31 SA PTI FIY IZRAELIT
En pti fiy i koz lo son Bondye
NOU pa konn son non, me nou konn en keksoz enportan dan son lavi. I ti en pti fiy ki ti reste Izrael ler Lerwa Zeoram ti pe dirize. Zeoram ek sa nasyon ki i ti dirize ti rebele, alor Zeova ti les bann Siriyen kontinyen atak zot e pran zot keksoz. En zour, bann Siriyen ti tyonbo sa pti fiy e anmenn li Siri avek zot.
I bezwen ki sa pti fiy ti vreman per e son fanmir ti bezwen vreman tris e enkyet pour li. I ti vin propriyete Naamann, en sef militer ki ti for. Naamann ti donn son madanm sa pti fiy pour ki i vin son servant. Sirman sa pti fiy ti fer son mye pour adapte avek son nouvo lavi. Petet i ti remarke ki dan sa fanmir, zot tou zot ti tris. Naamann ti pe soufer avek lalep, en maladi vreman terib. Sa maladi ti defigir dimoun e parfwa i ti menm napa en gerizon.
Menm si i ti en prizonnyen parmi bann ki ti ador bann fo bondye, i ti kontinyen demontre konpasyon ek kouraz
Sa pti fiy ti annan en bon leker. I ti konnen ki Naamann ti en lennmi pep Izrael, me i ti pran lapenn pour Naamann ek son madanm. Sa pti fiy ti osi konnen ki Naamann ti kapab ganny geri. Petet son paran ti’n rakont li bann zistwar lo bann mirak ki Zeova ti’n permet profet Elisa fer. Me i pa ti konnen si Elisa ti’n deza geri en dimoun avek sa kalite maladi. Me sa pti fiy ti asire ki son Bondye, Zeova, ti kapab fer son profet fer tou sa ki neseser pour geri Naamann.
Eski i merit dir en keksoz? I paret ki i ti danzere pour fer sa. Naamann ti ador sa bondye Siriyen, Rimonn e i ti regilyerman anmenn lerwa Siri kot tanp Rimonn pour fer son ladorasyon. I paret ki bann Siriyen ti konsider sa bondye konman sa enn ki ti annan pouvwar pour anmenn tanpet ek loraz. Alor, ki Naamann ti pou mazinen lo Zeova, sa Bondye ki sa pti fiy ti adore? Eski Naamann ti pou ofanse si i ti dir li ki Zeova ti pou kapab geri li, alor ki son bondye Rimonn pa ti kapab? I bezwen ki sa pti fiy ti priye e demann Zeova pour donn li kouraz. Apre sa, i ti dir madanm Naamann: “Si zis mon senyer ti al kot sa profet ki Samari! Sa profet ti pou geri son lalep.”
Sa i sa sel parol ki i ti dir ki’n ganny ekrir dan Labib. Menm si i paret senp, i ti annan en gran lefe. Dan sa verse ki swiv, nou vwar ki Naamann ti al kot son lerwa Benn-Adad pour dir li sa ki sa pti fiy ti’n dir. Apre lerwa ti anvoy Naamann Izrael. I ti donn li en let pour donn Lerwa Zeoram, kot i ti pe demande ki i geri lalep Naamann.
Apre ki Naamann ti’n ale, son fanmir ti zis bezwen espere pour vwar sa ki ti pou arive. Sirman i bezwen ki sa pti fiy ti kontinyen priye e sipliy Zeova pour azir e montre Naamann ki I sa sel vre Bondye. Petet Naamann ti’n ale pour plizyer zour oubyen menm plizyer semenn. Alafendefen, Naamann ti retournen. Zis mazinen ki kantite son fanmir ek serviter ti kontan ler zot ti vwar Naamann pros. Son lapo ki ti’n ganny afekte avek sa maladi ti aprezan prop e zoli parey en pti garson. Naaman ti’n ganny geri!
I bezwen ki sa pti fiy ti ekout byen ler Naamann ti pe rakont sa ki’n arive: lafason ki Elisa ti’n resevwar Naamann. Ki mannyer son limilite ti’n ganny teste e menm fer li ankoler. Ki mannyer bann serviter Naamann ti’n persyad li pour fer sa ki sa profet ti’n demann li pour fer. Ki mannyer Naamann ti’n plonz dan Larivyer Zourden set fwa e finalman ler i ti remonte, i ti’n ganny geri konpletman avek sa maladi. Me sa ki ti fer sa pti fiy pli kontan i sa ki ti arive apre ki Naamann ti’n ganny geri. Depi sa zour, Naamann ti konmans ador Bondye Zeova ansanm avek li!
Tousala ti arive akoz en pti fiy ti ganny kouraz pour li koz lo son Bondye ek profet. I vre, nou pa konn son non me Zeova i konnen. Si nou imit kouraz sa pti fiy, nou pou la ler Zeova i resisit li. Zis mazinen ki mannyer i pou gou ler nou zwenn li, konn son non e ekout li rakont lezot keksoz ki ti arive avek li!
Lir sa resi dan Labib:
Pour diskit lo la:
Ki mannyer sa pti fiy Izraelit ti demontre kouraz?
Al pli o profon
1. Petet akoz sa pti fiy ti per bann Siriyen e vwar zot drol? (w96-E 15/5 8 ¶3) A
Courtesy of Musée du Louvre, Paris
Portre A: En vye zidol Siriyen, posibleman bondye Rimonn
2. Dekrir ki mannyer lalep ti afekte en dimoun. (it-E “Leprosy” ¶3-5)
3. Akoz Elisa pa ti aksepte kado Naamann? (w05 1/10 19 ¶2)
4. Akoz Elisa ti annan konfyans ki Zeova ti pou pardonn Naamann pour tonm azenou devan bondye Rimonn? (2 Rwa. 5:18, 19; w05 1/10 19 ¶3) B
Portre B
Reflesir lo sa bann leson
Naamann ti en sef larme Siriyen ki ti atak Izrael. Pourtan, Zeova ti geri li. Ki sa i ansenny ou lo konpasyon Zeova e lefet ki i pa fer lapreferans? C
Portre C
Ki mannyer legzanp sa pti fiy Izraelit i ankouraz ou pour donn temwannyaz ler ou per?
Ki lezot fason ki ou kapab imit kouraz sa pti fiy Izraelit?
Reflesir lo Zeova ek son plan
Ki sa resi i ansenny mwan lo Zeova?
Ki mannyer sa resi i relye avek plan Zeova?
Ki mon ti pou kontan demann sa pti fiy Izraelit ler i resisite?a
Aprann plis
Lefet ki non sa pti fiy pa ganny mansyonnen, eski sa i vedir ki i pa ti enportan?
“Why Are Some Bible Characters Left Unnamed?” (w13-E 1/8 10)
Gete ki mannyer bann zenn ozordi i kapab annan kouraz parey sa pti fiy Izraelit.
a Si sa pti fiy ti grandi e vin en adilt, i evidan ki i pou ganny resisite konman en madanm.