47 MARI, SER LAZAR
“I’n fer sa ki i kapab”
MARI ti apresye en kantite labonte Zezi Kri. I ti’n fer en kantite pour li, pour son ser Mart e osi pour zot frer ki zot byen kontan, Lazar. Zezi ti’n reste kot zot lakour Betani plizyer fwa e i ti ansenny zot en kantite keksoz lo Zeova e lo li menm. Zot ti’n vin vreman pros avek Zezi. Ler Lazar ti mor, Zezi ti resisit li!
Alor, Mari ti anvi fer en keksoz ekstraordiner pour son Senyer Zezi. I ti deside pour donn li en kado vreman presye. Sa ti en delwil parfimen! I ti annan “lanmwatye en lit . . . delwil nar pir byen ser” dan en boutey albat. Sa letan i ti kapab pran preski en lannen pour en labourer ganny ase larzan pour aste enn sa pti boutey delwil parfimen. Labib pa dir kan e kote Mari ti ganny sa trezor, me i kapab ki sa ti sa keksoz pli ser ki i ti annan.
I ti anvi donn Zezi en zoli kado me sa ti pou kout li ser
En zour ler Zezi ti pe manze Betani, Mari ti deside ki sa bon moman ti’n arive. I ti al kot Zezi, ouver sa boutey e avek bokou tandres i ti vid sa delwil parfimen lo latet ek lipye Zezi. Anmezir ki sa delwil an plis ti koule, Mari ti tir son vwal lo son latet e i ti eswiy lipye Zezi avek son seve. Dan son kiltir, serten ti kapab vwar li mal pour tir son vwal lo son latet, me la, sa ki ti pli enportan pour Mari ti pour li onor son Senyer. I ti pare pour imilye son lekor pour donn Zezi sa pli gran loner.
Sa bon loder pa ti tarde ranpli sa lakaz. Me pa tou dimoun ki ti kontan. Zida Iskaryot ti vreman ankoler e i paret ki i ti reisi konvenk serten zapot osi ki sa ki Mari ti’n fer i mal. Zida ti demande: “Akoz sa delwil parfimen pa ti ganny vann pour 300 denye e donn sa larzan bann pov?” Zis mazinen ki mannyer Mari ti’n kapab santi. I ti’n donn Zezi sa zoli kado avek tou son leker. Me aprezan sa bann zonm respektab, setadir bann zapot Zezi, ti ankoler e zot ti pe dispit avek li! I bezwen ki i ti vreman anbarase. Alor Zezi ti defann li.
I ti dir: “Les li trankil.” Sirman apre ki Zezi ti’n dir sa, tou ti trankil. Apre Zezi ti dir: “I’n fer en bon aksyon anver mwan.” Zezi ti montre ki Mari ti’n fer en keksoz pour li avek lanmour. Mari pa ti konnen, me lanterman Zezi ti pros pour arive e sa delwil ti pe prepar Zezi pour sa levennman tris. Dan zis detrwa mo, Senyer ti dir sa parol inoubliyab: “I’n fer sa ki i kapab.” Zezi ti osi dir: “Laverite mon dir zot, nenport landrwa dan lemonn kot sa bon nouvel i ganny anonse, sa ki sa madanm in fer pou ganny rakonte an son memwar.” Zezi ti konnen ki Mari ti kontan li e i ti demann kouraz pour fer sa ki i ti’n fer. Alor, Mari ti merit ganny felisite pour son zenerozite olye ganny kritike.
Apre sa, personn pa ti oze dir nanryen ankor. Zida ti ale, determinen pour li trai son met. Sirman sa ki Zezi ti dir ti tous leker Mari! Detrwa zour pli tar, Mari ti vreman konpran sa ki Zezi ti’n dir konsernan son lanterman. Son Senyer Zezi ki i ti vreman kontan ti ganny zize ilegalman, touye e finalman antere zis parey Zezi ti’n predir. Nou zis kapab imazin sa latristes ki sa bon madanm ki ti annan konpasyon ti santi. Dan sa moman vreman difisil, sirman ler Mari ti mazin sa ki Zezi ti’n dir li, sa ti rekonfort li.
Trwazyenm zour apre lanmor Zezi, en keksoz vreman merveye ti arive: Senyer Zezi ti resisite! Pa lontan apre sa, Zezi ti aparet avek plis ki 500 dimoun parmi son bann disip e tre probab sa zour, i ti donn lord son bann disip pour anons sa bon nouvel avek “dimoun dan tou nasyon.” (Mat. 28:19, 20) Zezi ti dir ki dan “sa bon nouvel” ki ti pou ganny anonse, dimoun ti pou osi tann koz lo sa kado ki Mari ti ofer Zezi avek limilite ek lanmour! Sirman Mari pa’n zanmen regrete ki avek kouraz i ti donn son Senyer sa ki i ti kapab. Mari pa ti zanmen bliye ki Zezi ti felisit li pour son lafwa ek kouraz avek sa parol: “I’n fer sa ki i kapab.”
Lir sa resi dan Labib:
Pour diskit lo la:
Ki mannyer Mari, ser Lazar, ti demontre kouraz?
Al pli o profon
1. Ki Labib i ed nou konpran lo personnalite Mari ek son ser Mart? (Lik 10:39, 40; Zan 11:20; ia 173 ¶5-6; 176 ¶17) A
Portre A
2. Kwa ki remarkab avek Zezi, lefet ki i ti pare pour ansenny Mari ek lezot madanm? (w99-E 1/9 30 ¶1-4)
3. Kwa ki ti fer sa delwil ki Mari ti vid lo Zezi annan en kantite valer? (Not letid dan Mat. 26:7, nwtsty-E “costly perfumed oil”) B
Indian nard: © Haijie Lu, licensed under CC BY-NC 4.0. Source; dried jatamansi: wasanajai/stock.adobe.com; alabaster jar: © The Trustees of the British Museum. Licensed under CC BY-NC-SA 4.0. Source
Portre B: Fler ek rasin Nardostachys jatamansi. I posib ki sa delwil ki Mari ti vid lo Zezi i sorti dan sa plant. En boutey albat pour delwil parfimen
4. Akoz Mari ti vid delwil lo latet Zezi e lo son lipye osi? (w10 1/12 6 ¶4, not)
Reflesir lo sa bann leson
Zezi ti dir ki “Mari in fer sa bon swa,” setadir i ti met keksoz spirityel premye. (Lik 10:42) Ki mannyer nou kapab imit son legzanp? C
Portre C
Zezi ti felisit Mari akoz i ti “fer sa ki i kapab.” Ki sa i montre nou lo sa ki Zeova i apresye dan nou? (Mark 12:29, 30; 14:8)
Ki lezot fason ou kapab imit kouraz Mari dan ou lavi?
Reflesir lo Zeova ek son plan
Ki sa resi i ansenny mwan lo Zeova?
Ki mannyer sa resi i relye avek plan Zeova?
Akoz ou rekonesan ki i posib ki Mari, ser Lazar, in ganny swazir pour al dirize ansanm avek Kris dan lesyel?
Aprann plis
Ki zanfan i kapab aprann avek Mari, Mart ek Zezi lo fer zanmi?
Reflesir lo ki mannyer Zezi ti apresye bann kado ser parey sa enn ki Mari ti donn li me osi bann pti kado parey sa de pti sou ki sa vev ti donnen.