40 NEEMYA
I ti rekonstrir miray
NEEMYA ti reste Sousann, en lavil Pers, me son leker ti Zerizalenm. I ti kontan sa lavil akoz tanp Zeova ti laba. Apre ki zot ti’n al an egzil pour en kantite letan, pep Zeova ti’n retourn Zerizalenm me vre ladorasyon pa ti ankor ganny byen etabli. Bann miray lavil pa ti ankor ganny rekonstrir. Sa letan, en lavil ki ti napa miray ti san defans, alor pa bokou dimoun ki ti anvi reste la.
Neemya ti en zofisye gouvernman ki ti ganny byen respekte anba lotorite lerwa Pers Artakzerses. Pli enportan ankor, Neemya ti en serviter fidel Zeova. En zour, frer Neemya ti vin vizit li e i ti anmenn en move nouvel konsernan Zerizalenm ki ti dan “en move sityasyon.” Pa zis son bann miray ki pa ti ankor ganny rekonstrir me son pep osi ti “dan laont.”
Sa ti fatig Neemya en kantite. Pli tar i ti ekri: “Mon ti asize e konmans plere. Mon ti dan dey pour plizyer zour.” I ti priy Zeova e sipliy li pour mazin Son pep e pour ed zot. Pli tar, ler Neemya ti pe servi Artakzerses son diven, lerwa ti demann li akoz i ti sitan sagren. Neemya ti per me avek kouraz i ti koze. I ti dir lerwa ki Zerizalenm ti dan en move sityasyon. Artakzerses ti demann li ki i ti oule. Neemya ti ekri: “Deswit mon ti priy Bondye lesyel.” Apre i ti dir sa lerwa pwisan ki i ti anvi kit son travay pour en pe letan, retourn Zerizalenm e ede pour rekonstrir son bann miray ek baro. Lerwa ti dakor avek tou sa ki Neemya ti demande!
Neemya ti al Zerizalenm e sa ti en gran vwayaz ki ti danzere. Ler i ti ariv Zerizalenm, i ti al enspekte bann miray aswar dan en fason diskre. Apre sa, i ti organiz bann dimoun e ankouraz zot pour partisip dan sa travay restorasyon. I ti donn legzanp par partisip dan sa travay li menm. Lepep ti vin ede, enkli bann dimoun ris ek dimoun enportan, parey bann lorfev ek prens. Enn bann prens ti menm travay ansanm avek son bann fiy.
Bann Zwif ti annan bann lennmi ki pa ti anvi vwar Zerizalenm vin en lavil ki an sekirite e pwisan. Premye kou, zot ti konmans monk e boufonn bann Zwif. Enn sa bann opozan ti menm dir ki en renar ti pou kapab kas sa miray ki Neemya ek son pep ti pe konstri. Neemya pa ti antren zot e i ti kontinyen ankouraz bann travayer.
Menm si Neemya ti ganny boufonnen e menase, i ti rekonstrir bann miray Zerizalenm
Lopozisyon ti entansifye. Ler miray ti ariv lanmwatye sa grander ki i sipoze ete, bann lennmi ti konmans met pare pour atak zot! Neemya ti pran bann mezir neseser pour protez lavil. Ler bann lennmi ti vwar sa, zot ti fristre e deside pour pa atak sa lavil direkteman. Depi sa, Neemya ek lanmwatye bann travayer ti veye avek zot zarm, pare pour lager, tandis ki sa lot lanmwatye ti kontinyen travay lo miray. Me zot lennmi pa ti bes lebra.
Alor zot ti servi en lot taktik. Zot ti esey fer Neemya per, par dir li ki en dimoun ti pe vin touy li e ki i ti devret al kasyet dan tanp sakre Zeova. Si Neemya ti fer sa, i ti pou kas lalwa Bondye. Alor, Neemya ti refize. I ti dir: “Eski en zonm parey mwan i devret sove?” I ti kontinyen travay akoz i ti konnen ki bann Zwif ti pe fer lavolonte Zeova e alor Bondye li menm ti pou ed zot. Vreman Zeova ti ed zot! Dan zis 52 zour, sa miray ti’n fini ganny rekonstrir e sa bann dimoun ki ti pe sikann zot e persekit zot ti onte.
Apre sa, Neemya ti bezwen kouraz pour ed son pep. I ti bezwen gid zot e ed zot pour servi Zeova. Par egzanp ler bann dimoun ris ti pe abiz bann dimoun pov ki ti demann zot pret larzan par fer zot pey en gran lentere, avek kouraz Neemya ti koriz zot. Pli tar, ler i ti tande ki serten ti’n dezobeir Zeova e zot ti’n marye avek bann madanm etranze, avek kouraz Neemya ti konsey zot e siport lalwa Bondye.
Ler bann dimoun ti dekouraze akoz zot prop pese ek lenperfeksyon, Neemya ti ansenny zot en zoli laverite. I ti dir: “Lazwa Zeova i zot lafors.” Neemya ti konnen ki servi sa Bondye ere i anmenn bokou lazwa. Napa okenn miray, ni okenn landrwa proteksyon ki pli for ki sa. Menm ziska ozordi, sa kalite lazwa i kapab vreman ankouraz nou.
Lir sa resi dan Labib:
Pour diskit lo la:
Ki mannyer Neemya ti demontre kouraz?
Al pli o profon
1. Ki Neemya ti fer konman sa enn ki ti servi lerwa diven? (w10-E 1/7 9 ¶5-7) A
National Museum of Iran, Tehran, Iran/Bridgeman Images
Portre A: En skilptir lo en vye miray Pers pe montre en dimoun ki pe servi diven Daryis Legran, granpapa Artakzerses
2. Ki mannyer bann fiy Saloum ti diferan avek bann zonm enportan Tekoit? (Nee. 3:5, 12; w19.10 23 ¶11)
3. Ki mannyer bann ki ti pe savoy bann keksoz ti kapab “travay avek en kote lanmen e . . . tyonbo en zarm dan lot kote lanmen”? (Nee. 4:17, 18; w06 1/2 29 ¶1) B
Portre B
4. Akoz Neemya ti trakase ki serten zanfan Zwif pa ti kapab koz Ebre? (Nee. 13:23-27; w16.10 10 ¶4)
Reflesir lo sa bann leson
Ki mannyer bann ansyen i kapab imit legzanp Neemya par . . .
depan lo Zeova? (Nee. 1:4-11; 4:14; 13:1-3)
pare pour travay ansanm avek bann frer ek ser? (Nee. 4:15, 21-23)
pare pour ekoute? (Nee. 5:1-7) C
Portre C
Ki mannyer legzanp Neemya i montre nou ki ler nou pare pour fer serten sanzman dan nou fason viv pour fer plis dan servis Zeova, i pou toultan beni nou?
Ki lezot fason ki ou kapab imit kouraz Neemya?
Reflesir lo Zeova ek son plan
Ki sa resi i ansenny mwan lo Zeova?
Ki mannyer sa resi i relye avek plan Zeova?
Ler Neemya i resisite, ki mon ti pou kontan demann li?
Aprann plis
Ki nou aprann avek Neemya konsernan lafason ki Zeova i ed nou ler nou priy li?
“God Answered His Prayer” (Bann seri “Bible Study Activities” lo Enternet)
Dan sa video, gete ki mannyer avek kouraz Neemya i reazir menm si son bann lennmi i kontinyen opoz li.