Ki mannyer ou pou demontre lapresyasyon pour sa ranson?

1-2. Ki ranson Zezi i devret obliz nou pour fer e akoz? (2 Korentyen 5:14, 15) (Vwar portre.)

SI OU ti’n pri anba debri en batiman ki’n degrengole e en dimoun in vin sov ou, eski pa ou ti pou rekonesan anver sa dimoun ki’n sov ou lavi? Menm si i ti osi annan lezot dimoun ki ti’n ganny sove, i tre probab ki ou ti pou anvi montre ou lapresyasyon personnelman pour montre ki ou pa pou zanmen oubliy sa ki i’n fer pour ou.

² Parey nou’n vwar dan sa lartik avan, nou pa kapab sov nou lekor dan pese ek lanmor. Me ranson Zezi i kapab sov nou par fer li posib pour (1) ganny pardonnen ler nou fer pese, (2) annan sa lespwar pour ganny geri e vin parfe dan lavenir e (3) pour rekonsilye avek Bondye. Sa i fer ki nou annan sa lespwar pour viv pour touzour dan nouvo lemonn Bondye. Sa ranson i montre ki Zezi ti kontan imen menm avan ki i ti vin lo later. (Prov. 8:30, 31) Zapot Pol ti ekri ki “lanmour ki Kris i annan pour nou i obliz nou.” (Lir 2 Korentyen 5:14, 15.) Sa i vedir ki sa lanmour ki Kris i annan pour nou i devret motiv nou pour azir dan en fason ki montre ki nou apresye sa ranson e ki nou pa pou zanmen oubliy sa ki i’n fer pour nou.

3. Akoz lafason ki ou demontre ou lapresyasyon pour sa ranson i kapab diferan avek pour en lot dimoun?

³ Ki mannyer ou pou demontre lapresyasyon pour sa ranson? Ou larepons i kapab diferan avek pour en lot dimoun. Annou vwar en legzanp ki pou ed nou konpran akoz. Imazin trwa dimoun ki pe al dan menm destinasyon me zot tou le trwa zot sorti dan diferan lavil e zot pran diferan larout pour ariv laba. Sa “larout” ki ou pran pour ariv ou destinasyon, setadir lafason ki ou atenn ou lobzektif pour demontre lapresyasyon pour sa ranson, i depan lo kalite lanmitye ki ou annan avek Zeova. Avek sa nide antet, sa lartik pou koz lo trwa group dimoun: (1) bann etidyan Labib, (2) bann Kretyen ki’n batize e (3) bann mouton ki’n elwannyen avek troupo.

BANN ETIDYAN LABIB

4. Ki mannyer Zeova i santi anver bann etidyan Labib?

⁴ Si ou pe etidye Labib, reflesir lo sa: Lefet ki ou’n aksepte pour etidye Labib, sa i montre ki Zeova in atir ou ver li e i anvi ou annan en lanmitye avek li. (Zan 6:44; Akt 13:48) “Zeova i sa Enn ki egzamin leker.” Sa i vedir ki i vwar bann zefor ki ou pe fer pour aprann konsernan li e i kontan pour vwar ou bann progre anmezir ou fer bann sanzman pour viv dapre son bann standar. (Prov. 17:3; 27:11) Sa ranson i fer li posib pour ou annan en bon lanmitye avek Zeova. (Rom. 5:10, 11) Pa zanmen oubliy sa.

5. Ki mannyer bann etidyan Labib i kapab aplik sa konsey ki dan Filipyen 3:16?

⁵ Si ou en etidyan Labib, ki mannyer ou kapab demontre ou lapresyasyon pour sa ranson? En fason ki ou kapab fer sa i par swiv sa konsey ki zapot Pol ti donn bann Kretyen dan lavil Filip: “Nenport ki progre ki nou’n fer, annou kontinyen al annavan dan sa menm direksyon e dan en fason annord.” (Fili. 3:16) En lot tradiksyon Labib i tradwir sa verse koumsa: “Nou bezwen kontinyen al dan sa direksyon ki nou’n pran ziska aprezan.” Alor pa les nanryen anpes ou kontinyen mars lo sa semen lavi.—Mat. 7:14; Lik 9:62.

6. Ki bann etidyan Labib i kapab fer si zot vwar li difisil pour fer bann sanzman? (Deterononm 30:11-14) (Vwar portre.)

⁶ Me ki ou pou fer si ou vwar li difisil pour aksepte en lansennyman Labib ki ou fek aprann? Fer resers lo sa lansennyman e priy Zeova pour ed ou konpran pli byen. (Ps. 86:11) Si apre sa, ou ankor vwar li difisil pour konpran sa lansennyman, pour en pe letan aret mazin lo la me pa aret etidye Labib. Me ki ou pou fer si ou vwar li difisil pour aret fer en keksoz ki Labib i dir i mal? Gard antet ki Zeova pa pou zanmen demann bann imen enparfe pour fer en keksoz ki enposib pour zot fer. Ou kapab viv dapre son bann standar. (Lir Deterononm 30:11 -14.) Zeova i promet ki i pou ed ou. (Iza. 41:10, 13; 1 Kor. 10:13) Alor kontinyen fer zefor pour obei Zeova. Olye konsantre lo sa problenm ki ou pe fer fas avek, konsantre lo bann keksoz ki Zeova in donn ou, enkli sa ranson. Anmezir ki ou devlop plis lanmour pour Zeova, ou pou vwar ki “son bann komannman pa en fardo.”—1 Zan 5:3.a

7. Ki bann zenn ki pe grandi dan laverite i kapab reflesir lo la?

⁷ Ki nou pou dir lo bann zenn ki pe grandi dan laverite? Ou osi ou en etidyan Labib. Anfet, ou sa etidyan Labib pli enportan pour ou paran. Labib i dir: “Vin pros avek Bondye e i pou vin pros avek zot.” (Zak 4:8; 1 Kron. 28:9) Ler ou pran linisyativ pour apros avek Zeova, i pou vin pros avek ou. I pa akoz ou’n grandi dan en fanmir Temwen Zeova ki Zeova i port latansyon lo ou. I remark ou akoz i anvi ou vin son zanmi. Kwa ki fer li posib pour ou annan ou prop lanmitye avek Zeova? Zeova in donn son Garson konman en ranson e sa i en keksoz ki ou pa devret zanmen oubliye. (Rom. 5:1, 2) Alor avan ou asiste Memoryal sa lannen, akoz ou pa reflesir lo ki lanmor Zezi i vedir pour ou? Apre mazin lo en lobzektif ki ou anvi atenn ki pou ed ou demontre ou lapresyasyon pour sa ranson ki Zeova in donnen atraver son Garson.b

BANN KRETYEN KI’N BATIZE

8. Ki mannyer bann Kretyen ki’n batize in demontre lafwa dan sa ranson?

⁸ Si ou en Kretyen ki’n batize, ou deza pe demontre lafwa dan sa ranson dan plizyer fason. Par egzanp, ou’n fer plizyer keksoz pour apros avek Zeova e pour viv dapre son standar. Ou’n obei lord Zezi pour fer disip par koz avek lezot lo ou lafwa. Ou’n dedye ou lavi avek Zeova e ou’n batize. Petet lezot in opoz ou parski ou‘n swazir pour servi Zeova. (2 Tim. 3:12) Ou’n reste fidel e ou’n andire e sa i montre ki ou kontan Zeova e ou apresye sa ranson ki i’n donnen atraver son Garson.—Ebr. 12:2, 3.

9. Ki en keksoz ki bann Kretyen ki’n batize i devret fer atansyon?

⁹ Konman bann Kretyen ki’n batize, i annan en keksoz ki nou bezwen fer atansyon. Avek letan, nou kapab konmans perdi nou lapresyasyon pour sa ranson. Ki mannyer sa i kapab arive? Annou vwar sa ki ti arive avek bann Kretyen dan premye syek ki ti reste dan lavil Efez. Zezi ti felisit zot pour zot landirans. Me Zezi ti dir zot: “Mon annan en keksoz kont ou, se ki ou’n perdi sa lanmour ki ou ti annan o konmansman.” (Rev. 2:3, 4) Sa ki Zezi ti dir i montre ki avek letan, sa ladorasyon ki en Kretyen i donn Zeova i kapab vin zis parey en routin. Sa dimoun i kapab pe priye, pe al renyon, pe partisip dan predikasyon me i pe zis fer li akoz i abitye fer li. I nepli ganny motive par lanmour. Ki ou kapab fer si ou santi ki ou lanmour pour Zeova nepli for parey avan?

10. Ki mannyer ou kapab “reflesir lo” ou bann aktivite spirityel e “pran zot aker”? (1 Timote 4:13, 15)

¹⁰ Zapot Pol ti dir Timote “reflesir lo” son bann aktivite spirityel e “pran zot aker.” (Lir 1 Timote 4:13, 15.) An armoni avek sa konsey, ou osi ou kapab reflesir lo ki ou kapab fer pour kontinyen annan bokou devouman dan ou servis pour Zeova. (Rom. 12:11; vwar not letid “Be aglow with the spirit” dan nwtsty-E.) Par egzanp, ou kapab pran plis letan pour prepar ou renyon parski sa pou ed ou port plis latansyon pandan renyon. Ler ou pe fer ou letid personnel, ou kapab al dan en landrwa kot ou pou ou tousel e kot ou kapab pli byen reflesir lo sa ki ou pe aprann. Sa pou ed ou ganny plis byenfe avek ou letid personnel. Zis parey ou bezwen met dibwa dan en dife pour li kapab kontinyen brile, ou bezwen kontinyen fer sa bann keksoz pour ou kapab kontinyen annan lapresyasyon pour tou bann keksoz ki Zeova in donn ou, enkli sa ranson. Osi, akoz ou pa servi sa bann semenn avan Memoryal pour medit lo bann benediksyon spesyal ki ou annan konman en Temwen Zeova? San dout, sa pou ed ou pour annan plis lapresyasyon pour sa ranson, sa provizyon ki fer li posib pour annan en lanmitye avek Zeova.

11-12. Si ou santi ki ou nepli annan sa devouman ki ou ti annan oparavan, eski sa i vedir ki Zeova in aret donn ou son lespri sen? Eksplike. (Vwar portre.)

¹¹ Si pour en pe letan ou santi ki ou napa sa devouman dan ou servis pour Zeova parey ou ti ava kontan, pa bezwen dekouraze oubyen krwar ki Zeova pe nepli donn nou son lespri sen. Rapel sa ki zapot Pol ti ekri pour bann Kretyen dan lavil Korent konsernan son minister: “Menm si mon pa fer li volonterman, toudmenm Senyer in konfye mwan sa responsabilite.” (1 Kor. 9:17) Ki i ti pe esey dir?

¹² Parfwa Pol pa ti anvi fer predikasyon. Kantmenm sa, i ti determinen pour al predikasyon menm si i pa ti anvi. Ou osi ou kapab fer parey. Ou kapab determinen pour fer sa ki byen menm si ou pa anvi. Alor priye pour ganny “sa dezir ek lafors pour azir.” (Fili. 2:13) Kontinyen gard ou routin spirityel. Ou kapab asire ki apre en serten letan ou lanmour pour Zeova pou vin for ankor e ou pou reganny ou devouman.

13. Ki mannyer nou kapab kontinyen teste nou lekor pour vwar si nou “dan lafwa”?

¹³ I ti pou byen ki tanzantan nou egzamin nou lekor parey Pol ti dir dan 2 Korentyen 13:5 ki dir: “Kontinyen teste zot lekor pour vwar si zot dan lafwa, kontinyen fer sir ki kalite dimoun zot ete.” Tanzantan demann nou lekor bann kestyon parey: ‘Eski mon pe met lentere Rwayonm premye dan mon lavi?’ (Mat. 6:33) ‘Eski sa ki mon gete oubyen fer dan mon letan detant i montre ki mon ay sa ki mal?’ (Ps. 97:10) ‘Eski mon ede pour gard lape ek linite dan kongregasyon?’ (Efe. 4:2, 3) Memoryal i sa lokazyon kot nou sirtou reflesir lo sa ki Zeova ek Zezi in fer pour nou. I osi donn nou sa loportinite pour egzamin nou lekor pour fer sir ki nou pe viv pour Kris e pa pour nou lekor.c

BANN MOUTON KI’N ELWANNYEN AVEK TROUPO

14. Kwa ki kapab fer serten Kretyen elwannyen avek troupo?

¹⁴ Serten Kretyen in aret asiste renyon apre ki zot in servi Zeova fidelman pour plizyer mwan oubyen menm pour plizyer lannen. Akoz? Serten i santi zot anba presyon akoz “traka lavi.” (Lik 21:34) I annan ki’n ofanse par sa ki en dimoun dan kongregasyon in dir oubyen fer. (Zak 3:2) I annan lezot ankor ki’n fer en pese grav e ki ezite pour rod led. Nenport sityasyon ki ou ladan, ki ou kapab fer si ou’n elwannyen avek troupo? Ki sa ranson ki en provizyon ki’n ganny donnen avek lanmour i obliz ou pour fer?

15. Ki mannyer Zeova i montre ki i enterese avek bann mouton ki’n elwannyen? (Ezekyel 34:11, 12, 16)

¹⁵ Reflesir lo ki mannyer Zeova i santi anver bann ki’n elwannyen avek laverite. I pa rezet zot. O kontrer i rod sa bann mouton ki’n perdi. I donn zot manze e i ed zot pour retourn kot li. (Lir Ezekyel 34:11, 12, 16.) Eski Zeova pe fer menm keksoz pour ou? Wi. Lefet ki ou pe lir sa lartik, sa i montre ki ou ankor anvi fer Zeova plezir. Zis parey Zeova ti vwar ou leker e i ti atir ou ver laverite, eski pa aprezan i pe ed ou pour retournen?

16. Kwa ki kapab ed bann mouton ki’n perdi pour retourn kot Zeova? (Vwar portre.)

¹⁶ Dan sa brosir Retourn kot Zeova i annan sa bann parol ankourazan: “Ou kapab asire ki Zeova pou dan ou kote anmezir ki ou retourn kot li. I pou ed ou fer fas avek ou bann traka, pas lo bann lofans e ou pou annan en konsyans kler ki pou donn ou lape lespri ek leker. Tousala i kapab ed ou pour anvi rekonmans servi Zeova ansanm avek ou bann frer ek ser.” Osi, gard antet ki bann ansyen i vreman anvi ed ou. Zot kapab vin “parey en landrwa kasyet ler i annan divan, en landrwa kasyet ler i annan gro lapli.” (Iza. 32:2) Nou konnen ki ou rekonesan pour sa ranson e ou anvi montre Zeova ki ou rekonesan. Alor demann ou lekor: ‘Ki mon kapab fer la konmela pour “aranz keksoz” avek Zeova? (Iza. 1:18; 1 Pyer 2:25) Par egzanp, eski ou kapab asiste en renyon kot Lasal Rwayonm? Eski ou kapab al kot en ansyen e demann li pour ed ou pour retourn kot Zeova? I pou kapab fer laranzman pour ou fer letid Labib pour en pe letan. Ou kapab asire ki Zeova pou beni ou zefor pour demontre lapresyasyon pour sa ranson.

KI OU POU FER?

17-18. Ki mannyer nou kapab byen servi nou letan avan Memoryal sa lannen?

¹⁷ Zezi ti dir ki sa ranson ti ganny donnen “pour ki nenport ki ki demontre lafwa dan li pa ganny detrir me i ganny lavi eternel.” (Zan 3:16) Sa ranson i sa mwayen ki Zeova in servi pour delivre nou dan pese ek lanmor e nou pa devret zanmen oubliy sa. (Rom. 3:23, 24; 2 Kor. 6:1) Bann zour avan Memoryal i donn nou en loportinite pour reflesir lo sa lanmour ki Zeova ek Zezi in demontre e sa lanmour i devret obliz nou pour demontre nou lapresyasyon.

¹⁸ Ki sa ranson pou motiv ou pour fer? Ou larepons i kapab diferan avek sa ki pour en lot dimoun. Me ou kapab asire ki Zeova pou beni ou zefor anmezir ou zwenn ansanm avek plizyer milyon frer ek ser ki “pa viv pour zot prop lekor, me pour sa enn ki’n mor e resisite pour zot.”—2 Kor. 5:15.