25 DAVID
Avek kouraz David ti ekout son konsyans
DAVID ti bezwen viv dan kasyet! Avan sa, Sail ti kontan e i ti annan konfyans dan David. David ti sa enn ki ti anmenn zarm Sail, i ti vin en zeneral dan son larme me la David ti bezwen viv an tayan pour sov son lavi. Bondye ti’n promet pour fer David vin lerwa me la i ti bezwen kasyet dan bann landrwa dezerte pour ki li ek 600 zonm i reste vivan.
Sail ti vin en move lerwa. I ti les son zalouzi pour David fer li fer bann move keksoz, menm esey touy David plizyer fwa. En fwa, ler David ti ganny loportinite pour touy Sail, i pa ti fer li. Me kantmenm sa, Sail ti kontinyen rod li pour touy li. Bann dimoun dan lavil Zif ti trai David. Pour en dezyenm fwa, zot ti dir Sail kote i ti pe kasyet. Alor Sail ek son larme ti vin rod li.
Ki David ti pou fer? Premyerman, i ti anvoy serten son bann zonm pour al verifye kote Sail ti ete. Menm si Sail ti annan apepre 3,000 zonm avek li, David pa ti per. Anfet, i apepre sa menm letan ki i ti ekri: “Gete! Bondye i mon led, Zeova i avek bann ki soutenir mwan.” (Ps. 54:4; Lentrodiksyon) Alor David ti deside pour li al dan kan Sail aswar. I ti demann son bann zonm si i ti annan enn ki ti anvi al avek li.
Abisay ti volonter pour al avek li. Abisay ti neve David e i ti en gerye ki pa ti per e menm parfwa i ti napa konpasyon. David ek Abisay ti antre dan kan Sail dousman dousman e zot ti vwar ki tou dimoun ti pe dormi. Anfet, Zeova ki ti’n fer tou sa bann zonm tonm dan en profon sonmey. Finalman David ek Abisay ti vwar Lerwa Sail! Li osi i ti dan en profon sonmey e i ti napa personn ki ti pe vey li, son lans ti lanmenm la ater o bor son latet.
Ki David ti pou fer? La i ti pou vreman fasil pour touy Sail! Eski alafendefen David ti pou aret viv an tayan akoz Sail e petet menm vin lerwa? Abisay pa ti kapab konpran akoz David ti pou menm ezite. I ti dir dousman dan zorey David: “Ozordi, Bondye in livre ou lennmi dan ou lanmen. Alor silvouple, les mwan klout li ater avek sa lans zis en fwa e mon pa pou bezwen fer li de fwa.”
David ti ankor rapel byen dernyen fwa i ti dan en sityasyon en pe parey. Ler i ti dan dezer Enn-Gedi, Sail ti antre dan sa kavern kot David ti pe kasyet. Personn pa ti vwar David, alor i ti’n kapab fasilman touy son lennmi. Me i pa ti fer li, i ti plito koup en bout lenz Sail. Menm sa, ti vreman fatig konsyans David. I ti dezapwente avek son prop lekor akoz i ti’n mank respe pour sa lerwa ki Zeova ti’n swazir.
Petet sa zour swar, i pa ti fasil pour David anpes Abisay touy lerwa. Abisay osi ti bezwen viv an tayan akoz Sail. Sirman tou bann zonm David ti anvi ki Sail i aret persekit zot. Me kantmenm sa, David ti refize pran revanz. I ti koriz Abisay ki ti anvi touy lerwa e i ti ankouraz li pour annan pasyans. David ti ankouraz Abisay e dir li: “Zeova li menm ki pou met li amor. Si non, i pou bezwen mor en zour parey tou dimoun oubyen i pou ganny touye dan lager.” Apre, i ti osi dir: “Dapre pwennvi Zeova, zanmen mon pou kapab fer ditor sa enn ki Zeova in swazir!”
Ki David ti fer ler i ti anba presyon pour touy en lennmi pwisan?
David ti konnen ki Zeova ti pou pini Sail pour bann move keksoz ki i’n fer, dan sa moman apropriye. Dan sa psonm ki’n ganny mansyonnen pli boner, David ti dir sa lo Zeova: “I pou fer bann move keksoz ki mon lennmi in fer refoul lo zot.” (Ps. 54:5) Alor David ek Abisay ti kit kan Sail e zot ti mont lo en latet montanny ki pa ti tro lwen avek kan Sail. David ti kriy Sail ek son bann solda. I ti reprimann sa bann zonm akoz zot pa ti’n protez zot lerwa e i ti osi reprimann Sail akoz i ti pe gaspiy son letan pe tay deryer li parski David ti dir sa lo son lekor, i zis “en senp pis” e i pa ti pou zanmen fer ditor lerwa. Sail ti vreman onte e i ti dir: “Mon’n azir dan en fason bet e mon’n fer en gro fot.”
Eski Sail ti vreman sanze? David ti konnen ki i ti pou difisil pour Sail sanze. Me i pa ti zanmen regrete ki i ti’n demontre kouraz par ekout son konsyans ki Bondye ti’n donn li. Avek letan, Zeova ti beni son serviter fidel e brav dan en kantite fason ki David pa ti’n menm zanmen mazinen.
Lir sa resi dan Labib:
Pour diskit lo la:
Ki mannyer David ti demontre kouraz ler i ti pe kasyet akoz Sail?
Al pli o profon
1. Menm si Abisay ti en dimoun ki azir vitman e san pitye, ki mannyer avek kouraz i ti defann pep Bondye e siport David? (it-E “Abishai” ¶3-5)
2. Akoz David ti konpar son lekor avek “en perdri lo montanny”? (1 Sam. 26:20; it-E “Partridge” ¶4) A
Ekaterina Kolomeets/stock.adobe.com
Portre A
3. Akoz David ti bezwen annan pasyans? (w17.08 7 ¶14-15)
4. Ki mannyer David ti kontinyen montre ki i modes menm plizyer lannen apre sa resi? (w21.09 10 ¶8) B
Portre B
Reflesir lo sa bann leson
Menm si Sail ti fer en kantite fot, David ti respekte son lotorite. Ki mannyer nou kapab imit David dan lafason ki nou vwar . . .
nou paran? C
Portre C
bann lotorite gouvernman? D
Portre D
bann ansyen dan kongregasyon? E
Portre E
Avek kouraz David ti ekout son konsyans e i ti fer en desizyon ki fer plezir Zeova. Ki serten sityasyon ki nou kapab bezwen kouraz pour ekout nou konsyans?
Ki lezot fason ki ou kapab imit kouraz ki David ti demontre dan sa resi?
Reflesir lo Zeova ek son plan
Ki sa resi i ansenny mwan lo Zeova?
Ki mannyer sa resi i relye avek plan Zeova?
Ler David i resisite, ki mon ti pou kontan demann li konsernan sa ki’n arive dan sa resi?
Aprann plis
Gete ki mannyer bann levennman dan sa resi i reel.
Ki zanfan i kapab aprann avek Sail ki ti modes e annan limilite o konmansman me finalman i ti vin arogan?