16 BARAK EK DEBORA
“Sirman, mon pou al avek ou”
I TI en letan vreman difisil e danzere Izrael. Lepep ti’n rebel kont Zeova. Zis parey Zeova ti’n averti zot, i ti les zot bann lennmi domin lo zot. Lerwa Kananeen Zabin ki ti o pouvwar. Son zeneral ti en zonm sovaz e i ti apel Sisera. I ti diriz en gran larme avek 900 saret lager ki ti ekipe avek zarm an fer.
Pandan 20 an, larme Sisera ti’n fer en kantite dega Izrael. I paret ki ler zot ti atak en lavil oubyen vilaz, zot ti annan labitid pran bann zenn fiy konman prizonnyen e vyol zot. Akoz sa bann keksoz terib ki zot ti fer, i ti napa personn lo semen ni dan bann vilaz. Zis detrwa zonm Izraelit ki ti annan zouti pour defann zot lekor.
Sa letan, en madanm ki ti annan kouraz ki ti apel Debora ti pe servi konman en profet pour Zeova. I ti osi ziz bann ka difisil ki lepep ti anmenn kot li. Zeova ti servi li pour apwent en ziz e sover pour son pep. Sa ti en zonm ki ti apel Barak. Debora ti anvoy al sers li pour ki i donn li lenstriksyon Zeova. Zis mazinen ki mannyer Barak ti sirprann ler Debora ti donn li bann lenstriksyon Zeova. I ti demann li pour rasanble en larme 10,000 zonm e anmenn zot lo Montanny Tabor. Zeova ti pou fer li ganny laviktwar lo Sisera ek son larme!
Eski Barak ti en dimoun orgeye e i ti ofanse akoz Zeova ti’n servi en madanm pour donn li lenstriksyon? Non. O kontrer i ti dir ki i ti pou al lo sa misyon si Debora i akonpanny li. Barak pa ti dir sa akoz i ti napa lafwa. Pli tar, zapot Pol ti enkli Barak parmi bann zonm ek madanm ki ti annan en gran lafwa. (Ebr. 11:1, 2, 32) Barak ti pe demontre lafwa ler i ti demann Debora pour al avek li ek son bann zonm. I ti konnen ki Zeova ti pe servi Debora e i ti anvi kontinyen ganny gidans Zeova. Avek kouraz Debora ti dakor pour al avek zot. I ti dir: “Sirman, mon pou al avek ou.” Debora ti osi dir ki menm si i ti pou ganny laviktwar dan sa lager, pa en zonm, ni menm Barak ki ti pou touy Sisera. Bondye ti pou donn sa travay en madanm.
Deswit, Barak ti fer sa ki Zeova ti’n demann li pour fer. I ti rasanble 10,000 zonm kouraze e menm si zot ti napa bokou zarm, Barak ti prepar zot pour lager. I ti rasanble son larme anler lo Montanny Tabor. Sa montanny enpresyonan ki lo plato Zezreel i mezir apepre 562 met oter e i parey en bol ki’n vir latet anba. La anler lo sa montanny, Debora, Barak ek son bann zonm ti kapab vwar depi byen lwen anmezir ki Sisera, son larme ek son bann saret ti vin ver zot.
Ki Barak ti pou fer? Si i ti plàn lager parey en gerye, i ti pou bezwen espere ziska ler Sisera i ariv o bor Montanny Tabor. Ler zot ti pou konmans mont montanny, bann saret ti pou al pli dousman e alor, sa ti pou fer li pli fasil pour Barak ek son larme atak zot. Me Barak ti konnen ki sa lager pa ti pour li me i ti pour Zeova. Alor, i ti ekout Debora. Atraver Debora, Zeova ti demann Barak pour leve e atake! Avek kouraz, Barak ek son larme ti desann lo montanny ziska anba lo plato kot zot ti zwenn sa bann saret ki ti fer per!
En ziz ek en madanm ki ti profet ti bezwen fer fas avek en zeneral kriyel ek son bann saret lager
Dapre pwennvi en militer, zot pa ti pou ganny laviktwar. Me Zeova ti vwar zot kouraz e i ti rekonpans zot pour sa. I ti fer sa larme Kananeen panik e i ti fer en gro lapli tonbe. En sel kou, Vale Zezreel ti ranpli avek labou e sa bann saret ki ti fer per ti pri dan labou. Aprezan bann solda Sisera ti bezwen lager fas a fas avek bann gerye Izraelit akoz zot ti nepli annan sa lavantaz pour lager dan zot saret. Napa ni en solda Sisera ki ti reste vivan. Me ki ti arive avek Sisera?
Avek bokou difikilte dan sa vale labou, Sisera ti reisi sove apye e mont pli o. Petet i ti krwar ki i ti pou reisi sove e san pitye kit son bann solda deryer pour mor. Me Barak ti tay deryer li e Zeova ti pe gete. I ti annan en keksoz antet pour Sisera.
Lir sa resi dan Labib:
Pour diskit lo la:
Ki mannyer Barak ek Debora ti demontre kouraz?
Al pli o profon
1. Ki mannyer lavi ti ete pour bann Izraelit anba pouvwar Sisera? (w15 1/9 12-13 ¶1)
2. Akoz Debora pa ganny konsidere parmi sa 12 ziz ki ti servi Izrael avan Samyel ti vin en profet? (w86-E 1/6 31 ¶6-8)
3. Dan ki sans Debora ti “en manman pour Izrael”? (Ziz 4:4, 5; 5:7; w15 1/9 13 ¶1) A
Portre A
Portre A
4. Ki Debora ek Barak ti pe sey dir ler zot ti sante ki “bann zetwal ti lager” avek Sisera? (Ziz 5:20; w05 1/3 9 ¶5)
Reflesir lo sa bann leson
Ki mannyer en frer i kapab imit lafason ki Barak ti aksepte led en madanm fidel? B
Portre B
Akoz Debora ti bezwen kouraz pour akonpanny Barak? Kan ki nou bezwen demontre sa menm kouraz?
Ki lezot fason ki ou kapab imit kouraz Barak ek Debora?
Reflesir lo Zeova ek son plan
Ki sa resi i ansenny mwan lo Zeova?
Ki mannyer sa resi i relye avek plan Zeova?
Ki mon ti pou kontan demann Barak ek Debora ler zot resisite?
Aprann plis
Gete ki mannyer sa resi i reasir nou ki sa ki nou fer pour Zeova i enportan.
Ki legzanp Barak ek Debora i ansenny nou lo annan konfyans, modes e obeir?
“Through Faith, Barak Routed a Mighty Army” (w03-E 15/11 28-31)