11 MOIZ
“Al kot Faraon”
MOIZ ti’n sanze en kantite. I paret ki i ti nepli krwar ki i ti sa dimoun ki ti pou liber bann Izraelit dan lesklavaz Lezip. La, i ti annan apepre 80 an, i ti annan en madanm e de zanfan. I ti’n pas karant an pe travay konman en berze pour pran swen avek mouton son boper dan sa groker soley dan en pei dezerte kot bann Madyannit ti reste.
Zeova ti vwar ki mannyer Moiz ti’n sanze. En zour, Zeova ti ganny latansyon Moiz ler i ti fer en brousay anba lo Montanny Oreb (Sinai) pran dife me san ki sa brousay i brile. Ler Moiz ti vin pli pre, Zeova ti koz avek li dan sa dife atraver en lanz pwisan. Bondye ti demann Moiz pour retourn Lezip e liber son pep! Pour ankouraz Moiz, Bondye ti revel en laspe enportan ki annan pour fer avek son non sakre, Zeova, par dir: “Mon pou vin sa ki mon swazir pour vini.” Dan sa fason Zeova ti pou vin en Sover pour son pep ki ti pe ganny abize. I ti pou fer nenport kwa ki neseser pour liber zot e fer zot vin en nasyon pwisan.
Me kantmenm sa, Moiz ti ezite. I ti santi ki i pa kalifye, i pa ti pou kapab koz devan sa Faraon Lezip. Zeova ti koriz li e i ti ranforsi son lafwa par fer en keksoz enkrwayab. Pour premye fwa dan Labib, nou vwar ki Zeova i permet en dimoun pour fer bann mirak. Zeova ti osi donn Moiz en led ek en portparol, sa i son frer Aaron. Finalman, Moiz ti aksepte sa responsabilite pour vin en mesi oubyen sa enn ki Zeova in swazir pour sov Son pep.—Ebr. 11:26.
Moiz ti retourn Lezip avek Aaron akote li e zot ti al devan Faraon. Keksoz pa ti al byen pour zot. Olye les bann Izraelit ale, sa lerwa ankoler ti fer bann lesklav travay pli dir! Apre sa, Zeova ti reanvoy Moiz kot Faraon pour anons Son premye fleo ki i ti pou fer kont Lezip. Sa fleo ti tap zot! Zeova ti fer sa gran Larivyer Nil vin disan. Me sa pa ti fer Faraon sanz son desizyon. Zeova ti kontinyen anvoy Moiz kot Faraon, sak fwa pour dir ki kalite fleo ki ti pou tap zot. Zeova ti donn Moiz sa lord: “Al kot Faraon” e avek kouraz Moiz ti ale. Me sa dirizan arogan pa ti ekoute. Konmansman katriyenm fleo, Zeova ti protez son pep pandan ki bann Ezipsyen ti soufer.
Sak fleo ti montre ki mannyer bann bondye Lezip, zot bann pret ki fer mazik ek Faraon li menm ti vreman fay. Pourtan, Faraon ti andirsi son leker e i pa ti les son bann lesklav ale. Sa nevyenm fleo ti fer annan en fernwanr terib partou Lezip, me bann Izraelit zot, zot ti annan lalimyer kot zot. Premye kou Faraon ti aksepte pour les bann Izraelit ale me apre i ti sanz son nide ankor. I ti averti Moiz ki si zanmen i retourn kot li ankor, Moiz ti pou mor.
Plizyer fwa, Moiz ti bezwen fer fas avek lakoler sa dirizan pli pwisan lo later
Me Zeova ti anvoy Moiz kot Faraon pour en dernyen fwa e Moiz ti ale. Dan sa dizyenm e dernyen fleo, Zeova ti fer touy tou bann premye ne Lezip, dimoun konman zannimo. Faraon, ki son premye garson osi ti’n mor, ti finalman aksepte. Faraon ki ti’n ganny imilye, ti demann Moiz pour vin kot li. I ti liber bann Izraelit e i ti demann Moiz en benediksyon. Alafendefen bann Izraelit ti lib. I ti egzakteman 430 an depi ki Abraam ti antre dan Later Promiz pour premye fwa! Bann Izraelit ki ti nepli lesklav ti kit Lezip ansanm avek “en kantite etranze.” I posib ki laplipar sa bann etranze ti bann Ezipsyen. Apre, Faraon ti sanz son nide ankor. I ti rasanble son gran larme e i ti tay deryer bann Izraelit!
Ler zot ti ariv o bor Lanmer Rouz, i ti paret ki i ti napa semen sorti pour Moiz ek son pep. Bann Izraelit ti vreman per. Moiz ti sipliy Zeova pour ed zot e Zeova ti reponn par fer enn bann mirak pli spektakiler dan listwar imen. Zeova ti separ Lanmer Rouz. Alor bann Izraelit ti travers lanmer lo later sek. Ler Faraon ti realize ki bann Izraelit ti pe sove, li avek son larme ti tay deryer zot. Me ler bann Izraelit ti’n fini ariv lot kote lanmer sen e sof, Zeova ti fer Lanmer Rouz kouver bann Ezipsyen e zot tou zot ti noye. Sa larme pli pwisan dan lemonn ti’n ganny detrir!
Moiz pa ti zanmen oubliy sa bann levennman enkrwayab. Son lafwa ti’n vin pli for ki zanmen oparavan. Pour sa prosen 40 an, ziska son lanmor a laz 120 an, i ti diriz pep Bondye e pran swen avek zot avek en lafwa, lanmour ek kouraz remarkab.
Lir sa resi dan Labib:
Pour diskit lo la:
Ki mannyer Moiz ti demontre kouraz pandan sa letan son lavi?
Al pli o profon
1. Nou pa konn non sa Faraon ki ti pe dirize dan sa letan e napa okenn laprev ki bann Ezipsyen in rikorde konsernan ler bann Izraelit ti kit Lezip ki’n ganny trouve ziska prezan. Kantmenm sa, akoz i rezonnab pour krwar sa resi ki dan Labib? (g04-E 8/4 7 ¶4–9 ¶1)
2. Akoz dimoun ti per Faraon? (w14 15/4 8 ¶1) A
PRISMA ARCHIVO/Alamy Stock Photo
Portre A: Desen en Faraon ki’n ganny skilpte lo en miray
3. Ki mannyer sa dis fleo ti imilye bann bondye Lezip? (it-E “Gods and Goddesses” ¶24-26)
4. Kwa ki montre ki Zeova ti ouver en gran semen dan Lanmer Rouz e petet ki mannyer sa kantite Izraelit ti traverse? (it-E “Exodus” ¶46-51) B
Portre B: Portre Lanmer Rouz ki’n ganny tire Sinai posibleman kot bann Izraelit ti traverse
Reflesir lo sa bann leson
Ki mannyer legzanp Moiz i kapab ankouraz nou ler nou pa santi nou kalifye pour fer en travay ki Zeova in donn nou? (Egz. 4:10; 7:6, 7)
Parey Aaron ti ed Moiz pour desarz son responsabilite avek kouraz, ki mannyer nou kapab ed nou bann frer ek ser ozordi? (Egz. 4:14-16) C
Portre C
Ki mannyer ou kapab imit kouraz ki Moiz ti demontre dan sa resi?
Reflesir lo Zeova ek son plan
Ki sa resi i ansenny mwan lo Zeova?
Ki mannyer sa resi i relye avek plan Zeova?
Ki mon ti pou kontan demann Moiz ler i resisite, konsernan sa ki’n arive dan sa resi?
Aprann plis
Reflesir lo ki mannyer sinifikasyon non Bondye i kapab ed bann zenn pour annan plis kouraz.
Ki sa ki Moiz ti pas atraver ti ansenny li lo bann kalite Zeova?