I ti swiv bann lenstriksyon drol

ZOZYE ti pe get Zeriko, sa lavil ki Bondye ti’n demann li pour atake e detrir. I ti rapel sa ki Zeova ti dir li ler Moiz ti pros pour mor: “Pran kouraz e reste for.” (Det. 31:23) Pa tro lontan pase, Zeova ti’n dir Zozye preski menm zafer: “Pran kouraz e ou bezwen vreman for.” (Zoz. 1:7) La Zozye ti pou bezwen en kantite kouraz. Akoz?

Menm si Zeriko pa ti en gran lavil, i ti en lavil enportan ki ti ganny proteze par en gro miray. Lavil Zeriko ti pou sa premye landrwa ki bann Izraelit ti pou atake pour ki zot pran sa pei ki zot ti’n ganny promet. Par deryer sa miray, son pep ti pe fer en kantite move keksoz. Plizyer santenn lannen avan sa, Zeova ti’n deza koz avek Abraam konsernan pese bann Amorit, setadir tou dimoun ki reste dan sa rezyon Kanaan. Zeova ti dir ki en zour “sa letan pour bann Amorit ganny pini” ti pou arive e i ti pou finalman anmenn zizman lo zot. (Zen. 15:16) Aprezan, sa zour ti’n arive. Dimoun ti pe ador zidol, fer prostitisyon dan tanp, zot ti pe pratik omoseksyalite, annan relasyon seksyel avek fanmir pros e avek zannimo, zot ti pe menm sakrifye zot zanfan avek bann fo bondye. Bann Kananeen ti’n vin telman move ki konmsi later ti bezwen vomi zot! (Lev. 18:3, 6, 21-27) Ki mannyer sa ti pou arive?

Bondye ti pou servi Zozye ek son bann zonm fidel. Sa bann solda ti pare pour swiv bann lenstriksyon Zeova. Sa lager ti pou sa premye letap kot Zeova ti pou detrir sa bann move dimoun dan pei Kanaan. Kantmenm sa, sa bann lenstriksyon ki Zeova ti donn Zozye ti vreman drol! Zeova pa ti demann li pour atak sa lavil deswit, ni pour met li pare pour anserkle sa lavil pour en pe letan. Zeova ti plito demann li pour marse. Bann solda ti pou bezwen mars otour sa lavil en fwa par zour pandan sis zour. Bann pret osi ti pou bezwen marse e fer letour avek lars lalyans e soufle en kalite tronpet ki ti ganny fer avek korn zannimo. Setyenm zour, zot tou zot ti pou fer letour lavil set fwa e apre zot ti pou kriye.

Zozye ti annan en serten leksperyans konman en solda. Dapre pwennvi en solda, sa stratezi pa ti fer okenn sans. Deplis, ki ti pou arive si bann Izraelit ti perdi sa lager? Pa sa ti pou fer tou lezot lavil Kananeen vin pli ardyese e menm pli agresiv?

Me Zeova ti’n fini donn Zozye bann rezon pour li annan konfyans dan li. Ler Zozye ti anvoy de espyon Zeriko, zot ti tande ki bann dimoun Zeriko ti’n perdi kouraz akoz zot ti per bann Izraelit. Osi, Zeova ti’n fer en mirak e fer Larivyer Zourden aret koule pour ki bann Izraelit i pase.

Sirman Zozye ti annan lafwa dan son Bondye akoz i ti’n reflesir lo tousala. Alor, sa ti fer li annan kouraz pour obeir Bondye. I ti diriz son larme e zot ti fer letour Zeriko. Bann pret ti soufle zot tronpet. Me lavil ti reste trankil. Bann baro lavil ti reste “konpletman fermen” menm si zot ti pe ganny atake. Son lannmen, Zozye ek son larme ti fer en lot letour. Ankor en fwa zot ti fer egzakteman sa ki Zeova ti’n demann zot pour fer. Pandan sis zour, zot ti fer menm zafer. Apre, setyenm zour ti arive.

Sa zour, Zozye ek son larme ti fer letour Zeriko set fwa. Finalman, a lafen sa setyenm letour, zot ti fer en keksoz diferan. Zozye ti dir bann solda: “Kriye, parski Zeova in donn zot sa lavil!” Zot pa ti bezwen esper lontan. Labib i dir: “Dek ki bann solda . . . ti kriye pour fer konnen ki zot ti pe al lager . . . miray ti tonm plat ater.”

Zozye ek son larme ti antre drwat dan lavil e detrir tou sa ki ti vivan, zis parey Zeova ti’n demann li pour fer. Ler Zeova ti avek zot, Zozye ek son larme ti detrir tou bann lavil ek nasyon, enn deryer lot. Alafendefen, “sa letan pour bann Amorit ganny pini” ti’n arive e Zeova ti tir tou sa ki move dan sa pei!

Kantmenm sa, i ti annan en pti bout miray Zeriko ki pa ti tonbe. Akoz? Larepons i annan pour fer avek lafwa ek kouraz en madanm remarkab ki nou pou vwar dan sa lot sapit.

Lir sa resi dan Labib:

• Deterononm 20:16-18

• Zozye 2:1, 9-11, 24; 3:14-17; 5:1; 6:1-21, 24

Pour diskit lo la:

Ki mannyer Zozye ti demontre kouraz?

Al pli o profon

1. 1. Ki bout dan Labib ki petet Zozye ti lir? (w09-E 1/12 17 ¶4, not) A

   Ou larepons

   

2. 2. Avan ki bann Izraelit ti fer letour Zeriko, ki Zeova ti demann Zozye pour fer? Akoz sa ki Zeova ti demann Zozye pour fer ti drol? (Zoz. 5:2-8; w18.10 17 ¶5-7)

   Ou larepons

3. 3. Ki levidans i annan ki montre ki Zeriko ti ganny pran apre ki i ti’n ganny anserkle zis pour en pti letan? (w15-E 15/11 13) B

   Ou larepons

   

   Kennedy, Titus (2023). The Bronze Age Destruction of Jericho, Archaeology, and the Book of Joshua. Accessed via researchgate.net. Licensed under CC BY 4.0

4. 4. Ki mannyer sa profesi lo Zeriko dan Zozye 6:26 ti ganny akonplir? (w98-E 15/9 21 ¶8)

   Ou larepons

Reflesir lo sa bann leson

• Kwa ki ti ed Zozye pour annan konfyans dan bann promes Zeova? (Zoz. 23:14) Ki mannyer nou kapab annan sa menm konfyans ozordi?

  Ou larepons

• Ki mannyer legzanp Zozye i ed nou pour swiv bann lenstriksyon ki nou gannyen sorti kot lorganizasyon Zeova? C

  Ou larepons

  

• Ki mannyer ou kapab imit kouraz Zozye?

  Ou larepons

Reflesir lo Zeova ek son plan

• Ki sa resi i ansenny mwan lo Zeova?

  Ou larepons

• Ki mannyer sa resi i relye avek plan Zeova?

  Ou larepons

• Ki mon ti pou kontan demann Zozye ler i resisite?

  Ou larepons

Aprann plis

Ki mannyer legzanp Zozye i ed nou pour aprann avek bann aze, annan konfyans dan bann promes Zeova e pour reste fidel menm ler nou bann frer ek ser Kretyen i bles nou?

“What Joshua Remembered” (w02-E 1/12 9-12)

Ed ou zanfan pour konn bann levennman enportan dan lavi Zozye.

“Joshua” (Bible character card lo Enternet)