Buọt Idem ye Akakan Andikara Ekondo

1. Tịn̄ mme enyene-ndịk n̄kpọ emi ẹketịbede ẹnọ Job.

ENYENE ete kiet emi okodude uwem ke ata eset emi ọkọbuọtde idem ye Abasi, enye ekekere Job. Ekpere ndidi kpukpru n̄kpọ esie ẹma ẹtak. Nditọ esie ẹma ẹkpan̄a, enye ọduọ udọn̄ọ, inyene esie ẹnyụn̄ ẹtak. Edi ikokụreke do, Job emi ẹkekponode-kpono ekedikabade edi owo ndọk. Nso kaban̄a “mme ufan” esie? Ediwak se mmọ ẹketịn̄de ikọdọn̄ke enye esịt. Nnanenyịn ama akam anam edima n̄wan esie ọdọhọ enye ‘osụn̄i Abasi onyụn̄ akpa.’ (Job 2:9; 15:4, 5; 19:1-3) Mme enyene-ndịk n̄kpọ emi ẹketịbede ẹnọ Job ẹkpekekeme ndinam enye okûbuọt idem aba ye ata Abasi, anam enye eyịk m̀mê Jehovah oyosụk ekpeme mbon emi ẹmade Enye ẹnyụn̄ ẹnamde n̄kpọ Esie.

2-3. Nso ke ikeme nditọn̄ọ ndikere, ndien nso ke idikpep ito n̄wed Job?

² Ndusụk ini, mme mfịna emi ẹsinen̄erede ẹsọn̄ ẹsisịm nnyịn n̄ko, ndien mmọ ẹkeme ndinam ikụt adan̄a nte ibuọtde idem ye Jehovah. Idu uwem ke “ndiọkeyo emi ọsọn̄de ndiyọ.” (2 Tim. 3:1) Ke ini ediwak mfịna ẹduọde ẹfụk nnyịn inikiet, ekeme nditie nnyịn nte ke mme mfịna oro ẹkan nnyịn ubọk ndien ke nnyịn idinyụn̄ ikemeke ndiyọ. Mme utọ n̄kpọ ntre ẹnam ndusụk owo ẹkere m̀mê Jehovah enen̄ede ekere aban̄a mmimọ.

³ Ekpedi akananam etie fi ntre n̄ko ke idem, kûyak idem emem fi. Job ama okụt ke Jehovah esinyan̄a mbon emi ẹsọn̄ọde ẹda ye Enye. Imekeme ndinam n̄kpọ man inen̄ede ibuọt idem ye Ete nnyịn emi odude ke heaven ukem nte Job ọkọbuọtde. Man ikeme ndinam oro, ẹyak ise se idude ke n̄wed Job inyụn̄ ikụt nte enye anamde itetịm inịm akpan n̄kpọ iba emi: Akpa, ke Jehovah ikpọn̄ edi Akakan Andikara ke ofụri ekondo. Ọyọhọ iba, ke ata ọkpọsọn̄ Abasi nnyịn ekeme ndiwọn̄ọde n̄kpọ ke ererimbot emi mbon man enye okụt ete ke se enye akaduakde osu, ndien okûnyụn̄ odu n̄kpọ ndomokiet emi ekemede ndidian̄ade ikọt esie n̄kpọn̄ enye ke nsinsi nnyụn̄ nnam mmọ ẹbọ ufen ke nsinsi.

SATAN ODỤK OTU MMỌ

4. Ini ẹkenịmde mboho ke heaven emi n̄wed Job etịn̄de, anie eketiene odụk mboho oro?

⁴ Usen kiet, “nditọ ata Abasi” ẹma ẹboho ke iso Jehovah ke heaven. Mbụk oro aka iso ete: “Satan onyụn̄ etiene odụk otu mmọ.” (Job 1:6) Akpa ini edi emi ke mbụk Bible emi ẹsiakde enyịn̄ oro, “Satan,” m̀mê “Andibiọn̄ọ.” Enye edi akpan owo emi ọbiọn̄ọde Jehovah. Ini ẹsụk ẹtịn̄de ẹban̄a mi ke n̄wed Job, Satan ikedịghe aba eyen Abasi emi ọsọn̄ọde ada ye Abasi. Enye ama akabade edi asua Jehovah. Edi ikokụreke do, enye ama asua ubon Jehovah ke heaven ye ke isọn̄. Ini Jehovah eketịn̄de se idude ke Genesis 3:15, enye ama owụt ke Satan isịneke aba ke ubon Esie eke heaven. Ntre, Satan idịghe ubak “n̄wan” emi edimande “mfri.” N̄wan oro ada aban̄a ubon Jehovah eke heaven.

5. Ima inam ndụn̄ọde iban̄a se ẹketịn̄de ke mboho oro ke heaven, nso ke ikeme ndikpep?

⁵ Jehovah ama anam yak ẹwet se ẹkenemede ke mboho oro ke heaven ẹsịn ke Bible. Se Satan eketịn̄de okowụt ke enye edi ọdọk-edidọk emi ọsọn̄de esịt eti-eti. (Job 1:9; men Ediyarade 12:10 domo.) Se iketịbede ke mboho oro ke heaven ekpep nnyịn n̄kpọ emi ekemede ndidọn̄ nnyịn esịt, oro edi ke Jehovah ama oyom ndida akaka odudu esie nnam n̄kpọ, ke enye esinam ntre ke nnennen usụn̄ ye ke usụn̄ emi ọfọnde ama, ekpep nnyịn n̄ko ke Ata Ọkpọsọn̄ enịm adan̄a ke se mbon en̄wen ẹkemede ndinam.

JEHOVAH ENỊM ADAN̄A

6. Didie ke Jehovah okowụt ke kpukpru n̄kpọ ẹsịne imọ ke ubọk ke mboho oro ke heaven? (Job 1:7, 8)

⁶ Kot Job 1:7, 8. Ke mboho oro, Jehovah ama owụt ke imọ idi owo emi edibierede se iditịbede. Enye ama obụp Satan ete: “Nte afo omokụt asan̄autom mi Job?” Jehovah ama enen̄ede ọdiọn̄ọ ke emi Satan ododu do, ke Job emi ọkọsọn̄ọde ada ye imọ ke enye oyom ndikodomo oro. Ẹyak ise nte Jehovah edidade akakan odudu esie in̄wam Job.

7. Job 1:10, 11 owụt ke nso ke Satan eketịn̄ aban̄a mbon emi ẹnamde n̄kpọ Jehovah?

⁷ Kot Job 1:10, 11. Jehovah edi ata ọkpọsọn̄ Andikara ke ofụri ekondo, ndien enye esida odudu esie anam n̄kpọ ke usụn̄ emi enye okụtde ke odot. (Jer. 32:17; Dan. 4:35) Kpa ye oro, Satan ọkọdọhọ ke Jehovah idaha odudu Esie inam n̄kpọ ke nnennen usụn̄. Ikọ Satan oro ọkọwọrọ ke Abasi ọnọ mme owo, utọ nte Job ubọkedem man mmọ ẹnam n̄kpọ Esie. Satan okonyụn̄ ọdọhọ n̄ko ke n̄kukụre ntak emi anamde mme owo ẹnam n̄kpọ Jehovah edi ke ntak se Jehovah edinọde mmọ. Nso ke Jehovah akanam aban̄a se Satan eketịn̄de oro?

8-9. Ewe adan̄a ke Jehovah ekenịm ọnọ Satan, ndien ntak-a? (Job 1:12) (Se ndise n̄ko.)

⁸ Kot Job 1:12. Jehovah ama ayak Satan odomo Job man ẹkụt m̀mê se Satan eketịn̄de edi akpanikọ, edi ama enịm adan̄a ọnọ enye. Abasi ama osio ọdọhọ Satan ete: “Kûnyan ubọk fo utụk enye [Job]!” Jehovah ekenịm adan̄a ọnọ Satan ke iso kpukpru mme angel emi ẹkedude ke mboho oro. Ndien akana Satan anam ewụhọ emi Jehovah ọkọnọde enye do, enye ikenyeneke odudu ndinam Job n̄kpọ n̄kan se Jehovah akayakde enye anam. Idem idaha-emi, Satan ikemeke ndinam n̄kpọ mbe se Jehovah ayakde enye anam. Nte Jehovah akadade odudu esie ekpeme Job ekedi oro, onyụn̄ owụt ke imọ idi Abasi emi esinamde nnennen n̄kpọ inyụn̄ imade mme owo.

⁹ Akpa idomo emi Satan akadade ebịne Job ama okpu enye idiọk idiọk. Job ama aka iso ọsọn̄ọ ada ye Ete esie emi odude ke heaven. (Job 1:22) Edi Andibiọn̄ọ oro ikokụreke kan̄a n̄kpọ ye Job.

10. Ntak emi Jehovah akayakde Satan aka iso odomo Job? (Job 2:2-6)

¹⁰ Kot Job 2:2-6. Isan̄ enye emi, Satan ama etetịm esịn ibuot esịn itọn̄ anam n̄kpọ man Job ọkpọn̄ Abasi. Satan ọkọdọhọ ke Job iditreke-tre ndisụn̄i Abasi man n̄kpọ idinam ikpa-idem esie. Man Jehovah owụt ke Devil edi osu nsu, Jehovah ama ayak Devil ọtọ Job ata idiọk udọn̄ọ. Edi Jehovah ama afiak enịm adan̄a. Enye ọkọdọhọ ete: “Kpeme idemfo ye ukpọn̄ esie!” Satan ikekemeke ndinam n̄kpọ ndomokiet n̄kan ndinam n̄kpọ ntre ke ebiet emi Jehovah ọkọdọhọde enye etre. Imafiak ikụt ke kpukpru n̄kpọ emi ẹketịbede ke ini idomo Job oro ẹkesịne Ata Edikon̄ ke ubọk sia Satan ikekemeke ndinam n̄kpọ mbe adan̄a emi Jehovah ekenịmde ọnọ enye.

JEHOVAH ETRE UFEN JOB

11. Ndondo emi Jehovah eketrede mme idomo emi ẹkesịmde Job, didie ke enye ọkọdiọn̄ Job? (Job 42:10-13)

¹¹ Kot Job 42:10-13. Ẹma ẹnen̄ede ẹkụt ke Job idikpọn̄ke Abasi, ndien Jehovah ikayakke Satan odomo Job aba. Jehovah ama anam n̄kpọ man etre ufen emi asan̄a-utom esie emi ọkọsọn̄ọde ada ye enye ọkọbọde do. Imafiak ikụt ke Andibiọn̄ọ oro ikenyeneke odudu ndikpan Jehovah ndinam se Jehovah okoyomde ndinam. Jehovah ikayakke Satan aka iso odomo Job asan̄a-utom Jehovah emi Jehovah akamade eti-eti.

12. Nọ uwụtn̄kpọ emi aban̄ade se Jehovah anamde ọnọ mme asan̄a-utom esie emi ẹnịmde ke enye enyene odudu ndinyan̄a mmọ.

¹² Ke mme akpatre usen emi, ediwak owo ẹkụt ke Jehovah enyene odudu ndinyan̄a mmimọ. Ke uwụtn̄kpọ, ke 1945 mbonekọn̄ ẹma ẹnyịk Mme Ntiense Jehovah 230 ẹsan̄a ata anyan isan̄ emi ekpekekemede ndida mmọ ibuot. Ẹkedọhọ mmọ ẹsan̄a ọtọn̄ọde ke ufọk-n̄kpọkọbi emi odude ke Germany ẹkesịm inyan̄. Ẹkeyom ndikowot mmọ do. Edi idụhe Ntiense Jehovah kiet emi akakpade. Mmọ ẹma ẹwet ẹban̄a nte n̄kpọ eketiede ye mmọ ẹnyụn̄ ẹdọhọ ke Jehovah ama anyan̄a mmimọ nte akanyan̄ade nditọ Hebrew ita emi ẹketopde ẹdọn̄ ke akwa ikan̄ emi akasakde. Ini nditọ Hebrew ita oro ẹkewọrọde ẹdi, owo ikokopke mmọ kpak ufịk nsụn̄ikan̄ ke idem. Mbiet n̄kpọ oro okonyụn̄ etịbe ọnọ Mme Ntiense Jehovah oro. Se iketịbede inọ mmọ ekpekekeme ndida mmọ ibuot, edi mmọ ẹma ẹtetịm ẹbuọt idem ye Jehovah ẹkan nte ẹkebuọtde akpa. Jehovah ama ọnọ mmọ odudu esie ndien okonyụn̄ etie mmọ nte ke ẹnyan̄a mmimọ nte ẹkenyan̄ade Daniel ẹsio ke obube ekpe. Tọn̄ọ ke ini oro ka iso, mmọ ẹma ẹbiere ndinam n̄kpọ nnọ Jehovah ke nsinsi nsinsi. Ndien mmọ ẹkedọhọ ke mmimọ ndikeme ndika iso nnam n̄kpọ Jehovah ke nsinsi edi akakan edidiọn̄ emi ẹkemede ndidiọn̄ mmimọ.​—Men Daniel 3:27; 6:22 domo.

13. Nso ke ekeme ndinen̄ede nnịm nsio nsio idomo ẹma ẹsịm fi? (Se mme ndise n̄ko.)

¹³ Ekeme ndidi eyenyene mme ini ke uwem nnyịn n̄ko emi mme n̄kpọ ẹditịbede inọ nnyịn ndien enye etie nte ke ẹtop nnyịn ẹsịn ke obube ekpe. (1 Pet. 5:8-10) Ndusụk ini ekeme nditie nnyịn nte ke mme n̄kpọ oro ẹkan nnyịn ubọk, nnyịn inyụn̄ ikere m̀mê mfịna nnyịn oyosụk okụre do. Ke mme utọ ini ntre, nnyịn nditi mbụk Job ekeme ndin̄wam nnyịn. Imekeme ndinen̄ede nnịm ke Jehovah enyene odudu nditre ufen nnyịn, edide idaha-emi m̀mê ke obufa ererimbot emi osụk edide ke iso. Ini emi enye ekenịmde ndisobo ererimbot emi ama esịm, enye oyosobo, idiyakke ini oro ebe!

JEHOVAH AMA MME ASAN̄A-UTOM ESIE EMI ẸSỌN̄ỌDE ẸDA YE ENYE

14-15. Didie ke Jehovah ada nte enye edidiọn̄de mme asan̄a-utom esie emi ẹsọn̄ọde ẹda ye enye? (Job 14:15) (Se ndise n̄ko.)

¹⁴ Kot Job 14:15. Ete nnyịn eke heaven esisọn̄ọ ada ye mbon emi ẹsọn̄ọde ẹda ye enye. Enye enen̄ede ama mmọ tutu, enye ayanam mmọ ẹset edieke mmọ ẹkpade. Enye eyetre ubiak emi n̄kpa esidade edi.​—Isa. 65:17.

¹⁵ Kpa ye emi Job akakade iso odu uwem ke ererimbot emi Satan akarade, mbụk emi odude ke Bible emi ikemede ndiberi edem anam idiọn̄ọ ke Jehovah ama anam Job afiak okop nsọn̄idem. Jehovah ama akam ọdiọn̄ Job akan nte ọkọdiọn̄de mbemiso ẹkedomode enye. Mme edidiọn̄ oro ẹkedi ntabi-nse n̄kpọ emi Jehovah edinamde inọ Job ke ini iso. Jehovah ama owụt ke imọ iyom mbon emi ẹsọn̄ọde ẹda ye imọ ẹkop ata inemesịt ẹnyụn̄ ẹkop inem uwem. Se idude edi ke Jehovah ọyọnọ kpukpru mbon emi ẹsọn̄ọde ẹda ye enye ifet mmọ ndikop inem uwem ke Paradise emi edidude ke isọn̄. (Edi. 21:3, 4) Sia Jehovah edide Akakan Andikara ekondo, ọdọdọn̄ enye ndinam ntre. Nnyịn ndidiọn̄ọ enye oro ekeme ndidọn̄ nnyịn esịt ke ini nsio nsio idomo ẹsịmde nnyịn!

16. Tịn̄ ntak en̄wen emi anade ibuọt idem ye Jehovah emi edide Akakan Andikara.

¹⁶ Kpa ye emi edide ke Jehovah ama anam Job odu uwem enen̄ede ebịghi, Job ama edikpa. Edi Jehovah edi Akakan Andikara, enye edi Ata Ọkpọsọn̄ emi enyenede odudu ndinam mbon emi ẹkpade ẹset. (Deut. 32:39) Ntre idụhe owo ndomokiet emi ekemede ndikpan enye ndinam mbon emi enye amade ẹset. Enye oyonyụn̄ anam oro ke ini emi enye emekde.​—Rome 8:38, 39.

BUỌT IDEM YE JEHOVAH OFỤRI OFỤRI

17. Nso iwụt ke Satan ikwe unen ke ndisobo ikọt Jehovah ofụri ofụri mfep?

¹⁷ Mbụk Job anam ikụt ata nti ntak emi anamde ibuọt idem ye Jehovah ofụri ofụri. Imọkọm Jehovah eti-eti nte Satan mîkwe unen ndisobo ikọt Abasi ofụri ofụri mfep! Mfịn n̄kpọ nte owo miliọn usụkkiet ndinam n̄kpọ Jehovah owụt ke Jehovah emi edide ata Akakan Andikara enyene odudu. Idịghe inikiet m̀mê ikaba ke isikụt ke mme n̄kpọ-ẹkọn̄ emi ẹbotde man ẹda ẹsobo mme asan̄a-utom Jehovah isikwe unen. (Isa. 54:17) Ke enyịn owo, etie nte ikọt Jehovah inyeneke eke ekpemede mmọ. Kpa ye oro, ediwak ukara ye mme ikpọ owo ido ukpono emi ẹkopde odudu ikemeke ndisọhi mmọ mfep. Ndien idụhe n̄kpọ ndomokiet emi ekemede ndikpan nnyịn ndinam mme owo ẹdiọn̄ọ akpanikọ emi aban̄ade Jehovah, ndinyụn̄ nyarade Satan nte osu nsu ye owotowo. Idem n̄kpa ikemeke ndikpan nnyịn ndinam oro, sia Jehovah ayanam owo ekededi emi akpade, emi ọsọn̄ọde ada ye enye eset.​—Hos. 13:14.

18. Ntak emi nnyịn mîkpokopke ndịk iban̄a se iditịbede ke ini iso?

¹⁸ Ima inen̄ede ikere iban̄a se ikotde ke n̄wed Job, iyetetịm ibuọt idem ye Jehovah inyụn̄ inịm ke enye idikpọn̄ke nnyịn inamke n̄kpọ m̀mê nso iditịbe ke ini iso. Ntre, ẹyak ikûyak ndịk anam nnyịn. Ke ini akwa ukụt, Satan ye udịmekọn̄ esie ẹyekere ke idisọn̄ke utom ndikan ikọt Abasi, ntre mmọ ẹyemen ekọn̄ ẹbịne ikọt Abasi. Ukem nte okonyụn̄ edide ke eyo Job, kpukpru n̄kpọ ẹdisịne Jehovah ke ubọk, ndien enye idiyakke Satan osobo ikọt Esie efep. Ini emi Jehovah edinamde ufen emi Satan anamde esịm ubonowo etre enen̄ede ekpere. Ẹyekọbi Devil ye mme demon esie ke editụn̄ọ ukpe ke isua 1,000. (Luke 8:31; Edi. 20:1-3) Nte ini akade, ẹyesobo Satan ye kpukpru mbon emi ẹdade ye enye ẹfep. (Edi. 20:10) Ẹyenuak Satan ibuot nte Jehovah eketịn̄de. Ẹyesobo Satan taktak ẹfep.​—Gen. 3:15; Rome 16:20.

19. Didie ke Jehovah edidiọn̄ mbon emi ẹbuọtde idem ye enye ofụri ofụri? (Se ndise n̄ko.)

¹⁹ Mbon emi ẹkponode Jehovah nte Jehovah oyomde ẹdada ẹbet ini emi Jehovah edinamde mme owo ẹfọn ẹma ẹnyụn̄ ẹkop inemesịt ke obufa ererimbot emi osụk edide ke mîbịghike. Ọkpọkọm ikere nte ikekere, idinen̄ekede in̄wan̄a nnyịn ima nte uwem edinemde ini oro. Jehovah ọn̄wọn̄ọ ete: “Sese! Mmanam kpukpru n̄kpọ ẹdi mbufa.” (Edi. 21:5) Nso ke ikọ oro ọwọrọ? Tọn̄ọ Adam ye Eve ẹkenam idiọkn̄kpọ ke In̄wan̄ Eden, akpa edidi emi Satan ye mme demon esie mîdikemeke ndinam mme owo ibak, mîdinyụn̄ inamke yak mme owo ẹnam ibak n̄ko. Kpukpru owo ẹyen̄wek ẹduọk ndien! Ke idiọk ererimbot emi, editịmede esịt uwem emi iyakke fi ekeme ndibọp enyịn okoneyo, edi utọ n̄kpọ oro iditịbeke aba ke obufa ererimbot emi osụk edide. Mbon emi ẹdibọhọde Armageddon ẹyekụt nte ẹdikọkde mme owo udọn̄ọ ke utịbe utịbe usụn̄ ke ofụri ererimbot. Edi ikụreke do. N̄kpọ en̄wen emi idikụtde nte ẹtọn̄ọde ndinam edidi nte ẹdinamde mbon nnyịn emi ẹkekpade yak ẹset. Iyekeme ndidu ndien utọ uwem emi Ete nnyịn eke heaven okoyomde idu!

20. Nso ke afo ebiere ndinam?

²⁰ Nte inyenede uko iyọ mme mfịna emi ẹsịmde nnyịn ke mme akpatre usen emi, ẹyak ibiere ndibuọt idem ye Jehovah ofụri ofụri nnyụn̄ n̄wụt ke ida inọ ukara esie. Ẹyak inanam n̄kpọ iwụt ke imama Ete nnyịn eke heaven, inyụn̄ inam n̄kpọ iwụt ke Satan edi osu nsu. Ẹyak inịm ke edieke ikade iso isọn̄ọ ida ye Jehovah emi edide Ata Edikon̄, ke ini iso nnyịn ọyọfọn, sia enen̄ede ọdọn̄ Jehovah ndidiọn̄ mme asan̄a-utom esie emi ẹsọn̄ọde ẹda ye enye, ndien enye idinyụn̄ itreke-tre ndinam oro!