Fevriye

Bann frer ki demontre bann zoli kalite i en gran led pour kongregasyon. En zonm ki rezonnab i travay dir pour gard lape avek lezot e pour ed lezot annan lape antre zot. Osi, en zonm ki rezonnab i ekout lezot e i esey konpran zot pwennvi. Par egzanp, si laplipar ansyen i an faver en desizyon e sa desizyon i an armoni avek bann prensip Labib, eski ou ti pou siport sa desizyon menm si ou ti pou prefer en lot keksoz? Ou pa ensiste ki lezot i fer keksoz dan ou fason. Ou konnen i enportan pour ekout lopinyon lezot. (Zen. 13:8, 9; Prov. 15:22) Ou pa mank respe pour lezot oubyen argimant avek zot. O kontrer, ou zantiy e ou demontre labonte anver zot. Konman en zonm ki kontan fer lape, pran linisyativ pour fer lape avek lezot menm dan bann sityasyon kot sa dimoun i ankor ankoler. (Zak 3:17, 18) Si ou koz dan en fason zantiy, sa i kapab ed lezot pour kalme en pti pe menm bann ki opoz nou.—Ziz 8:1-3; Prov. 25:15; Mat. 5:23, 24. w24.11 23 ¶13

Menm si Zezi ti mor “enn fwa pour tou,” i ankor pe fer en kantite keksoz pour nou. (Rom. 6:10) Ki Zezi pe fer? I pe kontinyen travay pour donn nou bann bon keksoz ki posib pour nou gannyen gras a sa ranson. Annou vwar ki Zezi pe fer. I pe servi konman nou Lerwa, Granpret ek sef kongregasyon. (1 Kor. 15:25; Efe. 5:23; Ebr. 2:17) I pe diriz sa travay pour rasanble bann Kretyen swazir e osi sa gran lafoul, en travay ki pou konplete avan gran ladetres i fini. (Mat. 25:32) I pe osi fer sir ki pandan sa bann dernyen zour, son bann serviter fidel i ganny byen nouri spirityelman. (Mat. 24:45) Pandan sa mil an ki Kris pou dirize, i pou kontinyen fer keksoz pour nou. Zeova pa’n zis donn son Garson pour mor pour nou me in donn li pour fer en kantite keksoz pour nou. w25.01 24 ¶12

Ler Zeova i pardonn nou pese, i konmsi nou pa’n zanmen fer sa pese e nou kapab asire ki dan lavenir, Zeova pa pou pini nou pour sa pese. Sa i fer ki nou kapab annan en bon lanmitye avek nou Papa ki dan lesyel. Me an menm tan, nou bezwen gard antet ki ler Zeova i pardonn nou, sa i en kado. Zeova i pardonn nou akoz i kontan nou e akoz son labonte ekstraordiner e pa akoz nou merite ganny pardonnen. Nou tou nou devret rekonesan ki Zeova i sa Bondye ki “vreman pardonnen.” (Ps. 130:4; Rom. 4:8) Me pour ki Zeova i kapab pardonn nou, nou bezwen fer en keksoz enportan. Zezi ti dir: “Si zot pa pardonn fot lezot, zot Papa osi pa pou pardonn zot.” (Mat. 6:14, 15) Alor i enportan ki nou swiv legzanp Zeova e pardonn lezot. w25.02 13 ¶18-19

Mazin sa ki ti arive avek bann dimoun ki ti reste dan lavil Sodonm ek Gomor. Lot ki ti en zonm drwat, ti reste parmi sa bann dimoun. Me eski nou konnen si Lot ti anons mesaz Bondye avek zot tou? Non. I vre ki zot ti bann move dimoun me eski zot tou zot ti konnen kwa ki byen e kwa ki mal? Rapel ki en group zonm dan sa lavil ti anvi vyol bann envite Lot. Labib i dir ki dan sa group zonm i ti annan bann “zenn konman vye.” (Zen. 19:4; 2 Pyer 2:7) Eski nou asire ki Zeova, sa Bondye ki pran pitye, in kondann sak sa bann dimoun amor e ki i’n deside ki zot pa pou ganny resisite? Non, nou pa kapab dir sa. Zeova ti asir Abraam ki i ti napa ni menm dis zonm drwat dan sa lavil. (Zen. 18:32) Vi ki zot ti bann move dimoun, Zeova ti annan rezon pour detri zot. Me eski nou kapab dir ki ni enn sa bann dimoun pa pou ganny resisite ler bann “dimoun . . . move pou resisite”? Non, nou pa kapab dir sa. w24.05 2 ¶3; 3 ¶8

Vi ki i annan bann sanzman dan lekonomi, serten frer ek ser in aksepte en louvraz kot zot in bezwen al reste lwen avek zot fanmir e en kantite parmi zot in realize ki sa ti en move desizyon. Avan ki ou aksepte en lot louvraz, pa reflesir zis lo larzan ki ou pou gannyen me reflesir sirtou lo si sa louvraz pou ed ou ek ou fanmir reste pros avek Zeova. (Lik 14:28) Demann ou lekor: ‘Si mon al reste lwen avek mon konzwen, ki lefe sa pou annan lo nou maryaz? Eski mon pou kapab al tou mon bann renyon, partisip dan predikasyon e pas letan avek mon bann frer ek ser?’ Si ou annan zanfan, ou osi bezwen demann ou lekor sa kestyon enportan: ‘Si mon lwen avek mon zanfan, ki mannyer mon pou kapab elve li “dapre disiplin ek gidans Zeova”?’ (Efe. 6:4) Ler ou pe fer sa desizyon, ou bezwen les ou ganny gide par fason panse Zeova e non pa par fason panse ou fanmir ek zanmi ki pa aplik sa ki Labib i dir. w25.03 29 ¶12

De lot kote, en Kretyen ki pa matir i kapab fasilman ganny anbete par bann “trik ek riz” e i kapab menm krwar bann fo lenformasyon, rimer ek zistwar ki dan medya. Oubyen i kapab ganny anbete par bann aposta. I kapab ki i zalou lezot, i kontan fer problenm avek zot, i ofans fasilman e souvandfwa ler i ganny tante, i fer sa ki mal. (1 Kor. 3:3) Labib i konpar ler en Kretyen pe vin pli matir spirityelman avek ler en zanfan pe grandi pour vin en adilt. (Efe. 4:15) I annan en kantite keksoz ki en zanfan pa konnen. Alor i bezwen en adilt pour gid li. Par egzanp, en manman i kapab demann son pti fiy pour atrap son lanmen ler zot pe koup semen. Anmezir ki sa pti fiy i grandi, i kapab ki sa manman pou les li koup semen li tousel me i pou kontinyen fer li rapel pour fer atansyon avan i koup semen. Ler sa fiy i vin en adilt, i konnen ki mannyer pour evit sa bann kalite danze.Pareyman ler bann Kretyen i vin matir, zot reflesir lo bann prensip Labib pour zot kapab konn fason panse Zeova lo zot sityasyon e apre sa, zot aplik sa ki zot i’n aprann. w24.04 3 ¶5-6

Pour en serten letan, zis bann ki ti dan lesyel ki ti kapab vin bann envite Zeova. Pli tar, i ti kree bann imen e zot osi zot ti kapab vin son bann envite. Serten sa bann envite ti Enok, Noe, Abraam ek Zob. Labib i dekri sa bann serviter konman bann zanmi Bondye oubyen konman bann dimoun ki ti mars “avek sa vre Bondye.” (Zen. 5:24; 6:9; Zob 29:4; Iza. 41:8) Pandan bann syek ki’n pase, Zeova in kontinyen envit son bann zanmi dan son latant. (Ezek. 37:26, 27) Par egzanp, dan profesi Ezekyel, nou aprann ki Bondye i vreman anvi ki son bann serviter i annan en lanmitye pros avek li. I promet ki i pou fer “en lalyans lape avek zot.” Sa profesi i koz lo en letan kot bann ki annan lespwar pour al viv dan lesyel ek bann dimoun ki annan lespwar pour viv lo later pour touzour, pou ini ansanm konman “en sel troupo” anba latant Zeova. (Zan 10:16) Nou pe viv dan sa letan ozordi! w24.06 2 ¶2, 4; 3 ¶5

Konman pep Zeova, nou donn Rwayonm Bondye tou nou sipor. Me souvandfwa nou bezwen annan kouraz pour fer sa. (Mat. 6:33) Par egzanp, nou bezwen annan kouraz pour viv dapre bann standar Zeova e pour anons sa bon nouvel konsernan Rwayonm dan sa move lemonn. Sa lemonn i vin deplizanpli divize akoz bann zafer politik. Alor nou bezwen annan kouraz pour nou pa pran kote dan bann zafer politik. (Zan 18:36) En kantite parmi pep Zeova in fer fas avek problenm larzan, zot in ganny bate oubyen ganny met dan prizon parski zot pa oule partisip dan politik oubyen antre dan larme. Ler nou reflesir lo lafason ki lezot in demontre kouraz pour zot kapab reste fidel avek Zeova ek son Rwayonm, sa i motiv nou pour demontre kouraz nou osi. Ler nou Lerwa, Zezi Kri ti lo later, i ti reziste sa presyon pour form parti sistenm politik sa lemonn Satan. (Mat. 4:8-11; Zan 6:14, 15) I ti toultan depan lo Zeova pour li kapab ganny kouraz. w24.07 3 ¶4; 4 ¶7

Zeova in met sa resi dan Labib pour nou kapab konpran en keksoz enportan. I ed nou konpran akoz i ay pese en kantite. Pese i separ nou avek Bondye e nou mor akoz nou fer pese. (Iza. 59:2) Sanmenm sa, Satan ti tant Adan ek Ev pour fer pese e pe kontinyen fer sa ozordi akoz i ay Zeova ek bann imen. Alor, ler Adan ek Ev ti fer pese, petet Satan ti panse ki i ti’n kas plan Zeova pour bann imen. Me i pa ti konpran ki kantite Zeova i kontan bann imen. Plan Bondye pour bann desandans Adan ek Ev i ankor parey, i pa’n sanze. I kontan bann imen, alor deswit i ti donn zot lespwar. (Rom. 8:20, 21) Zeova ti konnen ki i ti pou annan dimoun ki ti pou swazir pour kontan li e ki ti pou rod son led pour zot kapab obeir li. Konman zot Papa e osi zot Kreater, Zeova ti fer li posib pour zot kapab vin pros avek li e pour sov zot dan pese ek lanmor. w24.08 3 ¶3-4

Laplipar serviter Bondye i vreman bizi. Nou travay pour pran swen avek nou lekor e avek nou fanmir. (1 Tim. 5:8) En kantite Kretyen i pran swen avek bann manm fanmir ki malad oubyen aze. An plis ki sa, nou tou nou bezwen pran swen avek nou prop lasante e sa i pran letan. Apard sa bann responsabilite, nou annan lezot responsabilite dan kongregasyon. Enn bann responsabilite enportan ki nou annan i pour donn nou meyer dan sa travay predikasyon. Konman bann Kretyen, enn bann keksoz “pli enportan” ki nou bezwen fer i pour lir Labib. Alor nou bezwen fer sir ki nou lektir Labib i vin en priyorite. Sa premye Psonm i dir sa konsernan en dimoun ki ere: “I pran plezir dan lalwa Zeova e i lir Son lalwa avwabas lizour konman aswar.” (Ps. 1:1, 2) I kler alor ki nou bezwen fer letan pour li Labib. Me kan ki i sa pli bon moman pour lir Labib? Larepons i kapab diferan pour sak dimoun. Sa ki enportan i ki nou swazir en letan kot nou pou kapab lir Labib regilyerman. w24.09 3 ¶5-6

Eski en Kretyen matir pa bezwen led avek lezot? Non i bezwen. Parfwa bann Kretyen matir i bezwen demann led. En Kretyen ki pa matir i kapab ekspekte ki lezot i dir li ki pour fer oubyen ki zot fer desizyon dan son plas. De lot kote, en Kretyen ki matir i rod led avek lezot ki pli saz ki li e ki annan plis leksperyans ki li. Me sa Kretyen i konnen ki i bezwen fer son prop desizyon e ki Zeova i ekspekte ki i “desarz son prop responsabilite.” Bann adilt i diferan avek kanmarad fizikman. Pareyman, bann Kretyen matir i annan diferan kalite. Par egzanp, i annan ki kapab vreman saz. I annan ki annan bokou kouraz. I annan lezot ankor ki vreman zenere e i osi annan lezot ki vreman konpran santiman lezot. Osi ler de Kretyen matir i fer fas avek en sityasyon en pe parey, zot kapab fer diferan desizyon me tou le de desizyon i dapre bann prensip Labib. Souvandfwa sa i kapab arive ler bann Kretyen i bezwen fer en desizyon dapre zot konsyans. Me zot pa ziz kanmarad si zot desizyon i diferan. O kontrer, zot reste ini avek kanmarad.—Rom. 14:10; 1 Kor. 1:10. w24.04 4 ¶7-8

Ki ou kapab fer si ou santi ki ou pa vo nanryen? Lir e medit lo bann verse Labib ki asir ou ki ou presye pour Zeova. Pa konpar ou avek lezot e pa konsantre lo sa ki ou pa kapab fer. Zeova pa ekspekte ki ou fer plis ki sa ki ou kapab fer. (Ps. 103:13, 14) Si dan lepase ou’n ganny trete dan en move fason, pa blanm ou lekor pour sa ki sa dimoun in fer. Gard antet ki Zeova pou ziz bann ki pa’n tret lezot byen. Me i pou ed bann ki’n ganny trete dan en move fason. (1 Pyer 3:12) Ou kapab asire ki Zeova i kapab servi ou pour ed lezot. I’n donn ou sa loner pour travay ansanm avek li dan sa travay predikasyon. (1 Kor. 3:9) I kapab ki bann sityasyon difisil ki ou’n pas ladan in fer li pli fasil pour ou konpran ki mannyer bann ki pe soufer i santi. Ou kapab fer en kantite keksoz pour ed zot. w24.10 7-8 ¶6-7

Zeova i anvi ki lezot i tret nou byen e i vwar ler lezot pa tret nou byen. “Zeova i kontan lazistis.” (Ps. 37:28) Zezi i asir nou ki dek ki sa moman apropriye i arive, Zeova pou “rann lazistis.” Byento, i pou retir tou sa ki fer nou soufer e i pa pou les nou soufer akoz lenzistis ankor. (Ps. 72:1, 2) Nou bezwen esper sa letan kot Zeova pou rezourd tou problenm. Me depi la konmela, Zeova i ed nou ler lezot pa tret nou byen. (2 Pyer 3:13) Par egzanp, i ansenny nou ki mannyer pour reazir ler nou ganny trete dan en fason enzis pour nou evite ganny plis problenm. En fason ki Zeova i fer sa i par montre nou dan Labib lafason ki son Garson ti reazir ler i ti ganny trete dan en fason enzis. I osi donn nou bann konsey ki nou kapab aplike ler nou pa ganny trete byen. w24.11 2-3 ¶3-4

Zezi ti demann son bann disip pour donn manze sa lafoul. Me sa ti paret enposib parski i ti annan apepre 5,000 zonm e si bann madanm ek bann zanfan i ganny enkli ansanm, i kapab ki an tou i ti annan apepre 15,000 dimoun. (Mat. 14:21) Andre ti dir: “I annan en pti garson la ki annan senk dipen lorz ek de pti pwason. Me sa pou ase pour tou sa dimoun?” (Zan 6:9) Dipen ki ti’n ganny fer avek lorz ti en keksoz ki dimoun ti abitye manze e i kapab ki sa pti pwason ti’n ganny sale e met sek. Me sa kantite dipen ek pwason ki sa pti garson ti annan pa ti pou ase pour sa kantite dimoun manze. Zezi ti anvi demontre lospitalite anver sa bann dimoun alor i ti demann zot pour asiz ater dan zerb par group. (Mark 6:39, 40; Zan 6:11-13) Apre sa, Zezi ti remersye son Papa pour sa dipen ek sa pwason. Ler i ti fer sa, i ti montre ki Bondye ki’n donn zot sa manze e ki i ti rekonesan pour sa manze. I enportan pour nou swiv legzanp Zezi par fer lapriyer avan en repa. Apre sa, Zezi ti fer son bann disip partaz manze avek bann dimoun e zot ti manze ziska ki zot vant ti plen. w24.12 2-3 ¶3-4

Ler Zezi ti lo later, i ti glorifye son Papa par dir lezot ki Zeova ki’n donn li sa pouvwar pour fer mirak. (Mark 5:18-20) Zezi ti osi glorifye Zeova par lafason ki i ti koz lo son Papa e lafason ki i ti tret lezot. En fwa, Zezi ti pe ansennyen dan sinagog e parmi bann ki ti pe ekout li, i ti annan en madanm ki ti posede par en demon pour 18 an. Sa demon ti’n fer lekor sa madanm sitan kourbe ki sa madanm pa ti ni menm kapab debout drwat. Zezi ti konpran ki sa madanm ti pe soufer e i ti anvi ed li. Alor i ti apros sa madanm e i ti koz avek li dan en fason zantiy. I ti dir sa madanm: “Madanm, ou’n geri.” Apre i ti poz son lanmen lo sa madanm e deswit sa madanm ti debout drwat e “konmans glorifye Bondye.” Sa madanm ti vreman rekonesan ki Zeova ti’n geri li. (Lik 13:10-13) Sa madanm ti annan bon rezon pour donn Zeova laglwar e nou osi nou annan bon rezon pour donn Zeova laglwar. w25.01 2-3 ¶3-4

Lo nou menm, i enposib pour nou reganny tou sa ki Adan ek Ev in perdi. (Ps. 49:7-9) San led, nou ti pou napa lespwar pour lavenir oubyen pour ganny resisite. Nou ti pou mor e pa zanmen viv ankor zis parey ler bann zannimo i mor. (Ekle. 3:19; 2 Pyer 2:12) Zeova, nou Papa ki kontan nou in donn nou en kado e sa kado i pey sa det setadir sa pese ki nou’n erite avek Adan. Zezi i eksplik sa laranzman dan sa fason. I ti dir: “Bondye in telman kontan lemonn ki i’n donn son sel Garson pour ki nenport ki ki demontre lafwa dan li pa ganny detrir me i ganny lavi eternel.” (Zan 3:16) Sa kado i osi fer li posib pour nou annan en bon lanmitye avek Zeova. Nou kapab ganny bann byenfe avek sa kado merveye ki fer li posib pour nou pese ganny pardonnen. w25.02 3 ¶3-6

Kwa ki ti ed Sol pour batize? Ler Zezi ti aparet avek Sol, Sol ti vin aveg. (Akt 9:3-9) Apre ki sa ti’n arive, Sol ti zennen pour trwa zour e i tre probab ki i ti medit lo sa ki ti’n arive avek li. Sa leksperyans ti fer Sol asire ki Zezi ti Mesi e ki son bann disip ti dan sa vre larelizyon. Nou kapab aprann serten keksoz avek legzanp Sol. I ti’n kapab les lorgey oubyen lafreyer zonm anpes li batize. Me i pa ti les sa arive. I ti pare pour vin en Kretyen menm si i ti konnen ki i ti pou ganny persekite. (Akt 9:15, 16; 20:22, 23) Apre ki i ti’n batize, i ti kontinyen depan lo Zeova pour li kapab fer fas avek diferan kalite problenm. (2 Kor. 4:7-10) Ler ou batize konman en Temwen Zeova, ou lafwa i kapab ganny teste oubyen i kapab ki dimoun i opoz ou. Me ou pa pou tousel. Ou kapab asire ki Bondye ek Kris pou toultan donn ou sa led ki ou bezwen pour andire e pour reste fidel.—Fili. 4:13. w25.03 4 ¶8-9

Lir Labib regilyerman i en bon lobzektif. Me nou bezwen fer plis ki sa si nou anvi ganny bann byenfe avek Parol Bondye. Annou vwar en legzanp. Bann plant i bezwen delo pour viv. Me si tro bokou lapli i tonbe dan en ptigin letan, later pa pou kapab abzorb tou sa delo. Si lapli i kontinyen tonbe, sa pa pou anmenn okenn byenfe pour bann plant. I pli bon ler lapli i tonm dousman parski later i kapab ganny letan pour abzorb sa delo e sa pou ed bann plant pouse. Pareyman nou devret evite lir Labib sitan vit ki nou pa ganny letan pour reflesir, rapel e aplik sa ki nou’n lir. (Zak 1:24) Eski parfwa ou santi ki ou pe lir Labib tro vitman? Si wi, ki ou devret? Lir pli dousman. Fer zefor pour reflesir lo sa ki ou lir pandan ki ou pe lir e apre ki ou’n fini lir. Petet ou kapab swazir pour etidye pour plis letan, pour ou kapab annan plis letan pour reflesir lo sa ki ou pe lir. w24.09 4 ¶7-9

Ler bann ansyen i ganny lenstriksyon avek lorganizasyon, zot bezwen lir byen sa bann lenstriksyon e fer tou sa ki zot kapab pour aplik sa bann lenstriksyon. Zot ganny lenstriksyon lo ki mannyer pour prezant sak parti dan renyon, lo ki mannyer pour fer lapriyer pour kongregasyon e osi lo ki mannyer pour pran swen avek bann mouton Kris. Ler bann ansyen i swiv tou lenstriksyon ki sorti kot lorganizasyon, zot ed bann frer ek ser pour santi ki Zeova i kontan zot e pe pran swen avek zot. Ler nou ganny lenstriksyon avek bann ansyen, nou devret pare pour swiv. Ler nou fer sa, i pou pli fasil pour bann ansyen fer zot travay. Labib i ankouraz nou pour obei e soumet avek bann ki pe dirize dan kongregasyon. (Ebr. 13:7, 17) Parfwa sa i kapab difisil. Akoz? Parski sa bann zonm i enparfe. Me si nou konsantre lo zot bann move tre olye lo zot bann bon kalite, nou pou pe ed nou bann lennmi. Akoz nou dir sa? Nou kapab konmans mazin an mal lo lorganizasyon e perdi konfyans dan lorganizasyon. w24.04 10 ¶11-12

Eski tou dimoun ki mor pandan gran ladetres pou mor e pa pou zanmen ganny resisite? Labib i dir ki bann ki opoz Zeova e ki ganny touye par Zeova ek son larme dan lager Armagedon, pa pou ganny resisite. (2 Tesa. 1:6-10) Me ki pou arive avek lezot dimoun, par egzanp, serten ki mor pandan gran ladetres akoz maladi, lavyeyes oubyen ki’n ganny touye par aksidan oubyen par en lot dimoun? (Ekle. 9:11; Zek. 14:13) Eski petet serten sa bann dimoun pou parmi sa bann “dimoun . . . move” ki pou ganny resisite dan nouvo lemonn? (Akt 24:15) Nou pa konnen. Me nou konn plizyer keksoz konsernan sa ki pou arive dan lavenir. Par egzanp, nou konnen ki pandan lager Armagedon bann dimoun pou ganny zize dapre lafason ki zot in tret bann frer Kris. (Mat. 25:40) Bann dimoun ki’n siport bann Kretyen swazir e ki’n siport Kris pou ganny zize konman bann mouton.—Rev. 12:17. w24.05 10-11 ¶9-11

Labib i dir ki nou pe viv dan “en letan vreman difisil.” (2 Tim. 3:1) Pep Zeova i fer fas avek menm problenm ki tou dimoun dan sa lemonn i fer fas avek. Me an plis ki sa, nou ganny persekite akoz nou servi Zeova. Kwa ki pou ed nou pour kontinyen servi Zeova menm si nou fer fas avek sa bann problenm? En rezon prensipal ki nou kontinyen servi Zeova i akoz nou’n vwar lafason ki Zeova in ed nou dan lepase e sa i fer nou konnen ki Zeova i “sa Bondye vivan.” (Zer. 10:10; 2 Tim. 1:12) Zeova i en personnaz reel ki vwar tou bann difikilte ki nou fer fas avek e i toultan anvi ed nou. (2 Kron. 16:9; Ps. 23:4) Ler nou vwar Zeova konman sa Bondye vivan, sa i kapab ed nou pour fer fas avek okenn difikilte ki nou rankontre. w24.06 20 ¶1-2

Nou bezwen kontinyen annan konfyans dan lorganizasyon Zeova. Ler i kler ki en azisteman i bezwen ganny fer dan lafason ki nou konpran en laverite ki dan Labib oubyen i bezwen annan en azisteman dan lafason ki nou servi Zeova, bann ki pe dirize dan lorganizasyon Zeova pa ezite pour fer sa bann sanzman neseser. Zot fer sa parski zot anvi fer plezir Zeova plis ki okenn lezot keksoz. Zot fer zot mye pour fer bann desizyon dapre Parol Bondye, ki sa standar ki tou serviter Bondye i bezwen obei. Zapot Pol ti donn sa konsey: “Kontinyen reste atase avek standar ek bann bon lansennyman.” (2 Tim. 1:13) Sa “standar ek bann bon lansennyman” ki sa verse pe koz lo la pe refer avek bann lansennyman ki dan Labib. (Zan 17:17) Tou sa ki nou krwar ladan i baze lo bann lansennyman koumsa. Lorganizasyon Zeova in ansenny nou pour nou fer sir ki sa ki nou krwar ladan i baze lo sa standar. Tan ki nou fer sa, nou pou ganny bann benediksyon. w24.07 11-12 ¶12-13

Zapot Pyer ti konpran ki mannyer en dimoun i santi apre ki i’n repantir e ganny pardonnen. Alor i ti ansenny lezot lo la. En pe letan apre lafet Lapannkot, Pyer ti koz avek en lafoul Zwif. I ti eksplik zot ki zot ti’n touy Mesi. Me kantmenm sa, i ti demann zot pour “repantir e sanz zot lavi pour ki zot pese i ganny efase e ki Zeova li menm i donn zot soulazman.” (Akt 3:14, 15, 17, 19) Alor Pyer ti montre ki ler en dimoun i repantir i bezwen sanz son move fason panse e azir, aret fer sa ki mal e fer sa ki fer plezir Zeova. Sa zapot ti fer vwar ki Zeova ti pou pardonn zot konpletman, konmsi i efas zot pese totalman. Sa i en zoli lespwar pour bann Kretyen ler zot fer pese, menm bann pese grav. w24.08 12 ¶14

Si nou annan en lafwa for e nou annan konfyans ki byento Zeova pou detri sa move lemonn, nou pa pou krwar ki pour annan plis larzan ek keksoz materyel i sa keksoz pli enportan. Pandan gran ladetres, larzan pou napa okenn valer. Labib i dir ki bann dimoun pou “zet zot larzan dan bann semen” parski zot pou realize ki “ni zot larzan, ni zot lor pa pou kapab sov zot zour gran lakoler Zeova i arive.” (Ezek. 7:19) Olye konsantre lo fer maksimonm larzan ki nou kapab, nou bezwen fer bann desizyon ki pou ed nou viv en lavi senp e an menm tan pran swen avek nou lekor, nou fanmir e pour servi Zeova. I ti pou bet pour nou fer bann det ki pa neseser oubyen pas en kantite nou letan pe pran swen avek bann keksoz materyel. Nou osi fer atansyon ki bann keksoz materyel ki nou annan pa vin sa keksoz pli enportan dan nou lavi. (Mat. 6:19, 24) Anmezir lafen sa move lemonn i aprose, nou pou bezwen swazir si nou pou met konfyans dan Zeova oubyen dan bann keksoz materyel ki nou annan. w24.09 11 ¶13-14

I tre probab ki nou kapab sirmont serten nou bann febles konpletman. Me i kapab ki nou bezwen kontinyen lalit avek lezot febles pour plis letan. Annou vwar legzanp zapot Pyer. Trwa fwa i ti dir ki i pa konn Zezi parski i ti annan lafreyer zonm. (Mat. 26:69-75) Pli tar i paret ki Pyer ti’n sirmont sa febles ler i ti rann temwannyaz lo Zezi devan Sannedren. (Akt 5:27-29) Me detrwa lannen pli tar, i ti aret manz avek serten Kretyen ki pa ti Zwif parski i ti per sa ki sa bann ki ti “an faver sirkonsizyon” ti pou panse lo li. (Gal. 2:11, 12) Sa febles ki Pyer ti annan ti’n retournen. Petet sa i akoz i pa ti’n konpletman sirmont sa febles. Parey Pyer, i kapab ki parfwa nou bezwen lalit avek en febles ki nou krwar nou ti’n fini sirmonte. Me nou kapab anpes en febles ki nou ankor annan fer nou fer sa ki mal par swiv sa konsey ki Zezi ti donnen pour “kontinyen veye.” (Mat. 26:41) Menm ler ou santi ou for, kontinyen evit bann sityasyon kot ou kapab tonm dan tantasyon. Kontinyen fer bann keksoz ki ti’n deza ed ou pour lalit avek ou bann febles.—2 Pyer 3:14. w24.07 18-19 ¶17-19

Napa okenn dimoun ki pli zenere ki Zezi. Ler i ti lo later, i ti servi son pouvwar pour ed lezot. (Lik 9:12-17) I ti donn son lavi pour nou e sa, i sa pli gro kado ki en dimoun in deza donnen. (Zan 15:13) Apre ki Zezi ti resisite, i ti kontinyen demontre zenerozite. Zis parey i ti promet, i ti demann Zeova pour anvoy lespri sen pour ansenny e rekonfort nou. (Zan 14:16, 17, not.; 16:13) Osi, atraver bann renyon, Zezi i kontinyen donn nou sa ki nou bezwen pour nou kapab fer dimoun partou dan lemonn vin son disip. (Mat. 28:18-20) Zapot Pol ti ekri ki apre ki Zezi ti’n al dan lesyel, “i ti donn bann zonm konman kado.” (Efe. 4:7, 8) Pol ti dir ki Zezi ti donn sa “bann zonm konman kado” pour siport kongregasyon dan diferan fason. (Efe. 1:22, 23; 4:11-13) Byensir sa bann zonm i enparfe, alor zot fer fot. (Zak 3:2) Me zot bann kado ki nou Senyer Zezi Kri in donn nou e i servi zot pour ed nou. w24.10 18 ¶1-2

David ti dir son garson Salomon ki i ti pou reisi tan ki i ti obei Zeova. Malerezman, ler Salomon ti vin pli aze, i ti konmans ador lezot Bondye. Me sa pa ti fer plezir Zeova e Zeova ti aret donn Salomon sa lasazes ki i ti bezwen pour diriz son pep avek lazistis e dan sa bon fason. (1 Rwa. 11:9, 10; 12:4) Ki nou aprann? Ler nou obei Zeova, nou pou reisi dan lavi. (Ps. 1:1-3) Byensir, Zeova pa’n promet nou ki i pou fer nou ris e vin renonmen parey Salomon. Me si nou obei Bondye, i pou donn nou sa lasazes ki nou bezwen pour fer bann bon desizyon. (Prov. 2:6, 7; Zak 1:5) Son bann prensip i kapab ed nou ler nou pe fer bann desizyon konsernan travay, lekol, larzan ek divertisman. Si nou swiv son bann prensip, nou pou protez nou lanmitye avek li e nou pou kapab viv pour touzour. (Prov. 2:10, 11) Nou pou annan bann bon zanmi e nou pou annan en lavi fanmir ki ere. w24.11 10-11 ¶11-12

Paran i annan diferan loportinite pour koz avek zot zanfan konsernan Labib oubyen konsernan zot lafwa dan Bondye. Zot kapab fer sa ler zot vizit en mize. Ou kapab montre ou zanfan en lobze oubyen fer li lir konsernan en levennman dan lepase ki relye avek en keksoz ki dan Labib. Sa i kapab ed ou zanfan pour vwar ki sa ki Labib i dir i vre. Petet ou kapab ansenny ou zanfan konsernan sa Moabite Stone ki en ros ki annan 3,000 an e ki annan non Zeova lo la. I annan en kopi sa Moabite Stone dan en legzibisyon ki annan pour tit “The Bible and the Divine Name” dan biro prensip Temwen Zeova ki Warwick, New York. Sa Moabite Stone i montre ki Lerwa Mesa ki ti lerwa Moab ti rebel kont Izrael. Sa i an armoni avek sa ki Labib i dir. (2 Rwa. 3:4, 5) Ler ou zanfan i vwar laprev pour li menm ki sa ki Labib i dir i vre e egzakt, sa pou fer son lafwa vin pli for. w24.12 14 ¶4; 15 ¶6