Zanvye

Enn bann moman pli zwaye pour en koup marye, i ler zot pti baba i ne. Me menm si bann paran i kontan zot pti baba, zot pa anvi ki i toultan reste en pti baba. Anfet, zot ti pou enkyet si zot pti baba pa grandi. Dan menm fason, Zeova i kontan ler nou fer bann premye pa pour vin bann disip Zezi me i pa anvi ki nou aret lanmenm. (1 Kor. 3:1) O kontrer, i demann nou pour nou vin “parey bann adilt,” setadir bann Kretyen matir. Dan 1 Korentyen 14:20, sa mo Grek ki’n ganny tradwir “adilt” i kapab osi vedir “matir,” “parfe” e “konplet.” (1 Kor. 2:6) Alor parey en pti baba i kontinyen grandi ziska ki i vin en adilt, nou osi nou devret kontinyen vin pli pros avek Zeova. Dan sa fason, nou vin bann Kretyen matir. Byensir, menm apre ki nou’n vin bann Kretyen matir, nou pa devret zanmen aret fer progre.—1 Tim. 4:15. w24.04 2 ¶1, 3

Ki Zeova i ete pour ou? Petet ou pou dir: ‘Zeova i mon Papa, mon Bondye e mon Zanmi.’ I kapab ki ou’n mazin lezot tit oubyen lezot fason pour dekri Zeova. Me eski ou vwar Zeova konman sa Enn ki’n envit ou? Lerwa David ti konpar sa lanmitye ki Zeova i annan avek son bann serviter fidel avek sa relasyon ki Zeova i annan avek bann ki I’n envite. David ti dir: “O Zeova, lekel ki pou ganny envite dan ou latant? Lekel ki pou reste lo ou montanny sen?” (Ps. 15:1) Dan sa bann verse, nou aprann ki nou kapab vin bann envite dan latant Zeova setadir son bann zanmi. Avan ki Zeova ti konmans kree tou keksoz, Zeova ti li tousel. Me pli tar, i ti kree son premye Garson e i ti akey li dan son latant. Zeova ti vreman kontan pour envit son premye envite dan son latant. Labib i dir ki Zeova ti “kontan” son Garson e konman sa premye envite dan latant Zeova, i ‘ti toultan kontan ler i ti avek Zeova.’—Prov. 8:30. w24.06 2 ¶1-3

Imazin en lafoul plis ki 340,000 zonm. Zot in rasanble lo montanny Ebronn pour fer David vin lerwa lo Izrael antye. Pour sa trwa zour ki zot in lo sa montanny, zot in koze e sant bann kantik louanz pour Zeova. (1 Kron. 12:39) Parmi sa lafoul, i ti annan en zenn garson ki ti apel Zadok. En kantite dimoun pa ti pou’n remark li. Me Zeova ti fer sir ki nou konnen ki Zadok ti la. (1 Kron. 12:22, 26-28) Zadok ti en pret ki ti travay pros avek Granpret Abyatar. Zadok ti osi en zonm ki ti ganny bann vizyon e Bondye ti donn li en kantite lasazes ek sa abilite pour konpran Son lavolonte. (2 Sam. 15:27) I ti en zonm ki ti annan kouraz. Pandan sa bann dernyen zour, Satan pe fer plis ki zanmen oparavan pour fer nou aret annan lafwa dan Zeova. (1 Pyer 5:8) Anmezir ki nou esper Zeova detri Satan ek son move lemonn, nou bezwen annan kouraz. (Ps. 31:24) Ler nou fer sa, nou kapab demontre kouraz parey Zadok. w24.07 2 ¶1-3

Ler Zeova ti kree sa premye zonm ek sa premye madanm, i ti anvi ki zot zwaye. I ti donn zot en zoli landrwa pour reste, maryaz konman en kado e en travay enteresan pour fer. Zot ti sipoze fer zanfan e ranpli later, fer later antye vin en paradi parey zarden Edenn. I ti donn zot zis en lord. I ti dir zot ki si zot swazir pour pa obeir sa lord zot pou mor. Nou konnen ki ti arive. En move lanz ki pa ti kontan bann imen ek Bondye ti tant Adan ek Ev pour dezobeir Bondye. Adan ek Ev ti fer sa ki sa move lanz, setadir Satan ti anvi zot fer. Zot ti napa konfyans dan zot Papa ki ti kontan zot en kantite. Zot pa ti obeir li e zot ti fer pese. Sa ki Zeova ti dir ti vin vre. Vi ki zot ti dezobeir Zeova, Adan ek Ev ti soufer pour larestan zot lavi. Zot ti vin vye, malad e apre zot ti mor.—Zen. 1:28, 29; 2:8, 9, 16-18; 3:1-6, 17-19, 24. w24.08 3 ¶3

Zeova ek son Garson i anvi ki nou ere. Psonm 119:2 i dir: “Bann ki swiv son bann rapel e ki rod Bondye avek tou zot leker pou ere.” Osi, Zezi ti dir: “Ere sa bann ki tann parol Bondye e obei li! (Lik 11:28) Konman bann serviter Zeova, nou bann dimoun ki ere ler nou lir Parol Bondye regilyerman e nou fer nou mye pour aplik sa ki nou aprann. (Zak 1:22-25) Sa i sa fason prensipal ki nou fer Bondye plezir. (Ekle. 12:13) Anmezir nou aplik sa ki nou aprann dan Parol Bondye, nou amelyor nou lavi fanmir e nou devlop bann bon lanmitye avek bann frer ek ser dan kongregasyon. An plis ki sa, nou evit en kantite problenm ki bann dimoun ki pa obei Zeova i gannyen. Anfet nou dakor avek sa ki Lerwa David ti dir dan en sanson. Apre ki David ti’n mansyonn lalwa, lord ek zizman Zeova, i ti dir: “Sa enn ki obei zot i ganny en gran rekonpans.”—Ps. 19:7-11. w24.09 2 ¶1-3

Ki Zeova i vwar ler i get son bann serviter lo later? I vwar ler nou zwaye e ler nou sagren. (Ps. 37:18) Zeova i kontan ler i vwar ki nou pe fer nou mye pour servi li menm ler nou vreman sagren. Me an plis ki sa, i vreman anvi ed nou e rekonfort nou. Psonm 147:3 i dir ki Zeova i ‘pans blesir’ bann ki annan en leker brize. Sa verse i montre ki mannyer Zeova i pran swen avek bann ki sagren. Ki nou bezwen fer pour ganny bann byenfe avek sa led ki Zeova i donnen? Annou pran en legzanp ki pou ed nou konpran sa. En dokter i kapab ed en dimoun ki’n ganny blese pour li geri. Pour sa dimoun ki’n ganny blese ganny bann byenfe i bezwen swiv byen lenstriksyon sa dokter. Atraver son Parol, Zeova i koz avek bann ki pe soufer emosyonnelman e i donn zot konsey. w24.10 6 ¶1-2

Dan lepase, dan nou bann piblikasyon nou’n koz konsernan sa ki arive avek bann dimoun ki Zeova i konsider konman bann dimoun move. Nou ti dir ki bann dimoun ki Zeova ti detri pa pou ganny resisite. I annan en kantite resi dan Labib ki koz konsernan ler Zeova in ziz bann dimoun move. Par egzanp, pandan Deliz, Zeova ti detri tou dimoun eksepte Noe ek son fanmir. Osi, i ti donn lord bann Izraelit pour detri sa set nasyon ki ti reste dan Later Promiz. Zeova ti osi servi en lanz pour touy 185,000 solda Asiryen dan en lannwit. (Det. 7:1-3; Iza. 37:36, 37) Dan sa bann sityasyon, eski Labib i donn ase lenformasyon pour nou dir ki Zeova in ziz sak sa bann dimoun endividyelman e deside pour detri zot pour touzour e pa zanmen resisit zot? Non. Dan sa bann legzanp ki fek ganny mansyonnen, nou pa konnen ki mannyer Zeova ti ziz sa bann dimoun e nou osi pa konnen si sa bann ki ti ganny touye ti ganny sa loportinite pour aprann konsernan Zeova e pour repantir. w24.05 3 ¶5-7

Zezi ti donn en legzanp konsernan en vev ki ti kontinyen demann en ziz pour fer li ganny lazistis. San dout, bann disip Zezi ti konpran lafason ki sa madanm dan sa legzanp ti santi parski en kantite dimoun sa letan pa ti ganny trete byen. (Lik 18:1-5) Nou osi nou kapab konpran lafason ki sa madanm ti santi parski nou tou nou’n fer fas avek lenzistis a en moman dan nou lavi. En kantite dimoun dan lemonn ozordi i annan bann prezidis, zot pa demontre labonte e zot egois. (Ekle. 5:8) Alor, nou pa sirprann ki nou pa ganny trete byen. Petet nou pa ekspekte ki en frer oubyen en ser i tret nou dan en move fason me sa i kapab arive. Byensir nou bann frer ek ser pa parey bann ki persekit nou oubyen opoz nou. Zot pa anvi tret nou dan en move fason. Me zot enparfe. Nou kapab aprann en kantite avek lafason ki Zezi ti reazir ler bann dimoun ki ti opoz li pa ti tret li byen. Si nou kapab demontre pasyans anver bann dimoun ki pa tret nou byen, i pli enportan ankor pour nou demontre pasyans anver nou bann frer ek ser. w24.11 2 ¶1-2

Dipen ti enn bann manze pli enportan. (Zen. 14:18; Lik 4:4) I ti telman enportan ki parfwa Labib ti servi sa mo “dipen” pour koz lo manze an zeneral. (Mat. 6:11; Akt 20:7, vwar not letid dan nwtsty-E.) Dipen ti osi en keksoz enportan dan de mirak ki Zezi ti fer. (Mat. 16:9, 10) Nou kapab lir konsernan enn sa bann mirak dan Zan sapit 6. Apre ki bann zapot Zezi ti’n pas bokou letan pe anons sa bon nouvel, zot ti fatige. Alor, zot ti anbark dan en kannot ansanm avek Zezi pour al lot kote Lanmer Galile pour zot repoze. (Mark 6:7, 30-32; Lik 9:10) Zot ti ariv dan en landrwa trankil o bor Betsayda. Pa bokou letan apre, plizyer milye dimoun ti vin dan sa landrwa pour vwar Zezi. Zezi pa ti inyor zot. I ti pran letan pour ansenny zot konsernan Rwayonm e i ti geri bann ki malad. Vi ki tar ti pe fer, bann disip ti mazinen ki mannyer tou sa bann dimoun ti pou ganny keksoz pour manze. Petet serten sa bann dimoun ti annan en ptigin manze avek zot me laplipar dimoun ti pou bezwen al aste manze dan bann vilaz.—Mat. 14:15. w24.12 2 ¶1-2

Nou premye paran, Adan ek Ev, ti parfe e zot ti viv dan en zoli paradi. (Zen. 1:27; 2:7-9) Zot ti pou’n kapab viv ere pour touzour me tou keksoz ti sanze. Adan ek Ev ti fer pese. Sa ti fer ki Zeova ti retir zot dan sa paradi e zot ti nepli kapab viv pour touzour. Ki zot zanfan in erite avek zot? Labib i dir: “Atraver en sel zonm [Adan] pese in antre dan lemonn e pese in anmenn lanmor, alor tou dimoun i mor parski tou dimoun in fer pese.” (Rom. 5:12) Nou’n erit pese avek Adan e sa i fer ki nou mor. Sa pese ki nou’n erite i parey en gro det ki ni enn ant nou pa kapab peye. (Ps. 49:8) Dan Labib, pese i ganny konpare avek “det.” (Mat. 6:12, not.; Lik 11:4) Ler nou fer pese, i konmsi nou annan en det anver Zeova. Lo nou menm, nou pa kapab pey sa det e sel fason ki sa det ti pou ganny kennsel i ler nou mor.—Rom. 6:7. w25.02 2-3 ¶2-3

Nou vwar li en privilez pour koz avek lezot konsernan Rwayonm Bondye. Pa tou dimoun ki annan sa privilez pour fer sa. Par egzanp, ler Zezi ti lo later, i pa ti les bann demon rann temwannyaz lo li. (Lik 4:41) Ozordi, avan en dimoun i partisip dan predikasyon avek Temwen Zeova, i bezwen pe viv dan en fason ki fer Zeova plezir. Nou montre ki kantite nou apresye sa privilez pour anons sa bon nouvel par rann temwannyaz avek bann dimoun nenport landrwa kot nou ete e nenport moman. Parey Zezi, nou fer nou mye pour anons sa bon nouvel konsernan Rwayonm Bondye avek lezot e pour ansenny zot laverite. (Mat. 13:3, 23; 1 Kor. 3:6) Lorganizasyon Zeova i swiv legzanp Zezi par rod tou fason pour ed dimoun pour konn non Bondye. En fason ki lorganizasyon in fer sa i atraver Labib–Tradiksyon nouvo lemonn. Dan sa Labib, non Bondye in ganny mete dan bann landrwa kot i ti ete dan bann langaz ki Labib ti ganny ekrir. Sa tradiksyon Labib i disponib an antye oubyen an parti dan plis ki 270 langaz. w24.04 9 ¶8-9

Serten frer ki’n marye e ki ere dan zot maryaz, i fer keksoz toulezour pour montre zot madanm ki kantite zot kontan li. (1 Zan 3:18) En msye i kapab montre ki i kontan son madanm par fer bann keksoz senp, parey atrap son lanmen oubyen may li. I kapab anvoy son madanm en mesaz e dir li: “Mon mank ou” oubyen i kapab demann li: “Ki mannyer ou pe pas ou lazournen?” Tanzantan, i kapab montre son madanm ki i kontan li par donn li fler oubyen en kado. Ler en msye i fer sa bann keksoz, i onor son madanm e i fer zot maryaz vin pli for. En msye ki onor son madanm i fer son madanm konnen ki i presye pour li e i ankouraz son madanm. En fason ki i fer sa i par montre lapresyasyon pour tou sa ki son madanm i fer pour ed li. (Kol. 3:15) Ler en msye i felisit son madanm, sa i fer son madanm kontan. I pou santi li an sekirite, ki son msye i kontan li e ki son msye i onor li. w25.01 11 ¶15; 13 ¶16

Psonm 15 i fini avek sa promes: “En dimoun ki fer tousala pa pou zanmen tonbe.” Sa fraz i eksplike akoz Zeova i anvi ki nou fer tou sa bann keksoz ki’n ganny mansyonnen dan psonm. Zeova i anvi ki nou ere. Alor i donn nou lenstriksyon ki pou ed nou annan en pli bon lavi e ki pou protez nou. Bann envite dan latant Zeova pou annan en lavenir merveye. Bann Kretyen swazir pou al reste dan lesyel kot Zezi in prepar en “landrwa” pour zot. (Zan 14:2) Bann ki annan lespwar pour viv pour touzour lo later pou eksperyans sa ki Revelasyon 21:3 in promet. I en gran loner ki Zeova i anvi ki nou reste konman bann envite dan son latant pour touzour!—Ps. 15:1-5. w24.06 13 ¶19-20

Kisisa laglwar? Dan Labib, sa mo “laglwar” i kapab refer avek okenn keksoz ki fer en dimoun enpresyonan. Pa bokou letan apre ki bann Izraelit ti ganny libere dan lesklavaz Lezip, Zeova ti montre zot ki i en Bondye vreman pwisan. Imazin sa ki ti arive: Plizyer milyon Izraelit i debout devan Montanny Sinai pour ekout sa ki Bondye pe al dir zot. En nyaz nwanr i kouver sa montanny. En sel kou, later i tranble anba lipye bann Izraelit. Petet sa i akoz i annan en volkan. I osi annan zekler, loraz ek en gro tapaz tronpet. (Egz. 19:16-18; 24:17; Ps. 68:8) I bezwen ki bann Izraelit ti enpresyonnen ler Zeova ti montre zot son laglwar dan sa fason. Ozordi, nou donn Zeova laglwar par koz avek lezot konsernan bann keksoz merveye ki i’n fer, konsernan son bann zoli kalite e ler nou donn li loner pour tou bann keksoz ki i ed nou pour fer.—Iza. 26:12. w25.01 2 ¶2-3

Ler bann Izraelit ti pe al dan Later Promiz, serten zonm enportan ti kestyonn lotorite Moiz ek sa rol ki Zeova ti’n donn li. Zot ti dir: “Lepep antye [pa zis Moiz] i sen, zot tou zot sen e Zeova i avek zot.” (Nom. 6:1-3) Menm si i vre ki pour Zeova “lepep antye” ti sen, Zeova ti’n swazir Moiz pour diriz Son pep. Ler sa bann rebel ti pe kritik Moiz, anfet zot ti pe kritik Zeova. Zot pa ti konsantre lo sa ki Zeova ti anvi me lo sa ki zot, zot ti anvi setadir ganny plis pouvwar e vin pli enportan. Bondye ti touy sa bann zonm ki ti’n konmans sa rebelyon e osi sa plizyer milye dimoun ki ti’n dakor avek sa ki sa bann zonm ti pe fer. (Nom. 16:30-35, 41, 49) Ozordi, nou kapab asire ki bann ki napa respe pour bann laranzman ki i annan dan lorganizasyon Zeova, zot napa laprouvasyon Zeova. w24.07 11 ¶11

Nou pe viv dan en letan kot laplipar dimoun i rezet sa ki Labib i dir konsernan lafen sa move lemonn e zot menm sikann nou akoz nou krwar ladan. (2 Pyer 3:3, 4) Menm si i annan en kantite keksoz ki nou pa konnen, nou bezwen annan en lafwa for e annan konfyans ki Zeova in fini deside kan lafen sa move lemonn pou vini e ki Zeova pou pran swen avek nou pandan sa letan difisil. Nou bezwen osi devlop plis lafwa dan sa mwayen ki Zeova pe servi pour gid nou ozordi, setadir “sa lesklav fidel e pridan.” (Mat. 24:45) Ler gran ladetres i konmanse, i kapab ki nou ganny bann lenstriksyon spesifik ki pou sov nou lavi. Alor, i vreman enportan ki depi la konmela, nou devlop plis konfyans dan bann ki pe dirize dan lorganizasyon Zeova. Si depi konmela nou vwar li difisil pour swiv lenstriksyon bann ki pe dirize dan lorganizasyon Zeova, pandan gran ladetres i pou pli difisil pour obei bann lenstriksyon ki nou gannyen. w24.09 11 ¶11-12

Bann paran Kretyen i realize ki lafwa i pa en keksoz ki zot kapab donn zot zanfan zis akoz zot, zot annan. Anmezir ki en zanfan i grandi, i kapab demann bann kestyon parey: ‘Ki mannyer mon konnen ki Bondye i egziste? Eski mon kapab vreman krwar sa ki Labib i dir?’ Anfet Labib i ankouraz nou pour servi nou “abilite pour reflesir” e pour “verifye tou keksoz.” (Rom. 12:1; 1 Tesa. 5:21) Me ki mannyer ou kapab ed ou zanfan pour devlop plis lafwa? Ankouraz ou zanfan pour li menm li fer sir ki sa ki Labib i dir i vre. Ler ou zanfan i demann bann kestyon, pran sa konman en loportinite pour montre li ki mannyer pour trouv bann larepons, par servi nou bann zouti resers. Par egzanp, zot kapab servi Watch Tower Publications Index ek Liv resers pour Temwen Zeova. Dan Liv resers, i kapab al anba topik “Labib” e apre anba soutit, “Enspire par Bondye” pour vwar levidans ki Labib pa zis en bon liv ki’n ganny ekrir par zonm. O kontrer ki i “parol Bondye.”—1 Tesa. 2:13. w24.12 14-15 ¶4-5

Ki mannyer bann ansyen i kapab swiv legzanp Zezi? Zot bezwen form e ed bann frer pour kalifye e desarz plis responsabilite dan kongregasyon e sa i enkli bann ki zenn. Bann ansyen i konpran ki sa bann frer i bezwen aprann en kantite keksoz e ki zot pa parfe. Zot devret donn sa bann frer konsey avek lanmour pour ki sa bann frer i kapab aprann pour annan limilite, pour fidel e pour pare pour ed lezot. (1 Tim. 3:1; 1 Pyer 5:5) Zezi ti donn son bann disip sa responsabilite pour anons sa bon nouvel e osi pour ansenny dimoun. I kapab ki bann disip ti santi ki zot pa kalifye pour fer sa travay ki Zezi ti’n donn zot pour fer. Me Zezi ti asire ki zot ti pou kapab fer sa travay. I ti sitan asire ki i ti dir: “Parey mon Papa in anvoy mwan, mwan osi mon pe anvoy zot.”—Zan 20:21. w24.10 16 ¶15; 17 ¶17

David ti en bon lerwa. I ti osi en mizisyen, i ti ekri poenm, i ti en gerye e i ti en profet. I ti pas dan en kantite problenm. Pour plizyer lannen, David ti bezwen kasyet parski Lerwa Sail ti pe esey touy li. Apre ki David ti’n vin lerwa, ankor enn fwa i ti bezwen kasyet parski son garson Absalonm ti anvi vin lerwa e i ti pe esey touy li. Menm si David ti pas dan sa bann problenm e i ti fer bann fot grav, i ti kontinyen reste fidel avek Bondye ziska son lanmor. Zeova ti dir ki David i “en zonm ki fer [Li] plezir.” Alor i vo lapenn pour nou ekout bann konsey saz ki David ti donnen. (1 Rwa. 15:5) Annou vwar sa konsey ki David ti donn son garson Salomon, ki ti pou vin lerwa apre li. Zeova ti’n swazir Salomon pour konstri en tanp kot dimoun ti pou kapab ador Li. (1 Kron. 22:5) Salomon ti annan en kantite travay pour li fer e i ti bezwen led Zeova pour li kapab diriz nasyon Izrael. Ki David ti pou dir li? David ti dir son garson ki si i obei Zeova, i pou reisi dan son lavi.—1 Rwa. 2:2, 3. w24.11 10 ¶9-11

En msye ki abiz son madanm fizikman oubyen verbalman, i bezwen fer serten keksoz pour aranz son relasyon avek Zeova e avek son madanm. Premyerman, i bezwen realize ki i annan en problenm grav. Napa nanryen ki kasyet devan lizye Zeova. (Ps. 44:21; Ekle. 12:14; Ebr. 4:13) Dezyenmman, i aret abiz son madanm e sanz son konportman. (Prov. 28:13) Trwazyenmman, i demann pardon son madanm e i osi demann Zeova pardon. (Akt 3:19) I devret osi sipliy Zeova pour ed li anvi sanze e pour ed li pour annan kontrol lo son panse, lo son fason koze e lo son aksyon. (Ps. 51:10-12; 2 Kor. 10:5; Fili. 2:13) Katriyenmman, i azir an armoni avek son lapriyer par aprann pour ay tou form vyolans ek bann parol ki ensilte lezot. (Ps. 97:10) Senkyenmman, i devret deswit al rod led avek bann ansyen dan kongregasyon. (Zak 5:14-16) Sizyenmman, i fer en plan ki pou ed li konnen kwa ki i pou evite pour li pa abiz son madanm dan lavenir. w25.01 11 ¶14

Eski ou kontan Zeova, sa Enn ki’n donn ou tou bann bon keksoz ki ou annan e ki’n donn ou lavi? Eski ou anvi montre ki ou kontan li? Sa pli bon fason ki ou kapab fer sa i pour dedye ou lavi avek li e batize. Ler ou fer sa, ou pou form parti fanmir Zeova e ou Papa ek Zanmi pou gid ou e pran swen avek ou parski ou pou’n vin pour li. (Ps. 73:24; Iza. 43:1, 2) Osi, ler ou dedye ou lavi avek Bondye e ou batize, ou annan sa lespwar pour viv pour touzour. (1 Pyer 3:21) Eski i annan en keksoz ki pe anpes ou batize? Si wi, ou pa tousel. Plizyer milyon dimoun in bezwen sanz zot fason fer ek zot fason panse pour zot kalifye pour batize. Aprezan zot pe servi Zeova dan lazwa e zot devoue dan zot servis. w25.03 2 ¶1-2

Dan Labib, souvan pese i ganny konpare avek bann fardo ki lour. Lerwa David ti dir sa parol konsernan son bann pese. I ti dir: “Mon bann fot in ariv pli o ki mon latet. Zot parey en fardo ki tro bokou pour mwan siporte.” (Ps. 38:4) Me Zeova i pardonn pese bann dimoun ki repantir. (Ps. 25:18; 32:5) Sa mo Ebre ki’n ganny tradwir “pardonn” i vedir “lev anler” oubyen “anmennen.” Alor ler Zeova i pardonn nou pese, i konmsi i tir sa fardo ki lo nou zepol e i anmenn li lwen avek nou. Labib i servi en lot legzanp pour montre zistans ki Zeova i anmenn nou pese lwen avek nou. Psonm 103:12 i dir: “I’n met nou bann pese lwen avek nou parey soley leve i lwen avek soley kouse.” Soley leve pa zanmen dan menm landrwa ki soley kouse. Andotmo, Zeova i anmenn nou pese vreman lwen avek nou, en zistans ki nou pa kapab imazinen. Sa i asir nou ki Zeova i pardonn nou konpletman. w25.02 9 ¶5-6

Apre ki Zezi ti’n retourn dan lesyel, zapot Pyer ti fer en mirak e geri en zonm ki ti paralize depi nesans. (Akt 1:8, 9; 3:2, 6-8) En gran lafoul dimoun ti vwar sa mirak e zot ti antour Pyer. (Akt 3:11) Pyer pa ti anvi ki dimoun i donn li latansyon menm si i ti’n grandi dan en kiltir kot dimoun ti krwar ki i enportan pour annan en pozisyon o plase. Pyer ti demontre limilite e i ti donn tou laglwar Zeova ek Zezi. I ti dir: “Atraver non [Zezi] e akoz nou annan lafwa dan son non, sa zonm ki zot konnen ki la, in byen.” (Akt 3:12-16) Nou kapab swiv legzanp Pyer e kontinyen devlop limilite. Nou fer bann bon keksoz pour lezot parski nou kontan Zeova e nou kontan dimoun, pa akoz nou anvi ki lezot i felisit nou. Nou montre ki nou annan limilite si nou vwar li en plezir pour servi Zeova ek nou bann frer ek ser menm si lezot pa vwar sa ki nou fer.—Mat. 6:1-4. w25.03 10-11 ¶11-12

Pour nou kapab annan plis lazwa dan predikasyon, nou bezwen konsantre lo nou lanmour pour Zeova ek nou prosen. (Mat. 22:37-39) Zis mazinen ki mannyer Zeova i kontan ler i vwar nou pe partisip dan sa travay predikasyon e ki mannyer dimoun pou zwaye ler zot konmans etidye Labib. Osi rapel ki bann ki ekout nou mesaz e ki deside pour servi Zeova, i kapab viv pour touzour. (Zan 6:40) Eski pour en rezon ou en lot ou pa kapab kit ou lakour? Si wi, konsantre lo sa ki ou kapab fer pour montre ki ou kontan Zeova ek ou prosen. Pandan pandemi COVID-19, Samuel ek Dania pa ti kapab kit zot lakour. Pandan sa letan difisil, zot ti regilyerman fer predikasyon par telefonn, ekri let e fer letid Labib lo Zoom. Menm si Samuel ek Dania pa ti kapab fer sa kantite ki zot ti fer avan, zot ti fer sa ki zot ti kapab e zot ti zwaye avek sa ki zot ti kapab fer. w24.04 18 ¶15-16

Menm si en dimoun pa bezwen marye pour li ere, en kantite Kretyen ki selibater, ki swa zot zenn oubyen aze, ti pou vreman kontan annan en konzwen. Byensir avan ki ou konmans pwente, ou bezwen annan en bon lanmitye avek Zeova, konn ou lekor byen e kapab siport ou fanmir lo plan materyel. (1 Kor. 7:36) I ti pou pli byen ki ou konn bann kalite ki ou ti pou kontan ou konzwen i annan avan ki ou konmans pwente. Si non, sa i kapab fer ki ou pa remark en dimoun ki ti kapab en bon konzwen pour ou oubyen ou kapab menm konmans pwente avek en dimoun ki pa pou en bon konzwen pour ou. Byensir sa dimoun ki ou pe mazin marye avek i devret en Kretyen ki’n batize. (1 Kor. 7:39) Me pa tou Kretyen ki’n batize ki pou vin en bon konzwen pour ou. Alor ou kapab demann ou lekor: ‘Ki bann lobzektif mon annan? Ki bann kalite ki i enportan pour mon konzwen annan? Eski sa ki mon ekspekte avek sa dimoun ki mon anvi marye avek, i rezonnab?’ w24.05 20 ¶1; 21 ¶3

Ki de dimoun ki pe pwente pou fer si tanzantan zot rankontre problenm oubyen zot pa tonm dakor lo en keksoz? Eski sa i vedir ki zot relasyon pa pe marse? Pa neseserman. Tou koup pa tonm dakor parfwa. Dan en maryaz ki for, i annan de dimoun ki pare pour travay ansanm menm si zot pa tonm dakor lo en keksoz. Alor, lafason ki zot rezourd bann problenm la konmela i kapab montre si zot maryaz pou reisi oubyen non. Ler zot pe koze ansanm, koz lo bann kestyon parey: ‘Eski nou kapab diskit lo bann problenm dan en fason kalm e avek respe? Eski nou pare pour admet ki nou annan nou bann defo e nou fer zefor pour amelyore? Eski nou vitman pare pour sede, demann leskiz e pardonnen?’ (Efe. 4:31) Me si pandan ki zot pe pwente zot toultan pa tonm dakor, i tre probab ki keksoz pa pou amelyore apre ki zot in marye. Si ou realize ki sa dimoun pa pou en bon konzwen pour ou, i ti pou byen pour zot tou le de si zot aret pwente. w24.05 29 ¶12

Si nou obei Zeova dan tou sa ki nou fer e nou fer desizyon baze lo bann prensip Labib, nou pou vin en bon legzanp pour lezot. Anmezir nou etidye Labib e nou lafwa i vin pli for, nou pou reste fidel avek Zeova ek son bann standar. Nou pou rekonnet bann fo lansennyman ek bann nide ki pa dapre fason panse Zeova e sa pou fer ki nou pa pou ganny enfliyanse par sa bann keksoz. (Efe. 4:14; Zak 1:6-8) Nou osi kapab ed bann ki pe fer fas avek bann difikilte. (1 Tesa. 3:2, 3) Bann ansyen i bezwen annan kontrol dan tou keksoz, annan bon zizman, zot lavi i devret annord e zot devret rezonnab. Sa bann frer i ed lezot pour reste kalm e pour annan konfyans dan Zeova par “reste atase avek sa vre parol.” (Tit 1:9; 1 Tim. 3:1-3) Atraver zot legzanp e lankourazman ki zot donnen, bann ansyen i ed bann frer ek ser pour asiste renyon regilyerman, pour partisip dan predikasyon regilyerman e pour fer zot letid personnel regilyerman. Ler bann frer ek ser i fer fas avek bann problenm ki fer zot enkyet, bann ansyen i fer zot rapel ki zot bezwen depan lo Zeova e konsantre lo son bann promes. w24.06 31 ¶16-18

Pandan son minister, Zezi ti ansenny bann dimoun ki son Papa i pare pour pardonn nou ler nou fer pese. Annou vwar sa dan legzanp garson perdi. Sa garson ti swazir pour kit son lakour e pour al viv en move lavi. Me i “ti realize sa ki i ti’n fer” e i ti retourn kot li. Ki mannyer son papa ti reazir? Zezi ti dir, ler sa garson “ti ankor en bon pti zistans dan semen, son papa ti vwar li . . . . Son papa ti tay kot li, may li e anbras li.” Sa garson pa ti ekspekte ki son papa ti pou pardonn li. Alor i ti demande pour travay konman en serviter kot lakour. Me son papa ti pare pour pardonn li. I ti apel li “mon garson” e i ti aksepte li dan lafanmir. Sa papa ti dir: “I ti’n perdi e i’n ganny retrouve.” (Lik 15:11-32) Ler Zezi ti dan lesyel avan ki i ti vin lo later, sirman i’n vwar plizyer fwa ki mannyer son Papa in demontre konpasyon e vitman pardonn sa bann ki’n repantir. Sa legzanp ki Zezi in servi i vreman rekonfortan e i montre nou ki Zeova i en Papa ki annan pitye. w24.08 11 ¶11-12

En Kretyen ki annan bon zizman i fer son mye pour fer bann bon desizyon dapre pwennvi Zeova. En Kretyen ki fer sa, i konnen ki i napa nanryen ki pli enportan ki son lanmitye avek Zeova. I annan en bon pwennvi lo son lekor parski i konnen ki i pa konn tou keksoz. I montre ki i depan lo Bondye par koz avek Zeova dan lapriyer souvan. Nenport ki abilite ki nou annan, nou rekonnet ki nou bezwen kontinyen priy Zeova. Alor ler nou annan bann desizyon enportan pour fer, nou priy Zeova e demann li pour gid nou e nou annan konfyans ki i konnen kwa ki pli bon pour nou. Nou rekonesan ki Zeova in kree nou avek sa abilite pour demontre bann kalite ki li i annan. (Zen. 1:26) Byensir nou pa kapab swiv legzanp Zeova dan en fason parfe.—Iza. 55:9. w25.03 11 ¶13; 13 ¶17-18

Pa bezwen mazin an mal lo lezot. Si lezot pa eksprim zot lapresyasyon pour en keksoz ki nou’n fer, petet nou kapab demann nou lekor: “Eski zot vreman pa apresye sa ki mon’n fer oubyen zot in zis oubliye remersye mwan?” Petet i annan lezot rezon akoz zot pa’n reazir parey nou, nou ti ekspekte. Serten i kapab vreman rekonesan me zot vwar li difisil pour eksprim zot lekor. Petet zot santi zot anbarase pour ganny led sirtou si dan lepase zot ki ti sa enn ki ti ed lezot. Nenport rezon ki zot annan, si nou vreman kontan nou bann frer ek ser, nou pa pou mazin an mal lo zot e nou pou kontinyen donn avek lazwa. (Efe. 4:2) Annan pasyans. Lerwa Salomon ti dir sa konsernan demontre zenerozite: “Zet ou dipen lo delo, parski ou pou trouv li ankor apre en kantite zour.” (Ekle. 11:1) Parey nou vwar dan sa verse, parfwa dimoun i kapab demontre zot lapresyasyon “apre en kantite zour.” w24.09 30 ¶18-19

Parfwa en lanons i ganny fer dan kongregasyon ki en dimoun in ganny reprimande. Dan sa ka, nou pou kapab kontinyen frekant sa dimoun akoz nou konnen ki i pe repantir e i’n aret fer sa ki mal. I ankor pe form parti kongregasyon e i bezwen lankourazman avek lezot Kretyen dan kongregasyon. (Ebr. 10:24, 25) Par kont, sityasyon i vreman diferan pour en dimoun ki’n ganny tire dan kongregasyon. Nou “aret frekant” sa dimoun e nou pa “ni menm manz avek en dimoun koumsa.” (1 Kor. 5:11) Eski sa i vedir ki nou pou konpletman inyor li? Pa neseserman. I vre ki nou pa pou frekant sa dimoun. Me dapre son konsyans ki’n ganny antrennen par Labib, sak Kretyen i kapab deside pour envit en dimoun ki’n ganny tire dan kongregasyon ki enn son fanmir oubyen en dimoun ki i ti pros avek pour asiste bann renyon kongregasyon. w24.08 30 ¶13-14