Didie ke Ekeme Ndikan Mme N̄kpọ Emi Ẹsiwọn̄ọrede Fi Ntịn̄enyịn?

1-2. Didie ke n̄kpọ emi edide akpan n̄kpọ ekeme ndikabade ndi n̄kpọ emi ọwọn̄ọrede nnyịn ntịn̄enyịn?

INI ewe idi akpatre ini emi eketịmede man n̄kpọ idiwọn̄ọde fi ntịn̄enyịn? Ekeme ndidi okosụk anam n̄kpọ ke ubọk, ndien etise n̄kpọ en̄wen esịbe odụk ndien enye edi se afo ebierede m̀mê ewe idi akpan n̄kpọ ikan. Ke uwụtn̄kpọ, yak idọhọ ke awat uwat ke ubọk ndien ẹkot fi ke fon. Ekeme ndinam akpan n̄kpọ anam ẹkot fi oro. Edi afo ọmọdiọn̄ọ ke ebe oro, ke ikot ẹsụk ẹkotde fi do ọyọwọn̄ọde fi ntịn̄enyịn, ndien ke afo nditịn̄ enyịn n̄wat uwat edi akpan n̄kpọ akan.

² Mme akpan n̄kpọ emi anade inam ẹyọyọhọ nnyịn idem. Edi imọdiọn̄ọ ke se idide akpan n̄kpọ ikan edi mme n̄kpọ emi inamde inọ Jehovah.a (Matt. 6:33) Mme draiva emi ẹnen̄erede ẹtịn̄ enyịn ẹwat uwat ẹsidomo ndidiọn̄ọ n̄kpọ emi ekemede ndiwọn̄ọde mmọ ntịn̄enyịn n̄kpọn̄ usụn̄ emi mmọ ẹsụk ẹwatde do. Ikọt Jehovah ẹnyụn̄ ẹtie nte mme draiva oro.​—N̄ke 4:25; Matt. 6:22.

3. Nso ke idineme ke ibuotikọ emi, ndien didie ke oro edin̄wam nnyịn?

³ Idụhe owo nnyịn ndomokiet emi okpoyomde yak n̄kpọ ndomokiet ọwọn̄ọde enye ntịn̄enyịn ọkpọn̄ enye ndinam n̄kpọ Abasi. Edi mme n̄kpọ emi ẹkemede ndisọp n̄wọn̄ọde nnyịn ntịn̄enyịn ẹsitịbe ọnọ kpukpru owo. (Luke 21:34-36) Ntre man ikeme ndika iso nnam n̄kpọ Jehovah, ẹyak ineme (1) nsio nsio n̄kpọ emi ẹkemede ndiwọn̄ọde nnyịn ntịn̄enyịn, (2) nte Jesus akakande mme n̄kpọ emi ẹkekemede ndiwọn̄ọde enye ntịn̄enyịn, ndien (3) nte nnyịn ikemede ndikan mme n̄kpọ emi ẹkemede ndiwọn̄ọde nnyịn ntịn̄enyịn mfịn.

NSO YE NSO IKEME NDIWỌN̄ỌDE NNYỊN NTỊN̄ENYỊN?

4-6. Nso ye nso ikeme ndisọp n̄wọn̄ọde nnyịn ntịn̄enyịn?

⁴ Kpukpru nnyịn imenyene ediwak n̄kpọ ke uwem nnyịn emi anade ise iban̄a. Ke uwụtn̄kpọ, ekeme ndidi mfịna nnyịn edi udọn̄ọ, mfịna ufọk, mîdịghe mfịna idem nnyịn emi anade ise iban̄a. Imọdiọn̄ọ ke mme n̄kpọ emi isiakde do ẹdi mme akpan n̄kpọ, ndien ke edi se isede iban̄a mmọ. Edi ndi mmọ ẹkeme ndikabade ndi mme n̄kpọ emi ẹwọn̄ọrede nnyịn ntịn̄enyịn? Mmọ ẹkeme ndikabade ndi edieke itọn̄ọde ndisiwak ndikere mban̄a mme n̄kpọ oro, ida ofụri ini nnyịn inam n̄kpọ iban̄a mmọ, inyụn̄ iyak mmọ ẹdia nnyịn idem.

⁵ Ke ẹsiode enye oro ẹfep, ediwak nnyịn idụn̄ ke mme ebiet emi ndutịme odude ke ukara, n̄kpọ ọsọn̄de, udọn̄ọ atarade asuana, ndien ẹn̄wanade en̄wan ke ubọk ke ubọk. Mme n̄kpọ emi ẹdi idiọn̄ọ mme akpatre usen. (2 Tim. 3:1) Ke ini mme utọ n̄kpọ oro ẹtịbede ẹnọ nnyịn, esịt ekeme ndinen̄ede ntịmede nnyịn tutu nnyịn iditak ke ndikere mban̄a mme n̄kpọ oro.

⁶ Ekeme ndidi ọmọdiọn̄ọ mme owo emi mme utọ n̄kpọ oro ẹtịbede ọnọ ndien ke ntak oro n̄kpọ ọtọ etịmede ke uwem mmọ. Mme n̄kpọ ntre ẹsinam esịt enen̄ede etịmede mmọ. Nte esinyụn̄ edide edi oro. Jehovah ikobotke mme owo yak ẹbọ ufen mîdịghe yak esịt aka iso etịmede mmọ. Imosụk ise nte esidide ndusụk owo ẹma ẹka iso ẹyọ mme n̄kpọ ntem, mmọ ẹkere ke uwem mmimọ itiehe aba nte ekpetiede! Ke ntak oro, ndusụk owo ẹsida ediwak ini mmọ ẹkop idem inem mîdịghe ẹnam n̄kpọ emi edinamde mmọ ẹkop inemesịt man ẹfre uwa. Ekededi ke otu mme n̄kpọ oro ekpetịbe ọnọ nnyịn, ikpanam nso? Ẹyak ise se ikemede ndikpep nto Jesus emi edin̄wamde nnyịn ikan mme n̄kpọ emi ẹkemede ndiwọn̄ọde nnyịn ntịn̄enyịn man ikûnam n̄kpọ Abasi.

DIDIE KE JESUS AKAKAN MME N̄KPỌ EMI ẸKEKEMEDE NDIWỌN̄ỌDE ENYE NTỊN̄ENYỊN?

7. Nso ikpekekeme ndiwọn̄ọde Jesus ntịn̄enyịn?

⁷ Awak mme n̄kpọ emi ẹkpekekemede ndiwọn̄ọde Jesus ntịn̄enyịn, ndusụk ke otu mmọ ẹdi nte n̄kpọ eketiede ye mme owo, ye n̄kpọ aban̄ade ukara. Ke eyo esie, ediwak owo ẹma ẹdọn̄ọ ẹnyụn̄ ẹdi ubuene. (Matt. 14:14; Mark 14:7) N̄kpọ en̄wen edi ke mbon Rome ye mme Jew eken ẹma ẹnam uwem enen̄ede ọsọn̄ ye mmọ. Ke ini mme owo ẹkekụtde ke Jesus enyene odudu ndinam utịben̄kpọ, ke enye onyụn̄ ekeme ndinam utịben̄kpọ, mmọ ẹma ẹyom ndimek enye edidem. (John 6:14, 15) N̄kpọ en̄wen edi ke Satan ama odomo ndinam Jesus enyịme ndikara ererimbot emi ke ini edide ini Jesus ndikpakakara ikekemke kan̄a. (Matt. 4:8, 9) Ndien onyụn̄ enyene ini emi apostle Peter emi ekedide kiet ke otu ufan Jesus emi ekenen̄erede ekpere Jesus idem ọkọdọhọde Jesus anam se idimemde ye idemesie. Enye ọkọdọhọ ete: “Tua idemfo mbọm, Ọbọn̄.”​—Matt. 16:21, 22.

8. Didie ke Jesus akakan mme n̄kpọ emi ẹkpekekemede ndiwọn̄ọde enye ntịn̄enyịn?

⁸ Didie ke Jesus akakan mme n̄kpọ emi ẹkpekekemede ndiwọn̄ọde enye ntịn̄enyịn? N̄kpọ ita ke enye akanam. Akpa, enye ama ekere n̄kpọ nte Jehovah esikerede. (John 8:28; 14:9) Ọyọhọ iba, enye ama esịn idem anam n̄kpọ Abasi. (Matt. 9:35) Ndien ọyọhọ ita, enye ama enen̄ede ọdiọn̄ọ se ikedide ata akpan n̄kpọ. (John 4:34) Jesus ikanamke se Satan okoyomde, ndien ini Peter ọkọdọhọde Jesus anam se idimemde ye idemesie, Peter okoyom ufọn Jesus, edi idịghe utọ mfọnido oro ke Jesus okoyom. Ntre Jesus ikanamke se Peter n̄ko eketịn̄de. (Matt. 4:10; 16:23) Se mme owo ẹkekerede, ẹketịn̄de, ẹkenyụn̄ ẹnamde ẹkpekekeme ndiwọn̄ọde ntịn̄enyịn Jesus, iyakke enye anam se Abasi okoyomde enye anam. Edi Jesus ikayakke utọ n̄kpọ oro etịbe. Mme n̄kpọ emi ẹkemede ndiwọn̄ọde nnyịn ntịn̄enyịn ẹkeme ndikpụhọde ye eke Jesus, enye oro edi ntre. Jesus ama ekeme ndikan mme n̄kpọ emi ẹkpekewọn̄ọrede enye ntịn̄enyịn. Edieke inen̄erede ikpep se ikan̄wamde Jesus, nnyịn n̄ko imekeme ndikan mme n̄kpọ emi ẹkemede ndiwọn̄ọde nnyịn ntịn̄enyịn.

DIDIE KE IKEME NDIKAN MME N̄KPỌ EMI ẸKEMEDE NDIWỌN̄ỌDE NNYỊN NTỊN̄ENYỊN?

9. Nnyịn ‘ndika iso mfiọk se uduak Jehovah edide’ ọwọrọ nso? (Ephesus 5:17)

⁹ Kpep ndikere n̄kpọ nte Jehovah. Afo ndinam ntre ekeme ndin̄wam fi ‘aka iso ọfiọk se uduak Jehovah edide.’ (Kot Ephesus 5:17.) Edieke ikotde Bible inyụn̄ itiede ikere se ikotde, imekeme ndidiọn̄ọ se idinemde Jehovah. Idem ekpededi Bible itịn̄ke n̄kpọ ndomokiet iban̄a akpan mfịna emi inyenede, imosụk ikeme ndidiọn̄ọ se Jehovah oyomde nnyịn inam. Idinam didie idiọn̄ọ? Edi nnyịn ndinen̄ede mmehe ye nte Jehovah esikerede n̄kpọ ndien inyụn̄ inyịme ndinanam n̄kpọ ntiene se idiọn̄ọde oro.

10. Didie ke ikeme ndikpep ndiọn̄ọ nte Jehovah esikerede n̄kpọ?

¹⁰ Imekeme ndikpep ndikere n̄kpọ nte Jehovah edieke isikotde Bible inyụn̄ ikerede nte enye esinamde n̄kpọ ye mme owo. (Jer. 45:5) Nte isụk ikotde mme mbụk oro, imekeme ndibụp idem nnyịn utọ mbụme nte: ‘Nso ke mbụk emi ekpep mi aban̄a Jehovah? Nso ke ana n̄kpụhọde man n̄keme ndikere n̄kpọ nte Jehovah ekerede?’ Edi imọdiọn̄ọ ke nte Jehovah esikerede n̄kpọ enen̄ede okon̄ akan nte nnyịn isikerede. (Isa. 55:9) Ntre nnennen n̄kpọ emi ikpanamde edi ndidọhọ enye ekpep nnyịn ndinam uduak esie. (Ps. 143:10) N̄kpọ en̄wen edi nnyịn ndibọn̄ akam mben̄e enye anam nte enye esikerede n̄kpọ an̄wan̄a nnyịn onyụn̄ an̄wam nnyịn ikere n̄kpọ nte enye esikerede, ekem inịm ke enye ayanam se iben̄ede.​—1 John 5:14.

11. Jehovah oyom n̄kpọ etie didie ye nnyịn?

¹¹ Imọdiọn̄ọ ke Jehovah iyomke n̄kpọ ndomokiet ọwọn̄ọde ntịn̄enyịn nnyịn nte isụk ikpepde ndikere n̄kpọ nte enye man ikeme ndiben̄e idem nnọ utịt editịm n̄kpọ emi. (Matt. 24:44) Enye iyomke editịmede esịt emen nnyịn emen. (Matt. 6:31, 32) Ntre esịt ama enen̄ede etịmede nnyịn ke ntak udọn̄ọ nnyịn, utom nnyịn, ebiet emi idụn̄de, m̀mê mfịna idem nnyịn ye eke ubon nnyịn, Jehovah esinọ nnyịn eti item man ikeme ndidiọn̄ọ se ikpanamde. Enye oyom yak iben̄e enye ọniọn̄ ye odudu man ikeme ndiyọ se iwọrọde nnyịn.​—Ps. 55:22; N̄ke 3:5-7.

12. Nso ikeme ndin̄wam nnyịn ika iso ikop inemesịt idem ke ini ndiọi n̄kpọ ẹtịbede ke ererimbot? (Matthew 5:3)

¹² Ka iso sịn idem nam n̄kpọ Abasi. Esịt esitịmede kpukpru nnyịn ke ntak ndiọi n̄kpọ emi ẹtịbede ke ererimbot, emi nnyịn mîkemeke ndinam n̄kpọ ndomokiet mban̄a. Ntre man mme n̄kpọ oro idiwọn̄ọde ntịn̄enyịn nnyịn, isinen̄ede isịn ekikere ke mme n̄kpọ emi inamde inọ Abasi. Edieke ikade iso inam ofụri se ikemede man ika iso ikpere Jehovah, iyokop inemesịt sia nte Jehovah okobotde nnyịn edi oro. (Kot Matthew 5:3.) Usụn̄ emi ikemede nditetịm n̄kpere Abasi edi nnyịn ndikpep Ikọ esie emi edide Bible, nnyụn̄ nnam ofụri se nnyịn ikekeme man inam n̄kpọ esie ke usụn̄ ekededi emi ikemede. Edieke inamde ntre, iyenem Jehovah esịt n̄ko, ndien enye oro ediwụt ke ida ini nnyịn inam eti n̄kpọ.​—N̄ke 23:15.

13. Nso ke ikeme ndinam man iwụt ke ‘idedep ifet inọ idem nnyịn’?

¹³ Sia idide mme Christian, imebiere ‘ndidep ifet nnọ idem nnyịn.’ (Eph. 5:15, 16; se se ẹwetde ẹban̄a “making the best use of your time” ke ufan̄ikọ Bible oro ke nwtsty.) Ọfọn yak idiọn̄ọ ke Bible idọhọke idiọn̄ọ nte ikpenen̄erede ida ini nnyịn inam n̄kpọ, okụre ke oro. Utu ke oro, enye akam ọdọhọ idiọn̄ọ nte idade ini nnyịn inam n̄kpọ mbemiso Jehovah osobode idiọk editịm n̄kpọ emi. Nso ke ikeme ndinam man iwụt ke idedep ifet inọ idem nnyịn? Edieke idade ata ediwak ini nnyịn ikot, ise, mîdịghe ikpan̄de utọn̄ ikop idiọk etop emi osụk etịbede, oro ekeme ndiwọn̄ọde ntịn̄enyịn nnyịn, anam idem emem nnyịn, onyụn̄ anam nnyịn ision̄o ubọk ke edinam n̄kpọ Abasi. Ntre ọfọn inịm adan̄a inọ adan̄a mbụk emi isede mîdịghe ikotde! Edieke inamde ntre, iyenen̄ede inyene ini ye odudu inam n̄kpọ inọ Jehovah. Ọyọfọn n̄ko inen̄ede isịn idem ke ukwọrọ-ikọ, utọ nte ndinen̄ede n̄ka n̄kese mbon emi ikesikwọrọde ikọ inọ ikan nte ikesinamde akpa, ke ebiet ekededi emi ikemede ndinam ntre. Imọdiọn̄ọ ke edi ata akpan n̄kpọ nnyịn ndida ifet ekededi emi inyenede n̄n̄wam mme owo “ẹnyene edinyan̄a ẹnyụn̄ ẹsịm nnennen ifiọk akpanikọ.”​—1 Tim. 2:4.

14. Tịn̄ nte nnyịn ndisịn idem nnam n̄kpọ Abasi esin̄wamde nnyịn. (Se ndise n̄ko.)

¹⁴ Ima isịn idem inam n̄kpọ Abasi, enye oro esin̄wam nnyịn ikûfre ini emi idude uwem mi. Ke ini ikụtde nte ndutịme okponde ke ukara, nte edide eyo esiere n̄kpọ ọsọn̄ akan nte ekedide, ye nte mme udọn̄ọ ẹtarade ẹsuana ke ererimbot, ikpat isinyekke nnyịn ke isọn̄ sia imọdiọn̄ọ ke Bible ama etetịn̄ ke mme n̄kpọ ntem ẹyetịbe, ndien ke mmọ ẹnyụn̄ ẹtịbe oro. Utu ke nnyịn ndiyak ndịk ọwọn̄ọde nnyịn ntịn̄enyịn, yak inịm ke Jehovah ayanam kpukpru mme n̄kpọ emi ẹtre onyụn̄ emen obufa ererimbot esie edi. Nte isụk ibetde ini oro edi, imọdiọn̄ọ ke Jehovah ayan̄wam nnyịn iyọ, ndien enye oro ayanam esịt ana nnyịn sụn̄.​—Ps. 16:8; 112:1, 6-8.

15. “Eti ibuot” edin̄wam nnyịn inam nso? (1 Peter 4:7)

¹⁵ Nen̄ede diọn̄ọ se idide ata akpan n̄kpọ. Se inen̄erede ibehe ediwak owo ke ererimbot emi edi ndinọ idemmọ inemesịt, idịghe ini emi utịt edidide. Kpa ye emi nnyịn ndinọ idem nnyịn inemesịt mîdiọkke, edi se inyenede “eti ibuot” mbak nnyịn idida unọ idem inemesịt nte ererimbot ẹdade. (Kot 1 Peter 4:7.) Nso ke emi ọwọrọ ọnọ nnyịn? Awak-o. Kiet edi ke ana ikpep ndikere n̄kpọ ọfọn man idiọn̄ọ nte ikpadade udia-uwem inyụn̄ ikeme ndibiere n̄kpọ ọfọn. Enye oro oyowụt ke imekere n̄kpọ nte Jehovah, oyonyụn̄ owụt ke imọdiọn̄ọ se idide ata akpan n̄kpọ.​—2 Tim. 1:7.

16. Nso ke Jesus ekenen̄ede esịn ekikere ekpri ini mbemiso enye akpade?

¹⁶ Jesus ikefreke se ikedide akpan n̄kpọ ikan. Ikememke inọ Jesus hour ifan̄ mbemiso enye akpade. Kpa ye oro, enye ekenen̄ede esịn ekikere ke nte enye ọkpọsọn̄ọde ada ye Abasi onyụn̄ anamde se Abasi ọkọdọhọde enye anam. Ke ntak oro, enye ama esịn ifịk ọbọn̄ akam. Jesus ama odu ke mben̄e-idem, edi mme mbet esie ẹkedede. “Mfụhọ” akanam mmọ ẹde.​—Luke 22:39-46; John 19:30.

17. Nso inam ediwak owo ẹsida ikpehe Intanet ẹnam n̄kpọ, edi didie ke oro ekeme ndiwọn̄ọde ntịn̄enyịn mmọ? (Se ndise n̄ko.)

¹⁷ Idem ekeme ndinen̄ede mmem nnyịn ndusụk ini nte ekememde mme mbet Jesus. Mme n̄kpọ emi ẹtịbede ke ererimbot, emi ẹwụtde ke idu ke mme akpatre usen ẹkeme ndinam esịt etịmede nnyịn. Ediwak owo ẹsifehe ẹka ikpehe Intanet man ẹfre uwa. Mmọ ẹkeme ndida ikpehe Intanet nse ediwak vidio nnyụn̄ mbre mme game. Se idude edi ke mme owo ẹkeme ndida ikpehe Intanet nneme nneme ye mme ufan mmọ ye mbonubon mmọ ke nsio nsio itie ke ererimbot ẹnyụn̄ ẹda ẹnọ etop, ẹnọ ndise, ẹnyụn̄ ẹda ẹnam mme n̄kpọ eken. Edi Ikpehe Intanet ekeme ndin̄ede ndia owo idem tutu enye ada ediwak ini ye odudu esie oyom mbufa n̄kpọ. Man nnyịn idida ikpehe Intanet nte mbon en̄wen ẹdade, imekeme ndibụp idem nnyịn ite, ‘Ndi ndida ikpehe Intanet nnam n̄kpọ esinen̄ede an̄wam mi m̀mê esikam anam yak n̄kûkeme ndinam se idide ata akpan n̄kpọ?’

18. Ntak emi ọfọnde itịm ikere se inamde ini imekde se idade inọ idem inemesịt?

¹⁸ Ọfọn itịm ikere n̄ko se inamde edieke isede mme fim, mîdịghe ida fon ise mme edinam emi ẹsisiode ke TV, ise mbio mbio vidio ke Intanet, mîdịghe ibre mme vidio game. Mme n̄kpọ ntre ẹkeme ndinem nnyịn onyụn̄ anam ifre n̄kpọ ifan̄ emi afịnade nnyịn. Edi ọfọn itịm ikere se inamde ke ini iyomde ndimek utọ n̄kpọ emi ididade inem idem esịt mîdịghe udomo ini emi ididade inam oro. Edieke edide ise vidio kiet ima, en̄wen ọwọrọ ada ete ise, oro ekeme ndinam yak ọdọn̄ nnyịn ndidi ima ise obufa oro ima, nnyịn ifiak iyom ndise en̄wen emi ọwọrọde edi, ndien ndusụk vidio oro ẹkeme ndiwụt nte ẹnamde afai m̀mê oburobụt ido. Se iketịbede inọ broda nnyịn kiet edi oro ke Asia. Enye ọkọtọn̄ọ ndise vidio emi ẹwụtde se ẹdinamde ke fim ke ikpehe Intanet kiet. Ekedi enye ese enye oro ama, efen ọwọrọ ada, enye onyụn̄ ese, ndien sụn̄ sụn̄ sụn̄ enye ama ọtọn̄ọ ndise ikpehe emi ẹnamde oburobụt ido ke mme vidio oro. Ndien nte ini akade enye ama ọtọn̄ọ ndise ndise idan̄. Imọkọm Abasi ke mbiowo ye mme ufan esie emi ẹkekperede enye idem ẹma ẹn̄wam enye, ndien enye ama onyụn̄ anam nnennen n̄kpọ. Enye ama a-delete mme app emi ẹsiwụtde mme fim ke fon esie efep onyụn̄ enịm udomo ini emi akpadade fon esie anam n̄kpọ eketre. Se isụk itịn̄de emi owụt ntak anade itịm ikere se inamde ini imekde se ididade inem idem esịt.

19. Nso ikeme nditịbe edieke idade ediwak ini nnyịn ida idia uwem?

¹⁹ Ekeme ndiyom yak itịm ikere se inamde n̄ko ke n̄kpọ aban̄ade udia-uwem ye nduọkodudu. Oyom yak edi ima inam utom, inam utom, nnyịn isio ini iduọk odudu sia n̄kpọ enye oro esifọn ye nnyịn onyụn̄ anam idem ọsọn̄ nnyịn. Edi edieke inen̄erede isịn ekikere ikaha ke mme n̄kpọ isụk isiakde do, mmọ ẹkeme ndinam nnyịn inyeneke ini aba inam mme n̄kpọ emi ẹdide akpan n̄kpọ ẹkan. (Phil. 1:10) Ana nnyịn owo kiet kiet ibiere se idinamde ye udomo ini emi ididade inam n̄kpọ oro. Ama oyom ndibiere mme n̄kpọ ntre, bụp idemfo: ‘Ndi udomo ini emi mbiatde ke udia-uwem ye nduọkodudu owụt ke mmebiere n̄kpọ ọfọn? Ndi mmowụt ke mmọdiọn̄ọ se idide ata akpan n̄kpọ nnyụn̄ ntịm idem mben̄e “utịt kpukpru n̄kpọ”?’

20. Edieke in̄wanade ikan mme n̄kpọ emi ẹkemede ndiwọn̄ọde nnyịn ntịn̄enyịn, nso ufọn ke ididia?

²⁰ Imesidia ufọn ke ini in̄wanade ikan mme n̄kpọ emi ẹkemede ndiwọn̄ọrede nnyịn ntịn̄enyịn ke ndinam n̄kpọ Jehovah. (Isa. 48:17) Jehovah ekeme ndin̄wam nnyịn isọn̄ọ ida iyọ mme mfịna emi ẹsịmde nnyịn. Inamke n̄kpọ m̀mê nso iditịbe ke ererimbot, iyọsọn̄ọ ida ikpat iba ke isọn̄, ndien nnyịn idibiatke ata ediwak ini nnyịn ke udia-uwem. Ntre yak ika iso ibiere ndikere n̄kpọ nte Jehovah, isịn idem inam n̄kpọ Abasi, inyụn̄ inen̄ede idiọn̄ọ se idide ata akpan n̄kpọ. Edieke inamde ntre, iyekeme ndin̄wana n̄kan mme n̄kpọ emi ẹkemede ndiwọn̄ọde nnyịn ntịn̄enyịn. Edi ikụreke do, ‘iyọsọn̄ọ imụm ata uwem ikama.’​—1 Tim. 6:19.