Anons laverite dan en fason agreab

1. Ki nou bezwen fer pour nou form parti fanmir Zeova?

SA PREMYE fwa ki nou zwenn en serviter Zeova, enn bann kestyon ki nou demann kanmarad i, “Ki mannyer ou’n konn laverite?” Serten i kapab reponn sa kestyon par dir ki i’n “grandi dan laverite.” Lezot i kapab dir ki zot fek “vin dan laverite.” Nou reponn dan sa bann fason parski sa laverite ki dan Parol Bondye i gid lafason ki nou viv nou lavi. Akoz? Parski nou konnen ki pour nou kapab form parti fanmir Zeova nou bezwen montre ki nou kontan laverite e nou aplik li. Sa i vedir ki nou onnet dan sa ki nou dir e fer.—Ps. 15:1-3.

2. (a) Ki kalite repitasyon Zezi ti annan? (b) Ki lefe laverite ki Zezi ti ansennyen ti pou annan lo dimoun?

² Zezi ti toultan koz laverite. Bann lennmi Zezi ti rekonnet ki Zezi i koz laverite menm ler laplipar dimoun pa ti kontan sa ki i ti dir. (Mat. 22:16) Zezi ti koz lo lefe ki sa laverite ki i ti ansennyen ti pou annan. I ti dir: “Mon’n vin anmenn divizyon, garson kont son papa, fiy kont son manman e belfiy kont son belmer.” (Mat. 10:35) Zezi pa ti anvi ki dimoun i opoz sa mesaz ki li ek son bann disip ti anonse me i ti konnen ki sa ti pou arive. (Mat. 23:37) I ti konnen ki sa mesaz ti pou kree divizyon e fer dimoun annan de diferan reaksyon, setadir en group ki ti pou kontan laverite ki dan Labib e en lot group ki pa ti pou kontan.—2 Tesa. 2:9-11.

3. Ki nou pou vwar dan sa lartik?

³ Parey Zezi, nou fer zefor pour onnet e pour toultan koz lo laverite menm ler dimoun pa kontan sa ki nou dir. Nou osi anons e ansenny bann laverite ki dan Labib, menm ler dimoun pa kontan sa ki nou dir. Eski sa i vedir ki nou pa bezwen reflesi lo ki mannyer e kan ki nou koz e anons laverite? Non i pa vedir sa. Dan sa lartik, nou pou premyerman reponn en kestyon fondamantal: Kote nou kapab trouv laverite? Apre nou pou vwar akoz, ki mannyer e kan nou devret koz laverite. Larepons pour sa bann kestyon pou ed nou pli byen kapab anons e koz laverite dan en fason agreab, setadir avek takt e dan sa bon moman.

KOTE NOU KAPAB TROUV LAVERITE?

4. Akoz nou kapab dir ki Zeova i Sours laverite?

⁴ Zeova i Sours laverite. Tou sa ki i dir i vre. Par egzanp, sa ki i dir konsernan kwa ki byen e kwa ki mal, i vre. (Ps. 19:9; 119:142, 151) Tou sa ki i dir konsernan lavenir i vin vre. (Iza. 55:10, 11) I toultan gard son promes. (Nom. 23:19) Anfet, i enposib pour Zeova koz manti! (Ebr. 6:18) I pour sa rezon ki Zeova i ganny apele “Bondye laverite.”—Ps. 31:5.

5. Akoz i pa difisil pour trouv sa “Bondye laverite”? Eksplike. (Akt 17:27)

⁵ Serten dimoun i dir ki i difisil pour aprann konn Zeova sa “Bondye laverite.” Me sa pa vre. Partou otour nou, nou vwar levidans ki i egziste. (Rom. 1:20) Ler zapot Pol ti pe koz avek en group Grek ki byen edike, dan lavil Atenn, i ti dir ki Bondye i anvi ki nou “trouv li” e ki “i pa lwen avek sakenn ant nou.” (Lir Akt 17:27.) Anfet, Zeova i atir ver li bann dimoun ki annan limilite ki pe rod laverite.—Zan 6:44.

6. Ki serten laverite ki dan Labib e akoz ou rekonesan ki ou konn sa bann laverite?

⁶ En fason ki nou kapab trouv Zeova i par etidye Labib. Sa bann zonm ki ti ekri sa liv ti ganny enspire par lespri sen Bondye. (2 Pyer 1:20, 21) Alor, tou sa ki dan Labib i laverite e nou kapab annan konfyans ladan. Par egzanp, nou kapab annan konfyans dan sa ki i dir konsernan lafason ki liniver ek lavi lo later ti konmanse. (Zen. 1:1, 26) Nou kapab krwar sa ki i dir konsernan akoz nou tou nou fer pese e akoz sa kantite dimoun pe soufer e mor. (Rom. 5:12; 6:23) Nou kapab annan konfyans total dan Labib ler i dir ki atraver son Garson, Zeova pou retir tou bann domaz ki Satan, setadir “papa mansonz” in fer. (Zan 8:44; Rom. 16:20) Nou kapab annan konfyans dan sa promes ki dan Labib ki dir ki Zezi pou detri bann move dimoun, resisit bann ki’n mor, fer later vin en paradi e ed nou pour vin parfe. (Zan 11:25, 26; 1 Zan 3:8) Pa Zeova in donn nou en zoli privilez! I’n ansenny nou laverite e in donn nou loportinite pour ansenny sa laverite avek lezot.—Mat. 28:19, 20.

AKOZ NOU KOZ LAVERITE?

7-8. Eski rezon akoz nou koz laverite i enportan? Donn en legzanp. (Mark 3:11, 12) (Vwar portre.)

⁷ Parey in ganny mansyonnen pli boner, si nou anvi form parti fanmir Zeova, nou bezwen koz laverite. Me pour nou fer li plezir nou bezwen fer plis ki sa. Pour Zeova, sa rezon akoz nou koz laverite i enportan pour li. Reflesir lo sa ki ti arive ler Zezi ti lo later. (Lir Mark 3:11, 12.) Ler Zezi ti pe anons bon nouvel o bor Lanmer Galile, en gran lafoul ti vin kot li. Parmi zot i ti annan serten dimoun ki ti’n ganny posede par demon, ki ti vini e tonm ater devan li. Zot ti kriye: “Ou menm Garson Bondye.” Akoz sa bann demon ti koz laverite lo Zezi? I kapab ki zot ti anvi bann dimoun ki ti pe ekoute i annan konfyans dan zot e apre avek letan, zot ti pou fer sa bann dimoun aret servi Zeova. Sa ki sa bann demon ti dir ti vre me zot motivasyon ti egois. Zot pa ti pe anbet Zezi e Zezi pa ti kontan. Anfet Zezi ti donn lord pour zot pa koz lo li.

⁸ Ki nou kapab aprann avek sa resi? Nou motivasyon, setadir rezon akoz nou koz laverite i enportan pour Zeova. Alor i vreman enportan ki nou motivasyon pour ansenny laverite i akoz nou kontan Zeova e okenn laglwar ki nou gannyen i al pour Zeova.—Mat. 5:16; konpar Akt 14:12-15.

9. Ki nou devret evite fer e akoz?

⁹ Annou vwar en lot sityasyon kot nou bezwen evite rod laglwar pour nou prop lekor. Meton en ansyen i dir ou en keksoz konfidansyel e apre ou, ou al koz lo la avek lezot. Si pli tar bann ki ou’n dir sa lenformasyon i konnen ki sa ki ou’n dir i vre, zot kapab enpresyonnen ki ou konn sa bann keksoz e zot kapab krwar ki ou konn en kantite lenformasyon konfidansyel. Sa i kapab fer zot vwar ou konman en dimoun vreman enportan me i pa pou fer Zeova vwar ou konman pli enportan. (Prov. 11:13) Akoz? Parski nou pa’n zis partaz lenformasyon konfidansyel me nou’n osi koz laverite avek en move motivasyon.

KI MANNYER NOU DEVRET KOZ LAVRITE?

10. Ki i vedir pour koz dan en fason “agreab?” (Kolosyen 4:6)

¹⁰ Lir Kolosyen 4:6. Zapot Pol ti fer bann Kretyen dan lavil Kolos rapel ki zot parol i devret “touzour agreab.” Ki sa i vedir? Sa mo Grek ki’n ganny servi dan sa verse i montre ki nou parol pa devret zis anmenn byenfe pour sa dimoun ki pe ekoute me i devret osi ganny dir avek labonte e dan en fason ki pou atir sa dimoun.

11-12. Akoz nou bezwen fer atansyon lafason ki nou ansenny laverite? Donn en legzanp. (Vwar portre.)

¹¹ Nou bezwen swiv konsey Pol e koz dan en fason agreab ler nou pe ansenny laverite. Labib i konpar bann laverite ki i koz lo la avek en lepe ki koupe ki kapab separ lezo ek lespri. Andotmo, i kapab revel nou bann vre santiman ek motivasyon. (Ebr. 4:12) Me si nou pa servi Labib byen, nou kapab ofans dimoun e kree problenm kan i pa neseser. Ki mannyer sa i kapab arive?

¹² Meton nou dan predikasyon, nou zwenn en zonm ki abitye priy avek bann zimaz e ki kontan selebre Nwel ek Pak avek son fanmir. Nou servi Labib pour montre li ki i bet pour priy avek bann stati ki pa kapab fer nanryen e nou montre li ki Nwel ek Pak i bann selebrasyon ki pa annakor avek sa ki Labib i dir. (Iza. 44:14-20; 2 Kor. 6:14-17) Si nou ti dir li sa pandan nou premye konversasyon, nou ti pou pe dir li laverite me nou pa ti pou pe servi Parol Bondye byen.

13. Ki mannyer nou kapab asezonn nou parol avek disel?

¹³ Pol ti osi dir bann Kretyen ki zot parol i devret ganny asezonnen avek disel. I pa ti pe vedir ki nou devret degiz laverite oubyen kasyet laverite. O kontrer i ti pe ankouraz nou pour servi bann parol ki’n “asezonnen” pour ki nou kapab ansenny laverite dan en fason ki fer li “goute” pour sa dimoun ki pe ekoute. (Zob 12:11) I kapab difisil pour fer sa. Par egzanp, ler nou pe kwi manze, nou kapab krwar ki sa ki goute pour nou pou osi goute pour lezot. Pareyman, nou kapab krwar ki tou dimoun i vwar nou fason koze agreab. Me sa i pa leka. Par egzanp, bann dimoun ki sorti dan serten kiltir i kapab tant pour eksprim zot lopinyon dan en fason direk menm ler zot pe koz avek bann ki pli aze ki zot. Tandis ki bann ki sorti dan lezot kiltir, i kapab vwar sa kalite fason koze pa akseptab e menm malelve. Pol ti dir ki nou bezwen konnen ki mannyer nou “devret reponn sak dimoun.” Sa i vedir ki nou pa devret asezonn sa ki nou dir dapre nou gou oubyen dapre nou kiltir, me dapre gou sa dimoun ki pe ekout nou.

KAN KI NOU DEVRET KOZ LAVERITE?

14. Ler Zezi ti lo later, eski i ti ansenny son bann disip tou sa ki i ti konnen? Eksplike.

¹⁴ Zezi ti toultan koz avek son bann disip dan en fason agreab e i ti ansenny zot en kantite keksoz avek labonte. (Mark 6:34) Me i ti ankor annan en kantite keksoz pour zot aprann. Zezi pa ti esey ansenny zot tou sa ki i ti konnen. I ti pran kont zot bann limit. I ti konpran ki i pa ti sa bon moman pour zot aprann serten laverite. Anfet, i ti dir ki zot pa ti pou kapab konpran sa bann laverite. (Zan 16:12) Ki sa i ansenny nou?

15. Eski nou devret ansenny nou etidyan Labib tou sa ki nou konnen en sel kou? Eksplike. (Proverb 25:11) (Vwar portre.)

¹⁵ Legzanp Zezi i montre ki menm si nou konn laverite, sa pa vedir ki nou bezwen ansenny lezot tou sa ki nou konnen en sel kou. Ki mannyer nou kapab swiv legzanp Zezi? Nou bezwen pran kont sirkonstans bann dimoun. Annou pran ankor enn fwa legzanp sa msye ki kontan selebre Nwel ek Pak avek son fanmir. Nou konnen ki sa bann selebrasyon i form parti fo ladorasyon e ki Zeova pa kontan sa bann selebrasyon. Me imazin ki ou konmans etidye Labib avek sa msye enn oubyen de semenn avan Nwel. Eski ou pou pe koz dan en fason agreab si ou montre li sa ki Labib i dir konsernan bann selebrasyon ki form parti fo ladorasyon e ou ekspekte ki i aret selebre Nwel deswit? I vre ki serten etidyan i aplik tou sa ki zot aprann dan Labib deswit. Tandis ki lezot i kapab pran plis letan pour sanz zot fason panse ek aksyon. Nou kapab ed nou etidyan Labib pour fer progre si nou dir zot sa ki zot bezwen konnen ler zot bezwen tande, setadir, ler zot kapab konpran sa lansennyman.—Lir Proverb 25:11.

16. Ki mannyer nou kapab ed nou etidyan Labib pour “kontinyen reste dan laverite”?

¹⁶ I napa bokou keksoz ki fer nou sitan zwaye parey ler nou ed lezot aprann laverite konsernan Zeova. Nou kapab ed zot pour “kontinyen reste dan laverite” si nou fer sa bann keksoz swivan: Kontinyen vin en bon legzanp pour zot. (3 Zan 3, 4) Fer sir ki ou fason viv i montre ki ou krwar dan bann promes ki dan Parol Bondye. Fer sir ki ou annan en bon motivasyon ler ou pe koz laverite. Ler ou pe ansenny laverite koz dan en fason agreab par servi bann mo zantiy dan sa bon moman. Fer sir ki okenn laglwar ki ou gannyen i al pour Zeova. Si ou fer sa bann keksoz, ou pou montre ki ou servi Zeova, sa Bondye laverite.