29 ELIYA
“Mon Bondye i Zeova”
ELIYA i aparet dan Labib en sel kou parey zekler! Listwar sa dis tribi Izrael ti’n vin en zistwar tris kot tou bann lerwa enn deryer lot ti move. Aab ti sa setyenm lerwa e Zeova ti’n vwar ki i ti pli move ki tou lezot. Aab ti marye avek en move prenses etranze ki ti apel Zezabel. Aab ti ador bann zidol me sa ki son madanm ti adore ti pli move. I ti ador sa fo bondye Baal e i posib ki sa ti enkli ofer bann zanfan konman en sakrifis. Me en zour, Eliya ti vin devan Aab. Zeova ti’n anvoy li pour kondann sa lerwa e pour anons son zizman.
Imazin Eliya kot i pe fer sa gran vwayaz sorti dan lakanpanny Gilead, en landrwa avek bokou montanny ek ros, pour al Samari sa lavil ki ganny proteze par bann miray kot Aab ti’n konstri son gran pale. I ti menm ganny apele “lakaz ivwar” petet akoz son larises. (1 Rwa. 22:39) Nou kapab imazin Eliya, dan son lenz ki’n ganny fer avek pwal zannimo e dan son leren en sang larz ki’n ganny fer avek lapo, pe antre dan sa zoli pale e pe debout devan lerwa e dir li ki son bondye Baal ti napa okenn pouvwar! Ki ti pou arive si Zezabel ti avek lerwa? Ki mannyer Aab ek son larenn ti pou reazir ler Eliya ti pou dir zot sa? Avek kouraz, sa profet ti pe esey dir zot ki sa bondye ki zot krwar i anmenn lapli pour zot pa ti pou kapab ed zot. Zeova ti dir ki i ti pou annan en lasesres dan sa pei. Sa lasesres ti pou dire pandan plizyer lannen ziska ki sa serviter Zeova, Eliya, i dir ki lapli ti pou rekonmans tonbe!
Kote ki Eliya ti ganny sa kouraz pour koz koumsa? Nou kapab trouv larepons dan sa ki Eliya li menm i dir. I ti konmans son mesaz koumsa: “Mon fer serman devan Zeova sa Bondye Izrael ki mon servi e ki vivan.” Sa lekspresyon Ebre ki’n ganny tradwir konman “ki mon servi” i literalman vedir “devan ki mon debout.” Eliya ti pe debout devan en lerwa imen ki pwisan. Me sa profet ti konn en keksoz pli enportan ankor, ki an realite i ti pe debout devan Zeova Bondye konman Son serviter. Menm si Aab ek Zezabel ti annan pouvwar e zot ti kapab fer per, an realite zot ti nanryen konpare avek Zeova. Pa sa i en fason ankourazan pour get keksoz!
Eliya ti fer fas avek en move lerwa ek larenn, en nasyon ki ti rebele ek son prop lafreyer
Eliya ti kontinyen demontre kouraz dan son servis pour Zeova. I ti fer sa ler i ti obeir Zeova e al kasyet dan en pti vale li tousel pandan sa lasesres ek lafanmin e i ti depan zis lo en pti larivyer pour li ganny en pe delo e lo korbo pour anmenn manze pour li. Eliya ti demontre kouraz ler Zeova ti anvoy li Sidon, sa landrwa kot papa Zezabel ti dirize, pour ed en pov vev ki ti’n demontre en lafwa remarkab. Eliya ti osi demontre kouraz ler i ti debout lo Montanny Karmel, an fas avek 450 profet Baal. I ti reprezant son Bondye e i ti prouve ki zis Zeova tousel ki sa vre Bondye. Tou dilon son lavi Eliya ti prouve ki i ti annan konfyans dan son Bondye Zeova e i ti vin annakor avek son non ki vedir “Mon Bondye i Zeova.”
Par kont, Eliya ti osi “en zonm ki ti annan bann santiman parey nou menm.” (Zak 5:17) I pa konmsi i pa ti per. Eliya ti vreman per apre ki Zeova ti’n fer mirak lo Montanny Karmel. Aab pa ti oule sanze e Zezabel ti fer serman pour touy Eliya. Alor i ti taye e kasyet pour ki i pa ganny touye. Eliya ti telman sagren ki i ti dir Zeova ki i ti anvi mor e i ti santi ki i pa vo nanryen zis parey son bann zanset ki ti’n mor depi lontan. Me avek pasyans Zeova ti ekout li. Pli tar, Eliya ti dir son Bondye ki i ti santi li tousel e i ti per e i ti santi ki tou son travay dir ti anven. Zeova ti reasir son profet ki i pa ti tousel e ki i ti annan ankor valer e itil pour li. Zeova ti menm swazir en dimoun pour ed son profet, en zanmi ki Eliya ti pou kapab formen e prepare pour kontinyen sa travay.
Apre sa, Eliya ti al kot sa zonm ki ti apel Elisa. Sa de zonm ti kontinyen servi Zeova ansanm pandan sa bann letan difisil. Elisa ti ed son zanmi ki ti pli aze ki li e i ti aprann avek li. Avek led Zeova, Eliya ti reganny son kouraz e i ti kontinyen servi Zeova avek kouraz ziska lafen.
Lir sa resi dan Labib:
Pour diskit lo la:
Ki mannyer Eliya ti demontre kouraz?
Al pli o profon
1. Akoz bann korbo ti sa pli bon swa pour anmenn manze pour Eliya (it-E “Raven” ¶5) A
Lior Kislev
Portre A
2. Ki mirak Eliya ti fer? (it-E “Elijah” No. 1 ¶11)
3. Ler zot ti lo Montanny Karmel, Eliya ti donn lord bann zonm pour ranpli en gran rigol avek delo. Vi ki ti annan lasesres, kote ki zot ti ganny sa delo? (ba-E 17 ¶3) B
Todd Bolen/BiblePlaces.com
Portre B: Montanny Karmel ek Lanmer Mediterannen
4. Ki sa lenz profet ki Eliya ti mete ti reprezante e akoz i ti met sa lenz lo zepol Elisa? (w14 1/3 12 ¶3)
Reflesir lo sa bann leson
Zis parey Zeova ti tret Eliya, ki mannyer nou kapab fer li fasil pour nou bann frer ek ser koz avek nou ler zot dekouraze? (1 Rwa. 19:1-18) C
Portre C
Eliya ti pare pour partaz son bann responsabilite avek Elisa. Ki mannyer nou kapab imit son latitid ler nou form e partaz bann responsabilite ki nou annan avek lezot?
Ki lezot fason ki ou kapab imit kouraz Eliya dan ou lavi?
Reflesir lo Zeova ek son plan
Ki sa resi i ansenny mwan lo Zeova?
Ki mannyer sa resi i relye avek plan Zeova?
Ki mon ti pou kontan demann Eliya ler i resisite?
Aprann plis
Get sa pti video pour vwar ki mannyer Zeova ti donn Eliya kouraz pour kontinyen servi li.
Ki bann zenn i kapab aprann avek kouraz ki Eliya ti demontre lo Montanny Karmel?
“Defend True Worship!” (Bann seri “Bible Study Activities” lo Enternet)