Ou kapab devlop plis kouraz!

1-3. Akoz ler Zezi ti dir: “Leve, annou ale,” sa i montre ki i ti annan en kantite kouraz?

“LEVE, annou ale.” Eski i posib ki sa i parol pli brav ki en dimoun in deza dir? Petet ou kapab demann ou lekor ki mannyer sa parol i demontre kouraz. Nou pou trouv larepons ler nou vwar lekel ki ti dir sa parol e akoz.—Mat. 26:46.

² Zezi Kri ti dir sa parol avek son bann disip fidel. I ti’n deza dir sa parol avan. (Zan 14:31) Me la, ler i ti dir sa parol, son lavi ti an danze. Zezi ti dan en zarden lo en montanny zis an deor lavil Zerizalenm. I ti tar aswar dan lalin kler e Zezi ti konnen ki en lafoul dimoun avek zarm ti pe vini. I ti konnen ki sa lafoul dimoun ti pe al fer avek li. I ti pe al fer fas avek sa leprev pli difisil ki en zonm ti pou pas atraver e i ti konnen ki i ti pou fer fas avek sa leprev li tousel.

³ Zezi pa ti esey sove. Menm si i ti’n kapab demann bann lanz pwisan pour protez li, Zezi pa ti fer sa. (Mat. 26:53) I ti plito dir: “Leve, annou ale.” Kote Zezi ti pe ale? Direk dan lanmen bann dimoun ki ti pe al fer li soufer e touy li. Akoz Zezi ti pare pour fer sa? Parski i ti kontan son Papa ek son bann disip.

4-5. Ki kalite kouraz Zezi ti demontre e akoz nou bezwen sa kalite kouraz?

⁴ San okenn dout, Zezi Kri i sa dimoun ki’n demontre plis kouraz lo later. Eski ou enn son bann disip? Alor, ou osi ou annan kouraz. Bann vre Kretyen i bezwen annan kouraz. Ozordi nou pe viv dan en letan difisil e danzere, alor nou vreman bezwen kouraz plis ki zanmen oparavan.

⁵ Ki mannyer nou kapab dekrir sa kalite kouraz ki Zezi ti demontre? Vre kouraz pa vedir pa per okenn danze, pran bann risk kan i pa neseser oubyen zis tay direk kot i annan danze. I osi pa vedir fer bann keksoz danzere oubyen vyolan zis pour prouve ki ou pa per. (Ps. 11:5) Me kouraz ki en Kretyen i bezwen demontre i en lafors anndan. Sa i sa kalite lafors ki ed nou pour fer sa ki nou konnen i byen devan Bondye menm si i kapab difisil oubyen vreman fer per.

Ou kapab imit kouraz Zezi!

6. Si nou santi ki nou napa kouraz, ki mannyer legzanp Zezi i kapab rekonfort nou?

⁶ Petet ou kapab demann ou lekor si ou ti pou annan kouraz parey Zezi ler ou pas dan problenm. Si wi, mazin sa: Zezi i rezonnab. Parey son Papa, Zezi pa zanmen ekspekte nou fer sa ki nou pa kapab fer. (Ps. 103:14; Zan 14:9) Par egzanp, sa zour swar dan zarden Zetsemane, Zezi ti demann son bann zapot pour reste eveye avek li me zot ti tonm dormi. Zezi ti dir zot: “Vreman, lespri i anvi fer sa ki byen, me lekor enparfe i feb.” (Mat. 26:41) I ti konpran zot febles e i konpran ou osi.

7-8. Ki mannyer Zezi ti reasir son bann disip?

⁷ Zezi ti osi montre son bann disip ki i ti annan konfyans dan zot. Zis mazinen ki mannyer zot ti santi ler i ti reasir zot par dir: “Pran kouraz! Mon’n ranport laviktwar lo lemonn!” (Zan 16:33) Zezi ti konnen ki zot ti pou kapab swiv son legzanp e sanmenm sa ki zot ti fer. Zezi ti servi sa lekspresyon “pran kouraz” plizyer fwa. I ti dir sa avek en zonm ki ti paralize avan reasir li ki son pese ti’n ganny pardonnen. (Mat. 9:2) I ti dir sa avek en madanm apre ki i ti’n geri li avek en maladi grav. (Mat. 9:22) I ti dir sa avek son bann disip pour reasir zot ler zot ti per pandan en tanpet divan. (Mat. 14:27) Ler i ti dan lesyel, i ti dir sa menm parol avek zapot Pol apre ki en group ziz ki ti ankoler ti pros pour touy li.—Akt 23:9-11.

⁸ Dan en sans, ou Lerwa ki annan bokou kouraz pe dir menm keksoz avek ou, ozordi. I anvi ou “pran kouraz” e i konnen ki ou pou kapab. Son Papa, Zeova, in donn ou egzakteman sa ki ou bezwen pour ki ou pran kouraz.

Ki mannyer Labib i kapab ed nou devlop plis kouraz?

9. Ki mannyer Parol Bondye i kapab ankouraz nou?

⁹ Avek lanmour, Zeova in donn nou en kantite legzanp dan son Parol Labib ki kapab ed nou pour devlop plis kouraz. Labib i koz lo en kantite msye ek madanm, zenn konman aze, dan diferan sirkonstans ki ti demontre kouraz. Sirman zot tou zot ti annan “bann santiman parey nou menm,” zis parey profet Eliya. (Zak 5:17) Parey nou tou, zot ti bann imen enparfe. Zot ti annan zot febles, limit ek defo e parey nou, zot ti fer fas avek diferan problenm e menm danze. Pourtan, parey Zezi, zot ti reisi sirmont zot. Zot ti annan kouraz e zot legzanp i kontinyen ankouraz nou.

10-11. Ki sa liv i kapab ed ou pour fer e ki mannyer ou devret servi li? (Vwar osi sa bwat “Ki mannyer nou devret servi sa liv pour letid personnel ek ladorasyon fanmir?”)

¹⁰ Sa liv in ganny prepare pour ed ou devlop plis kouraz. Dan sa 54 sapit ki swiv, ou pou vwar ki mannyer Zeova ti ed bann dimoun enparfe parey ou, pour ganny sa kouraz ki zot ti bezwen. Alor, lir sak zistwar, apre al pli o profon e apre fer resers lo sak dimoun. Ler ou fer sa, ou pou aprann konn sa bann zonm ek madanm pli byen.

¹¹ Nou swete ki zot legzanp i ed ou pour devlop plis kouraz koumsa ou pou kapab andir sa bann “dernyen zour” ki difisil. (2 Tim. 3:1) Toulezour, annou mazin sa promes Zeova: “Mon pa pou zanmen kit ou e mon pa pou zanmen abandonn ou.” Parey Pol ti remarke, sa parol i kapab ed nou pour “pran kouraz e dir: ‘Zeova i mon led, mon pa pou per.’”—Ebr. 13:5, 6.