39 ESTER
“Si mon bezwen mor, mon pou mor”
EN ZENN fiy ti kot pale lerwa e i ti al kot lerwa ki pe asize lo son tronn. I ti konnen ki i ti kapab mor akoz i ti vin devan lerwa san ganny demande. I ti per, me i ti kontinyen marse. Lekel sa zenn fiy e akoz i ti bezwen fer sa?
Sa fiy i apel Ester. Son paran ti’n mor ler i ti ankor en pti fiy e son kouzen Mordekay ki ti bokou pli vye ki li “ti pran li konman son prop fiy” e i ti vin son gardyen. Zot ti reste Sousann, en lavil rwayal dan Lanpir Pers. Lerwa ti osi reste dan sa lavil e Mordekay ti en serviter lerwa. Ester ti grandi e i ti vin “vreman zoli.”
En zour, Lerwa Asweris (posibleman Zerzes 1) ti deside pour rod en nouvo madanm. Alor, i ti fer rod partou dan son lanpir bann zoli fiy vyerz. Bann serviter lerwa ti vwar ki mannyer Ester ti vreman zoli, alor zot ti anmenn li kot pale lerwa. Avan ler sa bann zonm ti pran Ester, Mordekay ti demann li pour pa dir personn ki i ti en Zwif.
Kot pale, “tou dimoun ki ti vwar Ester ti apresye li.” Apre ki Ester ti’n ganny bann swen pandan douz mwan pour fer li vin pli zoli, i ti ganny anmennen devan lerwa. Lerwa “ti apresye li” e i ti pli kontan li ki tou lezot fiy. Alor, Ester ti vin larenn dan sa lanpir mondyal pwisan! Kantmenm sa, Ester ti obeir Mordekay e i pa ti dir personn ki i ti en Zwif.
Sa letan, en msye ki apel Amann ti ganny apwente pour servi dan dezyenm plas apre lerwa. Amann ti ay Mordekay akoz i pa ti oule tonm azenou devan li. Mordekay pa ti oule fer sa akoz i ti en serviter fidel Zeova. Aparaman, Amann ti sorti dan en nasyon ki Zeova ti konsider konman Son lennmi. An tou ka, Amann ti vreman ankoler avek Mordekay e i ti fer konplo pour touy tou bann Zwif dan sa lanpir. Ler Mordekay ti tann sa ki Amann ti pe mazin fer, i ti vreman tris. I ti anvoy en mesaz pour Ester e sipliy li pour al kot lerwa e esey entervenir pour ki bann Zwif pa ganny detrir. Ester ti pou bezwen en kantite kouraz pour fer sa!
Ester ti eksplik Mordekay ki i kapab ganny touye si i al devan lerwa san ganny envite. Lerwa ti annan en move lakoler. Kantmenm sa, Mordekay ti ankouraz li e i ti fer li rapel ki petet i pour sa rezon ki i’n vin larenn, setadir pour protez pep Zeova. Alor Ester ti esey met son lafreyer dekote. I ti mazinen: “Si mon bezwen mor, mon pou mor.” Sel keksoz ki Ester ti demande i ki son pep i zennen pour trwa zour. Sirman, Ester ek lezot Zwif ti priy en kantite pour li ganny led Zeova. Apre sa i ti al kot lerwa.
Ler Asweris ti vwar Ester pe debout dan lakour rwayal, i pa ti ankoler. Alor, i pa ti donn lord pour touy Ester. I ti plito demann Ester ki i ti anvi. Ester ti envit lerwa ek Amann pour en lafet ki i ti’n prepare pour zot. Kot sa lafet i ti pridan e avek lasazes i pa ti dir nanryen. I ti zis envit lerwa ek Amann pour en dezyenm lafet son lannmen. Amann ti profit sa letan pour kontinyen fer konplo kont Mordekay, ki i ti anvi vwar anpandan lo en poto. Me sa konplo byen kalkile ti pou zis fer keksoz pli grav pour Amann pli tar.
I ti bezwen persyad son msye, en lerwa pwisan, pour ki pep Bondye pa ganny masakre
Pandan sa dezyenm lafet, Asweris ti ankor en fwa demann Ester ki i ti anvi i fer pour li. Safwasi Ester ti dir li. Avek respe, i ti dir lerwa ki en dimoun ti pe fer konplo pour detrir li ek son pep. I ti dir ki i ti’n kapab reste trankil, me sa konplo ti pou afekte lerwa li menm. Asweris ti sirprann, alor i ti demande lekel sa dimoun ki ti pe fer konplo. Ester ti dir li ki sa move dimoun ti Amann! Sa lerwa byen ankoler ti donn lord pour touy Amann. Alor Amann ti ganny met anpandan lo sa poto ki li menm i ti’n prepare pour Mordekay.
Amann ti anvi touy Mordekay e detrir tou pep Bondye partou dan Lanpir Pers. Me i plito Amann ek en kantite lennmi Zeova ek Son pep ki ti ganny detrir. Zeova ti servi en zenn madanm ki ti annan kouraz ek lafwa pour fer sir ki son pep i reste sen e sof ankor en fwa.
Lir sa resi dan Labib:
Pour diskit lo la:
Ki mannyer Ester ti demontre kouraz?
Al pli o profon
1. Ki levidans istorik ki montre ki sa resi i vre? (ia 138, bwat) A
Ungnad, Arthur. “Neubabylonische Privaturkunden aus der Sammlung Amherst.” Archiv für Orientforschung, vol. 19, 1959, pp. 74–82
Portre A: En vye dokiman Pers ki mansyonn Marduka (Mordekay)
2. Petet akoz Mordekay ti refize tonm azenou devan Amann? (ia 131 ¶18)
3. Kwa ki montre ki Satan ek son bann demon osi ti pe esey elimin bann Zwif? (g02-E 8/9 7 ¶3–8 ¶2) B
Cube. Lot of Yahali, puru. Neo-Assyrian Clay. (YPM BC 021122). Courtesy of the Peabody Museum, Division of Anthropology, Babylonian Collection, Yale University; peabody.yale.edu
Portre B: En vye lobze ki ti ganny servi pour tir osor
4. Ki profesi Ester ek Mordekay ti ede akonpli? (ia 142, bwat)
Reflesir lo sa bann leson
Ester ti saz e obeisan menm ler i ti lwen avek lezot dimoun ki ador Zeova. Ki bann zenn ozordi i kapab aprann avek li?
Asweris ti ekout Ester akoz Ester ti annan pasyans, respe pour li e i ti onnet. Ki mannyer bann madanm Kretyen i kapab imit son legzanp? C
Portre C
Ki lezot fason ki ou kapab imit kouraz Ester?
Reflesir lo Zeova ek son plan
Ki sa resi i ansenny mwan lo Zeova?
Ki mannyer sa resi i relye avek plan Zeova?
Ler Ester i resisite, ki mon ti pou kontan demann li?
Aprann plis
Dan sa video lanmizik, get sa kantite leson ki bann zanfan i kapab aprann avek Ester.
Ki mannyer bann frer dan nou letan in imit Ester ler lezot Temwen ti bezwen ganny proteze?
Imit bann ki ti esper promes Bondye avek pasyans—Mordekay ek Ester (3:05)