Jelemíi
11 Xó e Jexóva ɖɔ nú Jelemíi é ɖíe: 2 “Mi mɛ e ɖo togun ɔ mɛ lɛ́ é mi, mi ɖótó xó e ɖo akɔjijɛ élɔ́ mɛ lɛ́ é!
“Ðɔ xó* énɛ́ lɛ́ nú súnnu Judáa tɔn lɛ́ kpó mɛ e nɔ nɔ Jeluzalɛ́mu lɛ́ é kpó. 3 Bo ɖɔ nú yě ɖɔ: ‘Nǔ e Jexóva, Mawu Izlayɛ́li tɔn ɖɔ é ɖíe: “Mɛ e ma se tónú nú akɔjijɛ élɔ́ sín xó lɛ́ ǎ é ɔ, nu wɛ è dó è. 4 Xó énɛ́ lɛ́ sín gbe wɛ un ɖe nú tɔ́gbó mitɔn lɛ́ gbe e gbe un kplá yě tɔ́n sín Ejípu to mɛ, ɛɛn, sín myɔkpó e mɛ gan ɖo sínsín sínsín ɖe wɛ é mɛ é, bo ɖɔ: ‘Mi se tónú nú gbe ce, bo wa nǔ e sín gbe un ɖe nú mi lɛ́ é bǐ; énɛ́ ɔ, mi ná húzú togun ce, bɔ un ná nyí Mawu mitɔn. 5 Bónú un ná dó sixú ɖe akpá e un dó nú tɔ́gbó mitɔn lɛ́ bo xwlé nǔ d’é jí é, é wɛ nyí ɖɔ un ná ná yě to e mɛ anɔ̌sin kpó wǐin kpó nɔ sa tɔ ɖe é, lěe é ɖe gbɔn égbé din é.’”’”
Bɔ un yí gbe ɖɔ: “Jexóva è, amǐ.”*
6 Énɛ́ gúdo ɔ, Jexóva ɖɔ nú mì ɖɔ: “Jlǎ xó élɔ́ lɛ́ bǐ ɖo toxo Judáa tɔn lɛ́ mɛ, bo lɛ́ jlá ɖo toxomɛli Jeluzalɛ́mu tɔn lɛ́ jí: ‘Mi ɖótó xó e ɖo akɔjijɛ élɔ́ mɛ lɛ́ é, bo wa nǔ sɔgbe xá. 7 Ðó un ɖe gbe nú tɔ́gbó mitɔn lɛ́ dó nǔjɔnǔ mɛ ɖo gbe e gbe un ɖe yě tɔ́n sín Ejípu to mɛ é, bo lɛ́ wa mɔ̌ káká jɛ égbé. Un ɖe wě xá yě azɔn gěgé,* bo nɔ ɖɔ: “Mi se tónú nú gbe ce.” 8 Amɔ̌, yě ɖótó, alǒ tɛ́ tó ǎ, é nyɔ́ wa ɔ, mɛ ɖokpó ɖokpó nɔ xwedó ayi nyanya éɖésúnɔ tɔn kpó ta syɛ́nsyɛ́n kpó. Énɛ́ wú ɔ, un dɔn tó nú yě bɔ é sɔgbe xá xó ɖěɖěe ɖo akɔjijɛ élɔ́ mɛ bɔ un ɖe gbe tɔn nú yě ɖɔ yě ní wa nǔ sɔgbe xá bɔ yě gbɛ́ wiwa lɛ́ é.’”
9 Énɛ́ gúdo ɔ, Jexóva ɖɔ nú mì ɖɔ: “Súnnu Judáa tɔn lɛ́ kpó mɛ e nɔ nɔ Jeluzalɛ́mu lɛ́ é kpó ɖo gbě blá mɛ. 10 Yě lɛ́ kɔ yi nǔwanyido tɔ́gbó yětɔn ɖěɖěe gbɛ́ tónú se nú xó ce lɛ́ é tɔn lɛ́ kɔn. Yě lɔ xwedó nǔmɛsɛn ɖěvo lɛ́, bo sɛn yě. Togun Izlayɛ́li tɔn kpó akɔta Judáa tɔn kpó gba akɔ e un jɛ xá tɔ́gbó yětɔn lɛ́ é. 11 Énɛ́ wú ɔ, nǔ e Jexóva ɖɔ é ɖíe: ‘Un ɖo blǒbló wɛ bɔ awě e yě ma sixú kpé wú bo xo gló ǎ é ná xo yě. Ényí yě ylɔ́ mì, bo byɔ́ alɔdó ɔ, un ná ɖótó yě ǎ. 12 Énɛ́ ɔ, toxo Judáa tɔn lɛ́ kpó mɛ e nɔ nɔ Jeluzalɛ́mu lɛ́ é kpó ná yi nǔmɛsɛn e yě nɔ sá vɔ̌* ná lɛ́ é gɔ́n, bo ná byɔ́ alɔdó, amɔ̌, hwenu e awě ná xo yě é ɔ, nǔmɛsɛn énɛ́ lɛ́ ná hwlɛ́n yě gán ɖo ali ɖěbǔ nu ǎ. 13 Judáa è, nǔmɛsɛn towe lɛ́ sukpɔ́ toxo towe lɛ́ ɖɔhun, bɔ a mɛ vɔ̌sákpe lɛ́ nú winnyánú ɔ* bɔ yě sukpɔ́ toxomɛli e ɖo Jeluzalɛ́mu lɛ́ é ɖɔhun, ɛɛn, vɔ̌sákpe lɛ́ bo ná dó sá vɔ̌ nú Baálu.’
14 “Amɔ̌, hwɛ* ɔ, ma xo ɖɛ dó togun élɔ́ tamɛ ó. Ma sú xó ylɔ́ mì dó ta yětɔn mɛ, alǒ xo ɖɛ nú yě ó. Ðó hwenu e yě ná sú xó ylɔ́ mì ɖó awě e ɖo yě xo wɛ é wútu é ɔ, un ná ɖótó ǎ.
15 Acɛ tɛ́ mɛvívɛ́ ce ka ɖó, bo ɖo xwé ce gbe
hwenu e mɛ gěgé bló nǔ nyanya sín tuto lɛ́ é?
Yě ka sixú zán vɔ̌sísá kanlin tɔn lɛ́* dó bló bɔ awě ná gɔn xixo we a?
A ná j’awǎ hwe énɛ́ nu wɛ a?
16 Jexóva ko ylɔ́ we ɖɔ olívutín e vun,
nyɔ́ ɖɛkpɛ, bo nɔ ná sínsɛ́n ɖagbe ɖagbe lɛ́ é kpɔ́n.
Kpó zǐngídi ɖaxó ɖé kpó ɔ, é dó è zo,
bɔ yě wɛ́n ala tɔn lɛ́.
17 “Jexóva ahwankpá lɛ́ tɔn, Mɛ e tun we é ɖɔ ɖɔ awě ná xo we ɖó nǔ nyanya e togun Izlayɛ́li tɔn kpó akɔta Judáa tɔn kpó wa lɛ́ é wú; yě sá vɔ̌ nú Baálu dó dó xomɛsin nú mì.”
18 Jexóva ɖɔ mɔ̌ nú mì bónú má dó tuun;
ɖo hwe énɛ́ nu ɔ, a bló bɔ un mɔ nǔ e wa wɛ yě ɖe é.
19 Un cí lɛ̌ngbɔ́ví e nɔ se tónú bɔ è kplá xwe mɛ e ná hu i é gɔ́n é ɖɔhun.
Un tuun ɖɔ yě ɖo gbě ce blá wɛ ǎ:
“Mi nú mǐ ní sú kún dó nú atín ɔ kpó sínsɛ́n tɔn kpó,
mi nú mǐ ní sɛ́n ɛ sín mɛ e ɖo gbɛ lɛ́ é sín to mɛ,
bónú è ma sɔ́ flín nyǐkɔ tɔn ɖě ó.”
20 Amɔ̌, Jexóva ahwankpá lɛ́ tɔn nɔ ɖɔ hwɛ jlɔ́jlɔ́;
é nɔ gbéjé linlin e ɖo hwlǎhwlá lɛ́ é* kpó ayi kpó kpɔ́n.
Ba hlɔn yě wú bónú má kpɔ́n,
ɖó alɔ towe mɛ wɛ un sɔ́ hwɛɖiɖɔ ce dó.
21 Énɛ́ wú ɔ, nǔ e Jexóva ɖɔ dó súnnu Anatɔ́ti tɔn ɖěɖěe ɖo biba ná hu we wɛ bo nɔ ɖɔ: “A ɖó ná wa gbeyíɖɔzɔ́ ɖo nyǐkɔ Jexóva tɔn mɛ ǎ, é ma nyí mɔ̌ ǎ ɔ, a ná kú ɖo alɔ mǐtɔn mɛ” lɛ́ é wú é ɖíe; 22 ɛɛn, nǔ e Jexóva ahwankpá lɛ́ tɔn ɖɔ é ɖíe: “Un ná byɔ́ yě ɖɔ yě ní ɖó gbe nú mì. Dɔ̌nkpɛvú lɛ́ ná kú hwǐ kú, bɔ adɔ ná hu vǐ súnnu yětɔn lɛ́ kpó vǐ nyɔ̌nu yětɔn lɛ́ kpó. 23 È tlɛ ná jó mɛ ɖokpó dó ɖo yě mɛ ǎ, ɖó un ná sɔ́ awě dó xo súnnu Anatɔ́ti tɔn lɛ́ ná ɖo xwe e mɛ un ná ylɔ́ yě ɖɔ yě ní wá ɖó gbe é.”