53 POL
“Mon demann zot pour pran kouraz”
ZEZI li menm ti montre Sol sorti Tars “ki kantite i [setadir, Sol ti] pou bezwen soufer” konman en predikater e ansenyan sa bon nouvel. Eski sa ki Zezi ti dir ti vin vre? Apepre 20 an pli tar, Sol ki pli tar ti vin zapot Pol, ti ekri son dezyenm let pour bann Korentyen. Sa letan, i ti’n deza “ganny bate en kantite fwa e plizyer fwa [i] ti pros pour mor.” I ti’n osi eksperyans nofraz trwa fwa, en fwa i ti pas en lazournen ek en lannwit pe drive lo lanmer. Deplis, i ti annan en lot nofraz ki ti pe esper li.
Pol ti’n soufer dan en prizon Romen, Sezare, pour plis ki de-z-an akoz en zofisye koronpi ti krwar ki i ti pou ganny gous. Ler sa zofisye ti ganny ranplase par en lot, Pol ti demann sa nouvo gouverner pour ki i kapab ganny zize devan Sezar. Finalman, Pol ti ganny anmennen konman en prizonnyen lo bato. Koumsa ki Pol ti konmans en vwayaz vreman difisil ki ti apepre 3,000 kilomet pour al Ronm. Lik sa dokter byenneme ki ti pres avek Pol ek en lot zanmi Kretyen ki apel Aristark ti al lo bato ansanm avek Pol.—Kol. 4:14.
Ler bato ti ariv Mira, Lazi Miner, en zofisye Romen ki ti ansarz, ti transfer bann prizonnyen lo en bato Ezipsyen ki ti pe anmenn lagrenn Itali. Apre ki tou bann pasaze ti’n anbarke e bato ti kit por, bann gro divan ti konmans fer li vreman difisil pour zot vwayaze. De fwa, Lik i dir ki zot ti vwayaz ‘avek difikilte.’ Ler zot ti ariv Bon Por, Pol ti realize ki si zot pa reste kot sa por pandan liver, zot ti pou ganny en kantite problenm.
Alor, avek kouraz sa zapot ti koze. I ti averti Zilyis ki si zot kontinyen fer sa vwayaz, i ti pou danzere e bato ek son kargo ti pou ganny andomaze. Me Zilyis ti ekout konsey lezot e zot ti kontinyen zot vwayaz. Sa ti en desizyon ki Zilyis ti sirman regrete. “En gro divan . . . ti konmans soufle” lo zot e Lik i dir ki sa divan “ti tap lo sa bato.” Apre, sa gro divan ti vin en gro tanpet divan ki ti vreman fer per. Bato “ti pe sitan balote dan sa gro divan” pandan plizyer zour, ki bann maren ti zet lekipman bato dan delo. Personn pa ti manze pandan plizyer zour. Apre ki preski de semenn ti’n pase, Lik i dir ki zot “ti konmans perdi lespwar pour ganny sove.”
Ler Pol ti en prizonnyen lo en bato, i ti ede pour sov tou dimoun dan en gro tanpet lo lanmer
Zot lavi ti vreman an danze. Me avek konfidans Pol ti dir bann dimoun ki ti lo bato: “Mon demann zot pour pran kouraz.” I ti predir: “Napa ni enn parmi zot ki pou perdi son lavi, zis bato ki pou perdi.” Ler serten maren ti esey sove lo en kannot, Pol ti dir ki en kantite dimoun ti pou perdi zot lavi si zot pa reste lo bato. Alor zot ti koup lakord kannot e les li ale vid.
Lo granmaten avan soley leve, Pol ti reasir zot ki aprezan zot ti kapab manz sa ki zot ti anvi lo bato. I ti dir zot: “Ni en bren seve lo zot latet pa pou perdi.” Apre i ti remersye Zeova devan zot tou. Zot ti manz dipen e apre zot ti zet sa dible ki ti’n reste dan lanmer. Kouraz ki Pol ti demontre ti ankouraz lezot. Lik i rapel ki “zot tou zot ti pran kouraz.” Ler lizour ti fer, bato ti mont lo en ban disab e laroul ti konmans kas kas li. Me sa ki Pol ti’n dir ti vin vre. “Zot tou zot ti ariv ater.” Alafendefen zot ti sen e sof!
Apre ki zot ti konpran ki zot ti lo zil Malt. Pol ek son de zanmi pa ti tarde pour konmans prese. Bondye ti menm servi Pol pour fer mirak laba. En kantite dimoun Malt ti aksepte sa bon nouvel.
Pol pa ti zanmen aret demontre kouraz. Ler i ti finalman ariv Ronm pandan sezon prentan, i ti reste dan en lakaz avek bann solda ki ti vey li pour apepre de-z-an. Me i ti kontinyen prese e i ti kontinyen ganny enspire pour ekri bann let. Apre ki i ti’n ganny large, i ti kontinyen prese. Me pli tar, i ti ganny met dan prizon ankor en fwa, safwasi pour en dernyen fwa. Finalman, i paret ki bann Romen ti touy sa zonm fidel e kouraze. Me Pol pa ti per lanmor. I ti apel li “dernyen lennmi” e i ti konnen ki Zeova ti pou detrir lanmor. (1 Kor. 15:26) Dan sa letan ki Bondye in swazir, Pol ti pou ganny sa rekonpans ki lontan i ti pe espere, setadir lavi imortel dan lesyel e servi konman lerwa ek pret ansanm avek Zezi Kri.
Lir sa resi dan Labib:
Pour diskit lo la:
Ki mannyer Pol ti demontre kouraz dan sa resi?
Al pli o profon
1. Petet akoz Sol ti pli kontan servi son non Romen, Pol? (w08-E 1/3 12 ¶4-5)
2. Sa peryod letan ne-v-an, setadir sa letan ant ler Pol ti retourn Tars e ler i ti al reste Antyos i ganny apele konman son “bann lannen trankil.” Petet ki difikilte i ti gannyen pandan sa letan? (w00-E 15/7 26-27, bwat ¶3-4)
3. Eski Pol ti saz ler i ti demande pour zot espere avan ler zot kontinyen zot vwayaz pour al Itali? (Akt 27:9, 10; wp17.5 9 ¶3-4) A
Portre A: En bato kargo dan premye syek ki parey sa enn ki Pol ti anbark lo la Mira
4. Akoz bann zabitan lo zil Malt ti dir sa lo Pol: “Sa zonm i en mertriye”? (Akt 28:4; w15-E 1/10 9 ¶5-6)
Reflesir lo sa bann leson
Pol ti dir bann dimoun ki ti lo bato ki gras a Bondye, “ni en bren seve lo zot latet pa pou perdi.” (Akt 27:22, 34) Ki sa i ansenny ou lo sa ki Zeova i kapab fer e ki lefe sa i annan lo lafason ki ou vwar sa travay predikasyon?
Apre ki Pol ti’n fer lapriyer, bann dimoun lo bato “ti pran kouraz.” (Akt 27:35, 36) Dan ki sityasyon ki nou lapriyer i kapab ankouraz lezot? B
Portre B
Ki mannyer ou kapab imit kouraz ki Pol ti demontre dan sa resi?
Reflesir lo Zeova ek son plan
Ki sa resi i ansenny mwan lo Zeova?
Ki mannyer sa resi i relye avek plan Zeova?
Ki ou’n aprann lo Pol dan sa resi ki fer ou kontan ki i’n ganny swazir pour dirize ansanm avek Zezi dan lesyel?
Aprann plis
Aprann lo ki mannyer bann bato ti enportan pour vwayaze dan premye syek e ki mannyer bann Kretyen ti servi zot pour anons sa bon nouvel dan en kantite landrwa.
Ki mannyer bann ansyen fidel in imit landirans ek leta lespri sakrifis ki Pol ti demontre?