Fer bann desizyon saz konsernan letid avanse

1-2. (a) Ki desizyon bann zenn i bezwen fer? (b) Ki savedir “letid avanse”? (Vwar “Ki sa i vedir?”)

“KI OU ti pou kontan fer ler ou gran?” Si ou en zenn, i tre probab ki ou’n ganny demande sa kestyon plizyer fwa. Sa pli bon karyer ki ou kapab swazir i pour servi Zeova dan servis a plen tan. Me an menm tan, ou pou bezwen travay pour pran swen avek ou lekor. (2 Tesa. 3:10) San dout, ou’n reflesir lo sa kalite travay ki ou pou kapab fer dan lavenir.

² Apre ki zot in diskit avek zot paran konsernan kalite travay ki zot kapab fer, serten zenn in deside pour fer letid avanse apre ki zot in fini sa lekol ki obligatwar dapre gouvernman.a Petet ou’n mazinen si ou devret fer letid avanse ou osi. Si wi, ki kalite? Dan sa lartik, nou pou diskit lo bann prensip Labib ki pou ed ou reflesir byen konsernan ou ledikasyon. Ler ou reflesir byen, sa pou ed ou fer bann desizyon saz. Menm si sa lartik i prensipalman pour bann zenn, i kapab ed bann Kretyen ki pe mazin fer letid avanse. Sa bann prensip i kapab osi ed bann paran pour gid zot zanfan.

ESKI OU DEVRET FER LETID AVANSE?

3. Akoz serten Kretyen i kapab deside pour fer letid avanse?

³ Dan serten pei, en dimoun i kapab pran swen avek son lekor san ki i bezwen fer letid avanse. Me dan lezot pei, letid avanse i kapab ed en dimoun pour trouv en travay kot i ganny plis larzan oubyen kot i annan en pli bon ler travay. Pour en Kretyen, sa i kapab permet li pour pas plis letan dan predikasyon oubyen dan lezot form servis dan lorganizasyon Zeova. Me bann ki deside pour fer letid avanse i bezwen fer bann sakrifis e sa i kapab anmenn serten problenm pour en Kretyen.

4. Lekel ki devret deside si en Kretyen pou fer letid avanse? (Vwar not.)

⁴ Labib i dir ki tou dimoun i bezwen “desarz son prop responsabilite.” (Gal. 6:5, vwar not letid.) Sa i vedir ki bann Kretyen ki en adilt i bezwen fer son prop desizyon konsernan si i pou fer letid avanse.b Bann paran osi i responsab pour fer en desizyon konsernan ledikasyon zot zanfan ki anba laz. (Efe. 6:1) Zot kapab prepar zot zanfan pour ki ler i vin adilt, i kapab fer bann desizyon saz konsernan son ledikasyon.—Prov. 22:6.

5. Kan ki en dimoun i devret konmans mazin konsernan letid avanse e akoz? (Vwar portre.)

⁵ Souvandfwa bann zenn i bezwen fer en desizyon konsernan si zot pou fer letid avanse avan zot fini lekol ki obligatwar dapre gouvernman. Byensir, i saz pour en zenn koz lo sa size avek son paran avan ki i bezwen fer sa desizyon. Sa pou donn zot letan pour travay ansanm pour fer resers konsernan bann diferan opsyon ki disponib. Petet zot pou kapab swazir bann size spesifik kot lekol ki pou ed sa zenn dan son letid avanse oubyen pour ganny en travay a lavenir. Eski zot bezwen fer en desizyon avan ki sa zenn i fini lekol? Pa neseserman. (Prov. 21:5) Serten zenn in swazir pour fini lekol, trouv en travay e konmans fer pionye pandan ki zot pe deside si zot pou fer letid avanse oubyen non. Menm pli tar dan son lavi, en dimoun i kapab mazin pour fer en desizyon koumsa.

6. Kwa ki kapab ed en dimoun fer en desizyon saz konsernan letid avanse?

⁶ Kwa ki kapab ed ou pour fer en desizyon saz konsernan letid avanse? Fer sir ki ou priy konsernan sa size. (Zak 1:5) Osi, reflesir lo sa de keksoz swivan. Premyerman, ou bezwen onnet avek ou lekor e analiz ou motivasyon. (Ps. 26:2) Dezyenmman, reflesir lo sa ki ou pou bezwen fer pour ganny sa ledikasyon ki ou anvi. (Prov. 14:15) Aprezan, annou vwar sak sa bann pwen.

ANALIZ OU MOTIVASYON

7. Ki en Kretyen i devret fer atansyon ler i pe mazin fer letid avanse?

⁷ Si ou pe mazin fer letid avanse, ou bezwen demann ou lekor en kestyon enportan, ‘Akoz mon anvi sa kalite ledikasyon?’ En kantite dimoun i fer letid avanse parski zot anvi en travay ki zot kontan oubyen en travay ki pey byen. Eski i mal pour anvi sa? Pa neseserman. (1 Tim. 5:8) Me Labib i averti nou kont sa danze pour tay deryer keksoz materyel oubyen pour mazinen ki zis larzan ki kapab protez nou. (Prov. 23:4, 5; 1 Tim. 6:8-10; 1 Zan 2:17) Si sa rezon akoz ou anvi fer letid avanse i pour ou vin ris oubyen pour vin enportan, ou pa pou vreman ere e ou kapab menm elwannyen avek Zeova.

8-9. (a) Ki mannyer bann Kretyen i devret vwar letid avanse? (Matye 6:33) (b) Ki ou aprann avek sa ki Josefina, Morine ek Iris ti dir?

⁸ Ki mannyer en Kretyen i devret vwar letid avanse? Napa nanryen ki devret pli enportan pour nou ki servi Zeova. (Mat. 22:37, 38; Fili. 3:8) Alor, ou devret vwar letid avanse konman en fason pour siport ou lekor pandan ki ou pe konsantre lo servi Zeova avek tou ou leker.—Lir Matye 6:33.

⁹ Remark sa ki ti ed serten Kretyen pour kontinyen annan sa bon pwennvi konsernan letid avanse. Josefina, ki sorti Chile, i dir: “Mon ti fer letid avanse pour mwan kapab ganny en louvraz ki ti pou permet mwan pas plis letan dan servis Zeova. Mon ti fer sir ki sa kors ki mon ti pe aprann pa ti vin sa keksoz pli enportan dan mon lavi me mon lanmitye avek Zeova ki ti sa keksoz pli enportan.” En ser ki apel Morine ti swazir en kors enn an pour vin en hairdresser. Akoz i ti fer sa? I dir: “Mon ti anvi al servi kot i annan bezwen pour plis proklanmater. Alor, mon ti rod en kors ki ti pou ed mwan atenn sa lobzektif. Apre ki mon ti’n fini sa kors, mon ti travay konman en hairdresser e mon ti anmas larzan pour mwan kapab al servi dan en landrwa kot i annan bezwen pour plis proklanmater. Enn fwa ki mon ti al reste dan en landrwa kot i ti annan plis bezwen, mon ti kapab trouv en louvraz gras a sa kors ki mon ti’n fer.” Iris, ki ti pran en kors pour vin en dantis ki ti dire pour pli lontan i dir: “Letid avanse i kapab annan serten lavantaz me i pa pou zanmen fer ou vreman zwaye e vreman reisi. Pour ou kapab vreman zwaye, ou bezwen gard sa antet: Si ou met Zeova premye dan ou lavi, i pou fer sir ki ou zwaye e ki ou annan tou sa ki ou bezwen.” Ler nou lanmitye avek Zeova i sa keksoz pli enportan dan nou lavi, nou pou fer bann desizyon ki pou fer nou ere pour touzour.

REFLESIR LO SA KI OU BEZWEN FER POUR GANNY SA LEDIKASYON KI OU ANVI

10. Ki mannyer nou kapab aplik sa prensip ki dan Deterononm 32:29 ler nou pe deside si nou pou fer letid avanse oubyen non?

¹⁰ Petet ou deza pe mazin lo en kors spesifik ki ou anvi fer. Me i ti pou osi byen ki ou reflesir lo lezot posibilite, par egzanp en lot louvraz dan sa menm domenn oubyen enn dan en lot domenn. (Konpar Proverb 18:17.) Ozordi i annan plis opsyon ki i ti annan dan lepase. Par egzanp, en dimoun i kapab fer en kors lo Enternet. Ou kapab osi reflesir lo si ou kapab pran swen avek ou lekor finansyerman san ki ou bezwen fer letid avanse. Par egzanp, Johanna ki reste Finlenn pa ti fer letid avanse. I dir: “Apre ki mon ti fini lekol, mon ti konmans fer pionye e travay a mitan. Mon’n fer diferan kalite travay. Me kantmenm sa, mon’n vwar ki mannyer Zeova in toultan gard son promes pour donn nou sa ki nou bezwen.” Gard antet ki tou desizyon ki ou fer konsernan si ou pou swazir pour fer letid avanse e ki kalite letid ou pou fer, i annan son lavantaz ek son dezavantaz. Alor, demann ou lekor: ‘Eski i annan plis lavantaz ki dezavantaz?’ (Lir Deterononm 32:29; 1 Kor. 10:23) Annou vwar serten pwen pour ed ou reponn sa kestyon.

11. Akoz i enportan pour reflesir lo lakantite letan ki ou bezwen sak semenn pour fer letid avanse? (Vwar portre.)

¹¹ Lakantite letan ki ou pou bezwen pase sak semenn. Reflesir lo lakantite erdtan ki ou pou pase sak semenn pe asiste bann laklas, pe aprann sa travay e pe fer bann devwar lakour. Eski ou pou ankor annan letan pour gard ou routin spirityel e pour desarz bann responsabilite ki ou annan dan ou fanmir? (Fili. 1:10) Eski ou letid pou fer ou santi ou tro fatige pour prepare pour renyon oubyen pour fer letid personnel? Sanmenm sa ki ti arive avek Jeroz ki sorti Lenn. I dir: “Mon ti vwar li difisil pour konsantre lo bann aktivite spirityel. Parfwa mon ti mank renyon. Ozordi mon santi ki mon pa ti’n devret fer sa kors parski i ti pran tro bokou mon letan ek lenerzi.” De lot kote, serten kors pa pran bokou letan. I annan serten ki a mitan e dan lezot ou pa bezwen fer bokou devwar lakour. Par egzanp, Rabeca ki sorti Mozanbik, i satisfe avek sa letid ki i’n swazir. I dir: “Sa kors ti zis de-z-erdtan par zour. Sa ti permet mwan pour kontinyen fer pionye ordiner.”

12. Kwa ki kapab ed en dimoun pour servi byen son letan ler i pe fer bann desizyon konsernan letid avanse? (Eklezyas 12:1)

¹² Lakantite letan ki i pou pran pour ou fini sa kors. Reflesir lo lakantite mwan oubyen lannen i pou pran pour ou fini sa kors. Si ou fer sa kors, eski ou pou pe servi ou letan byen? (Efe. 5:15-17) Si ou en zenn, eski sa kors pou permet ou donn Zeova ou meyer pandan ki ou ankor zenn, petet menm dan servis a plen tan? (Lir Eklezyas 12:1.) Eski i annan lezot kors dan menm domenn ki pli kourt? Par egzanp, bann progranm kot ou kapab aprann en metye dan en landrwa travay e bann lekol vokasyonnel ki dire pour mwens letan e ki pli bon marse ki bann liniversite. Mario ki sorti Chile, i dir: “Mon ti swazir en kors de-z-an ki ti pli bon marse ki en kors liniversite. Mon ti annan laklas zis kat fwa par semenn e sa ti permet mwan pour fer pionye pandan ki mon ti pe lekol.”

13. Ki i kapab arive si sa kors i lwen avek kot ou reste?

¹³ Sa landrwa kot ou pou al fer letid avanse. Petet ou kapab trouv en kors dan en landrwa ki pros avek kot ou reste. Me ki i kapab arive si ou trouv en kors ki lwen avek kot ou reste oubyen si ou bezwen al reste kot sa lekol ansanm avek lezot etidyan? Gard antet ki si ou al reste lwen avek ou fanmir, sa i kapab vin en danze pour ou spirityelman, sirtou si ou pou reste avek bann dimoun ki pa servi Zeova. (Prov. 22:3; 1 Kor. 15:33) Matias, ki sorti Mozanbik, ti pran en kors ki pa ti ser e ki ti dire pour enn an. Me kantmenm sa, i regret son desizyon. Akoz? I dir: “Pour sa enn an ki mon ti pe fer sa kors, mon ti bezwen reste lwen avek mon fanmir. Toulezour mon ti ganny tante pour fer bann keksoz mal. Mon ti pou konsey tou dimoun pour pa al fer en kors kot ou pou bezwen al reste lwen avek ou fanmir.” En ser ki reste Larisi, i dir: “Vi ki mon ti reste dan lakour avek mon paran e pa avek lezot etidyan, mon ti kapab evit en kantite danze ek tantasyon.” Ou menm kapab trouv en kors lo Enternet.

14. Ki mannyer sa prensip dan Lik 14:28 i kapab ed ou pour fer en bon desizyon konsernan letid avanse?

¹⁴ Konbyen sa kors pou koute? Serten kors pa ser oubyen gouvernman i kapab peye pour ou. Dan bann ka koumsa, letid avanse i en fason kot ou kapab aprann bann abilite ki ou bezwen pour ganny en travay san ki ou bezwen fer en kantite depans. Me dan serten ka, letid avanse i ser. I kapab osi annan lezot depans. Par egzanp, petet ou bezwen fer bann laklas prive pour ou kapab ganny aksepte dan en lekol. Serten kors i sitan ser ki i pran bann etidyan plizyer lannen pour fini pey sa kors. Adilson, ki sorti Mozanbik, i regrete ki in swazir sa kors ki in fer. I dir: “Mon fanmir pa ti kapab aste serten kalite manze ek lezot keksoz de baz parski zot ti pe peye pour mwan fer en kors kat-r-an.” Ler ou pe reflesir lo en kors oubyen lo en progranm, demann ou lekor: ‘Konbyen i pou koute? Eski mwan oubyen mon fanmir pou kapab peye pour sa kors? Eski i annan en lot opsyon ki pa tro ser?’ (Lir Lik 14:28.) ‘Si mon pa kapab pey deswit, ki kantite letan i pou pran pour mwan fini peye? Eski sa travay ki mon pou gannyen a lavenir, pou donn mwan ase larzan pour siport mon lekor e pour mwan pey sa det?’—Prov. 22:7.

15. Akoz ou devret reflesir lo kalite louvraz ki disponib dan sa landrwa kot ou reste avan ki ou deside ki kalite letid avanse ou pou fer?

¹⁵ Bann travay ki ou kapab gannyen. Reflesir lo bann travay ki disponib dan sa landrwa kot ou reste oubyen kot ou ti pou kontan reste. Eski sa kors ki ou’n fer pou ed ou ganny en travay? Dan serten kors, ou pa ganny ansennyen bann abilite pratik ki ou pou bezwen pour fer en travay. O kontrer, zot zis konsantre lo ansenny bann nide e lo bann size akademik dan plas ansenny bann abilite ki pou ed ou fer en travay spesifik. (Kol. 2:8) En ser ki sorti Lenn, i dir: “Sa kors ki mon ti swazir pa ti ed mwan pour devlop bann abilite pratik ki mon anplwayer ti pe rode. Sa i fer ki mon pa ti kapab trouv en travay dan sa domenn ki mon ti’n etidye.” De lot kote, serten kors i dan bann domenn kot napa bokou louvraz. Sublime ki reste Repiblik Lafrik Santral, ti fer en kors lo ki mannyer pour repar erkonn. Me i dir: “Kot mon reste laplipar dimoun i repar zot bann keksoz zot menm. Alor i ti difisil pour mwan ganny en travay.”

16. Akoz i byen pour reflesir lo kalite travay ki en kors pou ed ou gannyen?

¹⁶ Reflesir lo sa kalite travay ki sa kors pou permet ou gannyen. Eski ou pou kontan sa travay? (Ekle. 3:12, 13) Ki mannyer sa landrwa travay pou ete e avek ki ou pou travay? Eski sa domenn ki ou pe al travay ladan i koni konman en domenn ki danzere, konpetitif oubyen ki pou stres ou? Ki kantite larzan en dimoun i normalman gannyen dan sa kalite travay? Eski ou pou ganny ase pour siport ou lekor? Eski ou pou bezwen kontinyen fer bann pti kors pour kapab gard sa travay? Pli enportan, eski i pou permet ou pour met Rwayonm premye dan ou lavi? (Ekle. 12:13) Byensir, ler napa bokou travay ki disponib, ou pa pou toultan kapab ganny sa travay ki ou ti pou kontan, me sa kors ki ou swazir i kapab annan en lefe lo si ou pou kapab trouv en travay dan lavenir. Tabitha, ki sorti Lenn, ti swazir en kors sis mwan pour aprann koud. I dir: “Mon ti mazinen ki sa travay koudriyez ti pou ed mwan fer pionye. Dimoun ti pou toultan bezwen koudriyez. Mon ti pou annan en progranm fleksib e mon pa ti pou bezwen en kantite larzan pour konmans sa travay.” Sa kors ti ed Tabitha trouv en travay pour li kapab kontinyen fer pionye.

17. (a) Ki mannyer en Kretyen i kapab trouv bann lenformasyon ki i bezwen pour fer en desizyon saz konsernan letid avanse? (b) Ki bann prensip Labib ki kapab ed li fer en bon desizyon? (Vwar bwat “Bann prensip Labib pour reflesir lo la.”)

¹⁷ Dan sa lartik, nou’n koz lo plizyer keksoz ki ou kapab reflesir lo la konsernan letid avanse. Ki mannyer ou kapab trouv bann lenformasyon ki ou bezwen pour fer en desizyon saz? Fer resers konsernan bann kors par al vizit sa bann lekol oubyen al lo zot sit Enternet. Fer resers pour gete ki kantite travay i annan dan sa domenn ki ou anvi travay ladan. Ou kapab osi koz avek bann dimoun ki’n fer en kors en pe parey oubyen ki travay dan sa domenn. (Prov. 13:10) Demann zot: “Ki bann lavantaz ek dezavantaz sa kors oubyen sa travay?” Koz avek bann ki pe servi Zeova dan lazwa. (Prov. 15:22) Ki kalite kors ek travay ki zot sizere ou pran? Zot kapab menm koz lo en travay ki ou pa ti’n mazin lo la.

18. Ki nou devret gard antet?

¹⁸ Parey nou’n vwar, letid avanse i kapab annan son lavantaz ek son dezavantaz. Alor, priy Zeova e reflesir lo ou bann opsyon. Gard antet ki menm si letid avanse i kapab ed ou pour ganny en travay ki pey ase pour siport ou lekor, sa sel keksoz ki kapab fer ou vreman ere i pour annan en bon lanmitye avek Zeova. (Ps. 16:9, 11) Zeova pou toultan pran swen avek son pep nenport nivo ledikasyon zot annan. (Ebr. 13:5) Me si ou’n fini deside pour fer letid avanse, kwa ki kapab ed ou pour reste pros avek Zeova pandan ki ou pe etidye? Nou pou vwar larepons sa kestyon dan sa lartik ki swiv.