15 NAOMI EK RIT
Zot ti ed kanmarad ler zot ti dan problenm
NAOMI ti fer fas avek maler enn deryer lot. Ler i ti annan en gran lafanmin Izrael, son msye ti deside ki li ek son fanmir ti pou kit zot lakour Betleenm e al reste Moab. En zour, msye Naomi ti mor e i ti kit li tousel avek son de garson dan en pei etranze. Pli tar, bann garson Naomi ti marye avek bann fiy Moabit ki pa ti ador Zeova. Apepre di-z- an pli tar, maler ti arive: Tou le de garson Naomi ti mor e ni enn ti napa zanfan! Naomi pa ti perdi zis son msye me osi son de garson ek lespwar pour ganny bann pti zanfan.
Naomi ti santi ki i ti nepli annan rezon pour li reste Moab, alor i ti deside pour li retourn Betleenm, en vwayaz ki ti pou pran apepre en semenn. Rit ek Orpa, son de belfiy ti akonpanny li. Me sa ti fatig Naomi akoz i pa ti anvi fer zot kit zot pei ek fanmir e petet fer zot osi perdi sa lespwar pour remarye e ganny zanfan. Naomi pa ti mazin zis son prop lekor, alor i ti ankouraz Rit ek Orpa pour retourn kot zot manman. Avek kouraz, Naomi ti pare pour kontiny sa vwayaz li tousel. Orpa ti plere e apre i ti ale. Rit osi ti plere me i ti reste avek Naomi.
Rit ti dir Naomi: “Silvouple, pa demann mwan pour kit ou . . . Parski kot ou ale, mon pou ale e kot ou pas lannwit, mon pou pas lannwit. Ou pep pou vin mon pep e ou Bondye mon Bondye. Kot ou mor, mon pou mor e mon pou ganny antere lanmenm.” Sa zenn madanm ki ti fidel e annan kouraz ti’n deside pour fer Bondye Naomi, setadir Zeova, vin son Bondye.
De madanm dan dey ti bezwen andire akoz lanmor e zot ti ganny rekonforte parmi pep Zeova
Alor, Rit ti al avek Naomi Izrael. I ti kit son fanmir, kiltir ek son bann bondye Moabit deryer. Ler zot ti finalman ariv Betleenm, serten madanm ti soke ler zot ti vwar ki mannyer Naomi ti’n sanze pandan sa letan ki i ti’n ale. Naomi ti dir ki Zeova ti’n pran tou keksoz avek li. I ti’n kit li lanmen vid e fer son lavi vreman difisil. Si sa ki Naomi ti dir ti bles santiman Rit, akoz Rit ti kit tou deryer pour reste avek son belmer, i pa ti montre si sa ti afekte li. Alor, Rit ti konmans travay e anmas bann zepi ki ti ganny kit deryer dan bann plantasyon lanmenm o bor, pour siport son lekor ek Naomi.
Boaz garson Raab ki ti annan en gran propriyete e ki ti ris ti vwar Rit pe travay dir dan bann plantasyon. Sa zonm ki ti fer sa ki byen ti rod lenformasyon lo Rit. I ti tande ki mannyer Rit ti travay dir pour ed Naomi. I ti felisit Rit akoz i ti annan konfyans ki Zeova ti pou protez e pran swen avek zot. Boaz ti osi fer sir ki bann zonm ki ti pe travay pour li pa ti fer Rit okenn ditor.
Sa zour swar ler Naomi ti tande ki mannyer Boaz ti’n demontre labonte anver Rit, i ti vreman kontan. Eski Boaz ti kapab marye avek Rit? Boaz ti trouv fanmir avek Naomi e dapre lalwa Bondye, i ti annan en laranzman spesyal pour bann zenn vev parey Rit. Si en madanm ti vin en vev, i ti annan drwa marye avek fanmir pros son defen msye. Koumsa, i ti pou ganny en garson e zot ti pou ganny en desandans pour ki son non ek son leritaz pa disparet. (Det. 25:5, 6) Naomi ti eksplik Rit sa ki i ti pou bezwen fer.
Rit ti dakor pour fer sa ki Naomi ti dir, menm si sa koutim ti’n kapab paret drol e menm fer per. Aswar, Rit ti al dan sa landrwa kot zot bat dible, kot bann msye ti abitye dormi o bor bann pake dible ki zot ti’n rekolte. Rit ti al kot Boaz san fer tapaz. I ti dekouver son lipye e dormi lanmenm. Ler Boaz ti leve, avek limilite Rit ti fer li rapel lalwa Bondye e ki mannyer i ti aplik pour li. Petet sa zonm ki ti annan en bon leker ti remarke ki mannyer Rit ti per. Boaz ti vreman enpresyonnen avek kouraz ek lanmour fidel ki Rit ti demontre pour Zeova ek son fanmir, alor Boaz ti dakor pour esey gete ki i ti pou kapab fer.
Son lannmen, Boaz ti al kot bann ansyen Betleenm e i ti fer tou parey fodre. I ti marye avek Rit e avek letan i ti ganny en garson. Naomi ti vreman kontan son pti zanfan Obed. Lerwa David ti en desandans Obed e plizyer syek pli tar, Mesi osi ti vin atraver sa desandans! (Mat. 1:5, 6, 16) Zeova ti rekonpans kouraz Naomi ek Rit en kantite!
Lir sa resi dan Labib:
Pour diskit lo la:
Ki mannyer Naomi ek Rit ti demontre kouraz?
Al pli o profon
1. Ki mannyer sa laranzman pour bann Izraelit anmas sa ki ti’n reste deryer dan plantasyon ti en keksoz vreman spesyal dan bann pei Pros Oriyan sa letan? (ia 39 ¶23, not) A
Portre A
Portre A
2. Akoz nou kapab dir ki Rit pa ti al kot Boaz avek move lentansyon? (ia 47 ¶17-18)
3. Ki nou aprann lo Boaz, lefet ki i apel Rit “mon fiy”? (Rit 2:8; w16.11-E 3)
4. Konpare avek sa zonm ki apel Entel, ki mannyer Boaz ti montre ki i pa ti egois ler i ti dakor pour marye avek Rit? (w23.03 14) B
Portre B
Reflesir lo sa bann leson
Ki mannyer legzanp Rit lo kote travay dir e rekonesans i ed nou ler nou ganny problenm larzan? C
Portre C
Ler Naomi ti sagren, Rit ti ed li pour fer fas avek sa sityasyon. Ki nou aprann avek Naomi konsernan aksepte led lezot avek limilite? Ki nou aprann avek Rit lo ankouraz lezot?
Ki mannyer nou kapab imit kouraz Naomi ek Rit?
Reflesir lo Zeova ek son plan
Ki sa resi i ansenny mwan lo Zeova?
Ki mannyer sa resi i relye avek plan Zeova?
Ki mon ti pou kontan demann Naomi ek Rit ler zot resisite?
Aprann plis
Ki leson lo lanmour fidel nou kapab aprann dan liv Rit e ki mannyer nou kapab aplik sa bann leson?
“Kontinyen demontre lanmour fidel pour kanmarad” (w21.11 8-13)
Servi sa illustrated Bible story pour ed ou fanmir fer sa resi Labib vin pli reel pour zot.