48 ETYENN
“Ranpli avek lafwa ek lespri sen”
ETYENN ti en zonm enparfe. Me ler son lavi ti vreman an danze, Labib i dekrir li dan sa fason: “Son figir ti parey figir en lanz.” I ti kalm e anpe menm si i ti pe al ganny kestyonnen devan Sannedren, lakour siprenm Zwif. Sa ti sa menm lakour ki ti’n donn lord pour touy Zezi detrwa mwan pli boner. Ki mannyer en dimoun ki son lavi ti an danze ti kapab sitan kalm koumsa? Larepons i annan pour fer avek kouraz.
Labib i dir ki Etyenn “ti ranpli avek lafwa ek lespri sen.” Bann zapot Zerizalenm ti’n konfye li avek en travay enportan e sa ti pour li pran swen avek bann ki dan bezwen dan kongregasyon. En zour, Etyenn ti vwar li devan en group Zwif ki ti vreman ankoler. I ti servi Lekritir telman byen ki zot pa ti kapab dir li nanryen. Sa ti fer zot pli ankoler ankor alor zot ti anmenn li devan Sannedren ki ti pou deside si i pou viv oubyen mor.
Petet Etyenn ti konn sa promes ki Zezi ti fer avek son bann disip ki ti pou vwar zot dan en sityasyon koumsa: “Pa bezwen trakase davans ki zot pou dir. Me sa letan zot pou konnen ki pour dir. Dir sanmenm, parski pa zot ki pou koze, me i avek led lespri sen ki zot pou koze.” (Mark 13:11) Sirman sa promes ti donn Etyenn plis kouraz e avek led lespri sen Zeova, i ti paret vreman kalm parey en lanz ler i ti debout devan Sannedren.
I ti annan 71 ziz dan sa lakour e zot tou zot ti bann sef enportan ek bann ansenyan dan larelizyon Zwif. Zot ti zwenn dan en gran lasanm. Zot ti asiz dan trwa ranze e fer en demi ron. De profeser lalwa ti ekrir tou sa ki ti pe deroule. Etyenn ti debout devan zot, i ti’n ganny akize pour koz kont Lalwa Moiz ek tanp, en keksoz ki ti merit lanmor. Granpret Kaif ti demann Etyenn pour defann son lekor.
Etyenn ti konmans koz lo listwar pep Bondye. I ti koz lo Abraam. I ti osi koz lo Zozef ki ti’n ganny persekite avek son bann frer, bann patriars Izrael. Etyenn ti koz avek respe lo Moiz e i ti montre ki sa nasyon ti dezobeir li. Etyenn ti osi ganny enspire pour dir bann keksoz lo Moiz ki pa ti dan Lekritir Ebre.
Diskour Etyenn ti montre ki i ti annan en gran respe pour Lalwa, pour tabernak e pour sa tanp ki Zeova ti’n met an plas pour vre ladorasyon. Me an menm tan, i ti montre ki pep Bondye ti’n kontinyelman rebele kont bann dimoun ki Zeova ti’n anvoye pour diriz zot.
Etyenn ti bezwen defann son lafwa devan en lakour ki ti’n fini deside pour touy li
Sirman Etyenn ti vwar ki sa bann zonm ki zot leker ti dir pa ti pou pran okenn pitye pour li. Alor, lespri sen Zeova ti donn Etyenn sa kouraz pour li fini son diskour avek sa mesaz zizman. Etyenn ti dir zot ki zot ti “antete” e ki zot in toultan “reziste lespri sen, parey zot zanset ti fer.” Pli move ankor, zot ti’n touy sa enn ki Moiz ti’n predir pou vini, en profet ki ti pli gran ki li. Etyenn ti dir ki zot ti’n “trai e touy” sa Enn ki fer sa ki byen, setadir Zezi, sa Mesi.
Sa bann manm Sannedren ti telman ankoler ki zot “ti anvi fer [Etyenn] dimal.” Me Zeova ti ankouraz li atraver en vizyon. Etyenn ti dekrir sa vizyon koumsa: “Gete! Mon vwar lesyel ouver e Garson zonm lo kote drwat Bondye.” Ler Etyenn ti dir sa, Sannedren ti ankoler e zot ti vin vyolan! Akoz? Petet akoz zot in deza tann sa ki Etyenn fek dir. Detrwa mwan pli boner ler Zezi Kri ti pe ganny zize, i ti predir: “Zot pou vwar Garson zonm pe asize lo kote drwat sa Enn Pwisan.” (Mat. 26:64) Etyenn ti montre ki sa parol ti’n ganny akonplir. Aprezan Zezi ti pe debout lo kote drwat Zeova!
Dan zot lakoler, zot ti tyonbo Etyenn, zet li an deor lavil e saboul li avek ros. Petet Etyenn ti ankor pe vwar Zezi dan sa vizyon, alor i ti demann son Senyer pour pran son lavi. Apre sa i ti demann Zeova en dernyen keksoz: “Pa kondann zot pour sa pese.” Etyenn ti reste fidel ziska son lanmor. I ti sa premye Kretyen ki ti ganny touye akoz son lafwa. Me en zenn onm ki ti la, ki ti dakor ki Etyenn i ganny touye, pa ti zanmen oubliy sa ki Etyenn ti dir avan son lanmor. Nou pou koz plis lo li dan Sapit 50, 51 ek 53.
Lir sa resi dan Labib:
Pour diskit lo la:
Ki mannyer Etyenn ti demontre kouraz?
Al pli o profon
1. Akoz bann zapot ti swazir Etyenn ek lezot zonm ki ti “ranpli avek lespri sen ek lasazes” pour ansarz distribisyon manze? (Akt 6:3-5; bt 41-42 ¶17-18) A
Portre A
2. Ki Etyenn ti dir lo Moiz ki zis li ki koz lo la dan Labib? (bt 48 ¶13, not)
3. Kwa ki ti ed Etyenn pour reste sitan kalm ler i ti pe ganny persekite? (w18.10-E 32)
4. Eski Akt 7:59 pe montre ki Etyenn ti priy Zezi? (w05-E 1/1 31)
Reflesir lo sa bann leson
Etyenn ti “ranpli avek lafwa ek lespri sen” e i “ti annan pwisans ek laprouvasyon Bondye.” Pourtan i ti dakor pour distribye manze. (Akt 6:2, 5, 8) Ki mannyer bann frer ki annan abilite oubyen bann gran responsabilite i kapab imit legzanp Etyenn? B
Portre B
Etyenn ti priy pour sa bann dimoun ki ti persekit li. Ki mannyer nou kapab demontre lanmour pour bann ki opoz e persekit nou? (Mat. 5:44-48)
Ki lezot fason ki ou kapab imit kouraz Etyenn dan ou lavi?
Reflesir lo Zeova ek son plan
Ki sa resi i ansenny mwan lo Zeova?
Ki mannyer sa resi i relye avek plan Zeova?
Akoz ou rekonesan ki Etyenn in ganny swazir pour diriz avek Zezi Kri dan lesyel?
Aprann plis
Aprann avek legzanp Etyenn ki mannyer nou kapab defann nou lafwa avek respe ek kouraz.
“Etyenn—‘ti annan pwisans ek laprouvasyon Bondye’” (bt 47-50 ¶9-19)
Ler pep Zeova i ganny persekite konmela, ki mannyer zot kapab demontre kouraz parey Etyenn?