Akoz nou bezwen sa ranson?

1-2. Avek kwa ki nou bezwen ganny sove e akoz? (Romen 7:22-24) (Vwar portre.)

IMAZIN sa senn. En batiman in degrengole e en zonm in pri anba bann debri. I ankor vivan me lo li menm, i pa kapab sorti anba sa bann debri. I zis kapab kriye pour ganny led e swete ki en dimoun i vin sov li.

² Nou tou nou dan en sityasyon en pe parey. Ki mannyer? Ler Adan ti rebel kont son Kreater, i ti fer pese. Pli tar, ler i ti fer zanfan, son bann zanfan ti erit pese. Sa i fer ki tou imen in pri dan pese, zis parey sa zonm dan sa legzanp ti’n pri anba bann debri. Parey li, nou bezwen en dimoun pour sov nou. Dan sa let ki zapot Pol ti ekri pour bann Romen, i ti dekrir sa lefe ki pese i annan lo nou. (Lir Romen 7:22-24.) I ti sipliye pour ganny delivre “avek sa lekor ki pe touy” li. Pol ti’n pri dan pese ki i ti’n erite avek Adan e akoz sa, avek letan i ti pou mor. (Rom. 6:23) Nou osi nou dan menm sityasyon e nou bezwen ganny sove.

3. Dan ki fason sa ranson i kapab delivre nou?

³ Apre ki Pol ti’n koz lo lefe ki pese i annan, i ti osi donn nou en lespwar. Ler Pol ti’n fini demande: “Lekel ki pou delivre mwan avek sa lekor ki pe touy mwan?” i ti dir: “Gran mersi Bondye gras a Zezi Kri nou Senyer!” (Rom. 7:25) Pol ti pe dir ki Zeova in delivre nou atraver sa ranson.a Gras a sa ranson, Zeova i kapab (1) pardonn nou pese, (2) nou pou ganny geri setadir nou pou nepli anba lenfliyans pese e (3) nou kapab rekonsilye avek nou Kreater. Anmezir nou vwar sa bann pwen, nou lanmour pour Zeova, “sa Bondye ki donn lespwar” pou ogmante. (Rom. 15:13) Osi, nou pou annan plis lapresyasyon pour Zezi parski “i gras a li e sa ranson ki nou’n ganny libere.”—Kol. 1:14.

SA RANSON I FER LI POSIB POUR ZEOVA PARDONN NOU PESE

4-5. Akoz nou tou nou bezwen sa ranson? (Eklezyas 7:20)

⁴ Nou bezwen sa ranson pour nou pese kapab ganny pardonnen. Tou imen enparfe i fer pese, ki swa par zot parol oubyen zot aksyon. (Lir Eklezyas 7:20.) Serten pese i pli grav. Par egzanp, anba Lalwa Moiz, bann dimoun ki ti komet adilter ek mert ti devret ganny touye. (Lev. 20:10; Nom. 35:30, 31) Me i annan lezot pese ki pa sitan grav. Me kantmenm sa, i bann pese menm. Par egzanp, psalmis David ti dir: “Mon pou vey mon lepa pour ki mon pa fer pese dan sa ki mon dir.” (Ps. 39:1) Sa i montre ki parfwa menm sa ki nou dir i kapab en pese.—Zak 3:2.

⁵ Reflesir lo bann keksoz ki ou’n dir e fer dan lepase. Eski ou’n dir keksoz ki ou swete ou pa ti’n dir? Eski ou’n fer bann fot ki ou regrete? San dout, ou larepons pour tou le de kestyon i wi. Labib i dir: “Si nou dir, ‘Nou pa fer pese,’ nou pe anbet nou lekor e laverite pa dan nou.”—1 Zan 1:8.

6-7. Kwa ki donn Zeova sa baz pour pardonn nou pese? (Vwar portre.)

⁶ Dapre lazistis Zeova ki parfe, en keksoz ti bezwen ganny fer pour donn li sa baz oubyen rezon pour pardonn nou pese. Sa ranson i donn Zeova sa baz pour pardonn nou pese. (Efe. 1:7) Me sa pa vedir ki Zeova i inyor sa ki nou fer, konmsi sa pa enportan pour li. Anfet, Zeova pa kontan ler nou fer pese.—Iza. 59:2.

⁷ I pour sa rezon ki Lalwa Moiz ti demann bann Izraelit pour fer sakrifis zannimo pour ki zot pese i ganny pardonnen. (Lev. 4:27-31; 17:11) Sa bann sakrifis ti montre ki pli tar, i ti pou annan en pli gran sakrifis, setadir sakrifis Zezi ki ti pou anmenn en kantite benediksyon. Son sakrifis ti pou donn Zeova sa baz legal pour pardonn nou pese. Pol ti konpran valer sakrifis Zezi. Nou vwar sa dan sa let ki i ti ekri pour bann Kretyen dan lavil Korent. Apre ki i ti’n koz lo bann keksoz ki sa bann Kretyen ti’n fer dan lepase, i ti dir zot: “Zot in ganny lave e zot prop, zot in ganny sanktifye e zot in ganny aprouve konman dimoun ki fer sa ki byen o non Senyer Zezi Kri e gras a lespri sen nou Bondye.”—1 Kor. 6:9-11.

8. Ki ou kapab reflesir lo la anmezir ou pe prepare pour asiste Memoryal sa lannen?

⁸ Pandan ki ou pe prepare pour asiste Memoryal sa lannen, pran letan pour reflesir lo lafason ki ou lavi in amelyore lefet ki Zeova in pardonn ou. Par egzanp, gras a sa ranson, ou pa bezwen kontinyen santi ou koupab pour bann pese ki ou’n fer dan lepase ki ou’n fini repantir. Me eski ou vwar li difisil pour aksepte sa? Petet ou’n dir dan ou menm, ‘Mon konpran ki Zeova i pardonnen me mon pa kapab pardonn mon lekor.’ Si ou santi koumsa, rapel sa: Zeova i sa enn ki pardonnen e i’n donn son Garson sa lotorite pour ziz nou. Zeova pa’n donn ou oubyen okenn lezot imen sa drwa pour deside lekel ki i pou pardonnen oubyen lekel ki i pa pou pardonnen. Labib i dir: “Si nou pe mars dan lalimyer parey [Zeova] i dan lalimyer, . . . disan Zezi son Garson i pirifye nou avek tou pese.” (1 Zan 1:6, 7) Nou kapab annan konfyans ki sa i vre zis parey nou annan konfyans dan lezot lansennyman dan Labib. Sa ranson in donn Zeova sa baz legal pour demontre pitye anver nou e son Parol i dir ki i “pare pour pardonnen.”—Ps. 86:5.

SA RANSON I FER LI POSIB POUR NOU GANNY GERI

9. Dapre Labib, ki sa mo pese i refer avek? (Psonm 51:5)

⁹ Dan Labib, sa mo “pese” pa zis refer avek en aksyon me osi avek sa lenperfeksyon ki nou erite depi ler nou ganny konsevwar. (Lir Psonm 51:5.) Sa lenperfeksyon pa zis fer nou annan sa tandans pour fer sa ki mal me i osi fer nou lekor pa fonksyonn parey Zeova ti’n plàn e sa i fer ki nou malad, nou vin vye e nou mor. I pour sa rezon ki menm bann pti baba ki fek ne ki pa’n fer nanryen mal i kapab malad e menm mor. I osi ed nou konpran akoz move dimoun ek bon dimoun i soufer e mor. Tou desandans Adan in erit lenperfeksyon.

10. Ki lefe lenperfeksyon ti annan lo Adan ek Ev?

¹⁰ Mazin lefe ki lenperfeksyon ti annan lo sa premye koup imen. Pese ti fer zot annan bann move santiman. Deswit apre ki Adan ek Ev ti’n rebele e kas lalwa Bondye, setadir sa lalwa ki ti’n “ganny ekrir dan zot leker,” zot ti eksperyans konsekans zot move aksyon. (Rom. 2:15) Dan zot menm, zot ti kapab santi ki keksoz ti’n sanze. Zot ti santi ki zot ti bezwen kouver serten parti zot lekor e kasyet parey bann kriminel pour zot Kreater pa vwar zot. (Zen. 3:7, 8) Pour premye fwa, Adan ek Ev ti santi zot koupab, enkyet, per, onte e zot ti menm santi douler. Zot ti pou annan sa bann santiman ziska ki zot mor.—Zen. 3:16-19.

11. Ki lefe lenperfeksyon i annan lo nou?

¹¹ Lenperfeksyon i annan menm lefe lo nou ki i ti annan lo sa premye koup imen. Nou annan bann douler fizik e emosyonnel akoz nou enparfe. Menm si nou fer bokou zefor pour amelyor nou sityasyon, i annan keksoz ki nou pa kapab fer. Akoz? Labib i dir ki nou’n ganny “kondannen pour vin initil.” (Rom. 8:20) Sa i vre pour nou personnelman me osi pour tou imen. Par egzanp, mazin zefor ki bann imen pe fer pour pran swen avek lanvironnman, pour redwir lakantite krim, pour elimin lapovrete e fer ki i annan lape parmi bann nasyon. Menm si zot in fer serten progre, zot bann zefor i initil. Me sa ranson i donn nou lespwar. Ki lespwar?

12. Ki lespwar sa ranson i donn nou?

¹² Gras a sa ranson, nou annan lespwar ki “kreasyon [pou] ganny libere dan lesklavaz pese ek lanmor.” (Rom. 8:21) Sa i vedir ki apre ki nou pou’n vin parfe dan paradi, nou pou nepli malad fizikman, mantalman oubyen emosyonnelman e nou pou nepli santi nou koupab, enkyet, per oubyen onte. Sa letan, “Prens lape” setadir Zezi, sa enn ki’n pey sa ranson, pou pe dirize. Sa pou fer ki bann zefor ki nou fer pour pran swen avek later e pour viv anpe, pa pou initil me i pou reisi.—Iza. 9:6, 7.

13. Kwa ankor ki ou kapab mazin lo la pandan ki ou pe prepare pour asiste Memoryal sa lannen?

¹³ Reflesir lo ki mannyer lavi pou ete ler ou pou nepli enparfe. Ou pou kapab leve tou le bomaten e santi ou byen. Ou pou kapab viv toulezour san ki ou bezwen enkyet ki ou oubyen en dimoun ki ou kontan pou mor lafen, malad oubyen mor. Menm la konmela nou kapab santi nou en pe pli kalm anmezir ki nou “met tou nou konfyans dan sa lespwar ki . . . parey lank en bato dan nou lavi, enn ki sir e ferm.” (Ebr. 6:18, 19) Zis parey en lank i kapab fer en bato vin stab, ou lespwar i kapab fer ou lafwa vin pli for e ed ou fer fas avek okenn problenm la konmela. Ou kapab asire ki Zeova pou vin “sa enn ki rekonpans sa bann ki pe vreman rod li.” (Ebr. 11:6) Sa rekonfor ki ou gannyen la konmela e sa lespwar ki ou annan pour lavenir, i selman posib gras a sa ranson.

SA RANSON I FER LI POSIB POUR NOU REKONSILYE AVEK ZEOVA

14. Ki lefe pese in annan lo nou relasyon avek nou Kreater e akoz?

¹⁴ Depi ki Adan ek Ev in fer pese, imen in elwannyen avek Bondye. Labib i menm dir ki limanite antye in ganny separe avek Kreater. (Rom. 8:7, 8; Kol. 1:21) Akoz? Parski Zeova i parfe e i pa kapab inyor pese. Labib i dir sa konsernan Zeova: “Ou lizye i tro pir pour ou get sa ki mal e ou pa kapab toler sa ki move.” (Aba. 1:13) Pese in andomaz sa relasyon ki i ti annan ant Bondye ek bann imen. I napa personn parmi nou ki kapab annan en relasyon avek Bondye, tan ki sa domaz pa ganny repare e nou rekonsilye avek li. Sa ranson i fer li posib pour nou rekonsilye avek Bondye.

15. Ki mannyer sa ranson ti fer li posib pour bann imen annan en bon relasyon avek Zeova ankor?

¹⁵ Labib i dir ki Zezi i “sa sakrifis rekonsilyasyon pour nou pese.” (1 Zan 2:2) Ki mannyer sakrifis Zezi i fer li posib pour imen rekonsilye avek Bondye? Sa ranson ti satisfer lazistis Zeova ki parfe e sa ti donn Zeova en baz pour fer lape avek imen e fer ki bann imen i kapab annan en relasyon avek li ankor. (Rom. 3:23-26) Sa i fer ki i ti menm kapab konsider bann dimoun ki ti ador li fidelman avan lanmor Kris konman bann dimoun ki fer sa ki byen. (Zen. 15:1, 6) Akoz? Gras a sa ranson ki ti pou ganny peye dan lavenir. Zeova ti asire ki Zezi, son Garson, ti pou pey sa ranson. (Iza. 46:10) Sa ranson ti fer li posib pour bann imen rekonsilye avek Bondye.

16. Ki lezot keksoz ou kapab mazin lo la pandan ki ou pe prepare pour asiste Memoryal sa lannen? (Vwar portre.)

¹⁶ Mazin bann byenfe ki ou’n gannyen lefet ki ou’n rekonsilye avek Bondye. Par egzanp, ou kapab apel Zeova ou “Papa,” zis parey Zezi ti ansenny nou pour fer. (Mat. 6:9) Parfwa ou kapab menm apel Zeova ou “Zanmi.” Ler nou apel Zeova “Papa” oubyen “Zanmi,” nou devret fer li avek en gran respe e avek limilite. Akoz? Vi ki nou enparfe, lo nou menm nou pa kapab annan en relasyon pros avek Zeova. I selman akoz sa ranson ki nou kapab annan en relasyon avek Zeova. Atraver Zezi, Zeova in fer li posib pour “tou lezot keksoz . . . ganny rekonsilye avek [Li]” par “fer lape gras a disan ki Zezi ti verse lo poto martir.” (Kol. 1:19, 20) I pour sa rezon ki nou kapab annan en relasyon avek Zeova la konmela menm si nou ankor enparfe.

SA RANSON I MONTRE KI ZEOVA I PRAN PITYE

17. Ki mannyer sa ranson i montre ki Zeova i annan pitye? (Efezyen 2:4, 5)

¹⁷ Sa ranson i montre ki Zeova i “annan en kantite konpasyon” oubyen pitye. I’n “redonn nou lavi . . . menm si i ti konmsi nou ti’n mor akoz nou bann fot.” (Lir Efezyen 2:4, 5.) Bann ki annan “sa bon kondisyon leker pour ganny lavi eternel” i sipliy Zeova pour ganny led parski zot realize ki zot enparfe e ki lo zot menm, zot pa kapab sanz zot sityasyon alor zot bezwen ganny sove. (Akt 13:48) Zeova i ed zot par fer sir zot tann sa mesaz Rwayonm pour ki zot kapab aprann konn li ek son Garson, Zezi. (Zan 17:3) Si Satan ti krwar ki ler Adan ek Ev ti fer pese, sa ti pou anpes Bondye akonplir son plan, i ti’n mal kalkile!

18. Anmezir ki nou medit lo sa ranson, ki nou devret gard antet?

¹⁸ Anmezir ki nou medit lo bann byenfe ki sa ranson i anmennen pour nou personnelman, nou bezwen gard antet sa rezon prensipal akoz Zeova in donn sa ranson. Olye vwar sa ranson konman en provizyon ki’n ganny donnen zis pour sov nou, nou devret gard antet ki sa ranson i sa mwayen ki Zeova pe servi pour reponn sa lakizasyon ki Satan ti fer dan zarden Edenn. (Zen. 3:1-5, 15) Atraver sa ranson, Zeova i sanktifye son non e i montre ki tou bann move keksoz ki Satan in dir lo li pa vre. I osi sov nou dan pese ek lanmor e montre ki i en Bondye ki annan lanmour. Vi ki Zeova i annan labonte ekstraordiner, i permet nou menm si nou enparfe pour ede montre ki bann mansonz ki Satan in dir lo li, pa vre. (Prov. 27:11) Ki mannyer ou pou demontre ou lapresyasyon pour sa ranson? Nou pou vwar larepons sa kestyon dan sa lartik ki swiv.