KONKLIZYON

“Pran kouraz”

Edisyon ki enprimen

1. Kwa ankor ki nou kapab aprann dan Labib lo kouraz?

Ou larepons

A LAFEN sa liv, eski i annan ankor keksoz pour dir lo kouraz? Wi. Premyerman, remarke ki dan sa liv, nou’n koz lo legzanp bann dimoun ki ti demontre lafwa e fason ki nou kapab imit zot legzanp. Me i ankor annan en kantite leson pour nou aprann dan Labib lo kouraz ki nou pa’n koz lo la dan sa liv. Dezyenmman, nou bezwen met lanfaz lo sa ki neseser pour ki nou ganny bann byenfe atraver sa bann leson ki dan Labib lo kouraz.

2. Lekel lezot serviter fidel Bondye ki ti demontre kouraz?

Ou larepons

² Eski ou kapab mazin lezot dimoun ankor dan Labib ki ti demontre kouraz apard sa bann ki nou’n koz lo la? Petet ou pe mazin serten profet ki ti remarkab dan Lekritir Ebre, parey Izai, Zeremi, Ezekyel, Zonas oubyen Malaki. Sirman sa parol ki zapot Pol ti ganny enspire pour ekri i aplik pour bann dimoun koumsa. I ti dir ki serten ti “pas dan difikilte parey ganny monke, fwete e serten ti menm ganny mete dan prizon ek lasenn.” Pol ti osi dir ki lezot “ti dan bezwen, dan difikilte e ganny maltrete.” I annan serten ki ti menm ganny touye. (Ebr. 11:36, 37) Kantmenm sa, avek kouraz zot ti reste fidel avek Bondye Zeova.

3-4. ki mannyer de madanm ki zot non pa ganny mansyonnen ti ede pour sov lavi Lerwa David?

Ou larepons

³ I annan en kantite lezot dimoun ki ti demontre kouraz ki Labib pa’n mansyonn zot non. Annou vwar legzanp de madanm dan letan Lerwa David. Zot ti ed David ler son garson Absalonm ki ti move e bon nanryen ti esey tir li o pouvwar e fors David pour kit Zerizalenm. David ti demann Zadok, en pret ki ti annan kouraz, pour retourn dan lavil e reste laba pour ki i konnen ki plan Absalonm. Alor, Zadok ti pou bezwen fer David konnen ki ti pe arive. Menm si i ti’n kapab ganny touye, en fiy ki en “servant” ki son non pa ganny mansyonnen ti al dir de serviter fidel David sa ki Zadok ti’n dir. Sa de serviter ti pe al kot David me en garson ti vwar zot. Sa garson ti al dir Absalonm me erezman zot ti kasyet dan en pwi. En lot madanm ki son non pa ganny mansyonnen, madanm sa zonm ki ti annan sa pwi, ti deswit kouver sa pwi e apre i ti met lagrenn lo la. Ler bann zonm Absalonm ti vin rod sa de mesaze, sa madanm ti anvoy zot dan en lot direksyon. Sa de madanm ki ti demontre kouraz ti ede pour protez sa lerwa ki Zeova ti’n swazir!—2 Sam. 15:23-37; 17:8-22.

Portre: De madanm ki zot non pa ganny mansyonnen ki ti ede protez Lerwa David avek kouraz. 1. En servant i koz avek de serviter David. 2. Sa madanm ki ti kasyet bann serviter David dan pwi son msye, pe reflesir anmezir ki de zonm pe marse lwen avek son lakour. — Sa servant ek sa madanm ki ti demontre kouraz

⁴ Labib i koz lo en kantite dimoun ki’n demontre kouraz. Bann zonm ek madanm, bann ki zot non in ganny mansyonnen ek bann ki zot non pa ganny mansyonnen, ris konman pov, bann ki enportan ek bann dimoun ordiner, avek kouraz, zot tou zot ti pran kote Zeova. Zot legzanp i kapab ed nou ozordi.

Lapriyer i enportan

5-7. Ki mannyer Pol ti ganny sa kouraz ki i ti bezwen?

Ou larepons

⁵ Ki mannyer nou kapab imit legzanp bann dimoun ki ti demontre kouraz dan Labib? Nou bezwen realize ki sa bann zonm ek madanm pa ti zis ganny kouraz koumsanmenm. Eski zot ti reisi servi Zeova zis akoz zot prop lafors? Non, i ti annan en lot keksoz ki zot ti bezwen. Alor, ki zot ti bezwen?

⁶ Par egzanp, kwa ki ti ed zapot Pol demontre kouraz? Ler zot ti Filip, en lafoul dimoun ti atak Pol ek Silas. Zot ti tir zot lenz e bat zot avek baton. Apre zot ti zet zot dan kaso dan fon prizon e met zot lipye dan blok dibwa. (Akt 16:12, 19-24) Ler zot ti ganny large, eski Pol ti per pour prese? Konman en imen sa ti pou en keksoz normal. Me Zeova ti’n donn Pol en responsabilite enportan. Son prosen destinasyon ti lavil Tesalonik. Ki mannyer Pol ti ganny sa lafors ek kouraz ki i ti bezwen?

⁷ Pli tar Pol ti ekri: “Parey zot konnen, menm si o konmansman nou ti soufer e ganny maltrete dan lavil Filip, Bondye ti donn nou lardyes pour anons son bon nouvel avek zot malgre bokou lopozisyon.” (1 Tesa. 2:2) Pol ti konnen ki i ti bezwen lardyes pour reisi fer sa ki Bondye ti demann li pour fer. Me kote ki i ti ganny sa lardyes? Eski i ti annan en rezerv lardyes dan li menm? Non, “Bondye [ki] ti donn [li] lardyes.” Avek limilite, i ti demann Zeova pour donn li sa kouraz ki i ti bezwen e Zeova ti ekout son lapriyer.

8. Ki mannyer nou kapab imit legzanp Pol pour ganny kouraz?

Ou larepons

⁸ Ou osi ou kapab fer sa ki Pol ti fer. Pa bezwen trakase ki ou pou bezwen rod dan ou menm sa lafors ek kouraz ki ou pou bezwen. Plito priy avek Zeova Bondye e sipliy li pour donn ou sa lardyes ek kouraz ki ou bezwen.—Akt 4:29.

9. Akoz i byen pour demann nou Papa plis lafwa?

Ou larepons

⁹ Ou kapab osi demann ou Papa pour donn ou en lot kalite ki preski parey: lafwa. Lafwa i form parti fri lespri sen Zeova. (Gal. 5:22, 23) I osi form parti sa lekipman batay spirityel ki sak Kretyen i bezwen. (Efe. 6:16) Nou lafwa konman en Kretyen i telman pwisan ki Labib i dir ki i’n “ranport laviktwar lo lemonn.” (1 Zan 5:4) Si ou annan lafwa dan Zeova, sa pou ed ou devlop kouraz. Si ou annan konfyans total ki Zeova pou ed ou ler ou dan bezwen, ou pou remarke ki ou pou ganny plis kouraz. Alor, parey bann zapot Zezi, sak Kretyen i annan bon rezon pour demande: “Donn nou plis lafwa.”—Lik 17:5.

“Pran kouraz!”

10-11. Akoz Pol ti met lanfaz lo lenportans pour pran kouraz ler i ti ekri bann Kretyen Ebre?

Ou larepons

¹⁰ Ler Pol ti ekri bann Kretyen Ebre ki ti pe reste Zerizalenm e dan zalantour Zerizalenm, i ti konnen ki byento zot ti pou pas dan letan difisil. Zezi ti’n fini predir ki sa lavil ti pou ganny detrir e sa letan ti pe arive byen vit. (Lik 19:41-44; 21:20-24) Ki mannyer Pol ti fer zot rapel lenportans pour annan kouraz? I ti fer zot rapel promes Zeova. Nou’n koz lo sa promes dan lentrodiksyon sa liv, kot Zeova i dir: “Mon pa pou zanmen kit ou e mon pa pou zanmen abandonn ou.” Ki lefe sa promes ti kapab annan lo zot? Pol ti dir: “Pour sa rezon, pran kouraz e dir: ‘Zeova i mon led, mon pa pou per. Ki dimoun i kapab fer mwan?’”—Ebr. 13:5, 6.

¹¹ Menm si Labib pa donn okenn detay lo destriksyon Zerizalenm lannen 70, nou kapab asire ki bann Kretyen fidel dan sa lavil ti ekout konsey ki Pol ti donn zot. Avek kouraz, zot ti obeir lenstriksyon Zezi pour “konmans sov dan montanny” zis dan sa bon moman.—Lik 21:20, 21.

12. (a) Ki mannyer ou kapab demontre kouraz ler ou rankontre difikilte? (b) Ki mannyer serten in demontre en kouraz remarkab dan sa bann dernyen zour e ki ou determinen pour fer? (Vwar bwat “Imit zot kouraz.”)

Ou larepons

¹² Zeova i kapab donn ou osi sa kouraz ki ou bezwen ler ou rankontre difikilte ozordi e dan lavenir. (Ezek. 38:1, 2, 10-12; Mat. 24:21) Toultan mazinen ki Zeova li menm i promet pour protez nou. (Ezek. 38:19-23; 2 Tesa. 3:3) I pa pou zanmen abandonn bann ki kontan li e annan lafwa dan li. Sa ki Zeova ti dir Zozye i osi aplik pour ou. Ou kapab “pran kouraz” e “vreman for”! (Zoz. 1:7, 9, 18) Toultan mazin sa ki Zezi ti dir: “Pran kouraz!” I pou toultan gard son promes pour donn ou lespri sen Zeova ki pou donn ou kouraz pour fer fas avek nenport ki difikilte. (Zan 14:26; 15:26, 27; 16:33) Vreman, ou kapab “pran kouraz”!

Portre: Bann frer ek ser ki pe fer fas avek problenm avek kouraz. 1. Avek konfidans, en ser adolesan dan laklas pe sourir anmezir ki i pe tyonbo en liv lekol ek sa brosir “Was Life Created?” 2. Dan en kan refizye, paran en zenn fiy pe anmay zot fiy e zot tou pe sourir. 3. En zenn frer pe sourir anmezir ki i get atraver bann bar dan kaso. — Nenport sityasyon nou fer fas avek, Zeova i promet pour servi son lespri sen pour donn nou plis kouraz pour ki nou kapab sirmont nenport ki difikilte

Imit zot kouraz

Martin ek Gertrud Poetzinger

Martin ek Gertrud ti’n marye pandan zis trwa mwan edmi e ansanm zot ti pe fer zot servis a plen tan ler gouvernman Nazi Adolf Hitler ti separ zot. En sel kou, Martin ti ganny arete an 1936 e pli tar i ti ganny anmennen dan kan konsantrasyon Dachau. Gertrud osi ti ganny arete pli tar. Pandan ne-v-an, zot pa ti vwar kanmarad ditou e pandan preski tou sa letan ni enn pa ti konnen si sa lot ti ankor vivan. Me zot tou le de ti determinen pour reste fidel avek Zeova. Pli tar, Martin ti ganny transfer dan en kan konsantrasyon Mauthausen kot i ti ganny trete dan en fason vreman kriyel. Gertrud ti ganny mete dan kaso li tousel pandan trwa-z-an edmi e apre sa, i ti ganny forse pour fer ankor kat-r-an dan kan konsantrasyon Ravensbrück. Ler lager ti arete, i ti dekouver ki Martin ti ankor vivan. Alor, i ti sipliy en zofisye militer pour larg Martin e sa ti ede pour ki 100 lezot Temwen ki ti’n reisi sirviv bann kriyote dan kan Mauthausen i ganny large. Alafendefen Martin ek Gertrud ti zwenn ankor! Zot ti repran zot servis a plen tan ansanm. Pli tar, zot ti al Brooklyn, New York, kot Martin ti vin en manm lo Konsey Direkter Temwen Zeova. Souvan Martin ti dir son bann frer ek ser: “Kouraz i sa kalite pli enportan ki ou kapab annan!” Zot tou le de zot ti servi Zeova fidelman e dan lazwa ziska lanmor.

“Kouraz i sa kalite pli enportan ki ou kapab annan!”—M. Poetzinger

Valentina Garnovskaya

Valentina ti pe reste Belaris ler pour premye fwa i ti zwenn en Temwen Zeova an 1945. I ti apepre 20 an. I ti kontan sa ki i ti aprann dan Labib dan sa premye konversasyon e dan sa de lezot vizit ki sa Temwen ti fer. Me apre sa, i pa ti zanmen vwar sa Temwen ankor. Vi ki bann Temwen Zeova ti’n ganny enterdi, i ti difisil pour kontakte zot. Me avek kouraz, i ti koz avek lezot lo sa ki i ti’n aprann. Akoz sa, Valentina ti ganny arete e i ti ganny en santans wit an dan kan prizon. Ler i ti ganny large an 1953, deswit i ti konmans koz ankor lo sa laverite ki dan Labib avek lezot dimoun. Alor i ti ganny arete ankor en fwa e safwasi i ti ganny en santans di-z-an dan bann kan prizon. Dan enn bann kan i ti zwenn plizyer madanm ki ti Temwen. Zot ti annan en liv ki ti’n ganny enterdi. Sa ti en Labib. Ler enn parmi sa bann Temwen ti montre Valentina sa Labib, sa ti fer premye fwa ki i ti vwar sa liv sakre depi ki i ti’n koz avek en Temwen, plizyer lannen pase. Ler i ti ganny large an 1967, Valentina ti ganny batize konman en Temwen Zeova. Avek devouman, i ti partisip dan predikasyon ziska ki i ti ganny arete ankor an 1969 e safwasi i ti ganny en santans trwa-z-an. Me i ti kontinyen rann temwannyaz fidelman. Ziska son lanmor an 2001, Valentina ti ed apepre 44 dimoun pour aprann laverite dan Parol Bondye. Ler i ti reflesir lo son lavi, i ti dir: “Mon pa ti zanmen annan mon prop lakour. Tou mon bann keksoz ti dan en sel valiz, me mon ti ere e mon ti kontan pour servi Zeova.”

“Mon pa ti zanmen annan mon prop lakour. Tou mon keksoz ti dan en sel valiz, me mon ti ere e mon ti kontan pour servi Zeova.”—V. Garnovskaya

Alfredo Fernández

Alfredo ti annan apepre 19 an ler i ti ganny demande pour servi dan larme Arzanten. Son konsyans konman en Kretyen pa ti permet li pour partisip dan bann lager sa lemonn, alor i ti refize anrezistre oubyen menm pour met en liniform militer. I ti ganny anvoye dan prizon akoz i ti refize zwenn militer e akoz sa, bann gard dan prizon ti tret li dan en fason kriyel. Zot ti tortir li e dir li ki zot ti pou touy li. Me i ti kontinyen lir son Labib e pran not lo sa ki i ti pe aprann. Ler i ti pe al ganny zize, ziz ti ofer pour liber li si selman i ti met sa liniform militer pour al an kour. Avek determinasyon i ti refize. Alor, i ti retourn dan prizon. Vi ki i ti pe ganny tro tortire, i ti ganny en maladi vreman grav. Sa dokter dan prizon ti dir li ki prosenn fwa i ti pou vwar li, i ti pou dan en serkey. Alfredo ti realize ki i ti pe al mor, alor i ti anvoy en let pour son fanmir. I ti ekri: “Mon fanmir ki mon vreman kontan, mon pa’n zanmen anvi ekri zot en let koumsa. Me selman, akoz mon sirkonstans mon’n vwar li neseser.” I ti remersye zot pour sa sipor moral ki zot ti’n donn li ler i ti dan prizon. I ti osi ekri: “Mon vreman rekonesan pour nou Bondye, Zeova, ki’n donn mwan en fanmir koumsa. . . . Mon konpran sa latristes ki zot pou santi ler zot pou lir sa let. Mon zis demann zot pour pa les sa douler dekouraz zot konpletman me pour plito pran kouraz. Les Zeova rekonfort zot atraver son parol Labib. . . . Toultan mazinen ki mon pa pou mor pour touzour. Mon swete ki ler zot mazin mwan, sa pou donn zot kouraz pour reste for.” Apre trwa-z-an dan prizon, Alfredo ti mor a laz 21 an, an 1982. I ti reste fidel ziska lafen!

“Mon zis demann zot pour pa les sa douler dekouraz zot konpletman me pour plito pran kouraz.”—A. Fernández

Karen Oehm

Depi byen zenn, Karen ti servi Zeova. I ti en dimoun ere ki ti kontan lezot. I ti kontan son servis pionye e pli tar son lavi dan Betel Leta-z-ini ansanm avek son msye, Rainer. Me ler i ti apepre 55 an, i ti ganny en maladi ki avek letan ti pou touy li: Amyotrophic Lateral Sclerosis (ALS). Sa i en maladi ki atak e touy bann nerf en dimoun. Apre i fer sa dimoun perdi kontrol lo son bann misk, i paralize e mor. Dek ki Karen ti konnen ki i malad, i ti determinen pour fer sa ki i kapab e reste pozitif. I ti pas en kantite letan dan letid personnel e dan predikasyon anmezir i ti pe esey adapte avek son maladi ki ti fer son lasante kontinyen deteryore. Ler i ti konmans perdi son abilite pour koze, i ti aprann servi en konpiter ki ti permet li eple bann mo lo lekran anmezir i bouz son lizye. Menm si i ti vreman difisil pour ekri dan sa fason, i ti ekri son komanter pour bann renyon Kretyen e i ti partisip dan predikasyon par ekri let. Enn son bann ners ki ti osi en Temwen i dir: “I pa ti zanmen demande, ‘Akoz mwan?’ Zis de semenn avan i ti mor, i ti ekri en let pour en madanm ki mon pres avek e a lafen sa let i ti dir, ‘Si ou dekouraze e tris, ou kapab koz avek mwan nenport ler.’” En lot ners i dir: “I pa ti zanmen plennyen akoz son maladi. I ti annan en kantite rezon pour li dezespere me pour li, i pa ti fer sans pour santi koumsa akoz sa lafwa for ki i ti annan dan rezireksyon. I ti konnen ki i ti pou leve e Zeova ti pou fer li an bonn sante e parfe.” Ler Karen ti’n fek tonm malad, son ser zimel ti demann li, “Ki mannyer ou kapab sitan for koumsa?” Karen ti zis dir li: “Zeova i vreman donn ou sa lafors ki ou bezwen.” Sanmenm sa ki Zeova ti fer ziska son lanmor. Karen ti’n ekri detrwa let pour remersye, rekonfort e ankouraz son fanmir ek zanmi. Alor apre son lanmor, son msye ti bezwen al anmenn sa bann let kot sa bann dimoun.

“Zeova i vreman donn ou sa lafors ki ou bezwen.”—K. Oehm

13. Kwa ki motiv ou pour kontinyen demontre kouraz ozordi?

Ou larepons

¹³ Mazin sa letan ler i pou annan lape lo later antye e ler nou pou akeyir bann dimoun ki’n mor ki Zeova in gard dan son memwar sen e sof. Imazin ou pe zwenn sa bann zonm ek madanm ki’n demontre kouraz ki nou’n koz lo la dan sa liv e plizyer lezot ankor! Eski ou krwar ki i annan parmi zot ki pou regrete ki zot ti swazir pour servi Zeova dan sa vye lemonn Satan menm si avek kouraz zot ti perdi zot lavi? Byensir ki non! Me ou? Anmezir ki ou travay akote zot pour ede fer sa later antye vin en zoli paradi, eski ou pou regrete ki ou’n demontre kouraz ek lanmour pour Zeova dan sa bann dernyen zour? Byensir ki non! Alor, ou devret determinen pour kontinyen demontre kouraz ziska lafen. Pour touzour, ou pou vreman kontan ki ou’n fer sa!

Bann frer, ser ek zanfan pe viv en lavi ere dan Paradi. Serten pe donn manze ziraf e lezot pe get en gro sat, fer pitza, konverse oubyen zwe bann lenstriman lanmizik.