Jelemíi
14 Xó e Jexóva ɖɔ nú Jelemíi dó akú e ɖó lɛ́ é wú é ɖíe:
2 Judáa ɖo aluwɛ mɛ, bɔ hɔntogbó tɔn lɛ́ kíjá.
Yě j’ayǐ jɛ kɔ́mɛ, wǔ kú to ɔ mɛ nu lɛ́,
bɔ xósúsú mlí sín Jeluzalɛ́mu.
3 Gǎn yětɔn lɛ́ sɛ́ mɛsɛntɔ́ yětɔn lɛ́ dó sin gbé mɛ.
Yě yi dotɔ lɛ́* kɔn bo ka mɔ sin ɖě ǎ.
Yě lɛ́ kɔ wá, bɔ gannú yětɔn lɛ́ ɖo vɔ̌tɔ́.
Winnyá hu yě, bɔ yě flú,
lobɔ yě cyɔ́n nǔ ta.
4 Ðó ayǐkúngban ɔ zɛ,
bɔ jǐ ɖě ma ja ɖo to ɔ mɛ ǎ wútu ɔ,
glesi lɛ́ byɔ́ aluwɛ ɖaxó mɛ bo cyɔ́n nǔ ta.
5 Agbanlín asi e ɖo gle mɛ é tlɛ nɔ wɔn vǐ e é ji tlóló é,
ɖó gběhan ɖě sɔ́ ɖe ǎ wútu.
6 Tócí gbě tɔn lɛ́ nɔ cí te ɖo só kpɛví e jí nǔɖé ma ɖe ǎ lɛ́ é jí.
Yě nɔ gbɔ́ cukú gbě tɔn lɛ́ ɖɔhun;
nukún yětɔn lɛ́ ɖa so ɖo ta wú ɖó gběhan ɖě ɖe ǎ wútu.
7 Nǔwanyido mǐɖésúnɔ tɔn lɛ́ ɖo kúnnu ɖe dó mǐ wú wɛ có,
Jexóva è, wa nǔ ɖó nyǐkɔ towe wútu.
Ðó gbejímanɔ núwiwa mǐtɔn lɛ́ gégé,
bɔ hwi wɛ mǐ ka hu hwɛ dó.
8 Nukúnɖíɖó Izlayɛ́li tɔn è, hwi mɛ e nyí Mɛhwlɛ́ngántɔ́ tɔn ɖo wǔvɛ́ lɛ́ hwenu é,
étɛ́wú a ka cí jǒnɔ ɖɔhun ɖo to ɔ mɛ?
Étɛ́wú a ka cí tomɛyitɔ́ e nɔ te bo ná dɔ́ ayǐ kpowun é ɖɔhun?
9 Étɛ́wú a ka cí nya e ahwi xo é ɖɔhun?
Étɛ́wú a ka cí súnnu hlɔ̌nhlɔ́nnɔ e ma sixú hwlɛ́n mɛ ǎ é ɖɔhun?
Ðó Jexóva è, a ɖo tɛ́ntin mǐtɔn,
bɔ è ylɔ́ nyǐkɔ towe dó mǐ wú.
Ma jó mǐ dó ó.
10 Nǔ e Jexóva ɖɔ dó togun élɔ́ wú é ɖíe: “Yě yí wǎn nú flúflú kpé; afɔ yětɔn nɔ nɔ fí ɖokpó ǎ. Énɛ́ wú ɔ, Jexóva hun xomɛ ɖěbǔ dó yě wú ǎ. Din ɔ, é ná flín nǔwanyido yětɔn bo ná byɔ́ yě ɖɔ yě ní ɖó hwɛ e yě hu lɛ́ é sín gbe.”
11 Énɛ́ gúdo ɔ, Jexóva ɖɔ nú mì ɖɔ: “Ma xo ɖɛ ɖɔ ɖagbe ní hun hɔn dó togun élɔ́ jí ó. 12 Ényí yě blá nu ɔ, un nɔ ɖótó vosisa yětɔn lɛ́ ǎ, bɔ nú yě xwlé nǔníná e è nɔ dó blěbú tɔn zo lɛ́ é kpó nǔníná jinukún tɔn lɛ́ kpó mì ɔ, xomɛ ɖěbǔ nɔ hun mì d’é wú ǎ, un ná sú kún dó nú yě gbɔn hwǐ, adɔ kpó jɛmɛjí* kpó gblamɛ.”
13 Énɛ́ ɔ, un ɖɔ: “Áo, Aklúnɔ Nǔbǐwúkpétɔ́ Jexóva! Nǔ e gbeyíɖɔ lɛ́ ɖo ɖiɖɔ nú yě wɛ é ɖíe: ‘È ná tɔ́n ahwan mi ǎ, adɔ ka ná blá mi ǎ, loɔ, un ná ná fífá jɔ fífá mi ɖo nɔtɛn élɔ́.’”
14 Énɛ́ gúdo ɔ, Jexóva ɖɔ nú mì ɖɔ: “Gbeyíɖɔ lɛ́ nɔ ɖó adingban ɖo gbeyíɖɔzɔ́ yětɔn kɔn ɖo nyǐkɔ ce mɛ. Un sɛ́ yě dó ǎ, un zɔ́n nǔɖé yě ǎ, un ka lɛ́ ɖɔ xó ɖě nú yě ǎ. Nǔmimɔ adingban tɔn, amɔɛkinkan vɔ̌tɔ́ kpó ayi yěɖésúnɔ tɔn sín mɛblɛ́blɛ́ kpó sín nǔ lɛ́ wɛ nyí gbeyíɖɔzɔ́ e wa dó ta mitɔn mɛ wɛ yě ɖe é. 15 Énɛ́ wú ɔ, nǔ e Jexóva ɖɔ é ɖíe: ‘Gbeyíɖɔ ɖěɖěe ɖo gbeyíɖɔzɔ́ wa wɛ ɖo nyǐkɔ ce mɛ, bɔ un ma ka sɛ́ yě dó ǎ, bɔ yě nɔ ɖɔ hwǐ ɖě, alǒ adɔ ɖě kún ná wa nǔ dó to élɔ́ wú ó lɛ́ é ɔ, hwǐ kpó adɔ kpó wɛ ná sú gbeyíɖɔ énɛ́ lɛ́ sín kún dó. 16 È ná bɛ́ mɛ e tamɛ wa gbeyíɖɔzɔ́ dó wɛ yě ɖe lɛ́ é kɔn nyi toxomɛli Jeluzalɛ́mu tɔn lɛ́ jí, ɖó adɔ kpó hwǐ kpó wú, bɔ mɛ ɖěbǔ ná ɖe bo ná ɖi cyɔ yětɔn ǎ, ɛɛn, yědɛɛ lɛ́, asi yětɔn lɛ́, vǐ súnnu yětɔn lɛ́, alǒ vǐ nyɔ̌nu yětɔn lɛ́ tɔn ǎ, ɖó un ná sɔ́ awě e jɛxá yě é dó xo yě ná.’
17 “A ɖó ná ɖɔ xó élɔ́ nú yě:
‘Ðasin ní sa tɔ sín nukún ce lɛ́ jí zǎn kpó kéze kpó, é ní ma nɔ te ó,
ɖó è ko gba ɖyɔ̌vǐ ɖo alɔjí togun ce tɔn hánnyá bǐ mlɛ́mlɛ́,
bɔ akpa ɖaxó ɖé jɛ wǔ tɔn.
18 Nú un tɔ́n jɛ gle mɛ bo kpɔ́n ɔ,
un nɔ mɔ mɛ ɖěɖěe kú hwǐ kú lɛ́ é!
Bɔ ényí un wá toxo ɔ mɛ ɔ,
un nɔ mɔ azɔn ɖěɖěe adɔ ɔ dó mɛ lɛ́ é!
Ðó gbeyíɖɔ kpó vɔ̌sánúxwlémawutɔ́ kpó bǐ nɔ ɖo yiyi kpé wɛ ɖo to e yě ma tuun ǎ é mɛ.’”
19 A gbɛ́ Judáa bǐ mlɛ́mlɛ́ wɛ a? A* gbɛ́ wǎn nú Sinyɔ́ɔ tawun wɛ a?
Étɛ́wú a ka xo mǐ, bɔ azɔn gbigbɔ ɖě ma ɖe nú mǐ ǎ?
È ɖo nukún ɖó fífá wɛ, amɔ̌, nǔ ɖagbe ɖě wá ǎ;
è ɖo nukún ɖó azɔn gbigbɔ sín hwenu wɛ, amɔ̌, adohu adohu wɛ tíin!
20 Jexóva è, mǐ yí nǔ nyanya e mǐ wa lɛ́ é sín gbe,
bo yí nǔwanyido tɔ́gbó mǐtɔn lɛ́ tɔn sín gbe,
ɖó mǐ hu hwɛ dó we.
21 Ðó nyǐkɔ towe wú ɔ, ma gbɛ́ mǐ ó;
ma dó vɛ̌ nú axɔ́súzinkpo towe susunɔ ɔ ó.
Flín akɔ e a jɛ xá mǐ é, bo ma gba ó.
22 Bǒcyɔ akɔta lɛ́ tɔn e ma nyí nǔɖéwanú ǎ lɛ́ é ɖě ka sixú bló bɔ jǐ ja a?
Jǐnukúnsin ɖésúnɔ ka tlɛ sixú sɛ́ jǐ ɖaxó e nɔ ja xwaa é dó a?
Jexóva Mawu mǐtɔn è, hwiɖokpónɔ wɛ kpé wú ǎ cé?
Mǐ ɖo nukún ɖó we wɛ,
ɖó hwiɖokpónɔ wɛ bló nǔ énɛ́ lɛ́ bǐ.