Reste pros avek Zeova pandan ki ou pe fer letid avanse

1-2. (a) Si ou deside pour fer letid avanse, ki ou bezwen kontinyen fer? (b) Ki i vedir pour “kontinyen al annavan dan sa menm direksyon e dan en fason annord”? (Filipyen 3:16)

SERTEN serviter Zeova in deside pour fer letid avanse apre ki zot in fini sa lekol ki obligatwar dapre lalwa. Petet zot santi ki si zot fer letid avanse, sa i kapab ed zot pour trouv en travay ki pou ed zot siport zot lekor dan zot servis pour Zeova. Si ou’n fini deside ki ou pou fer letid avanse, ki mannyer ou kapab fer sir ki ou reste pros avek Zeova? (Zak 4:8a) I kapab ki dan ou lekol avan, ou ti fer fas avek bann sityasyon ki ti fer li difisil pour reste fidel avek Zeova. Aprezan ki ou’n deside pour fer letid avanse, ou pou bezwen “kontinyen al annavan dan sa menm direksyon e dan en fason annord” setadir kontinyen servi Zeova fidelman zis parey ou deza pe fer.—Lir Filipyen 3:16.

² Sa lekspresyon Grek ki’n ganny tradwir “al annavan dan sa menm direksyon e dan en fason annord” ti souvan ganny servi pour dekrir lafason ki bann solda i mars dan en fason annord ler zot pe fer parad. Si ou deside pour fer letid avanse, ou pou bezwen “kontinyen mars annavan” dan servis Zeova e pa debout drwat oubyen retourn deryer. Dan sa lartik, nou pou vwar kat prensip Labib ki pou ed ou. Ou deza konn sa bann prensip, ou ti aplik zot dan lepase e ou pou bezwen kontinyen aplik zot ler ou pe fer letid avanse e apre ki ou’n fini sa letid.

GARD EN BON ROUTIN SPIRITYEL

3. Kwa ki kapab fer li difisil pour ou gard ou routin pandan ki ou pe fer letid avanse?

³ Kwa ki kapab fer li difisil pour fer sa? Ler ou fer letid avanse, ou pou vreman bizi e ou pou annan plis keksoz pour fer toulezour. Vi ki ou anvi fer byen lekol, i kapab ki ou konmans met bann keksoz ki pour lekol avan sa ki pour Zeova. Ou kapab menm konmans mank renyon, mank predikasyon, pa lir Labib toulezour e pa priy souvan.—Rev. 2:4.

4. Ki i vedir pour annan “bokou keksoz pour fer dan travay Senyer”? (1 Korentyen 15:58)

⁴ Lir 1 Korentyen 15:58. Pour en bisiklet kapab reste debout, ou bezwen kontinyen pedale. Dan menm fason, pour ou reste pros avek Zeova, ou bezwen kontinyen reste bizi dan son servis. I pour sa rezon ki Labib i dir ki nou bezwen annan “bokou keksoz pour fer dan travay Senyer.” Sa pa vedir ki ou senpleman pas en kantite letan dan bann aktivite spirityel. Me i vedir ki ou konn ou priyorite. Vwar ou lekor konman en serviter Zeova premye. Ou letid avanse i devret vin apre. (Mat. 22:37) En zenn ser ki apel Samantha i dir: “Mon ti promet mon lekor ki si mon letid avanse i enterfer avek mon servis pour Zeova, mon ti pou kite lekol.”

5. Ki ou kapab fer pour reste bizi dan servis Zeova?

⁵ Sa ki ou kapab fer avan ou konmans letid avanse. Konn ou priyorite byen. Demann ou lekor: ‘Ki mon pou fer pour fer sir ki mon kontinyen al renyon, predikasyon e fer letid personnel?’ (Zoz. 1:8; Mat. 28:19, 20; Ebr. 10:25) Ou kapab osi demann ou lekor: Ki mon ti fer ler mon ti ankor lekol oparavan pour mwan kapab fer sa bann keksoz? Si ou santi ki ou ti’n kapab fer keksoz pli byen, ki ou kapab fer aprezan pour amelyore? Fer tou sa ki ou kapab pour reste bizi dan servis Zeova anmezir ki ou fer letid avanse. Menm si i enportan pour fer byen dan ou letid, pa bezwen pas tro bokou letan pe fer li, ki ou napa ase letan ek lenerzi pour kontinyen reste pros avek Zeova.a—Mat. 6:24.

6. Ki bann kestyon ou kapab demann ou lekor pour vwar si ou ankor pe met Zeova premye dan ou lavi? (Vwar portre.)

⁶ Anmezir ki ou pe fer ou letid avanse, egzamin ou lekor tanzantan. Petet fer li tou le mwan. Demann ou lekor: ‘Eski mon ankor konn mon priyorite byen?’ Vey byen bann siny. Par egzanp, eski ou annan labitid mank renyon oubyen ariv an retar? Eski pandan renyon, ou mazin bann leson ki ou annan pour lekol oubyen eski ou asiste renyon zis atraver video konferans? Ou kapab osi demann ou lekor: ‘Eski mon pe priy oubyen lir Labib mwens ki avan? Eski mon al predikasyon zis akoz mon bezwen ale e mon anvi ki i fini vitman?’ Si ou vwar sa bann tre pe devlope, azir vit. Pa les ou letid avanse anpes ou met ou servis pour Zeova premye.

“KONTINYEN APRANN POUR BYEN REFLESIR”

7. Pandan ki ou pe fer letid avanse, kwa ki kapab annan en lefe lo ou fason panse?

⁷ Kwa ki kapab fer li difisil pour fer sa? Parfwa i annan bann kors ki ou pran ki kapab ansenny ou bann “filozofi ek fo rezonnman” sa lemonn enkli sa lansennyman ki i napa Bondye e ki lavi in vin par evolisyon. (Kol. 2:8) Ou osi kapab ganny ansennyen sa nide ki ou bezwen depan lo ou lekor. En zenn frer i dir: “Nou pa ti zis ganny ansennyen en abilite me nou ti ganny ansennyen en fason panse, enn ki souvandfwa pa ti an armoni avek fason panse Zeova. Par egzanp, nou ti ganny ansennyen ki pour nou reisi, nou bezwen depan lo nou lekor. Sa kalite fason panse ti fer mwan pa pran kont pwennvi Zeova. I ti fer li pli difisil pour mwan depan lo li.”

8. Akoz i enportan pour “kontinyen aprann pour byen reflesir”? (Proverb 5:1, 2)

⁸ Lir Proverb 5:1, 2. Labib i dir ki ou bezwen “kontinyen aprann pour byen reflesir.” Sa i vreman enportan parski Satan ek son lemonn pe toultan esey fer ou mazin parey zot zot mazinen. (1 Pyer 5:8) Pwennvi sa lemonn i kapab fer ou annan dout konsernan sa ki byen ek sa ki mal, konsernan lafason ki lavi ti konmanse e konsernan si Bondye i vreman egziste. Dimoun i kapab esey fer ou krwar ki zot pwennvi i “pli meyer” ki sa ki lezot i krwar. Me an realite, zot bann pwennvi i en“enbesilite pour Bondye.”—1 Kor. 3:18-20.

9. Ki ou kapab fer pour ou kontinyen aprann pour byen reflesir?

⁹ Sa ki ou kapab fer avan ou konmans letid avanse. Fer sir ki ou konvenki ki sa ki ou krwar ladan i vre avan ki ou konmans fer letid avanse. Demann ou lekor bann kestyon parey: ‘Akoz mon krwar dan Bondye? Ki mannyer mon konnen ki Labib i Parol Bondye? Kwa ki konvenk mwan ki bann standar moral ki dan Labib i pli siperyer ki sa ki pour lemonn?’ Ou kapab osi reflesir lo sa letan ki ou ti ankor dan ou lekol avan. Demann ou lekor: ‘Ler lezot ti dir ki zot krwar dan evolisyon, eski mon ti konmans annan dout ki Bondye i vreman egziste e ki i’n kree tou keksoz? Eski i ti difisil pour mwan pa fer bann move keksoz ki mon bann kanmarad lekol ti pe fer?’ Si ou santi ki ou ti’n kapab fer pli byen, ki ou kapab fer la konmela pour ou pli konvenki ki sa ki Labib i dir i vre e ki sa ki Labib i dir i toultan pli bon pour ou? Anmezir ki ou pe fer letid avanse, ou bezwen determinen pour ou kontinyen aprann pour byen reflesir.—2 Tim. 2:16-18.b

10. Ki mannyer ou kapab kontinyen byen reflesir?

¹⁰ Anmezir ki ou pe fer letid avanse, egzamin ou lekor tanzantan. Demann ou lekor: ‘Eski mon pe ganny enfliyanse par move konportman bann dimoun otour mwan? Eski mon remarke ler en lansennyman dan lekol i baze lo lasazes imen e i pa laverite? Eski mon konvenki ki zis Rwayonm Bondye ki pou kapab rezourd problenm imen?’ Pour ou kapab kontinyen aprann pour byen reflesir, ou bezwen kontinyen lir e medit lo Parol Bondye e aplik sa ki ou aprann. Ler ou fer sa, sa pou ed ou pour pli konvenki ki tou sa ki Labib i dir i vre.—1 Tim. 4:15.

ORGANIZ OU LETAN BYEN

11. Ler ou pe fer letid avanse, akoz i kapab difisil pour servi byen ou letan?

¹¹ Kwa ki kapab fer li difisil pour fer sa? Anmezir ou pe fer letid avanse, ou pou bezwen fer bann laklas e etidye pour ou bann leson e sa pou pran en kantite ou letan. Ou kapab vreman bizi sirtou ler ou annan bann legzanmen oubyen ler ou annan bann proze pour fini. Si ou pa organiz ou letan byen, ou pou kapab vreman strese e santi ou fatige laplipar ditan. I pour sa rezon ki i enportan pour ou pran swen avek ou lekor fizikman e emosyonnelman.

12. Ki ou bezwen fer letan pour fer? (Efezyen 5:15, 16)

¹² Lir Efezyen 5:15, 16. Ou kapab vwar li difisil pour “servi byen ou letan.” Sa i akoz ou annan en kantite keksoz pour ou fer. Par egzanp, menm si ou bezwen etidye pour ou bann laklas, ou bezwen pas letan avek ou fanmir ek bann frer ek ser dan kongregasyon. (Ps. 133:1; Prov. 18:1) Me sa ki pli enportan i pour fer bann keksoz ki pou fer ou reste pros avek Zeova. (Mat. 6:33) Petet ou kapab annan responsabilite dan ou fanmir e ou osi annan en travay. Ou bezwen osi pran swen avek ou lasante par ganny ase repo e fer legzersis. (Ekle. 4:6; 1 Tim. 4:8) Pour ou kapab fer tousala, ou bezwen organiz byen ou letan.

13. Ki ou kapab fer pour ou servi byen ou letan?

¹³ Sa ki ou kapab fer avan ou konmans letid avanse. Labib i dir ki en dimoun ki fer plan pour reisi. (Prov. 21:5) Alor annan en bon progranm avan ler ou konmans letid avanse. Pour ed ou fer sa, reflesir lo sa letan ki ou ti ankor dan ou lekol avan e demann ou lekor: Eski mon ti kapab organiz mon letan pour fer tou bann keksoz enportan? Si ou santi ki ou ti’n kapab fer keksoz pli byen, ki ou kapab fer aprezan pour amelyore? Fer sir ki ou annan en bon progranm pour ki ou pa santi ou toultan strese.c

14. Ki bann kestyon ki kapab ed ou pour egzamin ou lekor?

¹⁴ Anmezir ki ou pe fer ou letid avanse, egzamin ou lekor tanzantan. Demann ou lekor: ‘Eski mon pe ganny ase letan pour mwan repoze e fer legzersis? Eski mon annan letan pour pas avek bann frer ek ser dan kongregasyon? Eski mon konplet mon bann travay lakour aler? Si non, eski sa i akoz mon annan tro bokou keksoz pour fer oubyen akoz mon tarde pour fer sa bann keksoz? Eski lezot dimoun enkli mon fanmir i dakor ki mon bezwen fer serten sanzman?’ Ki swa ou bezwen fer serten sanzman dan ou progranm oubyen ou bezwen devlop plis disiplin, fer li deswit. Ou menm kapab koz avek lezot ki organiz byen zot letan.—Prov. 11:14.

KONTINYEN “MARS AVEK BANN KI SAZ”

15. Ki bann difikilte ki ou kapab rankontre ler ou pe fer letid avanse?

¹⁵ Kwa ki kapab fer li difisil pour fer sa? Pandan ki ou pe fer letid avanse, ou bann kanmarad lekol i kapab envit ou pour pas letan avek zot apre lekol. I kapab ki ou anvi pas letan avek zot. Sa i kapab akoz ou apepre menm laz avek zot, petet ou enterese avek serten keksoz ki zot enterese avek e ou pas laplipar ou letan avek zot dan laklas. Ou menm kapab santi ki ou annan plis keksoz an komen avek ou bann kanmarad lekol ki avek serten frer ek ser dan kongregasyon. Me ou bezwen fer atansyon. Menm si ou parey avek zot dan serten fason, ou osi diferan avek zot parski ou anvi fer Zeova plezir e zot zot pa anvi fer sa. Pli ou pas letan avek zot, pli ou pou konmans mazin parey zot. (1 Kor. 15:33) Sanmenm sa ki ti arive avek en frer ki apel Michael ki ti etidye pour 4 an pour vin en elektrisyen. I dir: “Mon ti pas plis ki 40 erdtan par semenn avek bann koleg travay ki ti annan bann move fason koze, ki ti ekout bann lanmizik ki pa ti apropriye pour bann Kretyen e ki ti napa respe pour bann madanm. Mon ti konmans krwar ki sa ki zot ti dir e fer pa ti sitan mal.”

16. Ki i vedir pour “mars avek bann ki saz”? (Proverb 13:20)

¹⁶ Lir Proverb 13:20. Labib i averti nou konsernan bann danze ki i annan ler nou annan bann move frekantasyon. De lot kote, Labib i dir ki “sa enn ki mars avek bann ki saz pou vin saz.” I kler alor ki nou ganny enfliyanse avek bann dimoun ki nou swazir pour pas letan avek, ki swa nou ganny enfliyanse dan en bon fason oubyen dan en move fason. Alor vin zanmi avek bann ki kontan Zeova parey ou e ki vreman anvi sa ki meyer pour ou.—Ps. 101:6, 7; 119:63.

17. Ki ou kapab fer pour evit bann move frekantasyon?

¹⁷ Sa ki ou kapab fer avan ou konmans letid avanse. Deside ki kantite letan ou pou pase avek ou bann kanmarad lekol e ki kalite lanmitye ou pou annan avek zot. En frer ki apel Trenton i dir: “Mon zantiy avek mon bann kanmarad lekol e mon pa pas letan avek zot apre lekol. Mon vwar zot konman mon bann kanmarad dan laklas me pa konman mon bann zanmi pros.” Ki ou pou fer pour fer sir ki ou pa pas tro bokou letan avek ou bann kanmarad lekol oubyen annan en lanmitye tro pros avek zot? Pour ed ou reponn sa kestyon, demann ou lekor: ‘Ki mannyer mon ti fer sa ler mon ti dan mon lekol avan?’ Si ou santi ki ou ti’n kapab fer keksoz pli byen, ki ou kapab fer aprezan pour amelyore? Determinen pour kontinyen “mars avek bann ki saz” e pa pas tro bokou letan avek bann ki pa kontan Zeova.d

18. Ki kestyon ou devret demann ou lekor? (Vwar portre.)

¹⁸ Egzamin ou lekor tanzantan. Demann ou lekor: ‘Eski mon pe vin tro pros avek mon bann kanmarad lekol? Eski zot labitid, fason koze ek latitid pe konmans annan en lefe lo mon fason koze ek mon fason panse? Ki mannyer Zeova i santi konsernan sa lanmitye ki mon annan avek mon bann kanmarad lekol?’ (Ps. 1:1) Si ou santi ki ou bezwen fer sanzman, fer li deswit. Fer sir ki ou bann pli bon zanmi i bann ki kontan Zeova parey ou. Osi pa ezite pour anons sa bon nouvel avek ou bann kanmarad lekol. Ou annan sa bon loportinite pour ed zot aprann konn laverite.

PREPAR OU DAVANS

19. Ki mannyer ou kapab prepar ou pour sirmont bann difikilte ki kapab fer li difisil pour ou servi Zeova ler ou pe fer letid avanse? Donn en legzanp.

¹⁹ En dimoun ki pe al marse dan bwa i bezwen fer sir ki i annan serten keksoz avan ki i al sa marse. I bezwen fer sir ki i an bonn sante, son lenz i apropriye e i annan en lobzektif setadir i konnen kote i pe ale. Menm si i pa konn tou keksoz ki kapab ariv li pandan ki i pe marse, sa bann keksoz pou ed li ariv kot i pe ale. Ou kapab konpar sa avek bann keksoz ki pou ed ou ler ou pe fer letid avanse. Ou bezwen annan en lafwa for, met lo ou “tou lekipman batay ki Bondye i donnen” e annan en lobzektif. Ou lobzektif i pa pour ou ganny en kantite larzan oubyen vin en dimoun enportan me pour ou glorifye Zeova dan tou sa ki ou fer.—Efe. 6:11-13; 1 Kor. 9:26, 27; 10:31.

20. Ki mannyer ou kapab “kontinyen teste [ou] lekor pour vwar si [ou] dan lafwa”?

²⁰ Labib i ankouraz nou: “Kontinyen teste zot lekor pour vwar si zot dan lafwa, kontinyen fer sir ki kalite dimoun zot ete.” (2 Kor. 13:5) Ou kapab fer sa anmezir ou pe fer letid avanse. Egzamin ou lekor tanzantan pour vwar ki mannyer ou pe fer dan sa bann domenn swivan. Eski ou pe gard en bon routin spirityel? Eski ou pe protez ou fason panse kont lasazes sa lemonn? Eski ou pe servi byen ou letan? Eski ou pe fer zanmi avek bann frer ek ser dan kongregasyon e evit bann move frekantasyon? Sa i bann kestyon ki ou bezwen demann ou lekor ki swa ou pe lekol, ou pe travay oubyen ou en lot landrwa. Dan nenport ki sirkonstans ki ou ladan, determinen pour kontinyen annan en lafwa for. Si ou fer sa, ou kapab asire ki Zeova pou beni ou bann zefor.—Prov. 3:5, 6.