“Bondye laverite” i toultan akonpli son plan

1. Dapre Psonm 31:2-5, akoz nou kapab annan konfyans dan Zeova?

NOU viv dan en lemonn ki ganny dirize par Satan. En kantite dimoun i koz manti, anbet lezot e trai lezot. I kapab difisil pour konnen lekel ki ou pou met konfyans ladan. Bann biznesmenn i dezonnet avek kanmarad. I normal pour bann dimoun koz manti konsernan bann keksoz ki zot pe vann pour fer dimoun aste. Osi, serten in vwar ki zot pa kapab ni menm annan konfyans ki zot bann zanmi pros pou gard zot promes. Me pa i rekonfortan pour konnen ki nou toultan kapab met nou konfyans dan Zeova. I “Bondye laverite.” (Lir Psonm 31:2-5.) Zeova pa zanmen koz manti. Tou sa ki i dir i vre. Nou kapab annan konfyans dan tou sa ki Zeova i dir e fer.

2. Ki nou pou vwar dan sa lartik?

² Dan sa lartik, nou pou premyerman vwar serten rezon akoz nou kapab annan konfyans dan Zeova avek tou nou leker. Apre nou pou vwar ki mannyer sa Bondye laverite pou detrir sa move lemonn Dyab e ki Bondye pe fer depi la konmela pour akonpli son plan. Sa lartik pou ed nou pour vin bann Temwen pour Zeova ki annan lardyes e ki pa per.

AKOZ NOU KAPAB ANNAN KONFYANS DAN SA BONDYE LAVERITE?

3. Akoz nou kapab annan konfyans total dan Zeova?

³ Nou kapab annan konfyans dan Zeova parski i nou Kreater. I Kreater lesyel ek later e i sa Enn ki donn lavi. (Zen. 1:1; Ps. 36:9; Rev. 4:11) I’n fer later dan en fason pour ki tou sa ki nou bezwen pour reste vivan i kontinyen marse, par egzanp, sa ler ki nou respire ek sa delo ki nou bwar. I kontrol tou keksoz e i pou toultan annan kontrol lo liniver. Vi ki Zeova in kree nou, i konn tou keksoz e i Tou Pwisan, nou kapab depan lo li pour gid nou e nou asire ki i pou donn nou en lavenir merveye.

4. Ki mannyer nou konnen ki Zeova i kontan nou?

⁴ Nou kapab annan konfyans dan Zeova parski i kontan nou. Zeova in kree bann imen parski i ti anvi partaz sa zoli kado lavi avek zot. Zeova ti koz lo son plan pour bann imen ler i ti dir: “Annou fer zonm parey nou, dan nou resanblans.” (Zen. 1:26) I ti donn nou sa liberte pour swazir. I’n kree en zoli lakour pour nou. (Ps. 115:16) I ti beni nou premye paran e donn zot sa responsabilite merveye pour fer sa lakour vin en paradi. (Zen. 1:28; 2:15) I ti donn zot en kantite bon manze ek en varyete plant ek zannimo e bokou plis ankor. I ti fer sa pour ki zot kapab ere e rezouir lavi. Sa bann keksoz i laprev ki “Zeova i demontre lanmour fidel pour touzour.”—Ps. 103:17.

5. (a) Ki mannyer Zeova ti gard son parol malgre tou zefor ki Dyab ti fer pour detrir lafanmir imen? (b) Ki serten promes ki Bondye in akonpli? (Vwar bwat “Bondye i toultan dir laverite.”)

⁵ Nou kapab annan konfyans dan Zeova parski i toultan gard son parol. Zeova pa ti kree later “pour nanryen me pour ki bann dimoun i reste lo la.” (Iza. 45:18, 19) Ler Adan ek Ev ti dezobei Zeova, konsekans zot aksyon ti pour ganny touye. I ti kapab paret ki plan Bondye pa ti pou vin vre. Me Zeova i toultan gard son promes. (Iza. 46:10, 11) Son plan i ki bann dimoun ki fer sa ki byen, i reste lo later e son plan pa’n sanze. I pour sa rezon ki Zeova ti permet Adan ek Ev pour annan zanfan. Osi, i ti donn Son sel Garson konman en ranson pour sov bann desandans Adan e pour donn zot sa zoli lespwar pour viv pour touzour.—Zan 3:16.

SA BONDYE LAVERITE I AKONPLI SON PLAN

6. Ki Zeova ti predir apre ki Adan ek Ev ti rebele dan zarden Edenn?

⁶ Sa enn ki ti enfliyans Adan ek Ev pour rebel kont Bondye i “sa premye serpan, sa enn ki ganny apele Dyab e Satan.”a (Rev. 12:9; Zen. 3:4, 5; Zan 8:44) Zeova ti kondann li setadir, pli tar i ti pou ganny detrir. (Zen. 3:15) Me avan ki sa i arive, en kantite dimoun pou swiv Satan e azir parey li. Me kantmenm sa, serten pou reste fidel avek Zeova.

7. Lekel ki swiv Dyab e ki pou arive avek zot?

⁷ I annan en kantite ki pe swiv Satan. Serten i bann lanz ki’n rebel kont Zeova e lezot i bann imen. Vi ki zot opoz oubyen lager kont plan Bondye, sa i fer ki zot form parti desandans Satan. Dan sa moman ki Bondye in swazir, Satan ek bann ki swiv li pou ganny detrir.—Dan. 2:44; Rom. 16:20.

8. Ki Zezi ti fer an 1914? (Vwar portre.)

⁸ Kwa ki fer nou asire ki plan Bondye pour detrir Satan ek bann ki swiv li pou vin vre? An 1914, Zezi ti konmans lager avek Satan ek son bann demon e zet zot lo later. (Rev. 12:7-9) Menm si sa lager ti ariv dan lesyel, i ti annan en lefe lo bann ki lo later. Labib i dir: “Maler pour later ek lanmer parski Dyab in desann kot zot avek en gran lakoler, parski i konnen i reste li zis en ptigin letan.” (Rev. 12:12) Depi 1914, Satan in fer li son lobzektif prensipal pour fer maksimonm dimoun posib swiv li e sa i fer ki pli ale i annan plis problenm dan lemonn. Labib i annan rezon dir “maler pour later”! Me byento, Zezi pou “fini ranport laviktwar” e Satan ek tou bann ki swiv li pou ganny detrir. (Rev. 6:2) Enn fwa pour tou, Zezi pou montre ki bann mansonz ki Satan in dir lo Zeova pa vre. (Ps. 45:4-6) Tou dimoun pou konnen ki Zeova i sa Bondye laverite.—Ezek. 38:23.

World War I: U.S. National Archives photo; bomb: USAF photo; pandemic: blvdone/stock.adobe.com; riot: inhauscreative/E+ via Getty Images

SA BONDYE LAVERITE I RASANBLE TOU BANN KI KONTAN LAVERITE

9. Lekel ki Zeova pe rasanble ozordi?

⁹ Pandan ki Satan pe esey atenn son lobzektif, Zeova pe rasanble “tou keksoz ansanm dan Kris, bann keksoz dan lesyel e bann keksoz lo later.” (Efe. 1:10) “Bann keksoz dan lesyel” pe refer avek bann Kretyen swazir. Bann ki Zeova in swazir pour dirize ansanm avek Kris dan lesyel. “Bann keksoz lo later” pe refer avek bann dimoun ki pou viv pour touzour dan Paradi lo later. Tou bann serviter Zeova i bizi pe ed lezot aprann laverite konsernan Zeova e montre ki Satan i en manter.

10. Ki mannyer Zeova pe ed bann dimoun vwar ki bann fo larelizyon pe ansenny mansonz? (Revelasyon 14:6, 7)

¹⁰ Pour rasanble bann ki kontan laverite, Zeova pe demann son pep pour anons laverite konsernan li partou dan lemonn. Sa i sa pli gran travay predikasyon ki’n deza ganny fer dan listwar imen. (Lir Revelasyon 14:6, 7.) Menm si Zeova pe servi bann imen pour anons sa bon nouvel, bann lanz osi pe ede pour rasanble bann dimoun ki annan leker senser pour form parti pep Bondye. Sa travay predikasyon pe montre ki Gran Babilonn, ki reprezant tou fo larelizyon, pe ansenny mansonz e pour plizyer santenn lannen, Dyab pe servi zot pour fann bann mansonz konsernan Zeova. (Rev. 18:2, 4) Byento, tou fo larelizyon pou ganny detrir e tou bann ki kontan sa Bondye laverite pou donn Bondye sa laglwar ki i vreman merite.—Rev. 17:16.

11. Ki mannyer nou kapab idantifye bann vre adorater Zeova?

¹¹ Zeova pe rasanble bann ki kontan laverite sorti dan tou ran sosyal, ekonomik e kiltirel e sorti dan tou nasyon. (Rev. 7:9, 10) Ler zot ti tann “sa bon nouvel,” zot ti rekonnet ki sa i laverite e zot ti kontan pour zwenn ansanm avek pep Zeova. (Mark 13:10) Ozordi in vin pli kler lekel ki pe servi Zeova dan sa fason ki i aksepte. Profet Malaki ti predir: “Ankor enn fwa, zot pou vwar diferans ant en dimoun drwat ek en move dimoun, ant enn ki pe servi Bondye e enn ki pa pe servi li.” (Mal. 3:18) Par sa travay predikasyon ek zot kondwit, bann serviter Zeova i montre ki zot pe ador sa Bondye laverite.

12. Ki mannyer sa travay predikasyon i ede akonpli plan Zeova?

¹² Ler nou anons sa “bon nouvel Rwayonm,” nou obeir sa lord ki Zezi ti donnen e an menm tan nou pe akonpli profesi. (Mat. 24:14; 28:18-20) Sa travay i fer li posib pour dimoun ki sorti partou dan lemonn vin bann disip Kris e pour annan sa lespwar pour ador sa Bondye laverite pour touzour. I vreman en gran privilez pour ede akonpli plan Zeova.

NOU KAPAB ASIRE KI ZEOVA POU GARD SON PROMES

13. Lekel ki Satan i sirtou persekite e akoz?

¹³ Satan i vreman ankoler parski i konnen ki “i reste li zis en ptigin letan” avan ki son lemonn i ganny detrir. (Rev. 12:12, 13) I sirtou persekit bann Kretyen ki lo later ki Zeova in swazir pour dirize dan Rwayonm Bondye setadir, bann “ki pe obei komannman Bondye e rann temwannyaz konsernan Zezi.” (Rev. 12:17; 14:12) Tou bann ki siport sa bann Kretyen ek sa travay ki zot pe fer, i osi en target Satan.

14. Ki pou arive ler Satan i atak pep Zeova? (Vwar portre.)

¹⁴ Apre ki Gran Babilonn pou’n ganny detrir, bann ki siport Satan pou atak pep Zeova. Apre sa, lager Armagedon pou konmanse. (Rev. 16:13, 14, 16) Zezi ek son larme ki dan lesyel pou sov bann serviter Zeova e i pou detrir tou sa ki reste dan lemonn Satan. (Rev. 19:19-21) I pou nepli annan bann manter, bann move dimoun ek bann ki anbet lezot. (Rev. 21:8) Tou dimoun pou konnen ki Zeova i toultan fer sa ki byen e ki i sa Bondye laverite.

15. Akoz nou kapab asire ki Bondye pou gard son bann promes? (Izai 65:16, 17) (Vwar portre.)

¹⁵ Ozordi plis ki zanmen oparavan, dimoun partou dan lemonn i kontinyen lager e koz manti avek kanmarad. Me Zeova i ed son pep pour reste ini. Zeova pe deza rasanble bann dimoun. Napa nanryen ki kapab anpes Zeova beni son pep ek sa travay ki zot pe fer. (Lir Izai 65:16, 17.) Nou asire ki Bondye pou gard tou son bann promes. Sa ki zapot Pol ti dir dan Romen 8:38, 39 i asir nou ki: “Ni lanmor, ni lavi, ni lanz, ni gouvernman, ni keksoz la konmela, ni keksoz a lavenir, ni pouvwar, ni oter, ni fonder, ni okenn lezot kreasyon pa pou kapab anpes Bondye ek Kris Zezi nou Senyer kontan nou.”

16. Akoz ou annan konfyans dan Zeova avek tou ou leker?

¹⁶ Nou annan rezon pour annan konfyans dan Zeova sa Bondye laverite. I nou Kreater e i kontan nou en kantite. Sa gran lafoul pe ogmante anmezir dimoun sorti dan tou nasyon i vin ador Zeova. (Iza. 60:22; Zek. 8:23) Nou konnen ki i toultan akonpli son plan e ki byento i pou detrir Satan pour ki dimoun i nepli krwar dan son bann mansonz. Parey David, nou priye: “Ki Bondye Zeova i ganny loue, . . . zis li ki fer bann keksoz merveye. Ki son non i ganny glorifye e loue pour touzour e ki son laglwar i ranpli later antye.”—Ps. 72:18, 19.