23 DAVID
I ti lager avek en zean
DAVID ti get en zonm ki ti pe debout lot kote Vale Ela. Sa zonm ti apel Golyat. Sa zonm ki ti pe anmenn son zarm, tre probab ti grander en zonm ordiner. Alor, menm dan lwen, Golyat ti paret vreman gran. Son grander ti apepre 2.9 met e son lafors ti al byen avek son grander. Laplipar dimoun ti bezwen santi zot ptipti e fay ler zot ti vwar li. Me ler David ti get Golyat, i pa ti vwar sa ki lezot ti vwar e sa ti donn li kouraz.
Profet Samyel ti’n vid delwil lo latet David e sa profet ti’n dir ki David ti pou vin sa prosen lerwa Izrael. Apre sa, lespri sen Zeova ti konmans fer David fer bann keksoz ekstraordiner. Dimoun ti konn David konman “en gerye kouraze e for” menm si i ti ankor tro zenn pour li zwenn larme. I ti’n vin lo fron batay akoz son papa, Zese, ti’n demann li pour vin gete ki mannyer son bann frer ki ti dan larme Izrael ti ete? I posib ki David ti ankor en adolesan.
Ler David ti ariv kot Vale Ela, i ti remarke ki sa de larme, bann Izraelit ek bann Filisten, pa ti ankor konmans lager depi plizyer semenn. Zot ti an fas avek kanmarad, me sa vale ti separ zot. Apre sa, Golyat sa Filisten ti sorti e i ti konmans ensilte bann Izraelit byen for. David pa ti oule krwar sa ki i ti pe tande. Anfet sa gerye payen ti pe ensilt Bondye Zeova! Alor, David ti konmans demann bann solda kestyon konsernan Golyat e ki mannyer Lerwa Sail ti pou rekonpans sa dimoun ki ti pou defet sa Filisten ki ti annan lodas pour provok larme Zeova. Eliab gran frer David ti reprimann li e kestyonn son motivasyon. Me David ti kontinyen ankouraz bann solda.
Sa ki David ti dir ti tonm dan zorey Lerwa Sail e i ti fer David vin kot li. David ti esey ankouraz lerwa par dir: “Personn pa devret dekouraze akoz [Golyat].” Alor, i ti volonter pour “al lager avek sa Filisten” li menm. Premye kou, Sail pa ti oule akoz i ti asire ki David ti pou ganny touye. Me David ti rakont lerwa ki mannyer Zeova ti’n deza ed li pour fer bann keksoz remarkab, parey touy en lyon ek en lours ki ti’n atak troupo son papa. Finalman Sail ti dakor e i ti fer David met lekipman batay lerwa lo li e pran son lepe. David pa ti abitye avek sa kalite lekipman batay, alor i ti tir tousala lo li e i ti swazir son prop zouti lager, setadir son baton berze ek son fles.
Ler David ti ariv dan sa vale, i ti aret kot en pti larivyer e i ti anmas senk ros listre. Apre i ti al zwenn sa zean lo fron batay. Dek ki Golyat ti vwar sa zenn, son lavwa ti rezonnen anmezir i ti boufonn David akoz i ti’n vin lager avek li avek “baton,” setadir son baton berze. Petet Golyat pa ti vwar ki David ti annan en fles dan son lanmen, en zouti pwisan ki i ti kapab servi kont li. Sa gerye Filisten “ti modi David o non son bann bondye” e i ti promet pour fer bann zwazo ek zannimo sovaz manz son lekor.
Konman en zenn, David ti fer fas avek en gran lennmi pour defann non Zeova
David ti dir li “Ou pe vin kont mwan avek en lepe ek de lans, me mwan, mon pe vin kont ou o non Zeova Sef larme, Bondye larme Izrael ki ou’n provoke.” David ti alor montre lekel ki ti pe donn li kouraz. David pa ti konpar son lekor avek Golyat me i ti konpar Golyat avek Bondye Zeova! Alor David ti asire ki i ti pou kapab touy sa zean e bann Filisten ti pou ganny en gro defet.
David ti tay kot son lennmi. Sa zenn garson ti anvoy son lanmen dan son sak, swazir en ros, met li dan son fles e konmans balanse. Si prezan ki Golyat ti vwar sa fles, i ti’n fini tro tar. David ti balans sa ros ki ti al direk lo target e i ti anfonse dan son fron. Sa zean ti tonm ater “vant anba.” David ti tay kot Golyat, pran son lepe e koup son latet lanmenm kot i ti’n tonbe. La aprezan larme Izrael ti ganny kouraz. Bann zonm ti konmans kriye e atak bann Filisten. Pep Bondye ti ganny en gran laviktwar sa zour. Kouraz ki David ti demontre ti ankouraz zot, zis parey i’n ankouraz bann ki annan lafwa depi sa.
Lir sa resi dan Labib:
Pour diskit lo la:
Ki mannyer David ti demontre kouraz ler i ti ankor zenn?
Al pli o profon
1. Lekel serten zanset David ki ti demontre kouraz? (Mat. 1:5, 6; Lik 3:31-38; w12-E 1/10 24 ¶3)
2. Kwa ki montre ki sa resi i vre? (wp16.5 13) A
Courtesy of Israel Antiquities Authority
Portre A: En bout ros date nevyenm syek avan Kris ki pe refer avek “Fanmir David”
3. Dekrir lavi David konman en berze ler i ti ankor zenn. (w11-E 1/9 27 ¶1–28 ¶1) B
Todd Bolen/BiblePlaces.com
Portre B
4. Ki mannyer nou konnen ki dimoun ti souvan souzestim David? (w21.03 3 ¶6; it-E “Eliab” No. 4 ¶1)
Reflesir lo sa bann leson
Ki mannyer legzanp David i kapab ed ou lalit avek . . .
keksoz ki fer ou per? C
Portre C
move dezir?
Ki lefe ou kouraz i kapab annan lo lezot? (1 Sam. 17:50-53)
Ki lezot fason ou kapab imit kouraz David dan sa reisi?
Reflesir lo Zeova ek son plan
Ki sa resi i ansenny mwan lo Zeova?
Ki mannyer sa resi i relye avek plan Zeova?
Ler David i resisite, ki mon ti pou kontan demann li konsernan sa ki ti arive dan sa resi?
Aprann plis
Dan sa sanson pour zanfan, aprann kwa ki ti fer David annan sa kantite kouraz.
David ti ganny respekte. Pareyman, ki mannyer bann frer i kapab ganny e gard respe lezot?
“Ki bann zenn frer i kapab fer pour ganny konfyans lezot?” (w21.03 2-5 ¶1-11)