e nyɔ́ ɖɛkpɛ é ɖé kpó nú mì. Amɔ̌, yě se tónú ǎ.’
12 A ɖó ná lɛ́ dó wɛn élɔ́ yě: ‘Nǔ e Jexóva Mawu Izlayɛ́li tɔn ɖɔ é ɖíe: “Vɛ̌ɛn ɖó ná gɔ́ zɛ̌n ɖaxó lɛ́ bǐ.”’ Bɔ yě ná ɖɔ nú we ɖɔ: ‘Mǐ ko tuun ɖɔ vɛ̌ɛn ná gɔ́ zɛ̌n ɖaxó lɛ́ bǐ ǎ cé?’ 13 Énɛ́ gúdo hǔn, ɖɔ nú yě ɖɔ: ‘Nǔ e Jexóva ɖɔ é ɖíe: “Un ɖo mɛ e ɖo to ɔ mɛ lɛ́ é bǐ sɔ́ dó húzú ahannumúnɔ wɛ, ɛɛn, axɔ́sú e ɖo ayǐjínjɔ́n ɖo axɔ́súzinkpo Davídi tɔn jí lɛ́ é, vɔ̌sánúxwlémawutɔ́ lɛ́ kpó gbeyíɖɔ lɛ́ kpó, gɔ́ nú mɛ e nɔ nɔ Jeluzalɛ́mu lɛ́ é bǐ. 14 Un ná sɔ́ mɛ ɖě sɔ́ gba dó mɛ ɖěvo wú, un ná wa nǔ xá tɔ́ lɛ́ kpó vǐ súnnu lɛ́ kpó ɖo ali ɖokpó ɔ nu,” wɛ Jexóva ɖɔ. “Un ná se wǔvɛ́ xá yě ǎ, mɔ̌ jɛ́n un ma ná nɔ aluwɛ mɛ ɖěbǔ alǒ kú nǔbláwǔ ɖěbǔ nú yě ǎ é nɛ́; nǔ ɖěbǔ ná sú ali dó mì bónú má gɔn kún yětɔn sú dó ǎ.”’
15 Mi se, mi tɛ́ tó,
mi ma yí go ó, ɖó Jexóva ɖɔ xó.
16 Mi kpa susu nú Jexóva Mawu mitɔn
cóbónú é ní dɔn ablu wá,
mi kpa susu n’i cóbó klɛ́n afɔ dó só lɛ́ wú ɖo zǎnbibɔ.
Mi ná ɖó nukún wěziza,
amɔ̌, ablu gɔngɔn wɛ é ná dɔn wá;
é ná sɔ́ ɛ dó húzú zǐnflú tlitli ná.
17 Ényí mi gbɛ́ tó ɖó ɔ,
un* ná ya avǐ ɖo nǔglɔ́ ɖó goyíyí mitɔn wútu.
Un ná kun ɖasin gěgé, bɔ nukún ce lɛ́ ná ja ɖasin gěgé,
ɖó è kplá kanlinhwan Jexóva tɔn yi kannumɔgbénu.
18 Mi ɖɔ nú axɔ́sú ɔ kpó axɔ́sú ɔ sín nɔ kpó* ɖɔ: ‘Mi jínjɔ́n nɔtɛn e yi do é,
ɖó axɔ́súgbákún mitɔn ɖɛkpɛ ɖɛkpɛ ɔ ná j’ayǐ sín ta mitɔn.’
19 È sú* toxo e ɖo tofɔligbé lɛ́ é, bɔ mɛ ɖě ɖe bo ná hun yě ǎ.
È bɛ́ mɛ e ɖo Judáa lɛ́ é bǐ yi kannumɔgbénu, yě yi kannumɔgbénu bǐ mlɛ́mlɛ́.
20 Mi sɔ́ kɔ dó jǐ, bo kpɔ́n mɛ ɖěɖěe jawě sín totaligbé lɛ́ é.
Fítɛ́ kanlinhwan e è ná mi é, ɛɛn, lɛ̌ngbɔ́hwan mitɔn ɖɛkpɛ ɖɛkpɛ lɛ́ ka ɖe?
21 Étɛ́ a ka ná wa hwenu e tódɔnnúmɛ towe ná gosín
mɛ ɖěɖěe a zun xɔ́ntɔn vívɛ́ xá sín do lɛ́ é gɔ́n é?
A se wǔvɛ́ ajidonu tɔn nyɔ̌nu e ɖo vǐ ji wɛ é ɖɔhun ǎ cé?
22 Bɔ hwenu e a ɖɔ dó ayi mɛ ɖɔ: ‘Étɛ́wú nǔ énɛ́ lɛ́ ka xá mì?’ a jí é ɔ,
tuun ɖɔ hwɛ ɖaxó e a hu é wɛ zɔ́n bɔ è ɖe awu towe lɛ́ síin,
bo xo dǎka afɔgbɛnnu towe lɛ́ wú.
23 Kúcinu* ɖé ka sixú húzú agbaza tɔn a? Kpɔ ka sixú húzú hwɛkan tɔn lɛ́ a?
Ényí nǔ sixú nyí mɔ̌ hǔn, midɛɛ lɛ́ e è kplɔ́n bónú mi ná wa nǔ nyanya é
sixú wa nǔ ɖagbe.
24 Énɛ́ wú ɔ, un ná fúnfún yě jɔhɔn gbětótló mɛ tɔn d’alɔ nǔywɛ́ mɛ ɖɔhun.
25 Nǔ e ná xá we é nɛ́, kanta e un ná we é nɛ́,” wɛ Jexóva ɖɔ,
“ɖó a wɔn mì, bo ɖeji dó adingban wú.
26 Énɛ́ wú ɔ, un ná kplɔ́ awu towe yi nukún towe mɛ,
bɔ è ná mɔ winnyá towe,
27 è ná mɔ afɔdógbě walɔ towe lɛ́ kpó asúwándídó towe kpó,
gɔ́ nú tonyinya walɔ towe e xyɔ́ wǔ* lɛ́ é.
Un mɔ walɔ towe e xyɔ́ wǔ lɛ́ é
ɖo só kpɛví lɛ́ jí, bo lɛ́ mɔ ɖo gle mɛ.
Jeluzalɛ́mu è, heelú we!
Káká jɛ hwetɛ́nu a ná nyí mɛ blíblí yi jɛ?