12 KALEB
I ti lager fidelman pour son Bondye
APEPRE sa menm letan ki Moiz ti sove Lezip, en koup Izraelit ki ti bann lesklav laba ti ganny en pti garson ki zot ti apel Kaleb. Kaleb ti grandi konman en lesklav me i ti osi la ler zot ti ganny libere. Ler Kaleb ti annan apepre 40 an, Moiz ti retourn Lezip akoz Zeova ti’n demann li pour retournen e liber son pep Izrael. Sirman Kaleb ti etonnen e eksite pour vwar Zeova demontre Son pouvwar. Zeova ti anmenn sa dis fleo, i ti separ Lanmer Rouz e i ti sov son pep dan lesklavaz Lezip.
Kaleb pa’n zanmen bliy sa bann levennman ki ti fer son lafwa vin pli for. I ti reste fidel avek Zeova ler en kantite Izraelit ki ti napa lafwa ti rebele, zis detrwa mwan pli tar lo Montanny Sinai. Pli tar Kaleb ti ganny demande pour fer en travay spesyal: Kaleb, Zozye ek dis lezot sef Izraelit ti al espyonn sa pei ki zot ti’n ganny promet.
Avek kouraz sa 12 zonm ti al Kanaan. Zot ti pas 40 zour pe espyonn bann lavil, dimoun ek bann fri ki sa pei ti prodwi. Zot ti retourn avek serten fri enkli en gro grap rezen ki ti sitan gro ki de zonm ti bezwen anmennen. Me ler sa letan ti arive pour zot donn en rapor bann Izraelit, i bezwen ki Kaleb ti vreman dezapwente pour tann sa ki sa dis lezot espyon ti dir. Labib i dir: “Zot ti kontinyen donn bann Izraelit en move rapor.” Zot ti konplent e dir ki bann Kananeen i bokou pli for e pli gran ki zot e ki zot pa ti pou kapab defet zot. Zot ti menm egzazere e dir ki bann Kananeen ti desandans bann Nefilim ki ti’n ganny detrir pandan deliz. Sa ti fer tou dimoun dekouraze e serten ti menm anvi apwent en nouvo sef ki ti pou retourn avek zot Lezip.
Kaleb ek Zozye ti kontinyen annan lafwa dan Zeova. Zot ti esey ankouraz sa pep ki ti mank lafwa par dir: “Zeova i avek nou. Pa bezwen per zot.” Me sa ti zis fer bann Izraelit ki ti napa lafwa pli ankoler. Zot ti menm anvi saboul Kaleb ek Zozye avek ros!
Sa ti ofans Zeova en kantite. Apre tou sa ki Zeova ti’n fer pour sov son pep kont sa nasyon pwisan Lezip, Izrael ti’n vitman perdi lafwa dan li. Kantmenm sa, Zeova ti vwar kouraz ek lafwa ki Kaleb ek Zozye ti demontre. Zeova ti menm dir: “Mon serviter Kaleb ti annan en lot leta lespri e i’n toultan obeir mwan avek tou son leker.” Zeova ti deside ki sa zenerasyon antye ki ti napa lafwa ti pou mor dan dezer.a Me Kaleb ek Zozye ti pou parmi sa ptigin dimoun ki ti pou sirviv ziska dan zot vye zour e ki ti pou antre dan sa pei ki zot ti’n ganny promet.
Kaleb ti reste fidel avek Zeova menm si lezot Izraelit ti ankoler avek li e zot ti napa lafwa
Tou dilon sa 40 an ki bann Izraelit ti pe ale vini dan dezer, Kaleb ti kontinyen demontre lafwa ek kouraz. I ti fidelman siport Moiz. Apre lanmor Moiz, i ti osi fidelman siport Zozye, ler Zeova ti demann Zozye pour gid son pep pour travers Larivyer Zourden e antre dan sa pei ki i ti’n promet. Menm si Kaleb ti aze, avek kouraz i ti lager kont bann lennmi Bondye dan pei Kanaan.
Si-z-an apre ki pep Bondye ti’n travers Larivyer Zourden, bann Izraelit ti’n fini pran laplipar rezyon dan sa pei. Alafendefen, i ti’n ariv ler pour Kaleb deside kot i ti anvi reste. I ti swazir Ebronn, ki dapre bann espyon ki ti mank lafwa, sa landrwa ti ganny proteze par bann zean e i ti enposib pour pran. Menm si Kaleb ti annan 85 an, i ti konvenki ki sa ti pou arive: “Zeova pou avek mwan e mon pou pous zot zis parey Zeova ti promet.” Sanmenm sa ki ti arive, Kaleb ti pran sa lavil e i ti reste la. Apre sa nou lir: “I ti nepli annan lager dan sa pei e i ti anpe.”
Plizyer deseni avan sa, Moiz ti’n dir Kaleb: “Ou’n obeir Zeova mon Bondye avek tou ou leker.” San okenn dout, Kaleb ti kontinyen fer sa ziska son lanmor e sirman i pou fer li ankor a lavenir!
Lir sa resi dan Labib:
Pour diskit lo la:
Ki mannyer Kaleb ti demontre kouraz?
Al pli o profon
1. Akoz nou kapab dir ki Nonm 13:23 pa pe egzazere ler i koz lo bann fri ki dan Later Promiz? (w06-E 15/6 16 ¶1-2)
2. Eski “dile ek dimyel” ti vreman annabondans dan Later Promiz parey Kaleb ek Zozye ti dir? (Nom. 14:8; w11-E 1/3 15) A
Institute of Archaeology/Hebrew University © Tel Rehov Excavations
Portre A: Bann gof dimyel ki’n ganny fer avek larzil dan pei Izrael date depi dizyenm syek ziska boner nevyenm syek avan Kris
3. Ler Moiz ti anvoy sa 12 espyon sorti Kades, ki kantite pros bann Izraelit ti ete avek Later Promiz? (w04 1/11 17 ¶11-12) B
Portre B
4. Ki mannyer Zeova ti rekonpans lafwa ek kouraz Kaleb? (w06 1/10 17 ¶11)
Reflesir lo sa bann leson
Menm si Kaleb ti demontre lafwa, i ti bezwen ale vini dan dezer avek lezot Izraelit. Kantmenm sa, avek limilite, i ti kontinyen annan konfyans dan Zeova. Dan ki sityasyon nou kapab imit legzanp Kaleb?
Ki mannyer legzanp Kaleb i ed nou pour reziste presyon pour “swiv lafoul”? (Egz. 23:2) C
Portre C
Ki lezot fason ou kapab imit kouraz Kaleb?
Reflesir lo Zeova ek son plan
Ki sa resi i ansenny mwan lo Zeova?
Ki mannyer sa resi i relye avek plan Zeova?
Ki mon ti pou kontan demann Kaleb ler i resisite?
Aprann plis
Gete ki mannyer lafwa Kaleb ti relye avek son kouraz.
“Lafwa ek Lakrent pour Bondye i prodwi Kouraz” (w06 1/10 15-17 ¶1-12)
Akoz Kaleb a laz 85 an ti kapab dir: “Mwan mon ti obeir Zeova avek tou mon leker”? (Zoz. 14:8)
a Desizyon Zeova pa ti enkli bann Levit oubyen okenn Izraelit ki pa ti ankor ganny 20 an sa letan.—Nom. 14:29.