24 ABIGEL
I ti fer fas avek de zonm ankoler
DAN en sans, Abigel ti vwar li dan milye de zonm ankoler. Enn ti son msye Nabal, en dimoun brit, dir e bet. Sa lot ti David, en bon dimoun, en serviter fidel Zeova e sa enn ki ti pou vin lerwa Izrael pli tar. Me Nabal ti’n fer David ankoler e aprezan Abigel ek tou dimoun ki ti dan son lakaz ti dan en gran danze. Abigel ti en zoli madanm e i ti annan lasazes. Me kote i ti pou ganny kouraz pour rezourd sa problenm?
Abigel ti konnen ki i ti pou annan problenm ler en serviter ti’n vin koz avek li. Sa serviter ti dir li ki David ti pe vin kot zot avek 400 zonm arme e zot ti determinen pour zot anmenn maler lo Nabal e lo “son fanmir ek son bann serviter.” Akoz? David ti’n demann Nabal pour donn zot manze. Sa ti paret rezonnab. David ek son bann zonm ti parey en miray proteksyon otour Nabal ki ti en zonm ris, son bann berze ek son kantite troupo. David ti fidelman defann Izrael ek son pep kont bann group voler ki ti vin atak zot, menm si Lerwa Sail ti’n fors li pour sove e i ti pe persekit li san okenn rezon. Aprezan, ler David ti anvoy son bann zonm kot Nabal pour demann li pour donn zot manze, sa zonm ti kriye e ensilte zot. I ti menm dir ki David ti zis en serviter ki ti’n sove!
Sa serviter Nabal ti konnen ki i pa ti pou fer okenn sans pour li al koz avek son met konsernan sa problenm irzan. Sa serviter ti dir fran, “I sitan en bonnaryen ki personn pa kapab koz avek li.” Me i ti asire ki Abigel ti pou ekout li e azir avek lasazes. Me ki Abigel ti pou fer?
I pa ti panik me i ti bezwen azir vitman. I ti prepar en kantite manze pour David ek son bann zonm e i ti fer met tousala lo bann bourik e i ti anvoy bann serviter par devan li avek sa kado. I ti swiv bann serviter par deryer lo son prop bourik. I pa ti dir Nabal nanryen. Petet akoz i ti konnen ki Nabal ti pou esey anpes li fer sa ki byen.
Abigel ti fer fas avek en group gerye ki ti ankoler akoz son msye bet ti’n ofans zot
Ler Abigel ti pe desann lo montanny lo son bourik, i ti zwenn David ek son bann zonm. Abigel ti degaze, desann lo son bourik e i ti al direk kot sa sef ki ti ankoler. I ti tonm azenou devan David lafas anba e sipliy li pour les li koze. Sirman son limilite ti fer David bes son gard.
Abigel ti pran responsabilite pour sa problenm e i ti dir ki David ti annan rezon ankoler avek son msye ki ti en bonnaryen e ki ti’n azir dan en fason bet. Apre i ti dir ki David ti annan en gran lafwa dan Bondye Zeova e ki Zeova pa ti anvi ki i vin koupab pour touy bann dimoun inosan, en keksoz ki i ti pou regrete pli tar. Abigel ti osi dir ki Zeova ti pou fer li vin lerwa e son bann desandans ti pou vin lerwa pour bokou letan e bann lennmi David ti pou ganny defet. I kler ki Abigel ti konnen ki Zeova ti’n swazir David pour vin sa prosen lerwa.
Son bann parol saz e agreab ti kalme lakoler David. David ti dir: “Loue Zeova Bondye Izrael ki’n anvoy ou pour zwenn mwan ozordi.” I ti felisit Abigel pour son bon zizman e avek limilite i ti aksepte son konsey. I ti dir “Gete, mon’n ekout ou.”
Nabal pa ti okouran ki ti pe pase. Sa zour swar i ti fete e “i ti konpletman sou.” Abigel ti esper ziska bomaten ler i ti’n desoule me i ti ankor annan son move lakoler. Apre sa Abigel ti dir li tou sa ki ti’n arive. Eski i ti’n met li pare an ka Nabal ti ankoler e fer li ditor? Si wi, i pa ti neseser. “Leker Nabal ti vin parey leker en zonm mor e i ti alonze, paralize parey en ros.” Apepre dis zour pli tar, “Zeova ti frap Nabal e i ti mor.” Bondye ti pini Nabal akoz i ti’n mal azir anver David, Son serviter ki i ti’n swazir. Zeova ti osi beni Abigel par liber li dan sa move maryaz ki i ti ladan.
Zeova ti beni Abigel plis ankor. Ler David ti tande ki Nabal ti’n mor, i ti demann Abigel pour vin son madanm. Abigel ti aksepte. David ti vin lerwa, premye kou i ti vin lerwa Zida e pli tar lerwa Izrael antye e Abigel ti ganny en garson pour li. En fwa, Abigel ti ganny kidnap par lennmi pep Bondye me pa pour lontan. Son msye ki ti bon e brav ti vin sov li.
Lir sa resi dan Labib:
Pour diskit lo la:
Ki mannyer Abigel ti demontre kouraz?
Al pli o profon
1. Petet akoz Abigel ti marye avek Nabal? (ia 77 ¶6)
2. Dekrir sa letan ler David ti demann Nabal manze ler bann berze ti pe koup lalenn bann mouton. (w97-E 1/7 14 ¶4) A
Portre A: Koup lalenn mouton ti en lokazyon pour fete
Portre A: Koup lalenn mouton ti en lokazyon pour fete
3. Akoz Nabal ti’n devret rekonesan lefet ki bann solda David ti ed li? (ia 77-78 ¶9-10) B
Hanan Isachar/Alamy Stock Photo
Portre B: Bann pti montanny dan zanmirant Karmel
4. Ki Abigel ti pe esey dir ler i ti dir ki “Zeova [ti] pou protez lavi [David] dan son sak lavi”? (1 Sam. 25:29; it-E “Life” ¶45)
Reflesir lo sa bann leson
Ki bann msye i kapab aprann avek David ki ti pare pour ekout Abigel? C
Portre C
Ki bann ser ki’n marye avek bann msye ki pa Temwen i kapab aprann avek Abigel?
Ki mannyer ou kapab imit kouraz Abigel?
Reflesir lo Zeova ek son plan
Ki sa resi i ansenny mwan lo Zeova?
Ki mannyer sa resi i relye avek plan Zeova?
Ki mon ti pou kontan demann Abigel ler i resisite?
Aprann plis
Ki en Kretyen ki’n marye avek en dimoun ki pa ador Zeova i kapab fer pour fer son maryaz pli solid?
Abigel ti ed David pour kontrol son lakoler. Reflesir lo diferan fason ki ou kapab kontrol ou lakoler menm ler en dimoun in ofans oubyen provok ou.
“The Insight of a Man Certainly Slows Down His Anger” (w14-E 1/12 12-13)