18 GIDEONN
I ti pridan e kouraze
EN DIMOUN ki annan kouraz i bezwen osi pridan. Si en dimoun pa pridan, i kapab fer bann keksoz danzere. Gideonn ti pridan e kouraze. I ti viv pandan sa letan kot bann Izraelit ti’n ankor enn fwa, abandonn Zeova. Alor Zeova ti les bann Madyannit antre dan zot pei. Zot ti fer son pep soufer e anpes zot rekolte zot bann plantasyon. Me Gideonn pa ti per, i ti rekolte son dible pour pran swen avek lezot. Selman i ti pridan ler i ti fer sa. Ler i ti bat dible, aparaman i ti fer sa dan en gran preswar diven ki ti’n ganny fer dan ros, ki ti annan en kouvertir pour ki bann Madyannit pa vwar li.
Bann Izraelit ti repantir e rod led Zeova. Alor Zeova ti anvoy en profet pour fer zot rapel akoz i ti’n abandonn zot. Apre sa, i ti anvoy en lanz pour demann Gideonn pour sov Son pep. Gideonn ti demann en siny. Alor, sa lanz ti fer en mirak kot i ti fer dife desann e bril sa sakrifis ki Gideonn ti’n prepare. Apre sa, sa lanz ti disparet. Sa zour swar, Zeova ti koz avek Gideonn e demann li pour detrir lotel Baal ek en poto sakre e konstri en lotel pour Zeova e ofer Li en sakrifis. Gideonn ti obeir, me i ti per son papa ek bann zonm dan lavil, alor i ti deside pour fer sa aswar ler i ti asire ki personn pa ti pou vwar li.
Apre ki Gideonn ti’n fer sa avek kouraz, bann Madyannit ti rasanble en gran larme avek bann Amalekit ek bann dimoun sorti dan Les pour vin atak bann Izraelit. Zot ti telman bokou ki zot ti ranpli sa Vale Zezreel parey en karo sotrel. Lespri sen Zeova ti vin lo Gideonn e i ti anvoy bann mesaze kot plizyer tribi Izrael pour rasanble bann zonm e vin lager. Me ankor enn fwa, Gideonn ti pridan. I ti demann Zeova pour fer de mirak ki ti pou reasir li ki i vreman avek li. Avek pasyans Zeova ti fer sa ki Gideonn ti’n demann li. Sa zour swar, Gideonn ti met en lapo mouton kot zot bat dible e Zeova ti fer sa lapo mouton mouye pandan lannwit me partou ater, i ti sek. Son lannwit answit, partou ater i ti mouye me sa lapo mouton ti reste sek.
Gideonn ek son bann zonm ti vreman en pti gin konpare avek zot lennmi ki ti vreman en kantite. Kantmenm sa, Zeova ti demann Gideonn pour fer son larme vin pli pti ankor
Sa de mirak ti fer Gideonn annan plis lafors e i ti diriz son larme 32,000 zonm pour al lager avek zot lennmi ki ti apepre 135,000 zonm. Ler bann Izraelit ti pe kanpe kot Sours delo Arod, Zeova ti dir Gideonn ki son larme ti tro gran! Gideonn ti fer tou bann ki ti per retourn kot zot. Zis 10,000 zonm ki ti reste. Me Zeova ti dir ki son larme ti ankor tro gran. I ti demann Gideonn pour get son bann solda ler zot pe bwar delo dan larivyer. Bann ki ti azenou e bes anba pour bwar delo ti bezwen retourn kot zot. Me lezot ti pridan ler zot ti pe bwar delo. Zot ti asiz anmanningning e pran delo dan zot lanmen pour bwar anmezir ki zot get toultour zot. Sa bann solda ki ti vizilan ti ganny swazir pour al lager. Aprezan Gideonn ti annan zis 300 solda!
Kantmenm sa, Gideonn ti met li pare pour atake. Zeova ti reasir li ankor enn fwa. I ti demann Gideonn pour al dan kan lennmi aswar. Gideonn ti fer sanmenm. I ti tann en solda pe rakont en rev ki ti montre ki Izrael ti pou ganny laviktwar dan sa lager. Avek sa konfidans ki Zeova ti donn li, Gideonn ti retourn kot son bann solda. I ti demann zot pour get li byen e swiv son legzanp ler zot atak lennmi. Aswar dan fernwanr zot ti antour kan lennmi. Ler Gideonn ti donn sinyal, zot ti servi bann gran resipyan, flanbo ek tronpet pour ki en sel kou i annan tapaz ek lalimyer. Zot ti kriye: “Lepe Zeova e lepe Gideonn!” Sa plan ti fer bann lennmi krwar ki zot ti’n fini ganny antoure e pe ganny atake. Alor zot ti panik e konfize! Zeova ti fer zot konmans lager avek kanmarad. Zis 15,000 ki ti sirviv e sove.
Gideonn ti tay deryer zot. Finalman, i ti defet lennmi e touy zot bann sef. I ti osi pini sa bann ki ti enfidel e ki ti’n refize ed Gideonn dan sa lager ki Bondye ti’n demann li pour fer. Apre sa, lepep ti esey fer Gideonn vin zot lerwa. Me avek limilite, Gideonn ti refize e dir: “Zeova ki pou diriz zot.” Zeova ti rekonpans sa zonm kouraze e pridan. Pandan sa letan ki Gideonn ti ziz Izrael, i ti annan lape Izrael e Gideonn ti viv lontan. Zapot Pol i mansyonn Gideonn parmi bann zonm ek madanm ki ti annan bokou lafwa.—Ebr. 11:32.
Lir sa resi dan Labib:
Pour diskit lo la:
Ki mannyer Gideonn ti demontre kouraz?
Al pli o profon
1. Akoz sa “dipen ron ki’n ganny fer avek lorz” dan rev sa solda ti reprezant byen larme Gideonn? (Ziz 7:13; it-E “Barley” ¶7)
2. Akoz tapaz sa 300 tronpet ti konfiz e fer bann Madyannit per? (it-E “Horn” ¶3) A
Portre A: Bann korn mal mouton ti ganny servi konman en tronpet pour donn sinyal
3. Ki Gideonn ek son larme ti fer pour defet bann Madyannit? (w04 1/11 16 ¶9-10) B
Portre B: Gideonn ti tay deryer bann Madyannit pour apepre 80 kilomet ziska Zogbea (pa konn semen egzakt)
4. Ki detay dan Labib ki montre ki sa resi Labib i egzakt? (w05-E 15/4 32)
Reflesir lo sa bann leson
Gideonn ti diriz pep Zeova dan lager e ganny laviktwar. Me i ti kontinyen demontre limilite e koz byen avek lezot pour gard lape. (Ziz 8:1-3) Ki mannyer bann sef fanmir ek ansyen i kapab imit legzanp Gideonn ler en dimoun i ankoler akoz en keksoz ki zot in fer?
Dan ki sityasyon ki nou bezwen annan kouraz e an menm tan pridan? C
Portre C
Ki mannyer ou kapab imit kouraz Gideonn dan ou lavi?
Reflesir lo Zeova ek son plan
Ki sa resi i ansenny mwan lo Zeova?
Ki mannyer sa resi i relye avek plan Zeova?
Ki mon ti pou kontan demann Gideonn ler i resisite?
Aprann plis
Si ou ganny en responsabilite ki mannyer ou kapab imit Gideonn?
Servi sa illustrated Bible story pour ed ou zanfan annan konfyans dan Zeova.