30 SA VEV ZAREFAT
I ti demontre kouraz menm si i ti dezespere
MENM si i pa ti envizib, petet parfwa i ti santi li envizib. Eski i annan dimoun ki ti remarke ki i ti dan problenm? Eski i ti annan dimoun ki ti enterese avek li? Sa madanm ti en vev e en manman tousel. Izrael, bann vev ti ganny en serten soulazman akoz bann lalwa Bondye ki ti protez bann vev ek bann orfelen. Me i pa ti en Izraelit. I ti reste Zarefat, en lavil Sidon. Sa lerwa Sidonyen Etbaal ti en pret ki ti servi bondye Astoret. Bann dimoun ki ti ador Astoret ti promot tou sort kalite move kondwit. Dan en pei ki ti ranpli avek vyolans e dimoun ti pe lite akoz i ti annan en lafanmin ek lasesres, ki lespwar en pov vev ti annan pour dimoun demontre konpasyon anver li?
I ti esey anmas tou bann pti keksoz ki i ti vwar ki zot ti kapab manze pour ki li ek son zenn garson i reste vivan. Me kantmenm sa keksoz ti kontinyelman vin pli grav e i paret ki zot ti nepli annan okenn lespwar.
Pourtan, i ti annan en keksoz diferan e presye avek sa vev. Preski 1,000 an pli tar, Zezi Kri ti dir ki Zeova ti vwar sa vev diferan avek bann Izraelit ki ti napa lafwa. I paret ki i ti’n aprann konn Zeova, sa Bondye Izrael. Petet i ti apresye lafason ki Zeova ti tret son pep. I ti annan lafwa dan Zeova. Me ki Zeova ti pou kapab fer pour sa madanm ki ti dan en pei etranze kot zot ti servi lezot bondye? I ti anvoy en zoli kado pour li.
Zeova ti demann son profet Eliya pour al dan nor e pour rod sa vev e reste avek li pandan sa lasesres. Ler sa profet ti ariv Zarefat, i ti vwar en madanm pe anmas dibwa. Avek ladouser Eliya ti demann li en faver: “Silvouple, donn mwan en pe delo pour mwan bwar.” Sa vev pa ti’n zanmen vwar Eliya. Me Labib i dir ki ‘sa madanm ti al rod delo.’ Petet ton son lavwa, son bann parol dous oubyen son lenz senp konman en profet, ki ti montre li ki sa zonm i en serviter Zeova. Eski sanmenm sa madanm ki Zeova ti’n anvoy li pour al gete? Eliya ti demann li en lot faver, i ti demann li pour anmenn en bout dipen pour li.
E la sa madanm ti konmans eksprim li. “Mon fer serman devan Zeova ou Bondye vivan.” I ti konmans montre ki i annan lafwa dan sa vre Bondye, “sa Bondye vivan.” (Zer. 10:10) Apre sa i ti dir Eliya ki i ti napa dipen. I ti annan zis en pti ponnyen lafarin dan en gran resipyan e en ptigin delwil dan en pti boutey. I ti pe al alim dife e prepar sa dernyen repa pour li ek son garson. Apre i ti dir: “Sa i sa dernyen keksoz ki nou pou manze, apre sa, nou pou mor.”
Sa vev ek son garson ti pros pour mor lafen, pourtan profet Zeova ti demann li pour donn li sa dernyen keksoz ki i ti annan pour manze
I bezwen ki sa ki Eliya ti dir apre sa ti sirprann li. “Pa bezwen per.” Ki mannyer i ti kapab pa per kan i ti konnen ki son garson ti pe al mor lafen? Me kantmenm sa i ti ekoute. Apre, Eliya ti dir li sa ki Zeova ti’n promet pour fer pour li. Si i fer en pti dipen pour sa profet premye, Zeova ti pou rekonpans li. I ti pou fer sir ki son de resipyan, sa enn pour lafarin ek sa enn pour delwil, i kontinyen donn li sa ki i bezwen ziska lafen sa lasesres!
La ki lafwa sa vev ti ganny teste. Eski i ti pou donn profet Zeova sa dernyen pti manze ki ti reste? Petet i ti deza konnen ki Zeova ti’n fer bann pli gro mirak pour son pep e ki alor donn en vev ek en zanfan manze pa ti pou difisil. Me kantmenm sa eski i ti annan kouraz pour obeir? Labib i dir: “Alor i ti ale e i ti fer sa ki Eliya ti’n dir.”
Zeova ti rekonpans sa madanm en kantite. Zeova ti fer mirak e son bann resipyan lafarin ek delwil pa ti zanmen fini. Eliya ek son fanmir ti kontinyen ganny sa ki zot ti bezwen ziska ki sa lasesres ti fini. Zeova ti fer en lot mirak pli merveye pour li. Maler ti arive ler son garson ti tonm malad e mor en sel kou. Me Zeova ti servi Eliya pour resisit sa garson! Sa i premye rezireksyon ki Labib i koz lo la. Sirman, sa mirak ti fer sa vev ganny plis kouraz ankor. Depi sa, plizyer milyon dimoun in ganny kouraz akoz sa mirak e atraver legzanp sa vev.
Lir sa resi dan Labib:
Pour diskit lo la:
Ki mannyer sa vev Zarefat ti demontre kouraz?
Al pli o profon
1. Dekrir larelizyon Sidon, sa lavil prensipal Fenisi. Ki mannyer sa larelizyon ti enfliyans bann Izraelit? (it-E “Sidon” ¶6) A
Penta Springs Limited/Alamy Stock Photo
Portre A: Figir Astoret, date apepre 1500 avan Kris
2. Ki relasyon Etbaal ti annan avek lerwa Izrael Aab? (it-E “Ethbaal”)
3. Bann Fenisyen ti ador sa bondye Astoret (oubyen Astarte). Ki koutim ki ti relye avek sa larelizyon ki ankor egziste ozordi? (g93-E 22/11 13 ¶1-4)
4. Ler garson sa vev ti’n mor, petet akoz i ti demann Eliya: “Eski ou’n vin isi pour fer mwan rapel mon bann fot e fer mon garson mor?” (1 Rwa. 17:18; w14 15/2 15 ¶4-5) B
Portre B
Reflesir lo sa bann leson
Zeova ti vwar sa vev menm si i ti pe viv dan en lavil kot zot ti ador Baal. Ki sa i ansenny nou lo Zeova e lafason ki nou devret vwar dimoun dan nou teritwar? (Akt 10:35)
Ki bann Kretyen ki pe lalit finansyerman i kapab aprann avek lafwa ek kouraz sa vev Zarefat? C
Portre C
Ki lezot fason ki ou kapab imit kouraz sa vev Zarefat?
Reflesir lo Zeova ek son plan
Ki sa resi i ansenny mwan lo Zeova?
Ki mannyer sa resi i relye avek plan Zeova?
Ki mon ti pou kontan demann sa vev Zarefat ler i resisite?
Aprann plis
Parey sa vev Zarefat, ki mannyer nou osi nou kapab montre ki nou lanmitye avek Zeova i pli enportan ki keksoz materyel?
“Laprouvasyon Bondye i anmenn ver lavi eternel” (w11 1/2 19-23)
Reflesir lo laprev ki montre ki Zeova i enterese avek bann keksoz ki ou fer pour demontre ou lafwa, menm bann pti keksoz.