51 BARNABAS
“Garson Rekonfor”
LER Sol sorti Tars ti retourn Zerizalenm apre trwa-z-an ki i ti’n ale, i ti rod bann Kretyen Zerizalenm. (Gal. 1:15-19) Pour li aprezan, zot ti son bann frer ek ser, me pour zot, i ti ankor sa dimoun ki ti pe persekit zot dan en fason vyolan. I paret ki en kantite zot pa ti konnen si i ti’n vreman sanze. Me i ti annan en zonm ki ti annan kouraz ek konpasyon ki ti ed Sol. Sa zonm ti apel Barnabas.
Bann Kretyen Zerizalenm ti per pour ed Sol sorti Tars, me avek kouraz, Barnabas ti ed li
Labib i koz lo Barnabas pour premye fwa konman en Kretyen ki apel Zozef. Apepre Lapannkot lannen 33, Zozef ti vann en bout later e i ti donn sa larzan pour ed son bann frer ek ser Kretyen ki ti dan bezwen. Vi ki bokou dimoun ti konn li konman en dimoun ki bon e ki pare pour rekonfort lezot, bann zapot ti apel li Barnabas ki vedir “Garson Rekonfor.” Pli tar, apepre lannen 36, avek kouraz, i ti akeyir Sol. Labib i dir: “Barnabas ti vin ed li e anmenn li kot bann zapot.”
Koumsa ki Sol ek Barnabas ti vin bann bon zanmi. Sol ti pres avek bokou devouman Zerizalenm, alor bann fanatik relizye ti anvi touy li. Bann frer ti bezwen anvoy li Tars, sa landrwa kot i ti’n ne. Apepre ne-v-an pli tar, Barnabas li ti ganny anvoye pour ankouraz bann nouvo disip Antyos, Siri. Labib i dir ki i “ti en bon dimoun e i ti annan bokou lafwa ek lespri sen.” En kantite dimoun ti ekout sa bon nouvel, Antyos. Alor Barnabas ti bezwen led e i ti al rod son zanmi Sol. Sa de ti fer en bon lekip dan predikasyon. Zot ti osi ede pour anmas larzan pour ed bann Kretyen ki ti dan bezwen.
Avek letan, Sol ti ganny apele Pol e i ti al lo en vwayaz misyonner avek Barnabas. Zot kouraz ti ganny teste plizyer fwa. Ler zot ti Ikonyonm, serten Zwif ki ti opoz zot ti anvi saboul zot avek ros. Alor avek lasazes, sa bann misyonner ti kit Ikonyonm e al Lis. Ler zot ti laba, premye kou sa bann dimoun ti krwar ki Pol ek Barnabas ti bann bondye! Me bann ki ti opoz zot ti vini sorti Antyos ek Ikonyonm e zot ti anbet lafoul. Zot ti vir lo Pol, saboul li avek ros e kit li an deor lavil akoz zot ti krwar ki i’n mor. Ler bann Kretyen Lis ti rasanble otour Pol, i ti leve e i ti kapab marse e retourn dan lavil. Zis mazinen ki mannyer Barnabas ti bezwen soulaze! Pli tar, zot ti kit lavil Lis sen e sof. Pa lontan apre sa, zot ti retourn Lis pour zot rekonfort bann Kretyen laba. Vreman zot ti annan kouraz!
Tou le de Pol ek Barnabas ti fer fas avek en kantite danze me zot ti osi annan bann zoli leksperyans ansanm. Me enn fwa, i ti annan problenm ki ti arive antre zot. Barnabas ti determinen pour anmenn son kouzen Mark lo son prosen vwayaz. Pol pa ti dakor avek sa nide, akoz dan lepase Mark ti’n deza kit zot. Zot tou le de zot pa ti pare pour sede. “Zot ti pran en gran lakoler e sakenn ti pran son semen.”
Barnabas ti pou bezwen kouraz pour li fer sa ki byen. Ler bann Kretyen i ankoler avek kanmarad, i kapab fasil pour gard rankin, pour koz an mal lo sa lot dimoun oubyen menm pour aret asosye avek kongregasyon. I demann kouraz pour pa fer sa me plito pour fer zefor pour gard lape avek Bondye e avek bann frer ek ser.
I kler ki ni Pol ni Barnabas pa ti les sa problenm anpes zot kontinyen servi Zeova. Barnabas ek Mark ti pran bato pour al Sip kot zot ti kontinyen fer zot travay pour fer disip. Pol ti kontinyen son vwayaz avek Silas e i ti fer en kantite gran keksoz o non Zeova.
Eski sa de dimoun ti kontinyen gard rankin avek kanmarad? Non. Nou konn sa akoz ler Pol ti ekri bann let enspire par Bondye, i ti koz an byen lo Barnabas. Dan enn son let, Pol ti dir ki son zanmi, parey li menm, ti bezwen travay dir pour ki zot kapab kontinyen servi Zeova. (1 Kor. 9:6) Dan en lot let, i ti koz an byen lo Mark, “kouzen Barnabas.” (Kol. 4:10, 11) Menm si Pol ek Barnabas pa ti pe pres ansanm, zot ti kontinyen reste bon zanmi. San dout, parey son non i vedir, Barnabas ti kontinyen rekonfort lezot avek sa bon nouvel tan ki i ti kapab. Sirman anmezir ki i ti travay avek Mark, i ti kontinyen donn sa zenn frer sa formasyon ki i ti bezwen. Nou pou vwar kouraz ki Mark ti demontre dan lot sapit.
Lir sa resi dan Labib:
Pour diskit lo la:
Ki mannyer Barnabas ti demontre kouraz?
Al pli o profon
1. Bann Levit pa ti ganny okenn later konman leritaz. Alor ki mannyer Barnabas ki ti en Levit ti annan en bout later? (Nom. 18:20; Akt 4:36, 37; w98-E 15/4 20 ¶4, not anba lo paz)
2. Akoz Barnabas ti ganny apele en zapot? (Akt 14:14; it-E “Barnabas” ¶3)
3. Ler zot ti Sip, Barnabas ek Pol ti koz avek en zonm ki ti apel Serzis Polous. Eski Lik, sa ekriven liv Akt, ti annan rezon ler i ti dir ki Serzis Polous ti “prokonsil”? (Akt 13:7, not, 12; it-E “Cyprus” ¶7) A
Labank Cyprus Cultural Foundation Collection
Portre A: En kalen dan lepok ki Lanperer Klod ti dirize ler Barnabas ek Pol ti vizit Sip. Sa kalen i montre ki sa zil ti pe ganny dirize par en “prokonsil”
4. Akoz i pa drol ki bann dimoun Lis ti anvi akeyir Barnabas ek Pol avek bann sakrifis? (bt 97, bwat)
Reflesir lo sa bann leson
Ki mannyer nou kapab imit zenerozite Barnabas dan en fason pratik?
Menm si Barnabas ki ti aparaman organiz sa premye vwayaz misyonner, pli tar Pol ki ti ganny plis responsabilite ki Barnabas. Me i pa paret ki Barnabas ti zalou. Dan ki sityasyon ki nou kapab imit son legzanp? B
Portre B
Ki mannyer ou kapab imit kouraz Barnabas dan ou lavi?
Reflesir lo Zeova ek son plan
Ki sa resi i ansenny mwan lo Zeova?
Ki mannyer sa resi i relye avek plan Zeova?
Akoz ou rekonesan ki Barnabas in ganny swazir pour dirize ansanm avek Kris dan lesyel?
Aprann plis
Ki mannyer sa relasyon ant Barnabas ek Pol i ansenny nou ki dimoun avek diferan personnalite i kapab travay ansanm?
“Eski ou pou rezourd bann konfli e promot lape?” (w17.06 28-32)
Dan sa video, gete ki mannyer ozordi bann frer i kapab rezourd bann problenm parey Barnabas ek Pol.