17 ZAEL
“Sa madanm ki’n pli ganny beni”
SISERA sef sa larme pwisan ti sove e les son bann solda mor tousel Zezreel. Sirman, i ti difisil pour li krwar ki son larme pwisan avek son 900 saret lager ti’n ganny defet avek larme Izrael ki ti napa bokou zarm e ki ti apye. Aprezan Sisera ti pe zis mazinen kote i ti pou kapab kasyet. I ti tay kot latant Eber en Kenit.
An zeneral, bann Kenit ti bann alye Izrael. Zot ti annan en bon relasyon avek pep Izrael depi lepok Moiz. Madanm Moiz ti sorti dan en fanmir Kenit. Aprezan sa bann dimoun nomad ti reste Izrael. Me Eber ti diferan avek lezot Kenit. Olye vin en alye avek Izrael, Eber ti vin en alye avek Zabin, lerwa Kananeen. Alor, konman zeneral pour Lerwa Zabin, Sisera ti krwar ki i ti pou kapab pran refiz dan bann latant Eber. Me i paret ki Sisera pa ti mazinen ki Zael, madanm Eber, ti annan son prop nide.
Zael ti kot son latant me son msye ti’n sorti. Ler i ti vwar Sisera pe vin kot li i ti bezwen mazin deswit ki pour fer. San dout, i ti konnen lekel Sisera e ki mannyer i ti danzere. Petet i pa ti konnen ki profet Zeova, Debora, ti’n dir ki Sisera ti pou ganny touye par en madanm, pa par en zonm. Me i paret ki Zael ti konn sa ki Zeova ti anvi i fer. Akoz nou kapab dir sa?
Pli tar, Debora ti ganny enspire pour konpoz en sanson lo laviktwar Barak lo Sisera. I ti dir: “Zael i sa madanm ki’n pli ganny beni. Li menm madanm Eber en Kenit. Parmi bann madanm ki reste dan bann latant, i sa enn ki’n pli ganny beni.” Serten dimoun ki kritik Labib i dir ki Zael ti en move madanm ki ti kriyel e anbisye. I ti plito en gerye brav dan bann lager Zeova. Zis parey Raab, i ti swazir pour pran kote avek Zeova e al kont son bann lennmi. I ti konnen ki Sisera ti en lennmi Zeova e tou ti depan lo li pour fer sa ki Zeova ti anvi i fer. Me ki mannyer i ti pou fer sa?
Byensir, Zael ti konn tre byen ki i pa ti pou kapab lager fas a fas avek Sisera. Sisera ti en gerye eksperyanse e vreman for. Alor Zael ti envit Sisera dan son latant pour bwar en keksoz e repoze. I ti kouver li avek en tapi. Ler i ti demann li delo, i ti donn li dile. Sisera ti donn li lord pour debout devan larantre latant e pour koz manti avek tou dimoun ki demande si i annan en zonm anndan. Apre sa, i ti tonm dormi.
Bondye ti swazir en madanm pour touy en gerye kriyel
Zael ti konnen ki la ti sa bon moman pour azir. I ti pran bann zouti ki tre probab i ti abitye servi. En gro marto anbwa ek en pike latant, posibleman tou le de zouti ti ganny fer avek dibwa. Dousman dousmanm, Zael ti al kot sa gerye ki ti pe dormi. I ti bes anba, o bor son latet, pare pour touy Sisera. Si i ti fer en senp pti fot, sirman Zael ti pou ganny touye dan en fason terib. Me Zael pa ti fer en fot. En sel kou, i ti klout sa pike latant dan son latanp e Sisera ti mor lanmenm la kot son lipye!
Pli tar, dan pe tay deryer Sisera, Ziz Barak ti ariv kot Zael. Zael ti zwenn li. I ti dir li, “Vini, mon pou montre ou sa zonm ki ou pe rode.” Barak ti antre dan latant e i ti vwar ki sa ki Debora ti’n profetize ti’n ganny akonplir: “Zeova pou livre Sisera dan lanmen en madanm.”
Dan zot sanson laviktwar, Barak ek Debora ti remersye Zael e onor li. Apre sa, Labib pa koz lo Zael ankor. Kantmenm sa, ziska ozordi, plis ki 32 syek pli tar, nou ankor pe aprann avek son legzanp. Ozordi, bann serviter Bondye pa pe lager literalman avek zouti me nou dan en lager spirityel. Ozordi plis ki zanmen oparavan nou bezwen annan kouraz parey Zael.
Lir sa resi dan Labib:
Pour diskit lo la:
Ki mannyer Zael ti demontre kouraz?
Al pli o profon
1. Ki mannyer sa lager ki Sisera ti fer i relye avek lager Armagedon? (w19.09 8-9 ¶3-6)
2. Eber msye Zael ti en alye avek bann Kananeen ki ti lennmi Izrael. Me ki relasyon Eber ti annan avek bann Izraelit? (it-E “Heber” No. 2)
3. Ki mannyer laviktwar Izrael lo Sisera ek Zabin ti ranforsi lafwa pep Bondye plizyer lannen pli tar? (w08 1/10 18-20 ¶12-15)
4. Kwa ki remarkab avek lafason ki Debora ti onor Zael? (w15 1/9 15 ¶2) A
Portre A
Portre A
Reflesir lo sa bann leson
Si msye en ser pa ador Zeova, kan ki sa ser i kapab bezwen annan kouraz parey Zael?
Zael pa ti en profet parey Debora, ni en solda parey Barak. Kantmenm sa, i ti fer sa ki i ti kapab fer. Ler nou annan serten limit, ki mannyer nou kapab imit legzanp Zael? B
Portre B
Ki lezot fason nou kapab imit legzanp kouraz Zael?
Reflesir lo Zeova ek son plan
Ki sa resi i ansenny mwan lo Zeova?
Ki mannyer sa resi i relye avek plan Zeova?
Ki mon ti pou kontan demann Zael ler i resisite?
Aprann plis
Dan sa video, gete ki mannyer legzanp Zael i motiv en zenn ser pour donn en temwannyaz.
Pa swiv legzanp bann kapon, me bann ki annan kouraz!—Pa bann zabitan Meroz, me Zael (1:40)
Zael i zis enn parmi sa kantite madanm ki nou kapab aprann bann leson enportan avek zot legzanp. Lir lo serten sa bann madanm.
“Bann madanm dan Labib—Ki nou kapab aprann avek zot?” (ijwbq lartik 161)