6 REBEKA
I ti pare pour kit son fanmir ek lakour
REBEKA ti vin o bor pwi avek son resipyan delo. Soley ti pe konmans kouse e i ti’n ariv ler pour vin sers delo pour son fanmir. Rebeka ti abitye travay dir. Me i ti remarke ki i ti annan bann etranze, en group zonm avek zot samo ki ti pe debout o bor pwi! Kantmenm sa, i ti al o bor pwi e ranpli son resipyan delo.
Ler i ti’n fini pran delo e i ti pe al kot li, en msye pli aze dan sa group ti tay kot li e dir li, “Silvouple, donn mwan en pe delo pour bwar.” Rebeka pa ti kanmi pour li demontre lospitalite anver sa bann etranze. O kontrer, i ti vreman kontan pour fer li. Alor i ti dir: “Bwar mon senyer.” I ti tir son resipyan lo son zepol e i ti donn li en pe delo pour bwar ziska ki i ti nepli swaf.
Apre, i ti fer en lot keksoz. I ti ofer pour tir delo dan pwi pour sa dis samo ki ti anmenn sa bann etranze. Sa etranze pa ti oule krwar son lizye. I ti gete anmezir ki sa zoli fiy ti ale vini pe ranpli basen ziska ler sa bann gro zannimo ti’n rasazye. Sa zonm ti demann li lekel son papa e si zot ti pou kapab reste kot son fanmir sa zour swar. Rebeka pa ti ezite. I ti ofer zot en landrwa pour dormi e manze pour zot zannimo osi.
Rebeka pa ti konnen me Zeova ki ti par deryer tousala. Sa zonm aze, tre probab Eliezer, ti en serviter fidel ki ti’n sorti byen lwen. Detrwa semenn pli boner, son met Abraam ti’n demann li pour fer sa vwayaz plizyer santenn kilomet pour rod en madanm pour Izaak, garson ek zeritye Abraam. Abraam ti anvi ki sa fiy i sorti dan en fanmir ki ador Zeova. Alor Eliezer ti’n priye e demann Zeova son benediksyon. I ti priye ki sa fiy ki Zeova ti’n swazir ti pou demontre lospitalite anver zot e sanmenm sa ki Rebeka ti’n fek fer!
Rebeka pa ti ezite pour ed sa bann dimoun ki i pa ti’n zanmen zwenn. I vre, sa letan ti diferan avek nou letan. Ozordi en kantite dimoun i kriyel e zot pa kontan sa ki byen. (2 Tim. 3:1, 3) Me menm pour sa letan, Rebeka ti en bon legzanp e i ti osi montre en kantite kouraz.
I pa ti tarde pour konnen akoz sa bann zonm ti’n vin sitan lwen. Papa Rebeka, Betouel ek son frer Labann ti’n envit Eliezer pour asize pour manze. Avan manze, sa serviter fidel ti anvi dir zot ki i ti’n vin fer. I ti rakont zot ki mannyer Zeova ti’n beni li pour trouv Rebeka. Sa de zonm ti realize ki Zeova ti’n ed li, alor zot ti dir: “Sa i sorti kot Zeova.”
Ki Rebeka ti fer ler i ti konpran ki i ti lavolonte Bondye pour li kit son lakour e al lwen pour marye avek en zonm ki pa’n zanmen zwenn?
Ki Rebeka ti pou fer? Abraam ti’n dir ki i posib ki sa fiy pa ti pou anvi retourn Kanaan avek Eliezer. Eski Rebeka ti annan en swa? Son lannmen, Eliezer ti demande si i kapab al avek Rebeka deswit. Fanmir Rebeka ti deside pour demann Rebeka li menm si i ti anvi ale. Ler zot ti demann li, i ti donn zot sa senp larepons: “Wi, mon dakor.” I ti pare pour kit son fanmir ek lakour deryer e petet i pa ti pou zanmen revwar zot ankor. Akoz i ti annan kouraz pour fer sa? I paret ki li osi i ti konpran ki sa ti lavolonte Zeova pour li.
Apre plizyer semenn ki zot in vwayaze lo samo, sa group ti finalman ariv dan kan Abraam, Kanaan. Ler fernwanr ti pe fer, Rebeka ti vwar en zonm pe marse dan lakanpanny li tousel pe medite. Ler i ti tande ki sa ti Izaak, avek limilite i ti kouver son latet ek figir avek en vwal konman en siny respe pour sa enn ki ti pou vin son msye. Izaak, en zonm 40 an ki ti sansib e zantiy, ti ankor dan dey akoz lanmor son manman Sara ki ti’n mor trwa-z-an pase. Eski Rebeka ti pou annan sa kouraz pour fer sa ki Bondye ti pe demann li pour fer? Eski Rebeka ti pou kapab siport, kontan e ed Izaak pour servi Zeova konman sef fanmir? Labib i montre ki i ti fer sanmenm. Labib i dekri zot lavi maryaz dan sa fason: “Izaak ti tonm anmoure avek li. Izaak ti ganny konsole apre lanmor son manman.”
Lir sa resi dan Labib:
Pour diskit lo la:
Ki mannyer Rebeka ti demontre kouraz?
Al pli o profon
1. Ki mannyer Eliezer ti ganny afekte ler Abraam ti ganny zanfan me kwa ki montre ki i pa ti zalou oubyen ankoler? (Zen. 15:2-4; 24:12; w97-E 1/1 30 ¶2)
2. Akoz Abraam ti anvi ki Rebeka i vin reste Kanaan olye Izaak al kot Rebeka ti reste? (w97-E 1/1 30 ¶3)
3. Akoz Rebeka ek son fanmir ti ganny ofer bann kado? (it-E “Rebekah” ¶4)
4. Dekrir sa vwayaz ki Rebeka ti fer sorti Arann ziska Negeb kot Izaak ti reste. (wp16.3 15 ¶1) A
www.LifeintheHolyLand.com
Portre A: Lontan bann dimoun ti reste Negeb e bann gran troupo Abraam ti manz zerb laba
Reflesir lo sa bann leson
Ki nou kapab aprann avek Abraam, Rebeka ek Izaak konsernan swazir en konzwen? (Zen. 24:2, 3; 27:46–28:1)
Rebeka ti travay dir, i ti zenere e i ti annan respe pour lezot. Dan ki fason bann ser i kapab imit li ozordi? B
Portre B
Ki mannyer ou kapab imit kouraz Rebeka dan ou lavi?
Reflesir lo Zeova ek son plan
Ki sa resi i ansenny mwan lo Zeova?
Ki mannyer sa resi i relye avek plan Zeova?
Ki mon ti pou kontan demann Rebeka ler i resisite?
Aprann plis
Reflesir lo ki mannyer Rebeka ti kontinyen demontre kouraz konman en madanm fidel e manman.
Ki leson bann zanfan i kapab aprann avek Rebeka?
“Rebekah’s Fine Qualities” (Bann seri lo Enternet “Picture Activities”)