Jelemíi
12 Jexóva è, ényí un ɖo hwɛ jɛ nú we wɛ,
bo ɖo xó ɖɔ dó hwɛɖiɖɔxó lɛ́ wú xá we wɛ ɔ, a nɔ wa nǔ jlɔ́jlɔ́.
Amɔ̌, étɛ́wú nǔ e wa wɛ mɛdídá lɛ́ ɖe é ka nɔ kpa yě?
Étɛ́wú ado ma ka nɔ hu mɛblɛ́tɔ́ lɛ́ ǎ?
2 A tun yě, bɔ yě dó ɖɔ do.
Yě su bo ná sínsɛ́n.
Yě nɔ ɖɔ xó towe hwebǐnu, amɔ̌, yě lín dó we tawun ɖo ayi gɔngɔn yětɔn mɛ.*
3 Amɔ̌, Jexóva è, a tuun mì ganjí, a nɔ mɔ mì;
a gbéjé ayi ce kpɔ́n bo mɔ ɖɔ é ɖo bǔ xá we.
Ðe yě ɖó vo lɛ̌ngbɔ́ e è ja huhu gbé é ɖɔhun,
bo sɔ́ yě ɖó vo nú mɛhuhuzángbe.
4 Káká jɛ hwetɛ́nu ayǐkúngban ɔ ná sá yi jɛ?
Káká jɛ hwetɛ́nu gběhan e ɖo gle lɛ́ bǐ mɛ é ná xú yi jɛ?
Ðó nǔ nyanya e mɛ e ɖ’é jí lɛ́ é nɔ wa é wú ɔ,
kanlin lɛ́ kpó xɛ lɛ́ kpó kú.
Ðó yě ɖɔ: “É mɔ nǔ e ná wá gbo mǐ é ǎ.”
5 Ényí wezun kínkán xá gbɛtɔ́ ci kɔ nú we ɔ,
nɛ̌ a ka sixú kán wezun xá sɔ́ gbɔn?
A sixú ɖeji ɖo to e mɛ fífá ɖe é mɛ,
amɔ̌, nɛ̌ a ka ná wa nǔ gbɔn ɖo zun e dó, bo gbɔn Judɛ́ɛn tɔ ɔ tó lɛ́ é mɛ?
6 Ðó mɛ e tlɛ nyí nɔví súnnu towe lɛ́ é, ɛɛn, mɛ e ɖo tɔ́ towe xwé lɛ́ é,
wa nǔ xá we kpó mɛblɛ́blɛ́ kpó.
Yě sú xó dó jǐ towe syɛ́nsyɛ́n.
Ma ɖeji dó yě wú ó,
ényí yě tlɛ ɖɔ nǔ ɖagbe nú we ɔ nɛ́.
7 “Un jó xwé ce dó; un jó gǔ ce dó.
Un sɔ́ wǎnyínámɔ ce vívɛ́ná ɔ dó kɛntɔ́ tɔn lɛ́ sín alɔ mɛ.
8 Gǔ ce wá cí kinnikínní ɖo zungbó mɛ ɖɔhun nú mì.
É dó gbe dó jǐ ce.
Énɛ́ wú ɔ, un wá gbɛ́ wǎn n’i.
9 Gǔ ce cí nǔwlíxɛ e ɖó sinmɛ tɛnmɛ tɛnmɛ* lɛ́ é ɖɔhun nú mì;
nǔwlíxɛ ɖěvo lɛ́ lɛ́ lɛ̌ dó è, bo tɔ́n ahwan ɛ.
Kanlin e ɖo gle mɛ lɛ́ é mi, mi bǐ ní wá, mi kplé ɖó kpɔ́,
mi wá bá ɖu nǔ.
10 Lɛ̌ngbɔ́nyitɔ́ gěgé sú vǐwungbo ce dó;
Yě gbídí ayǐkúngban ce ɖó afɔ wú.
Yě sɔ́ ayǐkúngban ce ɖagbe ɖagbe ɔ dó húzú gbětótló e jɛ vɔ̌ é.
11 É húzú to e jɛ vɔ̌ é.
É xú;*
é jɛ vɔ̌ ɖo nukɔn ce.
È bló bɔ to ɔ blěbú jɛ vɔ̌,
amɔ̌, é ɖu ayi mɛ nú mɛ ɖěbǔ ǎ.
12 Ðó kúnsúdónúnǔtɔ́ lɛ́ gbɔn ali* e gbɔn gbětótló mɛ lɛ́ é wá,
ɖó hwǐ Jexóva tɔn ɖo mɛ lɛ́ vɔ wɛ gbɔn to ɔ bǐ mɛ.
Fífá ɖě ɖe nú mɛ* ɖěbǔ ǎ.
13 Yě dó blěe, amɔ̌, wun wɛ yě ya.
Yě zán yěɖée vún, amɔ̌, é hɛn le ɖě wá ǎ.
Winnyá ná hu yě dó sínsɛ́n yětɔn wú,
ɖó xomɛsin syɛ́nsyɛ́n Jexóva tɔn wútu.”
14 Nǔ e Jexóva ɖɔ é ɖíe: “Nɔzo ce nyanya e ɖo alɔ ɖó gǔ e un ná togun ce Izlayɛ́li é wú wɛ lɛ́ é bǐ ɔ, un ɖo ɖɔ hɔn nú yě sín to yětɔn mɛ wɛ, bo ná lɛ́ hɔn ɖɔ nú akɔta Judáa tɔn sín tɛ́ntin yětɔn. 15 Amɔ̌, un hɔn ɖɔ nú yě gúdo ɔ, un ná lɛ́ kú nǔbláwǔ nú yě, bo ná lɛ́ ná gǔ yě mɛ ɖokpó ɖokpó tɔn yě, gɔ́ nú to yětɔn.”
16 “Bɔ ényí yě kán ɖ’é jí bo ná kplɔ́n nǔwalɔ togun ce tɔn lɛ́, bo ná xwlé nǔ gbɔn nyǐkɔ ce gblamɛ ɖɔ: ‘Jexóva ɖo gbɛ jɛ́n wɛ ɔ’ lěe yě kplɔ́n togun ce bɔ é nɔ xwlé nǔ gbɔn Baálu gblamɛ gbɔn é ɔ, un ná dó yě do nyi togun ce tɛ́ntin. 17 Amɔ̌, ényí yě gbɛ́ ɖɔ émí kún ná se tónú ó ɔ, un ná lɛ́ hɔn ɖɔ nú akɔta énɛ́, un ná hɔn ɖɔ n’i bo ná sú kún tɔn dó,” wɛ Jexóva ɖɔ.