42 MARI
Kouraz pour dir wi
KI PLI gran responsabilite ki Zeova in deza donn en imen enparfe? Reflesir lo sa zenn fiy Zwif ki ti en vyerz ki ti apel Mari. En zour ler i ti kot son lakour Nazaret Galile, en sel kou i ti ganny en viziter enkrwayab. Sa ti lanz Gabriyel!
Sa lanz ti dir “Bonzour, ou ki’n ganny beni par Bondye, Zeova i avek ou.” Premye kou, sa ti “trouble Mari en kantite.” I ti santi ki i pa ti merit sa kalite salitasyon. Lanz Gabriyel ti rekonfort li e dir li ki i ti’n “fer plezir Bondye.” Apre sa, i ti koz avek li lo sa gran responsabilite ki Zeova ti pe donn li. Sa lanz ti dir: “Ou pou tonm ansent e ou pou ganny en garson.” Sa lanz ti osi dir li: “Sa zanfan pou remarkab e i pou ganny apele Garson sa Enn Tre O.” Son garson ti pou dirize konman Lerwa, pli gran zeritye Lerwa David.
Mari ti ganny kouraz pour demann en kestyon ki ti fer sans. I ti’n fiyanse me i pa ti ankor marye, alor i pa ti’n zanmen annan okenn relasyon seksyel avek en zonm. I ti demande: “Ki mannyer sa pou arive?” Lanz Gabriyel ti eksplik li ki pwisans Zeova, setadir son lespri sen, ti pou “kouver” li e i pour sa rezon ki i ti pou ganny en zanfan parfe ki ti pou “ganny apele sen e Garson Bondye.” Sa lanz ti osi dir li sa ki Zeova ti’n fer pour son fanmir Elizabet. Sa ti ase pour reasir Mari. I ti zis dir: “Gete! Mwan mon lesklav Zeova! Ki sa ki ou’n dir i ariv mwan.” I ti vwar Zeova konman en Met ki kontan li e li konman en lesklav obeisan. I ti asire ki si i fer son lavolonte, i ti pou toultan an sekirite dan son lanmen pwisan. Ler i ti vwar sa sityasyon dan sa fason, sa ti donn li kouraz pour aksepte sa gran responsabilite.
Apre sa, sa lanz ti kit li e Mari ti al vwar Elizabet. Sa de madanm ti ankouraz kanmarad pour sa ki ti pe al ariv zot byento. Mari ti eksprim son lafwa e sa ti montre akoz i ti annan sa kantite kouraz. Dan zis en konversasyon, Mari ti refer oubyen servi bann lekspresyon ki dan Lekritir Ebre plis ki 20 fwa! Mari ti annan en lafwa for akoz i ti annan labitid pour etidye Parol Bondye o profon. Sanmenm sa i ti konn Zeova byen e i ti annan en kantite rezon pour li annan konfyans dan son bann promes. Mari ti reste avek Elizabet pour apepre trwa mwan e apre i ti retourn kot li. I ti bezwen annan en kantite kouraz pour li kapab dir Zozef ki i ti ansent e ki mannyer sa in arive. Premye kou, Zozef pa ti oule krwar sa ki Mari ti dir li me apre lanz Zeova ti ed li konpran ki sa ti vre.
Apre ki Mari ek Zozef ti’n marye, i ti ariv ler pour Mari ganny son baba. Pourtan, Zozef ti al avek Mari Betleenm, akoz Sezar ti’n donn lord tou dimoun pour al anrezistre. I bezwen ki i ti vreman difisil pour Mari fer en vwayaz 150 kilomet lo en bourik, me kantmenm sa i ti ale. Finalman i ti bezwen ganny son zanfan dan en park bef e met li dormi dan en loz, en keksoz ki zannimo i manz ladan. Me i pa ti dekouraze. Pour pran swen avek son garson presye, i ti determinen pour fer son mye par servi sa ki i ti annan.
En lanz ti demann Mari pour fer en keksoz ki Bondye pa ti’n zanmen demann okenn imen pour fer
Mari ti pou osi bezwen kouraz dan bann zour ek lannen ki ti pe vini. I ti bezwen annan kouraz ler li ek Zozef ti bezwen pran Zezi e sove pour al Lezip akoz Lerwa Erod ti pe rod touy Zezi. I ti bezwen kouraz akoz menm si li ek Zozef ti pov, zot ti elve ankor sis zanfan. I ti bezwen kouraz ler son msye Zozef ki i ti kontan ti mor, petet avan ki Zezi ti vin Mesi. I ti bezwen kouraz ler Zezi ti kit lakour pour al akonplir son minister. Me i ti pli bezwen kouraz ler Zezi ti ganny akize, zize e touye pour en keksoz ki i pa ti’n fer. Finalman i ti bezwen kouraz ler i ti zwenn ansanm avek bann disip Zezi vi ki bann Zwif pa ti kontan zot.
Pa Mari ti annan en gran responsabilite! Kwa ki ti ed li annan kouraz pour desarz son responsabilite? Labib i dir ki ler Mari ti aprann en keksoz ki ti fortifye son lafwa, i ti gard li dan son leker. Alor, i ti’n anmas en kantite trezor spirityel. Serten sa bann trezor ti sorti dan Parol Bondye, serten kot bann lanz, serten kot bann serviter Zeova e serten kot son garson. Ler i ti reflesir lo sa bann laverite, sa ti ed Mari pour fer fas avek sak problenm ki i ti rankontre ziska son lanmor.
Lir sa resi dan Labib:
Pour diskit lo la:
Ki mannyer Mari ti demontre kouraz?
Al pli o profon
1. Ki laprev istorik ki montre ki sa ki Lik 2:1-3 i dir i vre? (g-E 11/4 11 ¶4-5) A
British Library, London, UK, from the British Library archive/Bridgeman Images
Portre A: Lord pour fer en resansman par en gouverner Romen, Lezip, lannen 104
2. Akoz i ti kapab difisil pour Mari al Betleenm? (ia 153-155 ¶4-7)
3. Ler Zezi ti ankor en pti baba, Mari ti ganny dir: “I pou konmsi en gran lepe pou pers ou.” Ki mannyer sa parol ti ganny akonplir? (Lik 2:35; w08 1/3 31 ¶1)
4. Akoz nou kapab dir ki Mari in ganny son rekonpans dan lesyel? (w18.07 7 ¶14) B
Portre B: Mari ek son bann garson ti Zerizalenm pandan sa letan avan Lapannkot lannen 33
Reflesir lo sa bann leson
Ler Mari ti bezwen lafors ek lankourazman, i ti al vizit Elizabet. (Lik 1:39, 40) Akoz nou devret rod led ler nou annan problenm oubyen vwar li difisil pour desarz en responsabilite? C
Portre C
Menm si Mari ti’n fiyanse avek Zozef, Zeova ti anvoy en lanz kot Mari premye. Ki sa i ansenny nou lo lafason ki Zeova i vwar bann madanm fidel?
Ki mannyer ou kapab imit kouraz Mari?
Reflesir lo Zeova ek son plan
Ki sa resi i ansenny mwan lo Zeova?
Ki mannyer sa resi i relye avek plan Zeova?
Akoz ou rekonesan ki tre probab Mari in ganny swazir pour dirize ansanm avek Kris dan lesyel?
Aprann plis
Reflesir lo ki mannyer Mari ti travay dir e pare pour fer sakrifis pour pran swen avek son bann zanfan.
Ki mannyer ou krwar Mari ti santi ler lanz Gabriyel ti donn li sa responsabilite enportan?