4 ABRAAM
Sa premye zonm pour lager dan en lager Zeova
ZEOVA ti fer en promes avek son zanmi Abraam, enn ki ti pou sanz lavenir limanite: “Mon pou fer ou vin en gran nasyon.” Bondye ti osi montre Abraam sa zoli pei kot sa nasyon ti pou reste pli tar. (Zen. 12:2; 13:14, 15) Me Satan ti determinen pour detrir sa nasyon menm avan i ganny formen. Dyab ti konnen ki atraver sa nasyon ki sa “desandans” ki’n ganny predir ti pou detrir li ek sa move lemonn ki pe dirize.—Zen. 3:15.
Satan ti atak Abraam ek son fanmir. Enn parmi zot ki ti soufer en kantite ti neve Abraam, Lot. Abraam ti les Lot swazir premye kote i ti pou reste dan sa later promiz e Lot ti swazir sa landrwa pli zoli e fertil. Sa landrwa ti o bor lavil Sodonm kot bann dimoun ti “bann move dimoun e zot ti fer bann pese grav kont Zeova.” (Zen. 13:8-13) Lerwa Sodonm ti’n fer en lalyans avek sa senk lerwa Kananeen e zot ti pe konmans fatige pey taks avek lerwa Elam. Alor zot ti rebele. Alor, lerwa Elam osi ti rod led avek sa kat lerwa ki i ti’n fer lalyans avek e zot ti vini sorti dan nor e zot ti defet sa bann lerwa Kananeen. Sa bann lerwa ki ti’n ganny laviktwar ti pe retourn kot zot avek en kantite keksoz ki zot ti’n gannyen dan lager. Lot ek son fanmir ti parmi bann dimoun ki zot ti’n pran konman prizonnyen.
Abraam ek son 318 zonm ti tay deryer sa kat lerwa avek zot larme e zot ti lager avek zot
Ki Abraam ti pou fer? Petet i ti’n kapab mazinen ki Lot ti’n rod problenm pour met lo li akoz son swa. Oubyen i ti’n kapab per ki si i esey sov Lot i ti pou bezwen lager avek sa bann lerwa e omwen enn parmi zot ti diriz Sinar. Abraam ti en nomad, i ti plis en berze ki en gerye. Ki mannyer i ti pou kapab defet larme tou le kat lerwa? Deplis, Abraam ti sorti Sinar. En lot dimoun ti pou per ki si i ti fer sa kalite lager, i pa ti pou zanmen kapab retourn Our kot i ti viv en lavi konfortab. Me Abraam pa ti mazin tousala. I ti konnen ki Zeova ti anvi i fer.
Petet la, fanmir Abraam ek son bann serviter ek servant ti’n ariv apepre 1,000 dimoun. Abraam ti rasanble 318 serviter e zot ti met pare pour al lager. Ansanm avek serten alye, Abraam ti al lager kont Elam ek son bann alye. Zot ti ale ziska dan nor dan rezyon Dann e la zot ti zwenn zot bann lennmi. Abraam ti separ son bann zonm dan diferan group e aswar zot ti atak zot lennmi. Menm si zot ti vreman pti gin konpare avek zot lennmi, zot ti reisi lager avek zot e fer zot taye. Anmezir ki sa kat lerwa ek zot larme ti tay pli dan nor, Abraam ti kontinyen tay deryer zot. Finalman Abraam ti reisi defet zot ler zot ti ariv o bor Damas e i ti pran tou sa ki zot ti’n pran Kanaan. Alafendefen, Lot ek son fanmir ti ganny sove!
Ki mannyer Zeova ti santi konsernan kouraz ek lafwa ki Abraam ti demontre? Larepons ti vin kler ler Abraam ti pas o bor lavil Salenm. Lerwa sa lavil, Melkisedek, ti osi pret Zeova. Sa lerwa ek pret ti al an deor lavil pour zwenn Abraam e donn li benediksyon Zeova. Avek limilite, Abraam ti donn Melkisedek en dizyenm parmi bann pli bon keksoz ki i ti’n pran.
San dout alor, sa lager pa ti en lager zonm me i ti lager Bondye. Labib i koz lo “liv bann Lager Zeova.” (Nom. 21:14) I tre probab ki sa lager Abraam ti sa premye lager pour ganny ekrir dan sa liv. Plizyer syek pli tar, ler bann desandans Abraam ti lager kont sa bann move Kananeen ki ti pe reste dan Later Promiz, Zeova ti fer son pep fidel ganny laviktwar enn apre lot.
Par kont, ler son pep ti abandonn li, i ti aret protez zot. Zeova ti finalman rezet zot konpletman ler zot ti rezet son Garson, Mesi. Dan plas beni nasyon Izrael, Zeova ti konmans beni en group Kretyen swazir ki ti pe ganny dirize par Kris. Zezi ti defann son bann sitwayen pour lager fizikman. (Mat. 26:52) Me i ti ansenny zot pour lager spirityelman. Zezi ti kit en legzanp pour nou. I ti montre nou ki nou bezwen en kantite kouraz pour reste fidel avek Zeova.
Lir sa resi dan Labib:
Pour diskit lo la:
Ki mannyer Abraam ti demontre kouraz pandan sa letan dan son lavi?
Al pli o profon
1. Ki levidans bann arkeolog in dekouver ki montre ki sa resi i egzakt? (w89-E 1/7 5 ¶4–6 ¶1)
2. Ki legzanp zeografik ki siport lafason ki Labib i dekrir Sodonm ek Gomor? (it-E “Salt Sea” ¶6) A
BestTravelPhotography/iStock via Getty Images Plus
Portre A: Menm ozordi, bann pye dat ek lezot pye dibwa i ankor annabondans dan sa landrwa kot Sodonm ti ete dan letan lontan
3. Melkisedek ti lerwa ek pret Salenm. Kote Salenm ti ete? (it-E “Salem”)
4. Dan ki fason Melkisedek ti reprezant Zezi? (it-E “High Priest” ¶27-28) B
Portre B
Reflesir lo sa bann leson
Abraam ti les Lot swazir sa pli zoli bout later. Ki mannyer nou kapab swiv legzanp Abraam dan lafason ki nou tret nou fanmir, nou bann frer ek ser Kretyen ek lezot? C
Portre C
Ki nou aprann avek Abraam lefet ki i ti pare pour sov son neve?
Ki lezot fason ki ou kapab imit kouraz ki Abraam ti demontre dan sa resi?
Reflesir lo Zeova ek son plan
Ki sa resi i ansenny mwan lo Zeova?
Ki mannyer sa resi i relye avek plan Zeova?
Ki mon ti pou kontan demann Abraam oubyen Lot ler zot resisite?
Aprann plis
Reflesir lo ki mannyer Abraam ti konmans annan konfyans total dan Zeova.
Ki mannyer Abraam ti demontre kouraz menm avan i ti kit lavil Our?