Mars

Dan Labib, i annan bann resi konsernan bann dimoun ki ti fer sa ki byen me ki apre zot in vin bann move dimoun. Enn parmi sa bann dimoun i Lerwa Salomon. I ti konnen lekel Zeova, ki mannyer i devret ador Zeova e Zeova ti donn li en kantite benediksyon. Me pli tar, Salomon ti konmans ador bann fo Bondye. Sa ti fer Zeova vreman ankoler e pour plizyer santenn lannen, nasyon Izrael antye ti soufer akoz bann pese Salomon. I vre ki Labib i dir ki ler Salomon ti mor, i ti “ganny antere dan Lavil David” ansanm avek bann zonm ki ti fidel parey Lerwa David. (1 Rwa. 11:5-9, 43; 2 Rwa. 23:13) Me eski lafason ki i ti ganny antere i vedir ki i pou ganny resisite? Labib pa dir. Rezireksyon i en kado sorti kot nou Bondye ki kontan nou. Zeova i donn sa kado avek bann ki i anvi donn sa loportinite pour servi li pour touzour. (Zob 14:13, 14; Zan 6:44) Alor, eski Salomon pou ganny sa kado? Zis Zeova ki konn sa larepons, pa nou. Me sa ki nou konnen, i ki Zeova pou fer sa ki drwat. w24.05 4 ¶9

Ler en dimoun i ganny envite dan en latant, i ti ekspekte ki sa dimoun ki’n envit li i pran swen avek li. Ler nou dedye nou lavi avek Zeova, nou vin bann envite dan son latant. Nou annan en kantite manze spirityel e nou zanmi avek lezot dimoun ki dan latant Zeova. Dimoun sorti partou dan lemonn i kapab vin bann envite dan latant Zeova. Nenport landrwa kot nou ete, si nou fidel avek Zeova nou kapab vin en envite dan son latant. (Rev. 21:3) Ki nou pou dir konsernan bann serviter fidel Zeova ki’n mor? Eski zot ankor bann envite dan latant Zeova? Wi! Akoz nou kapab dir sa? Parski Zeova i ankor rapel zot sitan byen ki i konmsi zot ankor vivan pour li. Zezi ti dir: “Dan sa resi lo sa brousay, menm Moiz ti fer kler ki bann mor i resisite, ler i ti apel Zeova ‘Bondye Abraam, Bondye Izaak ek Bondye Zakob.’ I pa Bondye bann ki’n mor, me Bondye bann ki vivan parski pour li zot tou zot vivan.”—Lik 20:37, 38. w24.06 3 ¶6-7

Zadok ti al Ebronn avek son bann zarm. (1 Kron. 12:38) I ti pare pour al lager ansanm avek David e pour defann Izrael kont son bann lennmi. Menm si Zadok ti napa bokou leksperyans konman en gerye, i ti en zonm ki ti annan bokou kouraz. Ki mannyer Zadok ki ti en pret ti’n kapab devlop kouraz? I ti konn en kantite zonm ki ti for e ki ti annan kouraz. San dout, i ti aprann avek zot legzanp. Par egzanp, vi ki David ti en dirizan e en gerye ki ti annan bokou kouraz, sa ti motiv tou bann Izraelit pour siport li. (1 Kron. 11:1, 2) David ti toultan depan lo Zeova pour ed li kont son bann lennmi. (Ps. 138:3) Zadok ti konn lezot zonm ki ti annan kouraz. Par egzanp, i ti konn Zeoada ek son garson Benaya, ki ti en gerye e osi 22 lezot sef tribi, ki ti siport David.—1 Kron. 11:22-25; 12:26-28. w24.07 3 ¶5-6

Sol sorti Tars ti persekit bann disip Kris dan en fason kriyel. Laplipar Kretyen ti panse ki petet i pa ti pou zanmen sanze. Me Zezi ti konnen ki Sol ti kapab sanze e repantir. Li avek son Papa zot ti vwar bann bon kalite dan Sol. Zezi ti dir: “Mon’n swazir sa zonm.” (Akt 9:15) Zezi ti menm servi en mirak pour ed Sol repantir. (Akt 7:58–8:3; 9:1-9, 17-20) Apre ki i ti’n vin en Kretyen, Sol ki pli tar ti ganny apele zapot Pol ti souvan eksprim son lapresyasyon pour lafason ki Zeova ek Zezi ti demontre labonte ek pitye anver li. (1 Tim. 1:12-15) Ki zapot Pol ti fer ler i ti aprann ki kongregasyon Korent ti’n permet en zonm ki ti’n komet imoralite seksyel pour reste dan kongregasyon? Sa ki i ti fer i ansenny nou en kantite lo lafason ki Zeova i disiplin avek lanmour e lo lenportans pour demontre pitye. w24.08 13 ¶15-16

Avek letan, Zeova ti montre ki mannyer bann imen enparfe i kapab vin pros avek li. Abel, dezyenm garson Adan ek Ev ti sa premye imen ki ti annan lafwa dan Zeova apre sa rebelyon dan zarden Edenn. Abel ti kontan Zeova, i ti anvi fer Zeova kontan e vin pros avek Li, alor i ti ofer en sakrifis avek li. Abel ti en berze, alor i ti pran detrwa pti mouton e ofer zot konman en sakrifis avek Zeova. Ki mannyer Zeova ti reazir? Zeova “ti aksepte son lofrann e Abel ti ganny laprouvasyon Bondye.” (Zen. 4:4) Zeova ti aksepte sakrifis bann dimoun ki ti kontan li e ki ti annan konfyans dan li, parey Noe. (Zen. 8:20, 21) Ler Zeova ti aksepte sa bann sakrifis, i ti montre ki bann imen ki fer pese i kapab ganny son laprouvasyon e vin pros avek li. w24.08 3 ¶5-6

Ler nou ganny trete dan en fason enzis, sa i kapab fer nou santi nou sagren e dekouraze. (Ekle. 7:7) Bann serviter fidel Zeova parey Zob ek Abakouk ti santi koumsa. (Zob 6:2, 3; Aba. 1:1-3) Menm si i normal pour nou annan sa bann santiman, nou bezwen fer atansyon ki mannyer nou reazir pour ki nou pa fer en keksoz mal e fer plis problenm. Ler bann dimoun ki tret lezot dan en fason enzis pa ganny pini, nou kapab konmans mazinen si i vo lapenn pour fer sa ki byen. Annou vwar leksperyans en psalmis ki ti vwar bann move dimoun pe tret bann bon dimoun dan en move fason. Me sa bann move dimoun ti paret ere. Sa psalmis ti dir: “Tou keksoz i fasil pour sa bann move dimoun.” (Ps. 73:12) I ti sitan dekouraze ler i ti vwar bann lenzistis ki ti pe arive, ki i ti konmans krwar ki i pa vo lapenn pour servi Zeova. I ti dir: “Ler mon ti esey konpran sa, sa ti fatig mwan.”—Ps. 73:14, 16. w24.11 3 ¶5-7

Nou glorifye Zeova parski nou annan bokou respe pour li. Nou annan en kantite rezon pour annan respe pour Zeova. Zeova i tou pwisan setadir i kapab fer nenport keksoz ki i anvi e i pa zanmen fatige. (Ps. 96:4-7) Atraver bann keksoz ki Zeova in fer, nou kapab vwar ki i vreman saz. I’n donn nou lavi e tou sa ki nou bezwen pour viv. (Rev. 4:11) I fidel. (Rev. 15:4) Tou sa ki i fer i reisi e i toultan gard son bann promes. (Zoz. 23:14) I pour sa rezon ki profet Zeremi ti dir sa konsernan Zeova: “Parmi tou bann dimoun saz dan bann nasyon e parmi tou zot bann rwayonm, napa personn parey ou.” (Zer. 10:6, 7) I kler ki nou annan bann bon rezon pour annan respe pour nou Papa ki dan lesyel. Me nou pa zis annan respe pour Zeova, nou kontan li. Osi, nou glorifye Zeova parski nou vreman kontan li. w25.01 3 ¶5-6

Bann ki opoz Bondye i esey fer krwar ki bann bon keksoz ki lorganizasyon Zeova i fer, i mal. Par egzanp, nou’n aprann dan Labib ki Zeova i ekspekte son bann serviter i reste prop fizikman, moralman e spirityelman. Zeova i dir ki okenn dimoun ki kontinyen fer sa ki mal e ki pa anvi sanz zot konportman, pa kapab kontinyen reste dan kongregasyon. (1 Kor. 5:11, 12; 6:9, 10) Nou obei sa lord ki sorti dan Labib. Me bann ki opoz nou i servi sa pour dir konmkwa nou pa kontan dimoun, ki nou ziz zot e ki nou pa aksepte bann ki diferan. Nou bezwen konnen lekel ki pe vreman atak lorganizasyon. Satan ki par deryer bann mansonz ki ganny dir konsernan lorganizasyon. I “papa mansonz.” (Zan 8:44; Zen. 3:1-5) Alor nou devret ekspekte ki Satan pou servi nou bann lennmi pour dir bann mansonz konsernan lorganizasyon Zeova. w24.04 10-11 ¶13-14

Menm apre ki gran ladetres i konmanse, i kapab ki serten dimoun ki vwar destriksyon “Gran Babilonn” i rapel ki pour plizyer lannen Temwen Zeova ti koz lo sa levennman. Eski petet serten sa bann dimoun ki vwar destriksyon “Gran Babilonn” pou devlop lafwa dan Zeova? (Rev. 17:5) Si sa i arive, i pou en pe parey sa ki ti arive Lezip dan letan Moiz. Rapel ki i ti annan “en kantite etranze” ki ti zwenn ansanm avek bann Izraelit ler zot ti kit Lezip. I kapab ki serten sa bann dimoun ti konmans devlop lafwa dan Zeova ler zot ti vwar ki sa ki Moiz ti’n dir konsernan sa Dis Fleo ti’n vin vre. (Egz. 12:38) Si en keksoz en pe parey i arive apre ki Gran Babilonn in ganny detrir, eski nou pou dezapwente si dimoun i kapab zwenn ansanm avek nou avan ki lafen i arive? Non. Nou anvi swiv legzanp nou Papa ki dan lesyel, ki “en Bondye ki annan pitye ek konpasyon, i pa ankoler vitman e i annan en kantite lanmour fidel ek laverite.”—Egz. 34:6. w24.05 11 ¶12-13

Ki i kapab arive si nou pa reste atase avek sa “standar ek bann bon lansennyman”? Annou vwar en legzanp. Dan premye syek, i ti annan en rimer parmi bann Kretyen konmkwa zour Zeova ti’n arive. I kapab ki sa ti akoz i ti annan en let ki dimoun ti krwar in ganny ekrir par zapot Pol. Serten Kretyen Tesalonik pa ti tyeke si sa ti vre me zot ti krwar sa rimer e zot ti menm repet sa avek lezot. Si zot ti rapel sa ki zapot Pol ti’n ansenny zot ler i ti avek zot, zot pa ti pou’n ganny anbete. (2 Tesa. 2:1-5) Pol ti dir son bann frer ek ser ki zot pa devret krwar tou sa ki zot tande. Pour ed sa bann Kretyen pour pa ganny anbete dan lavenir, Pol ti fini sa dezyenm let ki i ti anvoy pour sa bann Kretyen avek sa parol: “Mwan Pol mon fer zot salanm. Sa mon’n ekri avek mon prop lanmen. Sa i mon lekritir ki konfirmen ki tou sa bann let i sorti kot mwan.”—2 Tesa. 3:17. w24.07 12 ¶13-14

Bann Kretyen Ebre ti pou bezwen andire dan zot servis pour Zeova anmezir ki lavi dan Zide ti vin pli difisil. Menm si serten Kretyen Ebre ti fer fas avek en gran persekisyon dan lepase, en kantite ti’n vin Kretyen pandan en letan kot i ti napa bokou persekisyon. Zapot Pol ti dir zot ki menm si dan lepase zot ti’n fer fas avek persekisyon, ziska aprezan zot pa ti’n soufer parey Zezi in soufer, setadir ziska lanmor. (Ebr. 12:4) Me en kantite dimoun ti pe vin Kretyen e sa ti fer en kantite Zwif ankoler e vyolan. Zis detrwa lannen pli boner, plis ki 40 Zwif ti “fer serman ki zot pa ti pou manze oubyen bwar tan ki zot pa touy Pol, si non zot [ti] pou ganny en malediksyon.” (Akt 22:22; 23:12-14) Menm si dimoun ti pou ay zot e persekit zot, sa bann Kretyen ti bezwen kontinyen zwenn ansanm pour ador Zeova, anons sa bon nouvel e gard zot lafwa for. w24.09 12 ¶15

Zan ti en bon zanmi Zezi Kri e i ti enn son zapot. (Mat. 10:2) Zan ti akonpanny Zezi dan son travay predikasyon. I ti vwar bann mirak ki Zezi ti fer e i ti reste fidel avek Zezi pandan bann moman difisil. I ti vwar ler Zezi ti ganny touye e i ti vwar Zezi apre ki i ti’n resisite. I ti osi vwar lafason ki kongregasyon Kretyen ti agrandi e i ti viv ase lontan pour vwar sa bon nouvel “ganny anonse avek dimoun partou lo later.” (Kol. 1:23) Ler Zan ti pros pour mor, i ti ganny sa privilez pour ekri serten liv dan Labib. I ti ekri liv Revelasyon, ki en liv vreman eksitan. (Rev. 1:1) I ti osi ekri en Levanzil ek trwa let. I ti ekri son trwazyenm let pour en Kretyen fidel ki ti apel Gayis, ki i ti kontan e ki i ti konsider konman son zanfan. (3 Zan 1) Sa ki sa zonm aze e fidel ti ekri, in ankouraz tou bann disip Zezi ziska nou letan. w24.11 12 ¶15-16

En msye ki kontan son madanm i montre ki i apresye li. I vwar son madanm konman en kado presye sorti kot Zeova. (Prov. 18:22; 31:10) Sa i fer ki i tret son madanm avek labonte e avek respe, menm ler zot pe fer sèks. Pandan ki zot pe fer sèks, i pa pou fors son madanm pour fer bann keksoz ki fer son madanm enkonfortab, ki fer son madanm santi ki i pe ganny abize oubyen ki fatig konsyans son madanm. I osi pa pou fer okenn keksoz ki pou fatig son prop konsyans. (Akt 24:16) Bann msye, ou kapab asire ki Zeova i vwar e i apresye zefor ki zot fer pour onor zot madanm dan tou sa ki zot dir e fer. Determinen pour onor zot madanm par evite fer keksoz ki fer li ditor, par demontre labonte, respe e annan lafeksyon pour li. Ler zot fer sa, zot montre zot madanm ki zot kontan li e ki zot apresye li. Ler ou onor ou madanm, ou pou protez sa lanmitye ki pli enportan, setadir ou lanmitye avek Zeova.—Ps. 25:14. w25.01 13 ¶17-18

Enn bann keksoz ki fer bann serviter Zeova diferan avek bann swadizan Kretyen i zot devouman dan predikasyon. Kwa ki kapab ed nou pour kontinyen devoue dan sa travay predikasyon e menm annan plis devouman dan sa travay predikasyon. Atraver legzanp Zezi, nou kapab aprann ki mannyer pour annan devouman dan predikasyon. Ler i ti lo later, Zezi ti toultan devoue dan predikasyon. Anfet, pli letan ti pase, i ti fer plis dan predikasyon. Dan en legzanp, Zezi ti konpar sa travay predikasyon ki i ti fer avek sa travay ki en zardinyen ti fer. Pour trwa-z-an, sa zardinyen ti travay dir pour pran swen avek en pye fig me sa pye fig pa ti raport fri. Pareyman, pour trwa-z-an, Zezi ti anons sa bon nouvel avek bann Zwif me laplipar zot pa ti vin son bann disip. Kantmenm sa, Zezi ti azir parey sa zardinyen ki ti kontinyen annan lespwar ki sa pye fig ti pou raport fri e i pa ti aret anons sa bon nouvel avek zot. (Lik 13:6-9) Ler nou aprann avek sa ki Zezi ti ansennyen e nou swiv son legzanp, sa pou ed nou pour kontinyen devoue dan predikasyon. w25.03 14-15 ¶1-4

Ki ou devret fer si ou’n zwenn en dimoun ki ou krwar pou vin en bon konzwen pour ou? Eski ou devret dir sa dimoun ki mannyer ou santi deswit? Labib i dir ki en dimoun ki saz i devret rod konnesans avan ki i azir. Alor i ti pou saz ki ou obzerv sa dimoun pour en pe letan avan ki ou dir li ki ou enterese avek li. Ki mannyer ou kapab obzerv sa dimoun ki ou enterese avek? Pandan bann renyon ek rankont, ou kapab remark serten keksoz konsernan personnalite sa dimoun, son konportman ek son lanmitye avek Zeova. Lekel son bann zanmi e ki i koz lo la? (Lik 6:45) Eski son bann lobzektif i en pe parey avek sa ki pour ou? Petet ou kapab koz avek bann ansyen dan son kongregasyon oubyen bann Kretyen matir ki konn li byen. (Prov. 20:18) Ou kapab demann zot konsernan repitasyon sa dimoun ek bann kalite ki i annan. (Rit 2:11) Anmezir ki ou obzerv sa dimoun, fer sir ki ou pa fer li enkonfortab. Fer sir ki ou respekte son santiman, ki ou pa fer li enkonfortab par toultan oule pas letan avek li oubyen par anvi konn tou keksoz lo li. w24.05 22 ¶7-8

Bann ansyen pa pou vitman krwar ki en dimoun ki’n fer en fot grav pa pou repantir. En dimoun i kapab repantir pandan sa premye renyon avek sa komite, me lezot pou bezwen plis letan. Alor, bann ansyen i kapab fer laranzman pour zwenn plis ki en fwa avek en dimoun ki’n fer en fot grav. Petet apre sa premye renyon, sa Kretyen ki’n fer en fot grav pou konmans reflesi seryezman lo sa ki bann ansyen in dir li. Avek limilite, i kapab konmans priy Zeova. (Ps. 38:18) Alor, dan en lot renyon, i kapab konmans demontre en leta lespri ki diferan avek sa enn ki i ti demontre pandan sa premye renyon. Pour ed sa dimoun repantir, bann ansyen pou demontre konpasyon ek labonte. Zot annan lespwar e zot priye ki Zeova pou beni zot zefor pour ed sa Kretyen ki’n rezet Bondye revin alarezon e repantir.—2 Tim. 2:25, 26. w24.08 22-23 ¶12-13

Zeova pa oule ki personn i ganny detrir! I anvi ki tou bann ki fer pese i rekonsilye avek li. (2 Kor. 5:20) Sanmenm ki tou dilon listwar, Zeova in toultan sipliy son pep rebel, ensi ki bann endividi pour repantir e retourn ver li. Bann ansyen dan kongregasyon i annan sa privilez pour travay ansanm avek Zeova pour fer tou sa ki zot kapab pour ed bann dimoun ki’n fer en pese grav repantir. (Rom. 2:4; 1 Kor. 3:9) Zis mazin lazwa ki i annan dan lesyel ler en dimoun ki fer pese i repantir! Nou Papa dan lesyel, Zeova, i vreman kontan sak fwa ki enn bann mouton perdi i retourn dan kongregasyon. Sa i fer nou annan plis lanmour ankor pour Zeova ler nou reflesir lo son konpasyon, son pitye ek son labonte ekstraordiner.—Lik 1:78. w24.08 31 ¶16-17

Si Zezi ti’n les bann dimoun fer li vin lerwa, i ti pou pe partisip dan bann zafer politik ansanm avek bann Zwif, ki sa letan ti pe ganny dirize par bann Romen. Zezi ti ‘al lo montanny li tousel.’ Alor, menm si lezot ti met presyon lo li, i pa ti partisip dan politik. Sa i en leson vreman enportan pour nou. Byensir, dimoun pa pou demann nou pour fer mirak pour donn zot manze, pour geri bann malad oubyen pour vin zot dirizan. Me zot kapab esey konvenk nou pour vote oubyen pour siport en dimoun ki zot krwar pou kapab amelyor keksoz. Me legzanp Zezi i kler. Zezi ti refize pour partisip dan bann zafer politik e pli tar i ti menm dir: “Mon Rwayonm pa form parti sa lemonn.” (Zan 17:14; 18:36) Bann Kretyen ozordi i bezwen annan menm fason panse avek Zezi e swiv son legzanp. Parey Zezi, nou siport Rwayonm Bondye, nou koz avek lezot lo sa Rwayonm e nou priye pour sa Rwayonm vini.—Mat. 6:10. w24.12 4 ¶5-6

Anmezir ki ou etidye, reflesir lo ki mannyer ou kapab aplik sa ki ou pe aprann. Par egzanp, swiv legzanp Zeova e demontre lazistis par pa fer lapreferans. Swiv legzanp Zezi e demontre lanmour pour Zeova e pour lezot. Nou fer sa ler nou pare pour fer sa ki Zeova i anvi e nou ed lezot menm si par ler sa pou fer nou lavi pli difisil. Osi, swiv legzanp Zezi par anons sa bon nouvel avek lezot pour ki zot ganny sa loportinite pour konn bann keksoz merveye ki Zeova in fer pour bann imen e pour demontre lafwa dan sa ranson. Pli nou konpran e apresye sa ranson, pli nou pou kontan Zeova ek son Garson. Sa pou fer ki zot pou kontan nou plis. (Zak 4:8) Alor annou kontinyen servi tou sa ki Zeova in donn nou pour aprann konsernan sa ranson. w25.01 25 ¶16-17

Sa verse ki dan nou teks pour ozordi i osi kapab ganny tradwir konman: “Ou’n tir tou mon bann pese devan ou lizye.” Sa legzanp i montre nou ki Zeova i zet pese bann ki’n repantir e i pa get sa bann pese ankor. Sa bout dan sa verse i osi kapab ganny tradwir konman: “Ou’n konsider mon pese konmsi zot pa’n arive.” Labib i servi en lot legzanp pour met plis lanfaz lo sa pwen. Sa legzanp i dan Mika 7:18, 19. Sa bann verse i dir ki Zeova i zet nou pese dan fon lanmer. Dan letan lontan, ler en keksoz ti tonm dan fon lanmer, i ti enposib pour en dimoun al anmas sa keksoz. Atraver sa bann legzanp ki nou’n vwar, nou’n aprann ki ler Zeova i pardonn nou, i retir nou pese konpletman pour ki nou nepli santi nou koupab. David ti dir: “Ere sa bann ki zot move aksyon i ganny pardonnen e ki zot pese i ganny kouver.” (Rom. 4:7) Sa i lafason ki Zeova i pardonnen. w25.02 9 ¶7-8

Ozordi, i annan en paradi lo later kot i annan en kantite dimoun ki bizi pe fer bann bon keksoz. Sa plizyer milyon dimoun ki dan sa paradi i annan vre lape e zot determinen pour pa zanmen kit sa paradi. Zot osi anvi ki otan dimoun posib i zwenn ansanm avek zot dan sa landrwa senbolik ki spesyal. Kisisa sa landrwa? Sa i sa paradi spirityel! Dan en fason remarkab, Zeova in kree en landrwa senbolik kot son pep i anpe e ini avek kanmarad menm si zot viv dan move lemonn Satan ki danzere e kot dimoun i ay kanmarad. (1 Zan 5:19; Rev. 12:12) Nou Bondye ki kontan nou, i vwar ki mannyer sa lemonn i fer dimoun soufer. Alor i fer son bann serviter santi zot an sekirite pour zot kapab kontinyen servi li dan lazwa. Parol Bondye i dir ki sa paradi spirityel i parey en “landrwa kasyet” ki an sekirite e i parey en “zarden ki ganny byen aroze.” (Iza. 4:6; 58:11) Bann dimoun ki reste dan sa paradi spirityel i annan benediksyon Zeova. Sa i fer ki zot zwaye e an sekirite dan sa bann dernyen zour ki vreman difisil.—Iza. 54:14; 2 Tim. 3:1. w24.04 20 ¶1-2

Si ou ti pou kontan marye, i bezwen ki ou’n koz avek Zeova lo la dan lapriyer. Byensir Zeova pa’n promet ki i pou donn son bann serviter en konzwen. Me sa ki nou bezwen ek nou bann santiman i enportan pour Zeova. Alor i pou ed nou pandan ki nou pe rod en konzwen. Alor kontinyen koz avek Zeova konsernan sa ki ou anvi e konsernan ou bann santiman. (Ps. 62:8) Demann Zeova pour ed ou annan pasyans ek lasazes. (Zak 1:5) Menm si ou bezwen esper en pe pli lontan ziska ki ou trouv en dimoun ki kapab vin en bon konzwen pour ou, Zeova i promet pour donn ou sa ki ou bezwen e donn ou sa lanmour ek latansyon ki ou bezwen. (Ps. 55:22) Ou bezwen fer atansyon ki ou pa les lefet ki ou pe rod en konzwen vin sa keksoz pli enportan dan ou lavi. (Fili. 1:10) Vre lazwa pa depan lo si ou’n marye oubyen non, me lo ou lanmitye avek Zeova. (Mat. 5:3) Konman en selibater, i kapab ki ou pli lib pour fer plis dan servis Zeova, alor servi byen sa letan.—1 Kor. 7:32, 33. w24.05 21 ¶4; 22 ¶6

Ki kantite letan zot devret pwente? Ler nou pa pran ase letan pour reflesir avan nou fer en desizyon, souvandfwa keksoz pa mars byen. (Prov. 21:5) Alor, zot devret pran ase letan pour pwente pour zot kapab konn kanmarad pli byen. Me zot pa devret pwente pour en kantite letan si i pa neseser. Labib i osi dir: “Ler en dimoun pe esper en keksoz arive me i pa arive, sa i fer son leker malad.” (Prov. 13:12) Ki lezot i kapab fer ler de dimoun pe pwente? Nou kapab envit zot pour pran en repa avek nou, pour ladorasyon fanmir oubyen pour en moman detant. (Rom. 12:13) Nou kapab ed zot dan lezot fason. Pour zot pa zis zot de tousel, petet nou kapab al avek zot bann landrwa, vwayaz avek zot dan transpor oubyen envit zot kot nou lakour. (Gal. 6:10) Si de dimoun ki pe pwente i demann ou pour pas letan avek zot pour zot pa tousel, vwar sa konman en privilez parski ou pe ed ou bann zanmi. Fer atansyon ki ou pa kit sa de dimoun tousel. Me ou osi bezwen konpran kan ki ou bezwen les zot koz an prive. w24.05 30 ¶13-14

Bann ansyen i esey konpran bann sirkonstans ki’n kapab fer en dimoun fer pese. Par egzanp eski sa dimoun in vin feb spirityelman akoz i pa ti pe etidye personnelman oubyen partisip dan predikasyon? Eski i ti’n aret priye regilyerman oubyen eski i ti pe fer bann lapriyer alalezer? Eski i’n les bann move dezir diriz li? Eski i’n fer bann move swa konsernan frekantasyon oubyen lanmizman? Eski sa bann move swa in annan en move lefe lo son leker? Eski i aksepte ki son bann desizyon ek aksyon in annan en lefe lo son Papa Zeova? Avek labonte, bann ansyen i kapab demann bann kestyon ki ed sa dimoun konpran akoz i’n fer en pese grav. Par kont, zot pa pou demann bann kestyon personnel ki pa neseser. (Prov. 20:5) Deplis, zot kapab servi bann legzanp ki pou ed sa dimoun rezonnen e konpran akoz son bann aksyon i mal. Petet pandan sa premye renyon avek bann ansyen, sa dimoun pou konmans santi li vreman tris akoz sa ki i’n fer, i menm kapab repantir konpletman. w24.08 22 ¶9-11

Zezi ti anons “sa bon nouvel lo Rwayonm” avek devouman parski i ti konnen ki i sanmenm sa ki Bondye i anvi i fer. Sa travay predikasyon ti sa keksoz pli enportan dan son lavi. Pandan bann dernyen mwan ki i ti lo later, Zezi ti al “dan bann lavil ek vilaz enn apre lot” pour ansenny bann dimoun. (Lik 13:22) I ti osi ansenny lezot disip pour anons sa bon nouvel parey li. (Lik 10:1) Ozordi, sa travay pour anons sa bon nouvel i sa travay prensipal ki Zeova ek Zezi i anvi nou fer. (Mat. 24:14; 28:19, 20) Pour nou annan plis devouman dan predikasyon, nou bezwen vwar lezot parey Zeova i vwar zot. Zeova i anvi ki lamazorite dimoun i tann sa bon nouvel e zot aksepte laverite konsernan li. (1 Tim. 2:3, 4) Pour ed nou fer sa, i ed nou pour amelyor lafason ki nou anons sa bon nouvel ki sov lavi. Menm si dimoun pa konmans servi Zeova la konmela, zot kapab annan sa loportinite pour fer li avan gran ladetres i fini. w25.03 15-16 ¶5-7

Sak Kretyen i kapab servi son konsyans ki’n ganny antrennen par Labib pour fer en desizyon. Serten pou santi ki zot kapab dir bonzour sa dimoun e akeyir li ler i vin lasal. Par kont, nou pa pou fer en gran konversasyon oubyen konmans frekant sa dimoun. Serten dimoun ti kapab demande, ‘Pa Labib i dir ki si en Kretyen i dir bonzour en dimoun ki’n ganny tire dan kongregasyon i pe partisip avek li dan son bann move aksyon?’ (2 Zan 9-11) Konteks sa verse i montre ki sa lenstriksyon ti annan pour fer avek bann aposta oubyen bann dimoun ki promot bann move kondwit. (Rev. 2:20) Alor si en dimoun i promot bann lansennyman aposta oubyen ankouraz lezot pour fer sa ki mal, bann ansyen pa pou vizit li. Byensir, i toultan annan lespwar ki sa dimoun i sanze li osi. Me avan ki sa i arive, nou pa ti pou dir bonzour avek en tel dimoun, ni envit li pour vin asiste bann renyon kongregasyon. w24.08 30-31 ¶14-15

Apre ki Zezi ti’n donn manze en lafoul dimoun, i ti fer son bann zapot pran kannot pour retourn Kapernaoum e Zezi ti al dan montanny pour anpese ki lafoul i fer li vin lerwa. (Zan 6:16-20) Ler bann zapot ti pe ale dan kannot, en gro tanpet ti deklare e i ti annan gro divan ek laroul. Apre, Zezi ti vin kot zot e i ti pe mars lo delo. I ti envit zapot Pyer pour mars lo delo li osi. (Mat. 14:22-31) Me dek ki Zezi ti antre dan kannot, divan ti kalmi. Bann disip ti etonnen e zot ti dir: “Ou vreman Garson Bondye.” (Mat. 14:33) Menm si zot ti’n dir sa, zot pa ti konpran ki mannyer sa mirak ti relye avek sa ki Zezi ti’n fer pli boner ler i ti donn manze en lafoul dimoun. Remark sa ki Mark ti dir konsernan sa sityasyon. I ti dir: “[Bann zapot] ti vreman etonnen, parski zot pa ti’n konpran sinifikasyon mirak ki i ti’n fer avek dipen.” (Mark 6:50-52) Bann disip pa ti konpran ki Zeova ti’n donn Zezi pouvwar pour fer bokou plis ki zis fer mirak pour donn dipen. w24.12 5 ¶7

I annan ankor en lot fason ki nou kapab demontre lapresyasyon pour sa lanmour ki Zeova in demontre. Nou fer sa par servi bann semenn avan e apre Memoryal pour montre Zeova ki kantite nou rekonesan pour sa ranson. Apard ki fer laranzman pour asiste Memoryal, nou kapab osi envit lezot pour asiste sa levennman. Eksplik bann ki ou envite ki pou arive pandan Memoryal. Petet i pou itil pour montre zot sa video Akoz Zezi ti mor? ek sa video Mazin lanmor Zezi ki lo jw.org. Bann ansyen i devret fer sir ki zot envit bann ki inaktif. Imazin sa lazwa ki i pou annan dan lesyel e lo later si serten parmi bann mouton Zeova ki’n perdi i retourn dan troupo. (Lik 15:4-7) Ler nou asiste Memoryal, fer li en lobzektif pour nou akeyir kanmarad me sirtou pour akeyir bann ki nouvo ek bann ki pa’n asiste Memoryal pour en kantite letan. Nou anvi ki zot santi ki nou kontan ki zot la.—Rom. 12:13. w25.01 29 ¶15

Menm si ranson i ed nou konpran ki Zeova i zis, i annan en lot kalite ki ti motiv li pour anvoy Zezi pour mor pour nou. Sa i son lanmour pour nou. (Zan 3:16; 1 Zan 4:9, 10) Ranson i ansenny nou ki Zeova pa zis anvi ki nou viv pour touzour me i osi anvi ki nou form parti son fanmir. Annou reflesir lo sa: Ler Adan ti fer pese, i ti nepli kapab form parti fanmir Zeova. Sa i fer ki ler nou ne, nou tou nou pa form parti fanmir Bondye. Me gras a sa ranson, Zeova i kapab pardonn nou pese e en zour, tou dimoun ki annan lafwa dan li e ki obeir li pou kapab form parti son fanmir. Menm la konmela, nou kapab annan en bon lanmitye avek Zeova e avek nou bann frer ek ser. Tousala i montre ki Zeova i vreman kontan nou.—Rom. 5:10, 11. w25.01 21 ¶6

Ou pou dakor ki ranson i en kado ki annan bokou valer. (2 Kor. 9:15) Vi ki Zezi in sakrifye son lavi pour nou, ou kapab annan bon lanmitye avek Zeova. Ou kapab osi annan sa lespwar pour viv pour touzour. Nou annan en kantite rezon pour montre ki nou apresye sa ranson e ki nou rekonesan anver Zeova ki’n donn nou sa ranson akoz i kontan nou. (Rom. 5:8) Pour ed nou kontinyen annan rekonesans e pour pa zanmen oubliy sa ki Zeova ek Zezi in fer pour nou, Zezi in donn nou lord pour asiste Memoryal son lanmor ki ganny fer tou le lannen. (Lik 22:19, 20) Sa lannen nou pou selebre Memoryal Zedi le 2 Avril 2026. San dout, nou tou nou pou asiste. Nou pou ganny bann byenfe si pandan sezon Memoryal, nou pran letan pour medit lo sa ki Zeova ek son Garson in fer pour nou. w25.01 20 ¶1-2

Ou kapab kontinyen aprann konsernan sa lanmour ki Zeova ek Zezi i annan pour nou si ou kontinyen medit lo sa ki zot in fer pour nou. Petet pandan sezon Memoryal, ou kapab pran letan pour lir enn oubyen de Levanzil. Pa esey lir tro bokou sapit en sel kou. Me pran ou letan e rod lezot rezon akoz nou devret kontan Zeova ek Zezi. Si ou’n dan laverite pour en kantite lannen, petet ou kapab demande si i ankor annan nouvo keksoz pour ou aprann konsernan lazistis Zeova, son lanmour e lo ranson. Anfet, i pou toultan annan nouvo keksoz pour nou aprann lo sa bann topik e lo lezot topik ankor. Alor, pran letan pour lir e etidye bann lenformasyon ki i annan dan nou bann piblikasyon. w25.01 24-25 ¶13-15