10 MOIZ
I ti fer son swa
MOIZ ti ganny son non, pa avek son paran Ebre me avek sa prenses Ezipsyen ki ti adopte li. I ti swazir sa non akoz sa non i vedir “Ganny sove dan delo” e i dan sa fason ki i ti sov sa pti garson. Tre probab i ti swete ki i ti pou grandi pour vin en dimoun enportan dan fanmir rwayal Ezipsyen. I bezwen ki i ti oule vwar li ganny sa pli bon ledikasyon Lezip. Labib i dir: “Moiz ti ganny sa pli bon ledikasyon Lezip.”
I ti grandi pour vin en garson byen remarkab. Labib i dir: “Anfet, i ti koz vreman byen e fer bann gran keksoz.” I ti’n kapab konsantre lo vin en dimoun ris, enportan e fer tou sa ki i anvi. Me Moiz ti konnen ki sa kalite lavi ti pou fer li perdi laprouvasyon Zeova. Alor Moiz ti bezwen deside: Ki i pou fer avek son lavi?
Ler Moiz ti annan 40 an, i ti fer en desizyon kler. Nou lir: “Akoz son lafwa, ler Moiz ti gran, i ti refize ganny konsidere konman garson fiy Faraon. I ti swazir pour ganny maltrete avek pep Bondye plito ki pran plezir dan pese pour zis en serten letan.” I ti fer sa bon swa, enn ki ti demontre son lafwa ek kouraz. Me i ti osi fer serten fot.
Moiz ti konsider bann Izraelit konman “son bann frer” e i ti anvi ed sa bann ki ti pe ganny maltrete. En zour, i ti anvi al gete ki mannyer zot ti pe soufer. I ti vwar en Ezipsyen, tre probab en sef, pe bat en lesklav Ebre. Eski Moiz ti demann sa Ezipsyen pour arete? Nou pa konnen. An tou ka, Moiz “ti get gos drwat” petet pour vwar si napa personn ki ti pou kapab ede protez sa lesklav. Me i pa ti vwar personn. Alor Moiz ti azir. “I ti touy sa Ezipsyen.” Eski son lentansyon ti pour li touy sa Ezipsyen? Oubyen eski lakoler ki ti fer li tap sa zonm pli for ki i ti pe realize? Labib pa dir. Me an tou ka, Moiz ti konnen ki aprezan son lavi ti an danze. Alor i ti kasyet sa lekor dan disab.
Son lannmen i ti al ankor. Safwasi i ti vwar de lesklav Ebre pe lager e i ti esey fer zot arete. Me sa enn ki ti annan tor ti dir sa parol ki ti fer Moiz per: “Lekel ki’n apwent ou konman prens ek ziz lo nou? Eski ou anvi touy mwan parey ou ti touy sa Ezipsyen?” Alor Moiz ti realize ki dimoun ti konnen sa ki i ti’n fer. I ti vreman per.
Keksoz pa ti pe mars parey Moiz ti pou’n swete. Ki Moiz ti swete oubyen anvi? Labib i dir: “I ti krwar ki son bann frer ti pou konpran ki Bondye ti pe servi li pour delivre zot, me zot pa ti konpran.” I paret ki Moiz ti krwar ki Bondye ti’n swazir li pour tir Izrael dan lesklavaz Lezip. Me Moiz pa ti konpran ki Zeova ti annan en letan pour tou keksoz e i pa ti’n ekspekte si bann Izraelit pou azir dan sa fason. Zot ti napa konfyans dan sa Ebre ki ti’n ganny elve dan en fanmir rwayal Ezipsyen.
Eski Moiz ti pou swazir pour viv en lavi kot i annan larises ek pouvwar oubyen i ti pou siport pep Zeova?
Moiz pa ti realize sa letan ki i pa ti ankor pare pour tir pep Zeova dan lesklavaz Lezip. Pour Zeova, Moiz pa ti ankor pare. I vre i ti annan en serten kouraz, i ti for e “i ti koz vreman byen.” Me i annan en lot kalite ki i ti bezwen ki pour Zeova i vreman enportan, sa i limilite. Dan son lakoler Moiz ti’n touy en zonm Ezipsyen e Faraon ti tande sa ki ti’n arive.
San les Moiz eksplik sa ki ti’n arive, Faraon ti rod touy li. Alor Moiz ti sove Lezip. I pa ti konnen ki ti pou arive avek li. I ti kit deryer larises, en lavi konfortab ek pouvwar. Sirman i ti pou bezwen annan en kantite kouraz. Avek kouraz, Moiz ti kit Lezip e i ti al reste lwen dan pei Madyann. Moiz ti reste dan sa pei dezerte pour plizyer dizenn lannen konman en egzile setadir “en etranze dan en pei etranze.” Eski i ti pou annan kouraz pour li sanz son personnalite? Eski i ti pou devlop limilite parey Zeova ti anvi? Annou vwar.
Lir sa resi dan Labib:
Pour diskit lo la:
Ki mannyer Moiz ti demontre kouraz pandan sa letan dan son lavi?
Al pli o profon
1. Ki bann arkeolog in dekouver ki montre ki bann Izraelit ti bann lesklav Lezip parey Labib i dir? (w20.03 30) A
Courtesy Brooklyn Museum, gift of Theodora Wilbour
Portre A: En vye lalis Ezipsyen ki annan plis ki 40 non lesklav ki bann desandans Senm, ki montre ki bann Izraelit ti lesklav Lezip
2. Ki Moiz ti aprann avek son paran e ki mannyer i “ti ganny sa pli bon ledikasyon Lezip”? (Akt 7:22; w02-E 15/6 10 ¶2-5)
3. Ki mannyer bann Ezipsyen ti normalman anter zot bann mor? Ki mannyer zot ti santi ler Moiz ti touy sa Ezipsyen e osi kasyet son lekor olye anbonm sa lekor e anter li? (it-E “Egypt, Egyptian” ¶28) B
Portre B: En mummy Ezipsyen
4. Moiz ti sove e al Madyann. Kwa ki ti parey avek bann Madyannit ek bann Izraelit? (it-E “Midian” No. 2 ¶1-2)
Reflesir lo sa bann leson
Ki legzanp Moiz i ansenny ou lo kontrol ou lakoler?
Ki bann zenn i kapab aprann atraver legzanp Moiz lo swazir byen zot bann lobzektif avek kouraz? C
Portre C
Ki lezot fason ki ou kapab imit kouraz ki Moiz ti demontre dan sa resi?
Reflesir lo Zeova ek son plan
Ki sa resi i ansenny mwan lo Zeova?
Ki mannyer sa resi i relye avek plan Zeova?
Ler Moiz i resisite, ki mon ti pou kontan demann li lo son lavi ler i ti zenn?
Aprann plis
Gete ki mannyer nou kapab imit legzanp Moiz e fer bann sakrifis.
Imit legzanp bann ki annan lafwa, pa bann ki napa lafwa—Moiz, pa Faraon (2:27)
Moiz ti kit deryer larises pour servi Zeova. Eski sa i posib ozordi?