50 SOL SORTI TARS
I ti sanz son fason panse
PREMYE kou, Sol sorti Tars ti napa okenn regre pour son rol dan lanmor Etyenn.a Anfet, i ti pe vin deplizanpli move. Akoz son gran devouman pour son larelizyon, i ti “ankoler avek bann disip Senyer e i ti pe menase pour touy zot” Zerizalenm. I ti fer zonm konman madanm ganny arete e ganny trennen dan prizon. Ler bann Kretyen ti pe ganny zize, Sol ti dakor ki zot ganny met amor. Alor, i ti responsab pour bann persekisyon ki ti pe arive dan sa lavil, ki ti fors en kantite Kretyen pour sove pour zot pa ganny touye. Me sa pa ti ase pour Sol. I ti demann granpret pour donn li bann let pour li kapab persekit bann Kretyen Damas.
Avek sa bann let dan lanmen, Sol ek detrwa lezot dimoun ti al dan nor, ver sa lavil popiler dan dezer. Sol pa ti konnen ki Zezi ti vivan dan kote drwat son Papa dan lesyel. Me Zeova ek son Garson ti konn Sol byen e zot ti vwar bann bon keksoz dan li. Ler Sol ek son lekip ti pros pour ariv Damas, en sel kou i ti annan en lalimyer ki ti klere toultour zot. Sa lalimyer “ti pli klate ki soley”! Sol ti tonm ater e i pa ti kapab vwar kler.
Apre i ti tann en lavwa dir li: “Sol, Sol, akoz ou pe persekit mwan?” Sa lavwa ti reprimann Sol akoz i ti parey en toro ki antete ki fer son lekor dimal akoz i donn koudpye sa baton ki son met i servi pour gid li. Sol ti demande, “Lekel ou Senyer?” I bezwen ki sa larepons ti kas leker Sol. “Mwan menm Zezi ki ou pe persekite.” Zezi ti demann li pour leve e apre i ti dir li konsernan sa travay ki i ti pou fer. Sol ti pou vin en temwen ki ti pou rann temwannyaz lo laverite konsernan tou sa ki Zezi ti’n ansennyen. Sol, ki pour lemoman pa ti vwar kler ti pou ouver lizye bann dimoun ki pa krwar dan Zezi e i ti pou ed bann ki dan fernwanr vin dan lalimyer.
Ki mannyer en dimoun ki ti persekit bann Kretyen avek vyolans ti sanz son lavi e vin en predikater devoue pour Kris?
Sa vizyon ki i ti gannyen ti fer sa zonm arogan, ki ti annan en leker dir, demontre limilite. Sol pa ti vwar nanryen, alor zot ti bezwen atrap son lanmen e anmenn li Damas, kot i ti espere ziska ler en Kretyen ti vin vwar li. Sol ti zennen pandan trwa zour. Sirman Sol ti fer sa pour montre ki i ti sagren, ki son leker ti vreman fermal e ki i ti’n repantir. I bezwen ki i ti priy Zeova en kantite. Aprezan, Sol ti konpran ki i ti pe persekit Garson Bondye! Zezi ti anvoy kot Sol en Kretyen ki ti apel Ananyas. Menm si i ti per o konmansman, Ananyas ti ale e poz son lanmen lo Sol. Apre sa, “en keksoz ki ti parey bann lekay ti sorti dan son lizye” e i ti revwar kler. Sol ti’n vin en dimoun ki annan plis limilite e ki pli saz. Alor, “i ti leve e i ti ganny batize.”
Vi ki aprezan i ti en Kretyen, Sol ti konmans prese. Olye retourn Zerizalenm i ti fer en keksoz vreman difisil. I ti al kot bann sinagog Damas, kot petet en kantite dimoun ti konn li. Sirman i ti priye pour li ganny kouraz. Esey imazinen ki mannyer bann dimoun ti sirprann ler i ti dir zot ki tou sa letan i ti mal e ki aprezan i ti’n vin en Kretyen! Pa zis sa. “Sol ti vin deplizanpli efikas dan son minister. Bann Zwif Damas pa ti kapab dir nanryen ler i ti prouve avek bann largiman lozik ki Zezi i li menm Kris.”
Ler Sol ti pe reste Damas, i ti osi al Arabi, petet dan bann dezer Siriyen. Labib pa dir akoz, me petet i ti anvi pas en pe letan li tousel pour priy Zeova e reflesir lo sa travay enportan ki i ti pe al fer. Sol pa ti zanmen aret etidye e reflesir lo Lekritir. I ti vreman sanz son fason panse. Pli tar, i ti ankouraz bann Kretyen Ronm pour kontinyen fer sa.—Rom. 12:2.
Sol pa ti zanmen bliy bann move keksoz ki i ti’n fer dan lepase. Menm plizyer lannen pli tar, i ti mazin sa: “Mon ti koz kont Bondye, persekit lezot e mon ti arogan.” (1 Tim. 1:13) I ti koz lo lanmor Etyenn avek bokou regre. (Akt 22:19-21) Kantmenm sa, Sol ti konnen ki Zezi ek Zeova ti’n pardonn li e zot ti pou kontinyen beni li.
Sol ti’n reste Damas pour apepre trwa-z-an ler i ti bezwen sove e kit sa lavil akoz persekisyon. Apre ki zot ti’n fer li desann dan en pannyen par en trou dan miray, Sol ti al Zerizalenm. Sol ti ankor annan en kantite vwayaz pour fer konman en Kretyen.
Lir sa resi dan Labib:
Pour diskit lo la:
Ki mannyer Sol sorti Tars ti demontre kouraz dan sa resi?
Al pli o profon
1. Akoz Sol ti kapab dir ki son lavil, Tars, ti “en lavil enportan”? (Akt 21:39; w99-E 15/5 30 ¶1) A
Todd Bolen/BiblePlaces.com
Portre A: Bann debri ansyen lavil Tars, enkli en semen ki ganny pave
2. Akoz nou kapab dir ki Sol ti konn byen kiltir Zwif, Grek e Romen? (bt 62, bwat ¶1-3)
3. Ki Sol ti pe sey dir ler i ti dir ki Zezi ti’n aparet avek li “konmsi i’n aparet avek enn ki’n ne avan ler”? (1 Kor. 15:8; w22.09 27)
4. Kwa ki montre ki sa ki Lik ti ekri konsernan ler Sol ti konverti Damas i vre? (Akt 9:11, 24, 25; g03-E 8/2 24-26) B
Portre par ROLOC Color Slides
Portre B: Baro Bab-Sharqi Damas, kot sa semen Drwat i fini
Reflesir lo sa bann leson
Avek limilite Sol ti aksepte led Ananyas ek lezot Kretyen. (Akt 9:17, 18; Kol. 4:10, 11) Dan ki sityasyon nou devret aksepte led avek lezot?
Sol pa ti les son bann lakonplisman lepase oubyen fot lepase anpes li ador Zeova. (Fili. 3:4-8; 1 Tim. 1:12-16) Ki mannyer nou kapab imit li? C
Portre C
Ki lezot fason ki ou kapab imit kouraz Sol dan sa resi?
Reflesir lo Zeova ek son plan
Ki sa resi i ansenny mwan lo Zeova?
Ki mannyer sa resi i relye avek plan Zeova?
Ki ou’n aprann lo Sol dan sa resi ki fer ou kontan ki i’n ganny swazir pour diriz avek Kris dan lesyel?
Aprann plis
Gete ki mannyer en dimoun ki ti kontan persekit lezot, parey Sol, ti sanz son fason panse.
Ki mannyer legzanp Sol i ed nou pour nou annan en bon progranm pour etidye, pour devlop lanmour e pour annan en bon pwennvi lo nou lekor?
a Menm si Sol ti pli tar ganny apele Pol, dan sa sapit nou pou apel li “Sol.”