26 NATAN
I ti koriz en lerwa
‘KI MANNYER en bon dimoun koumsa i kapab fer bann move keksoz koumsa?’ Petet profet Natan ti pe mazin sa ler i ti pe al kot pale son bon zanmi Lerwa David. Pa tro lontan pase, Zeova ti’n demann Natan pour donn David en bon nouvel konsernan lavenir: Mesi ti pou vin atraver desandans David! (2 Sam. 7:4, 12, 13) Me aprezan, David ti’n fer bann gro pese e Zeova ti anvi Natan i koriz li.
David ti’n fer sa bann pese an kasyet me Zeova ti pe gete. I bezwen ki Bondye ti dir Natan sa ki ti’n arive. En zour swar, David ti pe marse anler lo twa son lakaz ler i ti vwar en madanm pe bennyen. I ti vwar ki sa madanm ti “vreman zoli” e i ti fer li vin kot li. Lerwa ti konnen ki sa madanm ti Bat-Seba, madanm son solda fidel, en Itit ki apel Ouriya. Kantmenm sa, David ti komet adilter avek li. Pli tar, Bat-Seba ti fer David konnen ki i ti ansent. David ti esey kasyet son pese. I ti demann Ouriya pour kit lezot solda deryer e vin pas lannwit avek son madanm. (Konpar 1 Samyel 21:5.) Me Ouriya ti refize akoz i ti pran son bann responsabilite dan larme o serye. Alor David ti fer konplo pour ki Ouriya i ganny mete dan en pozisyon kot i ti pou ganny touye pandan lager. Sa plan ti marse. Apre ki Ouriya ti’n mor, David ti pran Bat-Seba konman son madanm.
Labib i dir: “Zeova pa ti kontan ditou sa ki David ti’n fer.” Alor sa vre Bondye ti demann profet Natan pour koriz David e devwal son pese. Ler Natan ti pe al kot lerwa, eski i ti per ki mannyer David ti pou reazir? Apre tou, si David ti pare pour touy Ouriya, ki lerwa ti kapab fer si Natan ti devwal son pese e reprimann li? Natan ti anvi tous leker David e ed li pour vwar ki mannyer sa ki i ti’n fer ti vreman mal. Sirman sa profet ti priy lo la. I ti reflesir lo en legzanp e i ti al devan lerwa.
Natan ti koz avek David lo de zonm dan en lavil. Enn ti vreman ris e i ti annan en kantite mouton ek bef. Sa lot zonm ti pov, i ti annan zis en pti mouton e i ti kontan sa pti mouton. I ti pran swen avek li e fer li reste dan lakaz avek li. En zour, sa zonm ris ti ganny en viziter ki i pa ti pe ekspekte e i ti bezwen touy en mouton pour donn li manze. I pa ti swazir enn parmi son bann mouton. I ti plito “pran pti mouton sa zonm pov,” i ti touy li e kwi li pour donn sa dimoun ki ti’n vin vizit li. Ler Natan ti fini rakont sa zistwar, David ti vreman ankoler! I ti dir: “Mon fer serman devan Zeova sa Bondye vivan, ki sa zonm ki’n fer sa i devret mor!” David ti vreman ankoler akoz sa zonm ris pa ti’n “demontre okenn konpasyon.”
Natan ti donn en konsey serye e i ti koriz en lerwa ki i ti kontan e respekte
Natan ti’n swazir en bon legzanp. David ti deza en berze li menm e i ti ay lenzistis. Alor avek kouraz Natan ti dir li: “Ou menm ou sa zonm!” I bezwen ki David ti dan sok. Apre sa, Natan ti dir David tou sa ki i ti’n fer, setadir tou sa ki Zeova ti’n vwar. Profet Natan ti dir David sa ki Zeova ti’n deside: Pandan plizyer lannen i ti pou annan vyolans ek maler dan fanmir David. Ki mannyer David ti reazir?
Lerwa ti dir: “Mon’n fer pese kont Zeova.” David ti vreman tris e i ti regrete sa ki i ti’n fer. Sirman Natan ti soulaze ler i ti dir David sa mesaz zizman ek konpasyon Zeova: “Zeova i pardonn ou ou pese. Ou pa pou mor.” Par kont, David ti soufer en kantite akoz konsekans son pese avek Bat-Seba. Sa garson ki zot ti gannyen ti mor. Pandan plizyer lannen, vyolans, enfidelite e menm traizon ti afekte son fanmir.
Me malgre tousala, David ti reste fidel. I ti ganny enspire pour ekri bann zoli psonm tousan konsernan son repantans ek pardon Bondye. (Psonm 32 ek 51) Lerwa ti reganny laprouvasyon Zeova konman en dimoun fidel e i ti apresye konsey Natan ziska son lanmor. David ti mor konman en serviter fidel Zeova. (1 Rwa. 9:4) Sirman i bezwen ki Natan ti vreman kontan ki i ti’n demontre kouraz pour konsey sa lerwa ki ti’n fer bann pese grav.
Lir sa resi dan Labib:
Pour diskit lo la:
Ki mannyer Natan ti demontre kouraz?
Al pli o profon
1. Natan ti en ekriven Labib me nou pa konn nanryen konsernan son bann zanset oubyen lavi personnel. Ki nou kapab aprann lo li atraver sa? (w12-E 15/2 25 ¶2-3)
2. Ouriya ti en Itit. Akoz i ti dan larme David? (w24.04 31)
3. Natan ti profetize ki i ti pou annan maler dan fanmir David. Ki mannyer sa profesi ti ganny akonplir? (it-E “David” ¶29)
4. Ki mannyer Natan ti demontre kouraz pandan bann dernyen lannen ki David ti lerwa? (w12-E 15/2 25 ¶1) A
Portre A
Reflesir lo sa bann leson
Ki legzanp Natan i ansenny nou lo ki mannyer pour ed en zanmi ki fer en pese grav?
Ki mannyer nou kapab imit lafason ki Natan ti apros David, ler nou anvi tous leker en dimoun? B
Portre B
Dan ki lezot fason nou kapab imit kouraz Natan?
Reflesir lo Zeova ek son plan
Ki sa resi i ansenny mwan lo Zeova?
Ki mannyer sa resi i relye avek plan Zeova?
Ki mon ti pou kontan demann Natan ler i resisite?
Aprann plis
Ki mannyer sa ki David ti fer ti fer ditor son prop lekor, son bann zanmi, fanmir ek Bondye Zeova?
Mazinen ki mannyer lanmour i ete—Pa rod son prop lentere (1:14)
Aprann kwa ki ti fer konsey Natan annan bann bon rezilta.
“Respond Humbly to Correction” (Bann seri “Bible Study Activities” lo Enternet)