27 MEFIBOSET
I pa ti perdi son lazwa akoz problenm
MEFIBOSET ti pti zanfan en lerwa pwisan e i ti garson en zonm fidel ki ti annan kouraz. Me ler Mefiboset ti annan senk an, son lavi ti sanz en sel kou akoz bann maler ki ti arive. Son granpapa Sail ti ganny blese dan lager e apre i ti touy son lekor. Son papa, Zonatan, ti ganny touye dan sa menm lager. Ler sa madanm ki ti okip li ti tann sa nouvel, i ti pran li e konmans taye. Sa pti garson ti tonbe e son lipye ti ganny en bon dimal. Sa ti fer li andikape pour lavi.
I paret ki Mefiboset pa ti perdi son lazwa akoz sa bann maler. En Izraelit ki ti apel Makir ti donn li en landrwa reste. Avek letan, Lerwa David ti rapel ki i ti’n promet son bon zanmi Zonatan ki i ti pou pran swen avek son fanmir. (1 Sam. 20:14-17) Alor lerwa ti demann Mefiboset pour vin kot li.
Mefiboset ti per akoz i ti trouv fanmir avek Lerwa Sail. Eski David ti’n deside pour touy li? Kantmenm sa, i ti obeir e i ti al kot lerwa. David ti koz byen avek li. I ti redonn li propriyete Sail e i ti dir li: “Ou pou toultan manz lo mon latab.” Mefiboset ti telman rekonesan ki i ti demann lerwa akoz ki i ti enterese avek en dimoun ki pa ti enportan parey li. I ti menm konpar son lekor avek en lisyen ki’n mor!
Mefiboset ti paralize e i ti perdi son paran depi pti. Pli tar i ti ganny trai e i ti fer fas avek lenzistis
Me pli tar, en lot problenm ti arive. Garson David, Absalonm, ti rebele e lerwa ti bezwen sove e kit Zerizalenm. Ziba, en serviter Mefiboset ti al ed David me i ti kit son met deryer. Mefiboset pa ti kapab swiv me pourtan i ti rod en fason pour demontre son fidelite ek sagrinasyon. I ti aret okip son labarb ek son moustas parey en dimoun ti pou fer ler i dan dey. Avek letan David ti ganny laviktwar lo Absalonm e i ti retourn Zerizalenm anpe. Par kont, David ti dezapwente avek Mefiboset. Akoz?
Ziba ti’n koz manti lo son met. Ler i ti pe ed David, Ziba ti’n dir lerwa ki Mefiboset ti en tret, ki ti’n reste Zerizalenm akoz i ti anvi vin lerwa li menm. Zis mazinen ki mannyer David ti santi. Pa zis son garson me Aitofel son bon zanmi ek konseye ki ti annan konfyans ladan ti’n fek trai li. Alor petet sanmenm i pa ti vwar li drol ki Mefiboset osi ti’n trai li. Alor i ti donn lord ki leritaz Mefiboset, setadir propriyete Lerwa Sail, i ganny donnen avek Ziba.
Ler Mefiboset ti tann sa ki Ziba ti’n fer, i ti al vwar sa lerwa ki ti’n ganny ofanse avek lespwar pour dir li sa ki ti’n vreman arive. David ti demann Mefiboset akoz i pa ti’n kit Zerizalenm ansanm avek li. Mefiboset ti eksplik lerwa ki i pa ti’n kapab ale akoz son “serviter [ti] paralize” e i ti montre ki Ziba ti’n trik li. Petet David ti remarke ki Mefiboset ti dan dey akoz i pa ti’n okip son moustas ek labarb. Eski sa pa ti laprev ki Mefiboset ti sagren akoz lerwa ti’n ale, olye fer konplo kont li? An tou leka David ti ankoler. I ti demann Mefiboset akoz i ti ankor pe koze. Me apre i ti sanz son desizyon ki i ti’n fer pli boner. I ti dir ki Mefiboset ek Ziba i devret partaz later Sail.
Partaz son leritaz avek sa serviter ki ti’n trai li e koz manti lo li avek lerwa? Mefiboset ti annan drwa vreman ankoler. Ler en dimoun i fer fas avek lenzistis i fasil pour li ankoler e gard rankin. (Det. 19:18, 19) I demann kouraz pour pa ankoler e dekouraze akoz fot lezot me pour plito konsantre lo bann keksoz pli enportan parey fer lape. Ki Mefiboset ti pou swazir pour fer?
I ti reponn David dan en fason vreman dous, i ti dir: “Les li pran tou keksoz, la ki mon senyer lerwa in retourn kot son lakaz anpe.” Sa zonm ki ti annan limilite ti vreman enterese avek sa lerwa ki ti reprezant drwa Zeova pour dirize. I pa ti les bann mansonz ki ti’n ganny dir lo li oubyen lefet ki son propriyete ti’n ganny pran avek li, fer li gard rankin oubyen anpes li servi Zeova avek lazwa ek lape. Menm si i kapab vre ki Mefiboset pa ti’n zanmen servi en lepe pour lager me i ti demontre bokou plis kouraz ki bokou dimoun ki ti’n deza servi en lepe pour lager!
Lir sa resi dan Labib:
Pour diskit lo la:
Ki mannyer Mefiboset ti demontre kouraz?
Al pli o profon
1. Avan Mefiboset ti ganny anmennen devan David, i ti pe reste “kot Makir.” Kwa ankor ki montre ki Makir ti en dimoun fidel e ki i ti demontre lospitalite? (2 Sam. 9:3, 4; it-E “Machir” No. 2)
2. Akoz Mefiboset ti konpar son lekor avek “en lisyen mor”? (2 Sam. 9:8; it-E “Dog” ¶5) A
PhotoStock-Israel/Photodisc via Getty Images
Portre A: Lisyen ti ganny konsidere konman en zannimo enpir dan letan Izrael
3. Akoz i ti pou drol pour Mefiboset anvi vin lerwa? Ki nou konnen lo Mefiboset ki montre ki i pa ti pou zanmen anvi vin lerwa dan plas David? (w02 1/3 10 ¶11, not anba lo paz) B
Portre B: Ki Zonatan ti’n kapab ansenny son garson konsernan sa lerwa ki Zeova ti’n swazir?
4. Ki mannyer Zeova ti beni Mefiboset apre tou sa ki ti’n ariv li dan sa resi? (it-E “Mephibosheth” No. 2 ¶3)
Reflesir lo sa bann leson
En kantite dimoun i soufer avek depresyon oubyen lezot problenm ki zot bann frer ek ser pa kapab vreman konpran. Ki leson rekonfortan ki zot kapab aprann avek legzanp Mefiboset?
Apre ki i ti’n ekout zis en kote zistwar, David ti donn later Mefiboset en lot dimoun. Akoz i danzere pour azir vitman san rod tou lenformasyon? C
Portre C
Ki mannyer ou kapab imit kouraz Mefiboset dan ou lavi?
Reflesir lo Zeova ek son plan
Ki sa resi i ansenny mwan lo Zeova?
Ki mannyer sa resi i relye avek plan Zeova?
Ki mon ti pou kontan demann Mefiboset ler i resisite?
Aprann plis
Reflesir lo ki mannyer nou kapab imit legzanp Mefiboset ler nou ganny trete dan en fason enzis.
Si en zanfan i santi ki lezot pa kontan li, ki mannyer paran i kapab servi sa resi Mefiboset pour ed li?