Respekte desizyon lezot

1-2. Akoz parfwa bann desizyon ki nou fer i diferan avek desizyon ki bann frer ek ser i fer?

ESKI en dimoun in deza ziz ou dan en move fason akoz en desizyon ki ou’n fer? Eski ou’n deza ziz en frer oubyen en ser dan kongregasyon akoz en desizyon ki i’n fer? San dout, laplipar nou pou reponn wi pour sa de kestyon.

² Nou pa devret sirprann ki parfwa bann desizyon ki nou fer i diferan avek desizyon ki lezot frer ek ser i fer. Akoz? Parski nou tou nou diferan. Nou tou nou annan nou prop pwennvi. Nou kiltir, fason ki nou’n grandi ek bann keksoz ki’n arive dan nou lavi i annan en lefe lo nou fason panse. Menm si nou annan diferan lopinyon, nou pa devret les sa anpes nou gard lape ek linite dan kongregasyon.—Efe. 4:3.

3. Kwa ki kapab fer nou ziz en frer oubyen en ser akoz en desizyon ki i’n fer?

³ Ler en frer oubyen en ser i fer en desizyon ki nou pa dakor avek, i kapab ki nou santi ki nou bezwen konvenk li pour sanz son desizyon oubyen ki nou bezwen dir lezot ki nou krwar i’n fer en move desizyon. I tre probab ki nou fer sa parski nou anvi ed li. Nou kontan nou bann frer ek ser e nou anvi ki zot ere. (Prov. 17:17) Alor, nou pa anvi ki zot fer en desizyon ki zot pou regrete pli tar oubyen ki kapab gat zot lanmitye avek Zeova.

4-5. Ki nou devret fer si en frer oubyen en ser i deside pour fer en keksoz ki diferan avek sa ki nou, nou ti pou’n fer?

⁴ Eski nou devret dir nou frer oubyen nou ser si nou krwar ki zot pe fer en move desizyon? Sa i depan lo plizyer keksoz. Par egzanp, si nou konnen ki i pe mazin fer en keksoz ki pa an armoni avek sa ki Labib i dir, nou devret esey ed li pour konpran ki sa ki i anvi fer i mal. Nou fer sa parski nou kontan li. (Prov. 27:5, 6) Me ki nou devret fer si en frer oubyen en ser i deside pour fer en keksoz ki pa kas enn bann lalwa Bondye me ki diferan avek sa ki nou, nou ti pou’n fer? Nou vwar larepons dan nou verse tenm. Sa verse i dir: “Pa zize dapre bann lopinyon personnel.”—Rom. 14:1.

⁵ Kantmenm sa, nou kapab vwar li difisil pour respekte son desizyon. Dan sa lartik, nou pou vwar akoz nou devret respekte desizyon lezot e ki mannyer nou kapab fer sa. Me premyerman, annou vwar serten sityasyon ki enplik bann desizyon personnel kot i kapab arive ki nou ziz nou frer oubyen nou ser.

KI DESIZYON LEZOT I FER KI KAPAB FER NOU ZIZ ZOT?

6-7. Donn serten legzanp kot i kapab arive ki nou ziz lezot akoz bann desizyon ki zot in fer.

⁶ Parey nou’n vwar pli boner, lafason ki nou’n grandi oubyen bann keksoz ki’n arive avek nou, i kapab fer nou krwar ki keksoz i bezwen ganny fer en serten fason e nou kapab osi krwar ki lezot i annan menm pwennvi avek nou. Me sa i pa toultan leka. Annou vwar detrwa legzanp. Legzanp 1: Avan ki en frer ti aprann laverite, i ti grandi avek son papa ki ti bwar tro bokou. Pandan en rankont, sa frer i vwar lezot Kretyen pe bwar lalkol. I dezapwente e i dir zot ki sa ki zot pe fer i mal. Legzanp 2: En ser ti annan en maladi grav me apre i ti byen. Pli tar, i aprann ki en lot ser i annan sa menm maladi ki i ti annan e i anvi ed sa ser. Alor, i met presyon lo sa ser pour fer menm tretman medikal ki i ti fer. Petet i dir li manz zis en serten kalite manze, pran en serten kalite latizann oubyen bann latizann natirel. Legzanp 3: Oparavan en frer ti dan en fo larelizyon. I ay lafason ki i ti pe viv son lavi sa letan. I ankoler ler i aprann ki en frer in asiste en lanterman dan en legliz.a

⁷ Annou vwar lezot legzanp. Legzanp 4: En frer ti’n grandi dan en letan kot laplipar dimoun ti santi ki i pa apropriye pour bann msye annan labarb e pour bann madanm met kannson pour bann levennman formel. Menm si sa frer i konnen ki in annan en azisteman konsernan sa topik, i kontinyen dir lezot ki bann msye Kretyen pa devret kit labarb e ki bann madanm Kretyen i devret met rob ler zot al renyon, lasanble e dan predikasyon. Legzanp 5: En ansyen ti konn en frer ki ti fer letid avanse e ki pli tar in aret servi Zeova. Aprezan en zenn frer ki dan menm kongregasyon avek sa ansyen in deside pou fer letid avanse. Sa ansyen i enkyet e i esey konvenk sa zenn frer ek son paran pour sanz zot nide.

8. (a) Kwa ki kapab fer en paran konmans ziz lezot paran? (b) Ki i kapab arive si nou kritik lezot dan kongregasyon?

⁸ Annou vwar en legzanp kot i kapab arive ki bann paran i ziz lezot paran. Legzanp 6: Konman en paran, ou fer tou sa ki ou kapab pour elve ou zanfan “dapre disiplin ek gidans Zeova.” (Efe. 6:4) Me i paret ki lezot paran Kretyen i donn zot zanfan plis laliberte. Par egzanp, zot les zot zanfan antre lakaz pli tar, pour zwe bann zwe video ki pa vyolan oubyen pour annan en telefonn ler zot ankor byen zenn. Sa i fer ki ou zanfan i santi ki ou tro strik e i dir: “Akoz ou pa parey paran mon bann zanmi?” En sityasyon koumsa i kapab fer ou konmans kritik sa bann paran. Anfet, nenport desizyon personnel ki en Kretyen i fer ki diferan avek sa ki pour nou i kapab fer nou ankoler e nou kapab ziz li. Par egzanp, i kapab ki nou pa dakor avek lafason ki i servi son larzan, konbyen fwa i al vakans oubyen kalite divertisman ki i swazir. Me nou pa devret les nou santiman vin pli enportan ki sa linite ki i annan dan kongregasyon.

9. Ki nou devret gard antet? (Vwar portre.)

⁹ En Kretyen i kapab fer en desizyon ki diferan avek sa ki en lot Kretyen i deside pour fer. Me sa pa toultan vedir ki enn in fer en bon desizyon e lot in fer en move desizyon. (Rom. 14:5) Ler Labib i dir ki nou bezwen “annan menm fason panse,” sa pa vedir ki nou bezwen mazin parey dan tou keksoz me i vedir ki nou tou nou bezwen swiv bann lalwa Zeova. (2 Kor. 13:11) Nou kapab konpar nou bann desizyon personnel avek bann swa ki nou fer ler nou vwayaze pour al en lot landrwa. Souvandfwa, i annan diferan larout ki anmenn ver menm destinasyon. Nou swazir sa larout ki nou kontan e ki pli meyer pour nou. Dan menm fason, bann Kretyen i kapab fer diferan swa konsernan bann keksoz personnel me nou destinasyon i reste parey, setadir: Nou anvi fer Zeova plezir. Alor, nou pa ziz lezot pour bann desizyon personnel ki zot fer.—Mat. 7:1; 1 Tesa. 4:11.

AKOZ NOU BEZWEN RESPEKTE DESIZYON LEZOT?

10. Dapre Zak 4:12, ki nou napa drwa fer e akoz?

¹⁰ Labib i donn plizyer rezon akoz nou devret respekte desizyon lezot. Annou vwar serten sa bann rezon. Nou napa drwa ziz lezot konsernan bann keksoz personnel. (Lir Zak 4:12.) Zeova i sa Enn ki donn lalwa e ki ziz dan en fason ki drwat. Zis li ki annan sa drwa pour met bann standar ek bann lalwa konsernan sa ki nou devret fer e pa fer. Alor bann frer ek ser i bezwen rann kont avek Zeova me pa avek nou. (Rom. 14:10) Nou napa drwa ziz oubyen kritik desizyon lezot dapre nou prop standar oubyen lopinyon.b

11. Ki mannyer nou kapab ede pour gard linite dan kongregasyon? (Vwar portre.)

¹¹ Zeova i anvi ki son bann serviter i ini me pa ki zot parey avek kanmarad. Anfet, Zeova i kontan ki nou tou nou diferan. Nou vwar sa dan kreasyon. Par egzanp, tou fey lo en pye dibwa i diferan. I napa enn ki parey en lot. Zis mazin konsernan bann imen. I annan plis ki wit bilyon dimoun lo later, me i napa de dimoun ki egzakteman parey fizikman oubyen ki annan menm personnalite. Zeova in kree nou pour nou diferan. I pa anvi ki nou egzakteman parey kanmarad. Me i anvi ki nou ini. Olye les nou bann diferans kree divizyon antre nou, nou promot lape. Pour nou, i pli enportan ki i annan linite dan kongregasyon olye nou prop lopinyon ek preferans.—Rom. 14:19.

KI MANNYER NOU KAPAB RESPEKTE DESIZYON KI LEZOT I FER?

12-13. Ki nou devret gard antet si nou santi ki en dimoun in pran “en move semen”? (Galat 6:1; vwar bwat “Ler ou pa dakor.”)

¹² Ler lezot i fer en desizyon konsernan bann keksoz personnel. Demann ou lekor: ‘Eski sa dimoun in pran “en move semen” oubyen eski i pe fer keksoz diferan avek lafason ki mwan, mon ti pou fer?’ Si i’n pran en move semen setadir, i pe fer en keksoz ki pa an armoni avek sa ki Labib i dir, demann ou lekor: ‘Eski mon kalifye pour koz avek li konsernan sa? Oubyen eski en lot dimoun setadir en ansyen ki devret koz ek li?’ Si ou kalifye pour ed li, esey rezonn avek li avek ladouser. (Lir Galat 6:1.) Me souvandfwa, ou pour vwar ki i pa pe fer en keksoz mal me i pe fer keksoz diferan avek lafason ki ou ti pou fer. Si sa i leka, pa bezwen dout li oubyen koz an mal lo sa desizyon ki i’n fer. Respekte son drwa pour li fer son prop desizyon e pa ziz li.—Rom. 14:2-4.

¹³ Reflesir lo sa legzanp. Si ou al en restoran avek en zanmi, eski ou pou ensiste ki i swazir menm manze ki ou swazir? Non. Ou pou respekte son drwa pour li swazir son prop manze. Menm si ou pa kontan sa ki i’n swazir pour manze, sa pou napa lefe lo ou parski ou pa pou bezwen sa manze. Osi, si ou ti dan plas sa zanmi, i tre probab ki ou pa ti pou anvi ki ou zanmi i swazir en manze pour ou dapre sa ki li i kontan. Dan menm fason, nou kapab demontre respe anver lezot par les zot fer zot prop desizyon e pa fors zot pour fer sa ki nou, nou anvi zot fer.

14. Ler ou pe fer bann desizyon personnel, ki mannyer ou kapab ede pour gard linite dan kongregasyon? (1 Korentyen 8:12, 13)

¹⁴ Ler ou fer en desizyon konsernan bann keksoz personnel. Ou kapab gard linite par fer tou sa ki ou kapab pour pa ofans lezot. (Lir 1 Korentyen 8:12, 13.) Parfwa, ou konnen ki i napa nanryen mal avek en desizyon ki ou pe al fer. Me si i pou ofans ou frer oubyen ou ser, eski sa i sa pli bon desizyon pour fer?c (1 Kor. 10:23, 24) Dan bann ka koumsa, olye ensiste lo ou drwa, mazin ki mannyer lezot i santi. (Rom. 15:1) Nou’n vwar ki lezot i devret respekte nou desizyon konsernan bann keksoz personnel zis parey nou, nou respekte zot desizyon. Me nou osi devret gard antet sa konsey Labib ki dan Romen 12:18, ki dir: “Fer tou sa ki depan lo zot pour viv anpe avek tou dimoun.” Alor, nou fer tou sa ki nou kapab pour kontinyen fer lape avek lezot e pour evite fer keksoz ki pou ofans zot.

15. Ki mannyer bann ansyen i ede pour gard linite dan kongregasyon? (1 Korentyen 4:6)

¹⁵ Bann ansyen i respekte desizyon ki lezot i fer. Bann ansyen i ede gard linite dan kongregasyon ler zot pa fer bann lalwa konsernan bann keksoz personnel e ler zot pa “al pli lwen ki sa ki’n ganny ekrir” dan Labib. (Lir 1 Korentyen 4:6.) Sa i osi vedir ki zot pa dir bann keksoz ki pa an armoni avek bann konsey ki sorti dan Labib ki dan nou bann piblikasyon. Osi ler en frer oubyen en ser i demann led bann ansyen, bann ansyen i fer atansyon pour pa donn konsey ki baze zis lo zot prop leksperyans. O kontrer zot donn konsey dapre Parol Bondye.—Iza. 48:17, 18.

16. Ki mannyer en ansyen i respekte desizyon ki ganny fer par konsey ansyen?

¹⁶ En ansyen i osi respekte bann desizyon ki ganny fer par konsey ansyen. Apre ki konsey ansyen in priye pour ganny lespri sen, zot in reflesir byen e aplik bann konsey ki dan Labib e zot in tonm lo en desizyon, sak ansyen i devret siport sa desizyon menm ler son lopinyon i diferan avek lamazorite lo konsey ansyen. (Efe. 5:17) Bann ansyen i osi fer sir ki zot swiv bann lenstriksyon sorti kot lorganizasyon e zot pa esey sanz sa bann lenstriksyon dapre zot prop lopinyon. Par egzanp, en ansyen pa pou servi zis en fraz dan en lartik dan nou bann piblikasyon pour siport son lopinyon e inyor larestan sa lartik.

17. Ki bann byenfe nou gannyen ler nou respekte desizyon lezot?

¹⁷ Parey nou’n vwar, sak serviter Zeova i diferan. Nou tou nou annan nou prop lopinyon ek preferans e sa i en bon keksoz. Lefet ki nou’n grandi dan en fason diferan e nou annan diferan personnalite, sa i fer kongregasyon zoli e i fer nou santi nou konfortab. Olye les nou bann diferans kree divizyon antre nou, nou fer zefor pour gard lape. Nou fer atansyon ki nou pa ofans lezot. Nou respekte desizyon lezot konsernan bann keksoz personnel. Ler nou fer sa, nou pou ganny rekonpanse, nou pou santi nou zwaye e ini avek bann frer ek ser dan kongregasyon.—Ps. 133:1; Mat. 5:9.