Ou kapab lalit avek bann santiman negatif

1-2. Ki mannyer zapot Pol ti santi parfwa e akoz nou kapab konpran son santiman? (Romen 7:21-24)

KWA ki vin dan ou lespri ler ou mazin zapot Pol? Eski ou mazin en misyonner ki’n annan kouraz, en ansenyan oubyen en dimoun ki’n ekri en kantite liv Labib? Sa bann keksoz i vre. Me parfwa Pol ti osi santi li sagren, dekouraze oubyen enkyet. Parey bokou nou ozordi, i ti lalit avek bann santiman negatif.

² Lir Romen 7:21-24. Dan let ki Pol ti ekri pour bann Romen, i ti koz lo serten son bann santiman ki bokou nou, nou’n deza annan. Menm si i ti fidel, i ti bezwen lalit avek son bann santiman. I ti vreman anvi fer lavolonte Bondye me i ti osi bezwen lalit pour pa fer sa ki mal. An plis ki sa, parfwa Pol ti santi li koupab pour bann keksoz ki i ti’n fer dan lepase e i ti santi li fristre akoz i ti kontinyen annan menm problenm.

3. Ki nou pou vwar dan sa lartik? (Vwar “Ki sa i vedir?”)

³ Menm si Pol ti pe lalit avek bann santiman negatifa i ti fer zefor pour pa konsantre lo la. Dan sa lartik, nou pou reponn sa bann kestyon: Kwa ki ti fer Pol santi li malere parfwa? Ki mannyer i ti fer fas avek bann santiman negatif? Ki mannyer nou kapab lalit avek nou santiman negatif?

KWA KI TI FER POL ANNAN BANN SANTIMAN NEGATIF?

4. Kwa ki ti fer Pol annan bann santiman negatif?

⁴ Bann keksoz ki i ti’n fer dan lepase. Avan ki Pol ti vin en Kretyen, bann dimoun ti konn li konman Sol e i ti fer bann keksoz ki i ti regrete pli tar. Par egzanp, i ti la ler Etyenn ki ti en zonm fidel ti ganny touye e i ti dakor avek sa. (Akt 7:58; 8:1) Osi, i ti persekit en kantite Kretyen e tret zot dan en fason kriyel.—Akt 8:3; 26:9-11.

5. Ki lefe bann keksoz ki Pol ti fer dan lepase ti annan lo li?

⁵ Apre ki Pol ti vin en Kretyen, parfwa i ti santi li koupab pour bann keksoz ki i ti’n fer dan lepase. I kapab ki anmezir ki letan ti pase, bann keksoz ki i ti fer pour persekit bann Kretyen ti fatig li plis. Par egzanp, ler i ti ekri son premye let pour bann Kretyen dan lavil Korent ver lannen 55, i ti dir: “Mon pa merite ganny apele zapot parski mon ti persekit kongregasyon Bondye.” (1 Kor. 15:9) Apepre senk an pli tar, dan sa let ki i ti ekri pour bann Kretyen dan lavil Efez, i ti dir ki i “pli pti ki sa enn pli pti parmi tou bann sen.” (Efe. 3:8) Ler i ti ekri en let pour Timote, i ti dir ki oparavan i ti “koz kont Bondye, persekit lezot e [i] ti arogan.” (1 Tim. 1:13) Eski ou kapab imazin ki mannyer Pol ti santi ler i ti vizit en kongregasyon e zwenn bann ki i ti’n persekite oubyen fanmir bann ki i ti’n persekite?

6. Ki en lot keksoz ki ti pe fatig Pol? (Vwar not.)

⁶ Pol ti annan en problenm ki ti fer li soufer. I ti dir ki sa problenm i parey en “en pikan ki pe pik [li].” (2 Kor. 12:7) Sa zapot pa ti dir kwa ki ti pe fer li soufer. Me ki swa sa problenm ti en problenm fizik, emosyonnel oubyen en lot keksoz, lafason ki i ti dekrir sa problenm ti montre ki i ti pe fer li soufer en kantite.b

7. Akoz i ti difisil pour Pol toultan fer sa ki byen? (Romen 7:18, 19)

⁷ Son bann lenperfeksyon. Pol ti fer fot me i ti fer zefor pour amelyor son personnalite. (Lir Romen 7:18, 19.) Menm si i ti anvi fer sa ki byen, son lekor enparfe ti fer li difisil pour li fer sa. I ti admet ki i ti pe kontinyen lalit pour fer sa ki byen olye azir dapre son bann move dezir. Me Pol ti travay vreman dir pour amelyore. (1 Kor. 9:27) I bezwen ki Pol ti fristre ler i ti dir oubyen fer en move keksoz ki i ti’n travay sitan dir pour amelyore oubyen sanze.

KI MANNYER POL TI FER FAS AVEK SANTIMAN NEGATIF?

8. Ki bann let Pol i montre konsernan lafason ki i ti lalit avek son bann lenperfeksyon?

⁸ Parey nou vwar dan son bann let, Pol ti reflesir lo lafason ki li ek lezot Kretyen i kapab lalit e reziste bann move dezir avek led lespri sen. (Rom. 8:13; Gal. 5:16, 17) Souvandfwa, Pol ti koz lo bann move tre ek bann dezir ki bann Kretyen i devret lalit avek. (Gal. 5:19-21, 26) San dout, Pol ti medit lo son prop febles, i ti rod konsey dan Lekritir e i ti rod bann keksoz spesifik ki i kapab fer pour lalit avek son lenperfeksyon. Nou kapab asire ki i ti aplik son prop konsey.

9-10. Kwa ki ti ed Pol pour lalit avek bann santiman negatif? (Efezyen 1:7) (Vwar portre.)

⁹ Menm si parfwa Pol ti dekouraze, i ti kapab reste pozitif. Par egzanp, i ti kontan pour tann bann bon rapor ki bann dimoun ki ti’n vwayaz avek li ti anmennen konsernan bann kongregasyon. (2 Kor. 7:6, 7) Sa lanmitye ki i ti annan avek bann frer ek ser ti fer li zwaye. (2 Tim. 1:4) I ti osi konnen ki i ti annan laprouvasyon Zeova. Pol ti zwaye parski i ti kapab servi Bondye “avek en konsyans kler.” (2 Tim. 1:3) Menm ler i ti dan prizon Ronm, Pol ti ankouraz bann frer ek ser pour “annan lazwa akoz Senyer.” (Fili. 4:4) Ler nou lir bann parol ki Pol ti dir, nou konpran ki i pa ti konsantre lo son problenm ek son bann fot. I kler ki ler i ti annan bann panse negatif, i ti kapab lalit avek pour li reganny son lazwa.

¹⁰ Pol ti osi kapab lalit avek bann santiman negatif parski i ti krwar ki ranson ti en kado ki ti’n ganny donnen pour li personnelman. (Gal. 2:20; lir Efezyen 1:7.) Sa i fer ki i ti kapab annan konfyans ki Zeova in pardonn li atraver Zezi Kri. (Rom. 7:24, 25) Malgre lenperfeksyon ek bann fot ki Pol ti’n fer dan lepase, i ti kapab ofer Bondye “en servis sakre” avek lazwa.—Ebr. 9:12-14, not.

11. Akoz legzanp Pol i ankouraz nou?

¹¹ Parey Pol, petet nou santi ki nou toultan bezwen lalit avek nou lekor. I kapab ki nou bezwen lalit pour nou pa mazin, fer oubyen dir en keksoz mal. Nou kapab fristre ki nou pa kapab toultan fer Zeova plezir. En ser ki apel Elizac ki dan son bann 20 an i eksplike ki mannyer i santi e i dir: “Ler mon mazin legzanp Pol, sa i ankouraz mwan. Mon soulaze ler mon konnen ki pa zis mwan ki santi koumsa. I osi en lot rapel ki montre ki Zeova i konnen ki son pep pe pas ladan.” Parey Pol, ki nou kapab fer pour nou annan en konsyans kler e pour nou zwaye menm si nou annan bann santiman negatif?

KI MANNYER NOU KAPAB LALIT AVEK BANN SANTIMAN NEGATIF?

12. Ki mannyer ler nou annan en bon routin spirityel sa i ed nou lalit avek bann santiman negatif?

¹² Gard en bon routin spirityel. Ler nou annan en bon routin spirityel, nou pou pli kapab konsantre lo bann keksoz pozitif. Nou kapab konpar nou routin spirityel avek bann bon labitid ki ed nou annan en bon lasante fizik. Ler nou manz byen, nou fer legzersis regilyerman e nou pran ase letan pour dormi, nou santi nou pli byen. Dan menm fason, nou zwaye ler nou lir Parol Bondye regilyerman, prepar, asiste, partisip dan renyon e partisip dan predikasyon. Bann aktivite koumsa i ankouraz nou e i ed nou lalit avek nou bann panse negatif.—Rom. 12:11, 12.

13-14. Ki byenfe serten Kretyen in gannyen ler zot in gard en bon routin spirityel?

¹³ Annou vwar leksperyans John, en zonm ki ti aprann ki i ti annan en kanser rar ler i ti annan 39 an. O konmansman i ti lalit avek bann santiman negatif. I ti demann son lekor: ‘Mon sitan zenn, ki mannyer mon kapab ganny en maladi koumsa?’ Sa letan son garson ti annan zis 3 an. Kwa ki ti ed John? I dir: “Menm si mon ti fatige, mon ti fer sir ki nou fanmir i gard en bon routin spirityel. Nou ti asiste tou bann renyon. Tou le semenn nou ti al predikasyon e nou ti fer ladorasyon fanmir regilyerman menm ler i ti difisil pour met letan dekote pour fer li.” Ler John i mazin sa letan i dir: “Petet o konmansman ou soke me avek letan ou nepli annan bann santiman negatif. Zeova i donn ou lafors e ou santi son lanmour. Zeova i kapab fer ou for zis parey in fer mwan for.”

¹⁴ Eliza, ki’n ganny mansyonnen pli boner, i dir: “Sak fwa mon asiste renyon e mon fer letid personnel, sa i fer mwan rapel ki Zeova i tann mwan e i vreman kontan mwan. Sa i fer mwan zwaye.” En sirveyan rezyonal ki servi Lafrik ki apel Nolan i eksplike kwa ki ed li ek son madanm Diane. I dir: “Nou gard nou routin spirityel menm ler nou dekouraze. Zeova i toultan montre nou ki i pe ed nou pour annan sa bon latitid. Nou esey gard antet ki Zeova pou ed nou e beni nou. Nou pa konnen ki mannyer me nou konnen ki i pou fer li.”

15. Petet ki nou bezwen fer pour lalit avek bann panse negatif? Donn en legzanp.

¹⁵ Pour nou kapab lalit avek bann panse negatif, i annan lezot keksoz ki nou bezwen fer. Pour ed nou konpran sa, annou vwar en legzanp. Imazin ou annan en douler dan ou ledo. Pour fer sa douler ale, i kapab ki ou pou bezwen fer plis ki zis marse toulezour. Pour ou konnen kwa ki pe donn ou sa douler, petet ou pou bezwen fer resers e menm koz avek en dokter. Dan menm fason, petet nou bezwen fer resers dan Labib e dan nou bann piblikasyon e menm koz avek en Kretyen matir pour aprann ki mannyer pour lalit avek bann santiman negatif ki nou kontinyen annan. Annou vwar lezot sizesyon ki kapab ed ou.

16. Kwa ki kapab ed ou pour konnen kwa ki pe fer ou annan bann panse negatif? (Psonm 139:1-4, 23, 24)

¹⁶ Ou kapab priy Zeova pour ed ou konpran ki ou vreman bezwen. Lerwa David ti konnen ki Zeova ti konn li vreman byen. Alor, David ti demann Zeova pour ed li konnen kwa ki pe “fatig” li. (Lir Psonm 139:1-4, 23, 24.) Ou osi ou kapab demann Zeova pour ed ou konnen kwa ki pe fer ou annan bann panse negatif e pour ed ou konpran ki mannyer pour lalit avek. Ou kapab osi demann ou lekor bann kestyon parey: ‘Kwa ki pe fer mwan enkyet? Eski i annan en keksoz ki toultan fer mwan annan bann panse negatif? Eski mon kontinyen mazin sa bann keksoz negatif olye tir zot dan mon lespri deswit?’

17. Ki bann topik ki ou kapab etidye dan ou letid personnel ki pou ed ou konsantre lo bann keksoz ankourazan? (Vwar portre.)

¹⁷ Dan ou letid personnel, etidye en topik ki pou ed ou. I ti pou byen ki tanzantan ou etidye konsernan enn bann kalite ki Zeova i annan. Par egzanp, zapot Pol ti ganny bann byenfe ler i ti medit lo ranson e lo lafason ki Zeova i pardonnen. Ou osi ou kapab fer parey. Servi Liv resers pour Temwen Zeova, Watch Tower Publications Index oubyen lezot piblikasyon ki disponib dan ou langaz pour etidye bann kalite ki Bondye i annan parey pitye, lanmour fidel e osi lafason ki i pardonnen. Ler ou’n vwar bann lartik ki kapab ed ou, fer en lalis sa bann lartik. Met sa lalis dan en landrwa kot ou kapab vwar e etidye sa bann lartik ler ou konmans santi ou sagren. Apre, esey aplik sa ki ou lir dan ou prop sityasyon.—Fili. 4:8.

18. Ki topik serten Kretyen in etidye pour ed zot?

¹⁸ Eliza, ki’n ganny mansyonnen pli boner, ti etidye konsernan Zob dan son letid personnel. I dir: “Mon kapab konpran santiman Zob. I ti fer fas avek en problenm enn deryer lot. Menm ler Zob ti vreman dekouraze, i pa ti aret rod led avek Zeova menm si i pa ti konnen akoz i ti pe pas dan sa bann problenm.” (Zob 42:1-6) Diane, ki’n ganny mansyonnen pli boner i dir: “Mwan ek mon msye nou ti etidye liv Apros avek Zeova. Nou apresye ki Zeova in moul nou parey en potye i moul larzil. Dan plas konsantre lo lefet ki nou dezapwente avek nou lekor, nou esey imazin Zeova pe moul nou e pe esey fer nou vin bann pli bon dimoun. Sa i fer nou vin pli pros avek li.”—Iza. 64:8.

NOU KAPAB ASIRE KI ZEOVA POU ED NOU E REKONPANS NOU

19. Ki nou kapab ekspekte?

¹⁹ Menm si nou annan en bon routin spirityel ek en bon progranm letid personnel ki dapre nou sityasyon, nou pa ekspekte ki bann panse ek santiman negatif pou ale konpletman. Kantmenm sa, i kapab annan bann zour kot nou vreman dekouraze. Me avek led Zeova, nou kapab aret mazin bann keksoz ki fer nou annan bann move santiman e santi nou pli kalm. Nou kapab asire ki laplipar zour, nou pou ere e nou pou annan en konsyans kler parski nou pou annan en bon lanmitye avek Zeova e nou konnen ki sa ki nou pe fer i fer li plezir.

20. Ki ou determinen pour fer?

²⁰ Annou determinen pour pa les bann santiman negatif konsernan sa ki nou’n fer dan lepase, bann problenm ki nou annan ek nou lenperfeksyon kontrol nou. Avek led Zeova, nou kapab aret mazin bann keksoz ki fer nou annan bann santiman negatif e reste kalm. (Ps. 143:10) Nou kapab osi annan lespwar e esper sa letan kot nou pou dan nouvo lemonn kot tou sa ki nou mazinen pou fer nou zwaye. Sa letan, i pou napa nanryen ki pou fer nou enkyet. Nou pou leve tou le bomaten e zwaye pour servi nou Bondye ki kontan nou!