En let sorti kot Konsey Direkter

Bann ser ek frer ki nou kontan:

Dan son mesaz pour kongregasyon Smirn, Zezi ti dir: “Pa bezwen per sa ki pe al fer ou soufer.” (Rev. 2:10) Son lankourazman pour pa per i osi aplik pour nou ki pe viv pandan “zour Senyer.” (Rev. 1:10) Sirman sa i “en letan vreman difisil” e nou vreman kontan pour vwar pep Bondye partou dan lemonn pe demontre en kantite lafwa ek kouraz pour ki zot reste fidel avek Zeova!—2 Tim. 3:1-5.

Me ki mannyer nou kapab fer sir ki nou reste ferm e pa “retourn an aryer”? (Ebr. 10:39) I pa toultan fasil akoz nou kapab ganny lopozisyon e menm persekisyon. Kantmenm sa, nou pou toultan annan en swa. Ki swa nou timid oubyen ardyese, avek kouraz nou kapab swazir pour pran kote Zeova e pour fer sa ki byen. Kwa ki kapab ed nou?

Parol Bondye ki’n ganny enspire i kapab ed ou pour ganny kouraz. Dan Labib, i annan en kantite legzanp bann zonm ek madanm ki annan kouraz. Sa liv in ganny prepare pour ed nou egzamin byen zot legzanp e pour reflesir lo la. Ler ou lir sa bann resi Labib, priy Zeova e reflesir lo ou sirkonstans lavi, bann problenm ki ou pe fer fas avek la konmela oubyen sa ki ou kapab rankontre a lavenir. Reflesir lo ki mannyer Zeova i kapab ed ou pour annan kouraz. Reflesir osi lo ki mannyer kouraz ki sa bann zonm ek madanm ti demontre i kapab donn ou plis kouraz:

Pour adapte. (Zak 3:17) Ler Zeova ti rezet Sail e swazir David pour vin sa prosen lerwa, Zonatan ti demontre fidelite ek kouraz e i ti aksepte desizyon Zeova avek tou son leker.

Pour defann bann prensip drwat. (Ebr. 11:32-34) Ananya, Misael ek Azarya ti pare pour mor dan en four dife akoz zot lafwa olye ador en zidol.

Pour defann laverite. (Mat. 22:16) Mazin Sol sorti Tars ki ti dir laverite lo Zezi avek bann dimoun ki ti krwar ki i ti pou ed zot persekit bann disip Zezi.

Nou priye ki sa liv pou ed ou pour devlop plis lafwa ek kouraz. (Ps. 27:14) Ki Zeova i beni ou anmezir ki ou ed ou fanmir ek bann dan kongregasyon pour siport Rwayonm Bondye avek kouraz!