5 ABRAAM
Sa leprev pli difisil ki Abraam in bezwen fer fas avek
DOUSMAN dousman, Abraam pe kontinyen marse pour al ver son destinasyon. Sa vwayaz i pran zis detrwa zour me pour Abraam i sa vwayaz pli difisil ki i’n deza fer dan son lavi.
I ti pe zis mazin sa ki Zeova ti’n demann li pour fer: “Silvouple, pran ou garson, ou sel garson ki ou vreman kontan, Izaak e al dan pei Moriya. Laba, ofer li konman en lofrann brile lo enn sa bann montanny ki mon pou montre ou.” Zeova ti konnen ki kantite Abraam ti kontan Izaak. Me akoz i ti demann li fer en keksoz koumsa? Ki mannyer Abraam ti pou ganny sa lafwa ek kouraz ki i bezwen pour obeir Zeova?
Labib i dir ki Abraam i “papa tou sa bann ki annan lafwa.” (Rom. 4:11) I ti deza annan en lafwa for menm avan Zeova i demann li pour fer sa e Zeova ti’n ed li devlop plis lafwa. Par egzanp, en zour Zeova ti dir Abraam ki i ti pou detrir sa de move lavil, Sodonm ek Gomor. Sa ti vreman fatig Abraam. Alor, i ti demann Zeova si I ti pou detrir bann bon dimoun ansanm avek bann move. Me avek bokou pasyans Zeova ti dir Abraam ki i pa ti pou detrir sa bann lavil si i ti annan detrwa dimoun ki ti pe fer sa ki byen laba. (Zen. 18:16-33) Abraam pa ti zanmen bliy sa leson, Zeova i en Bondye zis e i pran pitye.
Ki mannyer en papa ki annan lanmour ti ganny sa kouraz pour obeir ler Zeova ti demann li fer en keksoz ki i pa ti pou’n zanmen mazin fer?
Pa lontan apre sa, Zeova ti donn Abraam ek Sara en zoli kado. Menm si Sara ti annan preski 90 an e Abraam preski 100 an, Zeova ti fer li posib pour zot ganny en garson, Izaak! Abraam ti aprann ki napa nanryen ki enposib pour Zeova. I menm kapab redonn lavi sa ki paret i’n mor. (Rom. 4:18, 19) Sa leson osi ti reste dan lespri ek leker Abraam.
Me la, preski 25 an pli tar, sirman tousala pe vir vir dan son lespri anmezir ki pe al ver Moriya. I ti realize ki menm si Izaak i mor, Zeova i kapab e i pou resisit li! (Ebr. 11:19) Alor, Abraam ti kontinyen ver son destinasyon, son lespwar ti donn li sa kouraz ki i ti bezwen.
Ler Abraam ti vwar dan lwen sa landrwa ki Zeova ti’n swazir, i ti demann son bann serviter esper li e li ek Izaak ti monte pour ofer en sakrifis. Avek konfyans, i ti dir son bann serviter ki li ek Izaak ti pou retournen. Ler zot ti ariv en pti landrwa izole lo montanny, finalman sa letan ti arive. Avek limilite, Izaak ti les son papa aze anmar li e met li lo lotel. Avek son kouto dan lanmen, Abraam ti lev son lanmen pare pour fer en keksoz ki i pa ti’n zanmen mazin fer. Me i ti arete ler en lanz ti kriy son non e dir li: “Pa fer ditor sa garson.”
Apre Bondye ti felisit Abraam pour son lafwa ek lobeisans. Ankor en fwa i ti promet pour beni Abraam e fer son desandans vin en kantite e “tou nasyon lo later” ti pou ganny bann gran benediksyon akoz lobeisans Abraam.
Sa promes ki Zeova ti fer avek Abraam i ankor pe ganny akonplir. I pou anmenn bann benediksyon ki pou dire pour touzour. I annan en lot keksoz ki nou aprann atraver sa ki Zeova ti fer avek Abraam ek Izaak. I ed nou konpran sa ki li menm li Zeova ti pou pas atraver pour sov tou bann imen fidel. Zis parey Abraam ti pare pour ofer son Garson ki i ti kontan, Zeova osi ti pou pare pour donn son sel Garson, Zezi, pour tou dimoun benefisye. (Zan 3:16) Alor, ler nou aprann konsernan sa ki Abraam ti fer, nou osi aprann lo lanmour Zeova.
Parey Abraam, nou osi nou pou devlop plis lafwa si nou reflesir lo sa ki Zeova in dir e fer dan lepase. Anmezir nou devlop plis lafwa, nou pou osi annan plis kouraz. Nou pa bezwen trakase ki Zeova pou demann nou pour fer sa ki i ti demann Abraam. I pa’n zanmen demann personn pour fer sa ankor. Me nou kapab asire ki nenport kwa ki Bondye i demann nou pour fer, nou lafwa dan li pou donn nou sa kouraz ki nou bezwen pour obeir. Ler nou obeir li nou pou ganny plis benediksyon ankor!
Lir sa resi dan Labib:
Pour diskit lo la:
Ki mannyer Abraam ti demontre kouraz pandan sa parti son lavi?
Al pli o profon
1. Ki levidans i annan ki Abraam ti vreman egziste? (g-E 5/12 18, bwat; it-E “Abraham” ¶22-23) A
Portre A: Lekritir lo en miray Karnak, Lezip, ki koz lo “Plantasyon Abraam”
2. Ki mannyer Abraam ti’n kapab aprann konn Zeova? (ia 26 ¶4-5)
3. Akoz Zeova ti aksepte ladorasyon Abraam? (rr-E 20 ¶18)
4. Ki mannyer sa promes ki Zeova ti fer avek Abraam dan Zenez 22:17 i montre ki Labib i egzakt dan domenn syantifik? (g88-E 8/4 25) B
Portre B
Portre B
Reflesir lo sa bann leson
Ki mannyer lespwar ki Abraam ti annan ti ed li pour annan kouraz? Ler nou konsantre lo nou lespwar, ki mannyer sa pou ed nou annan kouraz? C
Portre C
Ki mannyer nou kapab imit kouraz Abraam e ofer en sakrifis ler nou . . .
vwar en loportinite pour rann en temwannyaz? (Ebr. 13:15)
deside ki mannyer pour servi nou bann keksoz materyel? (Prov. 3:9)
konnen ki nou bann frer ek ser i bezwen nou led? (Fili. 4:18)
Ki mannyer ou kapab imit kouraz ki Abraam ti demontre dan sa resi?
Reflesir lo Zeova ek son plan
Ki sa resi i ansenny mwan lo Zeova?
Ki mannyer sa resi i relye avek plan Zeova?
Ki mon ti pou kontan demann Abraam oubyen Izaak ler zot resisite?
Aprann plis
Gete ki mannyer bann levennman dan sa resi i reel.
Ki mannyer Abraam ti vin bon zanmi Zeova e ki mannyer ou kapab vin pli pros avek Zeova?