Sa resi konsernan Salomon i montre nou sa ki kapab arive avek en serviter Zeova. I kapab fer en pese grav e apre krwar ki tou keksoz in ariv “en sel kou.” Oubyen i kapab dir: “I’n zis arive.” Me si i reflesir lo sa ki’n arive, i tre probab ki i pou realize ki avan ki i ti fer sa pese grav, i’n fer plizyer move desizyon. Petet in swazir bann zanmi ki pa kontan Zeova oubyen petet bann divertisman ki i’n swazir, bann sit Enternet ki i’n al lo la oubyen bann landrwa ki i’n ale, pa bon pour en Kretyen. Petet in osi aret priye, lir Labib, asiste renyon oubyen partisip dan sa travay predikasyon. Parey sa garson ki Proverb i koz lo la, i kapab ki i pa’n fer sa pese en sel kou parey i krwar me i’n fer sa pese akoz bann move desizyon ki i’n fer. Ki leson nou aprann? Nou pa zis bezwen evite fer pese me nou bezwen osi evite fer bann move desizyon ki kapab fer nou fer pese. I sanmenm sa ki Salomon ti eksplike apre ki i ti’n koz lo sa resi.—Mat. 5:29, 30. w24.07 16 ¶10-11

Ki sa trezor ki nou’n gannyen? I sa travay pour anons sa mesaz Rwayonm ki sov lavi. (2 Kor. 4:1) Lekel sa bann resipyan later? Zot reprezant bann serviter Bondye ki anons sa bon nouvel avek lezot. Dan letan zapot Pol, bann marsan ti servi bann resipyan later pour transport bann keksoz ki annan valer, parey manze, diven ek larzan. Pareyman, Zeova in konfye nou sa bon nouvel ki en mesaz ki presye. Avek led Zeova, nou kapab ganny sa lafors ki nou bezwen pour kontinyen anons sa mesaz fidelman. Parfwa nou kapab per ki dan predikasyon dimoun i opoz nou e ki zot pa anvi ekout nou. Ki mannyer nou kapab fer fas avek sa santiman? Mazin sa lapriyer ki bann zapot ti fer ler zot ti ganny en lord pour aret fer predikasyon. Zot pa ti les sa lafreyer fer zot aret fer predikasyon, o kontrer zot ti demann Zeova pour ed zot kontinyen koz avek lardyes. Zeova ti reponn zot lapriyer deswit. (Akt 4:18, 29, 31) Si parfwa ou osi ou annan lafreyer zonm, demann Zeova pour ed ou pour annan plis lanmour pour bann dimoun parski sa pou ed ou pour ou pa per pour anons sa bon nouvel avek zot. w24.04 16 ¶8-9

Sa lanmour ki nou annan pour Zeova i motiv nou pour sanktifye son non. Sa i fer ki nou anvi dir lezot ki sa bann keksoz ki Satan in dir lo Zeova, pa vre. (Zen. 3:1-5; Zob 2:4; Zan 8:44) Dan predikasyon, nou vreman anvi koz avek lezot konsernan Zeova e konsernan sa Bondye ki i ete. Nou anvi ki tou dimoun i konnen ki lanmour i sa pli gran kalite ki Zeova i annan, ki son fason dirize i drwat e zis e ki byento son Rwayonm pou tir tou soufrans e fer ki bann imen i anpe e zwaye. (Ps. 37:10, 11, 29; 1 Zan 4:8) Ler nou defann repitasyon Zeova dan predikasyon, nou sanktifye son non. Nou osi kontan parski nou pe fer sa ki nou sipoze fer konman bann Temwen Zeova. w24.05 18 ¶12